ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ (SIR) ಪ್ರಜಾತಂತ್ರಕ್ಕೆ ಮಾರಕವಾಗಿರುವುದನ್ನು ವಿರೋಧಿಸಿ ಫೆಬ್ರವರಿ 3ರಂದು ಬೀದರ್ ನಗರದ ಪೂಜ್ಯ ಚನ್ನಬಸವ ಪಟ್ಟದ್ದೇವರು ರಂಗಮಂದಿರದಲ್ಲಿ ಒಂದು ದಿನದ ಚಿಂತನ-ಮಂಥನ ಸಮಾವೇಶ ಆಯೋಜಿಸಲಾಗಿದೆ.
ಎಸ್‌ಐಆರ್ ವಿರೋಧಿ ಜನಾಂದೋಲನ ಸಮಿತಿ ವತಿಯಿಂದ ಮಂಗಳವಾರ ನಗರದ ಕನ್ನಡ ಸಾಹಿತ್ಯ ಸಂಘದ ಸಭಾಂಗಣದಲ್ಲಿ ಸಮಾವೇಶ ಪ್ರಯುಕ್ತ ʼಎಚ್ಚರ–ಪ್ರಜಾತಂತ್ರ ಕೊಲ್ಲುವ ಅಸ್ತ್ರ ಎಸ್‌ಐಆರ್ʼ ಎಂಬ ಕಿರು ಪುಸ್ತಕ ಬಿಡುಗಡೆ ಮಾಡಲಾಯಿತು.
ಬೆಂಗಳೂರಿನ ಚನ್ನಬಸವೇಶ್ವರ ಜ್ಞಾನಪೀಠದ ಪೀಠಾಧ್ಯಕ್ಷ ಚನ್ನಬಸವ ಸ್ವಾಮೀಜಿ ಅವರು ಪುಸ್ತಕ ಬಿಡುಗೊಡೆಗೊಳಿಸಿ ಮಾತನಾಡಿ, ʼಮತದಾನ ಹಕ್ಕು ನಾಗರಿಕರಿಗೆ ರಾಜಕೀಯ ಸಮಾನತೆ, ಗೌರವ ಹಾಗೂ ಘನತೆ ನೀಡುವ ಮೂಲಭೂತ ಹಕ್ಕಾಗಿದೆ. ಆದರೆ, ಎಸ್‌ಐಆರ್ ಬಡ, ಅಶಿಕ್ಷಿತ, ಅಲೆಮಾರಿ ಹಾಗೂ ಅಲ್ಪಸಂಖ್ಯಾತ ಸಮುದಾಯಗಳ ಮತದಾನದ ಹಕ್ಕು ಕಸಿಯುವ ಷಡ್ಯಂತ್ರವಾಗುವ ಆತಂಕವಿದೆ. 2003ರ ನಂತರ ಇದೇ ಮೊದಲ ಬಾರಿಗೆ ʼವಿಶೇಷ ಸಮಗ್ರ ಪರಿಷ್ಕರಣೆʼಯು ಪ್ರಜಾತಂತ್ರದ ಮೂಲ ತತ್ವಗಳಿಗೆ ವಿರುದ್ಧವಾಗಿದೆ. ಪ್ರಜಾತಂತ್ರ ರಕ್ಷಣೆಗೆ ಜನಜಾಗೃತಿ ಅತ್ಯಗತ್ಯವಾಗಿದ್ದು, ಎಸ್‌ಐಆರ್ ವಿರುದ್ಧ ಸಂಘಟಿತ ಹೋರಾಟ ಮುಂದುವರಿಸಲಾಗುವುದುʼ ಎಂದು ಹೇಳಿದರು.
ಸಮಿತಿಯ ಪ್ರಮುಖರು ಮಾತನಾಡಿ, ʼಸಂವಿಧಾನ ವಿರೋಧಿ ಶಕ್ತಿಗಳು ಸ್ವಾಯತ್ತ ಸಂಸ್ಥೆಗಳನ್ನು ತಮ್ಮ ಕಪಿಮುಷ್ಠಿಯಲ್ಲಿ ಇಟ್ಟುಕೊಂಡು ತಮಗೆ ಬೇಕಾದಂತಹ ಫಲಿತಾಂಶಗಳನ್ನು ಪಡೆಯುತ್ತಾ ಪ್ರಜಾತಂತ್ರ ವಿರೋಧಿಯಾಗಿ ಸರ್ವಾಧಿಕಾರದಿಂದ ಆಡಳಿತವನ್ನು ನಡೆಸುತ್ತಿವೆ ಹಾಗೂ ನಿರಂತರವಾಗಿ ಪ್ರಜಾತಂತ್ರ ವ್ಯವಸ್ಥೆಗೆ ದುರಸ್ತಿ ಪಡಿಸಲಾಗದಷ್ಟು ಧಕ್ಕೆ ಉಂಟುಮಾಡುತ್ತಿವೆ. ಈ ಪರಿಸ್ಥಿತಿಯನ್ನು ಎದುರುಗೊಂಡು ಜನರನ್ನು ಬಡಿದೆಬ್ಬಿಸಿ ಜನಾಂದೋಲನವನ್ನು ರೂಪಿಸಿ ಪ್ರಜಾತಂತ್ರ ಕಾಪಾಡಿಕೊಳ್ಳುವುದು ನಮ್ಮೆಲ್ಲರ ಕರ್ತವ್ಯವಾಗಿದೆ. ಜನವಿರೋಧಿಯಾದ ʼಎಸ್‌ಐಆರ್ʼ ನೀತಿ ಖಂಡಿಸಬೇಕಿದೆʼ ಎಂದರು.
ಎಸ್‌ಐಆರ್ ವಿರೋಧಿ ಚಿಂತನ-ಮಂಥನ ಸಮಾವೇಶದಲ್ಲಿ ಖ್ಯಾತ ಆರ್ಥಿಕ ತಜ್ಞ ಪರಕಾಲ ಪ್ರಭಾಕರ, ಚಿಂತಕ, ಅಂಕಣಕಾರ ಶಿವಸುಂದರ್‌, ನಾಗರಿಕ ಹಕ್ಕುಗಳ ಪ್ರತಿಪಾದಕರಾದ ತಾರಾ ರಾವ್‌ ಅವರು ವಿಶೇಷ ಉಪನ್ಯಾಸ ನೀಡಲಿದ್ದಾರೆ.
ಭಂತೆ ಜ್ಞಾನಸಾಗರ, ಫಾದರ್ ಕ್ಲೇರಿ ಡಿಸೋಜಾ, ಮೊಹಮ್ಮದ್ ಮೋನಿಶ್ ಕಿರ್ಮಾನಿ, ಸತ್ಯದೇವಿ ಮಾತಾಜಿ ಅವರು ಸಾನಿಧ್ಯ ವಹಿಸಿದ್ದರು.
ಇದನ್ನೂ ಓದಿ : ಈ ದಿನ ಸಂಪಾದಕೀಯ | ರಾಜ್ಯ ಪೊಲೀಸ್ ವ್ಯವಸ್ಥೆ ಕೆಡಲು ಕಾರಣರಾರು?
ಎಸ್‌ಐಆರ್ ವಿರೋಧಿ ಜನಾಂದೋಲನ ಸಮಿತಿಯ ಸಂಚಾಲಕರಾದ ಶ್ರಿಕಾಂತ ಸ್ವಾಮಿ, ಸಮಿತಿಯ ಸದಸ್ಯರಾದ ಅಬ್ದುಲ್ ಮನ್ನಾನ್ ಸೇಠ, ಮಕ್ಸೂದ್ ಚಂದಾ, ಮಹಮ್ಮದ್ ನಿಜಾಮುದ್ದೀನ್, ವಿಜಯಕುಮಾರ, ಮಂಜುಳಾ, ವಿನಯಕುಮಾರ ಮಾಳಗೆ, ಮಹೇಶ ಗೊರನಾಳಕರ್, ಬಸವರಾಜ ಮಾಳಗೆ, ಸಂತೋಷ್ ಜೋಳದಾಪಕೆ, ಅಮೃತರಾವ ಚಿಮಕೋಡೆ, ಓಂಪ್ರಕಾಶ್ ರೊಟ್ಟೆ, ಜಗದೀಶ್ವರ ಬಿರಾದಾರ, ಅನೀಲಕುಮಾರ ಬೆಲ್ದಾರ್ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
