ಸುವರ್ಣಾವತಿ ಜಲಾಶಯದಲ್ಲಿ ಬೋಟಿಂಗ್ ಮತ್ತು ಇತರೆ ಜಲಕ್ರೀಡೆಗಳನ್ನು ಶಾಶ್ವತ ವೈಶಿಷ್ಟ್ಯವನ್ನಾಗಿ ಮಾಡಬೇಕೆಂಬ ಬೇಡಿಕೆ ಚಾಮರಾಜನಗರ ಜಿಲ್ಲೆಯಲ್ಲಿ ಜೋರಾಗಿದ್ದು, ಸಾಹಸ ಚಟುವಟಿಕೆಗಳನ್ನು ಪರಿಚಯಿಸುವ ಪ್ರಯೋಗವು ಈ ಸ್ಥಳದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಜನರನ್ನು ಆಕರ್ಷಿಸುತ್ತಿದೆ.
ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಹಾಗೂ ಚಾಮರಾಜನಗರ ಜಿಲ್ಲಾಡಳಿತದ ಸಂಯುಕ್ತಾಶ್ರಯದಲ್ಲಿ ಸುವರ್ಣಾವತಿ ಜಲಾಶಯದಲ್ಲಿ ಪ್ರಾಯೋಗಿಕವಾಗಿ ಬೋಟಿಂಗ್ ಸೇವೆ ಆರಂಭಿಸಲಾಯಿತು.
ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಪೂವಿತಾ, ಅಪರ ಜಿಲ್ಲಾಧಿಕಾರಿ ಕಾತ್ಯಾಯಿನಿದೇವಿ, ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಉಪ ನಿರ್ದೇಶಕಿ ಅನಿತಾ ಸೇರಿದಂತೆ ನೂರಾರು ಪ್ರವಾಸಿಗರು, ವಿವಿಧ ಕ್ಷೇತ್ರಗಳ ಜನರು ಪ್ರವಾಸಿಗರೊಂದಿಗೆ ಅಕ್ವಾ ಸಾಹಸಗಳ ಕ್ರೀಡೆಯನ್ನು ಆನಂದಿಸಿದರು. ಅವರು ರಾಫ್ಟಿಂಗ್, ಜೆಟ್ ಸ್ಕೀಯಿಂಗ್, ಸ್ಪೀಡ್ ಬೋಟಿಂಗ್, ಬನಾನಾ ರೈಡಿಂಗ್, ಬಂಪರ್ ರೈಡಿಂಗ್, ಕಯಾಕಿಂಗ್ ಮತ್ತು ಬೋಟಿಂಗ್‌ನಂತಹ ಸಾಹಸ ಕ್ರೀಡೆಗಳನ್ನು ಆನಂದಿಸಿದರು. ಪೆಡಲಿಂಗ್ ಮತ್ತು ರೋಯಿಂಗ್ ಬೋಟ್ ಸೇವೆಗಳು ಹೆಚ್ಚಿನ ಸಂಖ್ಯೆಯ ಪ್ಆರವಾಸಿಗರನ್ನು ಆಕರ್ಷಿಸಿದವು.
ಜಿಲ್ಲಾಡಳಿತ ಆಯೋಜಿಸಿದ್ದ ಜಲ ಮತ್ತು ಸಾಹಸ ಕ್ರೀಡಾ ಚಟುವಟಿಕೆಗಳಿಗೆ ಜಲಕ್ರೀಡೆ ಪ್ರಿಯರಿಂದ ಉತ್ತಮ ಸ್ಪಂದನೆ ದೊರೆತಿದ್ದು, ಮೈಸೂರು ಜಿಲ್ಲಾಡಳಿತ ವರುಣಾ ಕೆರೆಯಲ್ಲಿ ಬೋಟಿಂಗ್ ಸೇವೆಯನ್ನು ಖಾಯಂಗೊಳಿಸಿರುವಂತೆ ಸುವರ್ಣಾವತಿ ಜಲಾಶಯದಲ್ಲಿ ಇದನ್ನು ಖಾಯಂಗೊಳಿಸುವಂತೆ ಪ್ರವಾಸಿಗರು ಮತ್ತು ಸ್ಥಳೀಯರು ಸರ್ಕಾರಿ ಅಧಿಕಾರಿಗಳಿಗೆ ಒತ್ತಾಯಿಸಿದ್ದಾರೆ.
“ಅಂತರಾಜ್ಯ ಕರ್ನಾಟಕ-ತಮಿಳುನಾಡು ಹೆದ್ದಾರಿಯಲ್ಲಿ ಜಿಲ್ಲಾ ಕೇಂದ್ರದಿಂದ 15 ಕಿ.ಮೀ ದೂರದಲ್ಲಿರುವ ಸುವರ್ಣಾವತಿ ಜಲಾಶಯವು ವರ್ಷಪೂರ್ತಿ ದೇಶಾದ್ಯಂತ ಪ್ರವಾಸಿಗರನ್ನು ಆಕರ್ಷಿಸುವುದರಿಂದ, ಸರ್ಕಾರ ಮತ್ತು ಚಾಮರಾಜನಗರ ಜಿಲ್ಲಾಡಳಿತ ಬೋಟಿಂಗ್ ಸೇರಿದಂತೆ ಇತರ ಸಾಹಸ ಚಟುವಟಿಕೆಗಳನ್ನು ಶಾಶ್ವತ ಲಕ್ಷಣವಾಗಿ ಪರಿಚಯಿಸಬೇಕು” ಎಂದು ಪ್ರವಾಸಿ ಯಮುನಾ ಹೇಳಿದರು.
ಜಲಾಶಯವು ಬಿಳಿಗಿರಿ ರಂಗನ ಬೆಟ್ಟ(ಬಿ ಆರ್ ಬೆಟ್ಟ)ಗಳಿಂದ ಸುತ್ತುವರೆದಿದ್ದು, ಹಲವಾರು ಜಾತಿಯ ಪಕ್ಷಿ ಮತ್ತು ಪ್ರಾಣಿಗಳಿಗೆ ನೆಲೆಯಾಗಿದೆ. ಸುವರ್ಣಾವತಿಯ ಹಿನ್ನೀರು ವರ್ಷವಿಡೀ ಪ್ರವಾಸಿಗರನ್ನು ಆಕರ್ಷಿಸುತ್ತದೆ.
ಬೋಟಿಂಗ್ ಕ್ರೀಡೆಯನ್ನು ಶಾಶ್ವತ ಲಕ್ಷಣವಾಗಿ ಪರಿಚಯಿಸುವುದರಿಂದ ಹೆಚ್ಚಿನ ಪ್ರವಾಸಿಗರನ್ನು ಆಕರ್ಷಿಸುತ್ತದೆ ಎಂದು ಪ್ರವಾಸಿಗರೊಬ್ಬರು ತಿಳಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಕೋಲಾರ | ಅವಸಾನದ ಅಂಚಿನಲ್ಲಿರುವ ಯುರೋಪಿಯನ್ನರ ಸ್ಮಶಾನ
“ಪ್ರವಾಸೋದ್ಯಮ ಇಲಾಖೆ, ಕಾವೇರಿ ನೀರಾವರಿ ನಿಗಮ ನಿಯಮಿತದ ಅಧಿಕಾರಿಗಳೊಂದಿಗೆ ಚರ್ಚಿಸಿ ಬೋಟಿಂಗ್ ಕ್ರೀಡೆಯನ್ನು ಖಾಯಂ ಆಗಿ ಪ್ರಾರಂಭಿಸಲಾಗುವುದು. ಪ್ರವಾಸಿಗರನ್ನು ಆಕರ್ಷಿಸಲು ಇಂತಹ ಸೇವೆಗಳನ್ನು ಪರಿಚಯಿಸಲು ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಮತ್ತು ಇತರ ಹಿರಿಯ ಅಧಿಕಾರಿಗಳ ಗಮನಕ್ಕೆ ತರಲಾಗುವುದು” ಎಂದು ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಉಪ ನಿರ್ದೇಶಕಿ ಅನಿತಾ ತಿಳಿಸಿದ್ದಾರೆ.
