ಕರ್ನಾಟಕ ಸಾಹಿತ್ಯ ಅಕಾಡೆಮಿ, ಚಕೋರ ಸಾಹಿತ್ಯ ವಿಚಾರ ವೇದಿಕೆ-ದಕ್ಷಿಣ ಕನ್ನಡ, ವಿಜಯಾ ಕಾಲೇಜು, ಮುಲ್ಕಿ ಸಾಹಿತ್ಯ ಸಂಘ ಮತ್ತು ಐಕ್ಯುಎಸಿ ಸಹಯೋಗದಲ್ಲಿ “ಲಂಕೇಶ್ ಬರಹಗಳ ವೈಚಾರಿಕ ವಿನ್ಯಾಸ” ಕುರಿತ ವಿಶೇಷ ಉಪನ್ಯಾಸ ಕಾರ್ಯಕ್ರಮವು ಇಂದು ವಿಜಯಾ ಕಾಲೇಜಿನ ಸಭಾಂಗಣದಲ್ಲಿ ನಡೆಯಿತು.
ಕರ್ನಾಟಕ ಸಾಹಿತ್ಯ ಅಕಾಡೆಮಿ ಸದಸ್ಯರು ಹಾಗೂ ಹಿರಿಯಡಕ ಸ.ಪ್ರ.ದ.ಕಾಲೇಜಿನ ಪ್ರಾಂಶುಪಾಲರಾದ ಡಾ. ಜಯಪ್ರಕಾಶ್ ಶೆಟ್ಟಿ ಅವರು ಹೆಚ್.ಪಿ. ಲಂಕೇಶ್ ಅವರ ಭಾವಚಿತ್ರಕ್ಕೆ ಹೂವುಗಳನ್ನು ಅರ್ಪಿಸುವ ಮೂಲಕ ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಬಳಿಕ ಮಾತನಾಡಿದ ಅವರು, “ನಾವು ಬದುಕುತ್ತಿರುವ ಇಂದಿನ ಜಗತ್ತು ನಮ್ಮ ನಡೆ-ನುಡಿಗಳು ಹಾಗೂ ವಿಚಾರಗಳು ವಿಶಾಲವಾಗಿ ಹರಡದಂತೆ ತಡೆಯುವಂತಹ ವಿಶಿಷ್ಟ ಪ್ರಯತ್ನಗಳು ನಡೆಯುತ್ತಿರುವ ಕಾಲಘಟ್ಟವಾಗಿದೆ. ಇಂತಹ ಸಂದರ್ಭದಲ್ಲಿ ನಾವು ಮತ್ತೆ ಹಳೆಯ 16ನೇ ಶತಮಾನದ ಚಿಂತನೆಗಳತ್ತ ಹಿಂತಿರುಗಬೇಕಿದೆ. ಈ ಹಿನ್ನಲೆಯಲ್ಲಿ ಸಮಾಜದಲ್ಲಿ ಜಾಗೃತಿ ಮೂಡಿಸಲು ಪಿ. ಲಂಕೇಶ್ ಅವರ ಬರಹಗಳು ಮತ್ತು ಅವರ ಪತ್ರಿಕೆಯ ಮೂಲಕ ದೊಡ್ಡ ಮಟ್ಟದ ಕ್ರಾಂತಿಯನ್ನುಂಟುಮಾಡಿದವು. ಅವರು ಅಹಿಂಸಾವಾದಿಯಾಗಿ ಸಮಾಜದಲ್ಲಿ ಪ್ರಬುದ್ಧ ಚಿಂತನೆಗಳನ್ನು ಹರಡಿದರು” ಎಂದು ಹೇಳಿದರು.
“ಸರ್ವಜನಾಂಗ ಶಾಂತಿಯ ತೋಟವಾಗಿರುವ ಈ ನಾಡಿನಲ್ಲಿ ನಾವು ಸಂವಿಧಾನದ ಆಶಯಗಳಡಿಯಲ್ಲಿ ಬದುಕಬೇಕು. ಸಂವಿಧಾನವು ಎಲ್ಲರಿಗೂ ಸಮಬಾಳು, ಸಮಪಾಲು ನೀಡುವ ಮಹತ್ವದ ಮೌಲ್ಯಗಳನ್ನು ಪ್ರತಿಪಾದಿಸಿದೆ. ಒಂದು ದೇಶ ಸದೃಢವಾಗಬೇಕಾದರೆ ದ್ವೇಷ, ವಿಭಜನೆ ಹಾಗೂ ಒಡಕುಗಳಿಲ್ಲದ ಸಮಾಜ ನಿರ್ಮಾಣವಾಗಬೇಕು” ಎಂದು ಅವರು ಅಭಿಪ್ರಾಯಪಟ್ಟರು.
ಚೇಳಾಯ್ತು ಸ.ಪ.ಪೂ ಕಾಲೇಜಿನ ಪ್ರಾಂಶುಪಾಲೆಯಾದ ಡಾ. ಜ್ಯೋತಿ ಚೇಳ್ಯಾರು ಅವರು “ಲಂಕೇಶ್ ಬರಹಗಳ ವೈಚಾರಿಕ ವಿನ್ಯಾಸ” ಎಂಬ ವಿಷಯದಲ್ಲಿ ಮಾತನಾಡುತ್ತಾ, ಪಿ. ಲಂಕೇಶ್ ಅವರ ಬರಹಗಳು ಪಟಬದ್ರರು, ರಾಜಕಾರಣಿಗಳು ಮತ್ತು ಆಶಾಡಬೂತಿಗಳ ಮೇಲೆ ಕಟುವಾಗಿ ಬೆಳಕು ಚೆಲ್ಲುತ್ತವೆ ಎಂದು ಹೇಳಿದರು. ಕಂಡದ್ದನ್ನು ಕಂಡ ಹಾಗೆ ನಿಷ್ಠೂರವಾಗಿ ಬರೆಯುವ ಬರಹಗಾರನಾಗಿ ಲಂಕೇಶ್ ಗುರುತಿಸಿಕೊಂಡಿದ್ದರು ಎಂದು ಅವರು ಅಭಿಪ್ರಾಯಪಟ್ಟರು.
ಶಿವಮೊಗ್ಗ ಜಿಲ್ಲೆಯಲ್ಲಿ ಜನಿಸಿದ ಲಂಕೇಶ್ ಅವರು 12 ವರ್ಷಗಳ ಕಾಲ ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಇಂಗ್ಲೀಷ್ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿದರು. ಇಂಗ್ಲೀಷ್ ಸಾಹಿತ್ಯದ ಮೇರು ಕೃತಿಗಳನ್ನು ಆಳವಾಗಿ ಅಧ್ಯಯನ ಮಾಡಿದರೂ, ತಮ್ಮ ಸ್ಥಳೀಯ ಬೇರುಗಳನ್ನು ಮರೆಯದೆ ಕನ್ನಡದ ಜಗತ್ತಿಗಾಗಿ, ವಿಶೇಷವಾಗಿ ಸಾಮಾನ್ಯ ಜನರ ಪರವಾಗಿ ತೀವ್ರ ಸ್ಪಂದನೆಯುಳ್ಳ ಬರಹಗಳನ್ನು ನೀಡಿದ್ದಾರೆ ಎಂದು ಹೇಳಿದರು. ಬರಹಗಾರರಷ್ಟೇ ಅಲ್ಲದೆ, ಅವರು ನಾಟಕಕಾರರೂ ಆಗಿದ್ದು, ಸಿನಿಮಾ ನಿರ್ದೇಶಕರಾಗಿಯೂ ಗುರುತಿಸಿಕೊಂಡು ರಾಷ್ಟ್ರ ಮಟ್ಟದ ಪ್ರಶಸ್ತಿಗಳು ಮತ್ತು ಚಿನ್ನದ ಪದಕಗಳನ್ನು ಪಡೆದಿದ್ದಾರೆ. ಇಂದಿನ ದಿನಗಳಲ್ಲಿ ಬರುತ್ತಿರುವ ದುರಂದರ್‌ ಮಾದರಿಯ ಸಿನಿಮಾಗಳ ನಡುವಿನಲ್ಲಿ, ನಾವು ಲಂಕೇಶ್ ಅವರ ಸಿನಿಮಾಗಳನ್ನು ಯಾಕೆ ನೋಡಬೇಕು ಎಂಬ ಪ್ರಶ್ನೆಯೂ ನಮ್ಮ ಮುಂದೆ ಉದ್ಭವಿಸಿದೆ. ಲಂಕೇಶ್ ರವರ ಸಿನಿಮಾಗಳು ಇಂದಿಗೂ ಪ್ರಸ್ತುತವಾಗಿವೆ ಎಂದರು.
ಇಂದಿನ ಸಮಾಜದಲ್ಲಿ ಏನು ಮಾತನಾಡಬೇಕು, ಏನು ಮಾತನಾಡಬಾರದು ಎಂಬ ನಿಯಂತ್ರಣಗಳ ನಡುವೆ ನಾವು ಬದುಕುತ್ತಿದ್ದೇವೆ. ಆದರೆ ಲಂಕೇಶ್ ಅವರು ನಿರ್ಭಯವಾಗಿ ತಮ್ಮ ವಿಚಾರಗಳನ್ನು ಮಂಡಿಸುತ್ತಿದ್ದ ರೀತಿ ಗಮನಾರ್ಹವಾಗಿದೆ ಎಂದು ಅವರು ತಿಳಿಸಿದರು. ಬದುಕಿದ್ದಾಗ ಅವರನ್ನು ಗೌರವಿಸದವರು, ಅವರ ನಿಧನದ ನಂತರ ಅವರ ಬಗ್ಗೆ ತೀರಾ ಟೀಕೆಗಳನ್ನು ಮಾಡಿರುವುದೂ ಗಮನಾರ್ಹ ಸಂಗತಿಯಾಗಿದೆ ಎಂದರು.
ಲಂಕೇಶ್ ಅವರ ಚಿಂತನೆಗಳು ಭಾರತದ ಸಂವಿಧಾನದ ಆಶಯಗಳು ಮತ್ತು ಮಹಾತ್ಮ ಗಾಂಧಿಯವರ ತತ್ವಗಳು ಪ್ರಭಾವ ಬೀರಿದ್ದವು. ಗಾಂಧೀಜಿಯವರ ಚಿಂತನೆಗಳನ್ನು ತಮ್ಮದಾಗಿಸಿಕೊಂಡು, ಸಾಮಾಜಿಕ ನ್ಯಾಯದ ದೃಷ್ಟಿಕೋನದಿಂದ ಬರಹಗಳನ್ನು ರಚಿಸಿದ್ದರು ಎಂದು ಹೇಳಿದರು.
ಅವರ ಸೃಜನಶೀಲ ಬರಹಗಳು ಸೈದ್ಧಾಂತಿಕತೆ ಮತ್ತು ಚಿಂತನಾ ವಿಶ್ಲೇಷಣೆಯ ಮಿಶ್ರಣವಾಗಿದ್ದು, ಸಮಾಜವನ್ನು ಹತ್ತಿರದಿಂದ ಅವಲೋಕಿಸಿ ಕಟುವಾಗಿ ವಿಮರ್ಶಿಸಿದವು. ತಮ್ಮ ಸುತ್ತಲಿನ ಜಗತ್ತನ್ನು ಸೂಕ್ಷ್ಮವಾಗಿ ಗಮನಿಸಿ ಬರೆದವರು ಪಿ. ಲಂಕೇಶ್ ಎಂದು ಅವರು ಹೇಳಿದರು.
ಲಂಕೇಶ್ ಪತ್ರಿಕೆಯಲ್ಲಿ ಪ್ರಕಟವಾಗುತ್ತಿದ್ದ ಅವರ ಸಂಪಾದಕೀಯಗಳು ಟೀಕೆ-ಟಿಪ್ಪಣಿಗಳ ಮೂಲಕ ಸಮಾಜದ ವಿಚಾರಗಳನ್ನು ವಿಮರ್ಶಾತ್ಮಕವಾಗಿ ಜನರ ಮುಂದಿಟ್ಟವು. ಇಂದಿನ ಪೀಳಿಗೆ ಅವರು ಬರೆದ ಬರಹಗಳು, ನಾಟಕಗಳು ಮತ್ತು ಸಿನಿಮಾಗಳನ್ನು ಅರಿತುಕೊಳ್ಳುವುದು ಕಾಲದ ಅವಶ್ಯಕತೆಯಾಗಿದೆ. ಸಂವಿಧಾನದ ಆಶಯಗಳನ್ನು ಮನನ ಮಾಡಿಕೊಂಡು ಸಮಾಜದಲ್ಲಿ ಬದುಕಬೇಕೆಂಬ ಸಂದೇಶವನ್ನು ಅವರು ನೀಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಕಾಲೇಜಿನ ಪ್ರಾಂಶುಪಾಲರಾದ ಪ್ರೊ. ವೆಂಕಟೇಶ್ ಭಟ್ ವಹಿಸಿದ್ದರು. ಕನ್ನಡ ವಿಭಾಗದ ಮುಖ್ಯಸ್ಥರು ಹಾಗೂ ವಿದ್ಯಾರ್ಥಿ ಕ್ಷೇಮಪಾಲನಾಧಿಕಾರಿ ಡಾ. ಶೈಲಜಾ ವೈ.ವಿ. ಮಾತನಾಡಿದರು. ವೇದಿಕೆಯಲ್ಲಿ ಐಕ್ಯುಎಸಿ ಸಂಚಾಲಕರಾದ ಪ್ರೊ. ದೇವದಾಸ್ ಕೆ, ಚಕೋರ ದಕ್ಷಿಣ ಕನ್ನಡ ಜಿಲ್ಲಾ ಸಂಚಾಲಕರಾದ ಸುಜಿತ್ ಉಪಸ್ಥಿತರಿದ್ದರು.
ವಿಜಯ ಕಾಲೇಜಿನ ವಿದ್ಯಾರ್ಥಿ ಅಮೃತೇಶ್ ಸ್ವಾಗತಿಸಿದರು. ದೀಪ್ತಿ ಕಾರ್ಯಕ್ರಮ ನಿರೂಪಿಸಿದರು. ದಶಮಿ ಧನ್ಯವಾದ ಸಲ್ಲಿಸಿದರು. ಮೇಘ ಮತ್ತು ತಂಡದವರು ನಾಡಗೀತೆ ಹಾಡಿದರು. ಈ ಸಂದರ್ಭದಲ್ಲಿ ಲಂಕೇಶ್ ಅವರ ಪ್ರಸಿದ್ಧ “ಅವ್ವ” ಕವಿತೆಯನ್ನು ರಾಮಾಂಜಿ ವಾಚಿಸಿದರು.
