ಭಕ್ತರ ದೇಣಿಗೆ ಹಣದ ದುರುಪಯೋಗ ಆರೋಪದ ಹಿನ್ನೆಲೆಯಲ್ಲಿ ಇತ್ತೀಚಿಗೆ ಸುದ್ದಿಯಲ್ಲಿರುವ ದಾವಣಗೆರೆ ಜಿಲ್ಲೆಯ ಹರಿಹರ ನಗರ ಸಮೀಪದ ಲಿಂಗಾಯತ ಪಂಚಮಸಾಲಿ ಹರಪೀಠದ ಮುಂಭಾಗದಲ್ಲಿ ನಿಷೇಧಾಜ್ಞೆ ನಡುವೆಯೂ ಮಠದ ಭಕ್ತರು “ಲೆಕ್ಕ ಕೊಡಿ ಚಳುವಳಿ” ಪ್ರಾರಂಭಿಸಿ ಮಠದ ಟ್ರಸ್ಟ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.
ಹರಿಹರ ಪಂಚಮಸಾಲಿ ಮಠದ ಆಡಳಿತ ಮಂಡಳಿ, ಟ್ರಸ್ಟ್ ಹಾಗೂ ವಚನಾನಂದ ಶ್ರೀಗಳ ನಡುವೆ ಈಚೆಗೆ ಕೆಲವು ದಿನಗಳಿಂದಲೂ ಒಳಗೇ ಗುದ್ದಾಟ ಪ್ರಾರಂಭವಾಗಿದ್ದು, ಪೀಠದ ವಿವಾದಕ್ಕೆ ಸಂಬಂಧಿಸಿದಂತೆ ಟ್ರಸ್ಟ್ ನಿಂದ ವಚನಾನಂದ ಶ್ರೀಗಳಿಗೆ ಎಚ್ಚರಿಕೆ ನೀಡಿ ಪೀಠಕ್ಕೆ ಸಂಪೂರ್ಣ ಸಮಯ ಕೊಡುವಂತೆ ಎಚ್ಚರಿಸಿದ್ದರು. ಇಲ್ಲವಾದಲ್ಲಿ ಮಠದಿಂದ ಹೊರ ಹಾಕುವುದಾಗಿ ಎಚ್ಚರಿಸಿದ ಬೆನ್ನಲ್ಲೇ ಮಠದ ಆಡಳಿತಾಧಿಕಾರಿ ರಾಜಕುಮಾರ್ ಅವರನ್ನು ಹುದ್ದೆಯಿಂದ ವಜಾ ಮಾಡಿದ್ದರು. ಆಡಳಿತಾಧಿಕಾರಿ ರಾಜಕುಮಾರ್ “ಮಠದ ಭಕ್ತದಿಂದ ಸಂಗ್ರಹಿಸಲಾದ ನಗದು ಮತ್ತು ಆಭರಣಗಳನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದ್ದು ಸರಿಯಾದ ಲೆಕ್ಕ ಪತ್ರಗಳೇ ಇಲ್ಲ. ಇದನ್ನು ಪ್ರಶ್ನೆ ಮಾಡಿದ್ದಕ್ಕೆ ನನಗೆ ಹಾಗೂ ಶ್ರೀಗಳಿಗೆ ಬೆದರಿಕೆ ಹಾಕಿ ನಮ್ಮನ್ನು ಪೀಠದ ಆಡಳಿತಾಧಿಕಾರಿ ಹುದ್ದೆಯಿಂದ ವಜಾ ಮಾಡಲಾಗಿದೆ” ಎಂದು ಆರೋಪಿಸಿದ್ದರು.
ಇದು ರಾಜ್ಯಾದ್ಯಂತ ಪಂಚಮಸಾಲಿ ಸಮುದಾಯದಲ್ಲಿ ಆಕ್ರೋಶ ಉಂಟು ಮಾಡಿತ್ತು. ಇದರ ಬೆನ್ನಲ್ಲೇ ಕೆಲವು ಮುಖಂಡರೂ ಕೂಡ ಮಠದಲ್ಲಿ ಟ್ರಸ್ಟಿಗಳಿಂದ ಹಣದ ದುರುಪಯೋಗ ಆಗುತ್ತಿದ್ದು, ಈ ಕೂಡಲೇ ಸಾರ್ವಜನಿಕವಾಗಿ ಲೆಕ್ಕಪತ್ರ ನೀಡಬೇಕು” ಎಂದು ಒತ್ತಾಯಿಸಿದ್ದರು.
ಈ ಹಿನ್ನೆಲೆಯಲ್ಲಿ ಏಪ್ರಿಲ್ 13ರಂದು ಮಠದ ಮುಂಭಾಗದಲ್ಲಿ ಹಲವು ಮುಖಂಡರು ಸಮಾಜದ ಭಕ್ತರೊಂದಿಗೆ ಲೆಕ್ಕ ಕೊಡಿ ಚಳುವಳಿ ಆರಂಭಿಸಿದ್ದರು. ಈ ಹಿನ್ನೆಲೆಯಲ್ಲಿ ಪೊಲೀಸರು ಮಠದ ಸುತ್ತಮುತ್ತ ಸೆಕ್ಷನ್ 148 ಜಾರಿಗೊಳಿಸಿದ್ದರು. ನಿಷೇಧಾಜ್ಞೆ ಜಾರಿ ಇದ್ದರೂ ಮಠದ ಮುಂಭಾಗ ಭಕ್ತರು ಇಂದು ಬೆಳಗ್ಗೆ 10 ಗಂಟೆಯಿಂದ ಪ್ರತಿಭಟನೆ ಆರಂಭಿಸಿದ್ದರು.
ಈ ನಡುವೆ ಮುಂಜಾಗ್ರತಾ ಕ್ರಮವಾಗಿ ನಿಷೇಧಾಜ್ಞೆ ಜಾರಿಯಲ್ಲಿದ್ದರೂ ಪ್ರತಿಭಟನೆ ನಡೆಸಿದ ಸುಮಾರು 40ಕ್ಕೂ ಹೆಚ್ಚು ಭಕ್ತರನ್ನು ಪೊಲೀಸರು ಬಂಧಿಸಿ ಕರೆದೊಯ್ದಿದ್ದಾರೆ. ಬಂಧಿಸುವ ವೇಳೆ ನೂಕಾಟದಿಂದ ಮುಖಂಡರೊಬ್ಬರು ಅಸ್ವಸ್ಥಗೊಂಡ ಘಟನೆ ನಡೆಯಿತು. ಈ ನಡುವೆ ಮುಖಂಡರು, ಭಕ್ತರಿಂದ “ಧರ್ಮದರ್ಶಿಗಳೇ ಕಳ್ಳ ಲೆಕ್ಕ ಬೇಡ, ಧರ್ಮದ ಲೆಕ್ಕ ಕೊಡಿ” ಹಾಗೂ “ಲೆಕ್ಕ ಕೊಡಿ, ಮಠ ಉಳಿಸಿ” ಸೇರಿದಂತೆ ಇತರ ಘೋಷಣೆಗಳು ಕೇಳಿ ಬಂದವು.
ಈ ವೇಳೆ ಮಾತನಾಡಿದ ಹರಿಹರ ಮಾಜಿ ಶಾಸಕ ಎಚ್ಎಸ್ ಶಿವಶಂಕರ್ “ಮಠದ ಭಕ್ತರಿಂದ ಸಂಗ್ರಹಗೊಂಡ ಸ್ಥಿರಾಸ್ತಿ ಹಾಗೂ ಕೋಟ್ಯಂತರ ಹಣವನ್ನು ಟ್ರಸ್ಟ್ ನಲ್ಲಿರುವ ಕೆಲವು ಪ್ರಭಾವಿಗಳು ದುರ್ಬಳಕೆ ಮಾಡಿಕೊಂಡ ಆರೋಪವಿದೆ. ಹೀಗಾಗಿ ಮಠದ ಭಕ್ತರಿಂದ ಸಂಗ್ರಹವಾದ ಹಣದ ಬಗ್ಗೆ ಕೂಡಲೇ ಸಮರ್ಪಕ ಲೆಕ್ಕಪತ್ರ ನೀಡಬೇಕು. ಇಲ್ಲವಾದಲ್ಲಿ ಮುಂದಿನ ದಿನಗಳಲ್ಲಿ ಸಾವಿರಾರು ಅನುಯಾಯಿಗಳು ಆಗಮಿಸಿ ಟ್ರಸ್ಟಿಗಳಿಗೆ ಛೀಮಾರಿ ಹಾಕಲಿದ್ದಾರೆ. ಪೊಲೀಸರು ಮಠದ ಕಳ್ಳರು, ಲೂಟಿಕೋರರಿಗೆ ರಕ್ಷಣೆ ನೀಡುತ್ತಿದ್ದಾರೆ.ಧರ್ಮದ ಲೆಕ್ಕ ನೀಡಬೇಕು”” ಎಂದು ಎಚ್ಚರಿಸಿದರು.
ಈ ವೇಳೆ ಮಾತನಾಡಿದ ರಾಣೆಬೆನ್ನೂರು ಮಾಜಿ ಶಾಸಕ ಅರುಣ್ ಕುಮಾರ್ ಪೂಜಾರ್ “2008 ರಿಂದ ಮಠದಲ್ಲಿ ಅವ್ಯವಹಾರ ನಡೆದಿದೆ. ಸರ್ಕಾರ ನೀಡಿದ 11 ಕೋಟಿಯಲ್ಲಿ 5 ಕೋಟಿ ಅವ್ಯವಹಾರ ನಡೆದಿದೆ. ಹಲವಾರು ಭಕ್ತರು ನೀಡಿರುವ ಹಣದಲ್ಲಿ ದುರುಪಯೋಗ ನಡೆದಿದೆ. ಸ್ಥಳೀಯ ಪಿಡಿಓ ಹಾಗೂ ಟ್ರಸ್ಟ್ ಸದಸ್ಯರ ಸಹಿ ದುರ್ಬಳಕೆ ಮಾಡಿಕೊಂಡು ಚಂದ್ರಶೇಖರ ಪೂಜಾರ್ ಅವ್ಯವಹಾರ ಮಾಡಿದ್ದಾರೆ. ಈ ಬಗ್ಗೆ ಲೆಕ್ಕ ನೀಡಬೇಕು” ಎಂದು ಆಗ್ರಹಿಸಿದರು.
ಈ ಸುದ್ದಿ ಓದಿದ್ದೀರಾ? ದಾವಣಗೆರೆ | ದಕ್ಷಿಣ ಉಪಚುನಾವಣೆ ಅಸಮಾಧಾನ; ಕಾಂಗ್ರೆಸ್ ಮುಸ್ಲಿಂ ಮುಖಂಡರ ರಾಜೀನಾಮೆ ಸೂಚನೆ?
ಪ್ರತಿಭಟನೆಯಲ್ಲಿ ಮಾಜಿ ಶಾಸಕ ಅರುಣ್ ಕುಮಾರ್ ಪೂಜಾರ್, ಬಿಜೆಪಿ ಮುಖಂಡ ಅಜಯ್ ಕುಮಾರ್ ಪರಮೇಶ್ವರ್ ಗೌಡ ಸೇರಿದಂತೆ ಹಲವಾರು ಭಕ್ತರು ಪಾಲ್ಗೊಂಡಿದ್ದರು.
