ಕನ್ನಡ ಸಾಹಿತ್ಯ ಲೋಕದ ವಿಶಿಷ್ಟ ಧ್ವನಿಯಾಗಿ ತಮ್ಮದೇ ಆದ ಮಾರ್ಗವನ್ನು ನಿರ್ಮಿಸಿಕೊಂಡ ಹಿರಿಯ ಕವಿ, ವಿಮರ್ಶಕ, ಅನುವಾದಕ ಮತ್ತು ಸಾಂಸ್ಕೃತಿಕ ರಾಯಭಾರಿ. ಸದಾ ಜನಸಾಮಾನ್ಯರ ಒಡನಾಟದಲ್ಲಿರುವ ಡಾ.ಸಿದ್ಧಲಿಂಗ ಪಟ್ಟಣಶೆಟ್ಟಿ ಅವರನ್ನು ಅಭಿನಂದಿಸುವ ನೆಪದಲ್ಲಿ, ಯುವಬರಹಗಾರರಿಗೆ ಸ್ಪೂರ್ತಿದಾಯಕವಾದ ಅವರ ಬದುಕು, ಬರಹವನ್ನು ಅವಲೋಕನ ಮಾಡುವ ಕಾರ್ಯಕ್ರಮವನ್ನು ಧಾರವಾಡ ಪ್ರೊಗ್ರೆಸಿವ್ ಕಲ್ಚರಲ್ ಅಸೋಸಿಯೇಶನ್ ಆಫ್ ಇಂಡಿಯಾ (PCAI) ಸಂಸ್ಥೆಯ ವತಿಯಿಂದ ಡಿಸೆಂಬರ್ 14ರಂದು ಧಾರವಾಡದ ಆಲೂರು ವೆಂಕಟರಾವ್ ಸಭಾಭವನದಲ್ಲಿ ಹಮ್ಮಿಕೊಂಡಿದ್ದಾರೆ.
ಕನ್ನಡ, ಹಿಂದಿ ಭಾಷೆಗಳ ನಡುವಿನ ಸಾಂಸ್ಕೃತಿಕ ಸೇತುವೆಯಾಗಿ, ಹಿಂದಿ ಭಾಷೆಯ ಸಾಹಿತ್ಯದ ಸಾರವನ್ನು ಅನುವಾದಗಳ ಮೂಲಕ ಕನ್ನಡದ ಪರಿಚಯಿಸಿದವರು. ಕನ್ನಡದ ಘಮವನ್ನು ಭಾರತದ ತುಂಬ ಪಸರಿಸಿದವರು. ಬಂಗಾಲದ ಜನಮನದ ಸಾಹಿತಿ ಶರತ್‌ಚಂದ್ರ ಚಟ್ಟೋಪಾಧ್ಯಾಯ ಅವರ ಮಹತ್ವದ ಕೃತಿಗಳನ್ನು ಕನ್ನಡಕ್ಕೆ ತಂದವರು. ಜನಪರ ಚಳುವಳಿಗಳ ಸಂಗಾತಿಯಾಗಿದ್ದುಕೊಂಡು, ಜನರ ನೋವು-ನಲಿವಿಗೆ ದನಿಯಾಗಿದ್ದಾರೆ.
ಅವರ ‘ವಿದಿಶಾ ಪ್ರಹಸನ ಕೃತಿ’ಗೆ 2025ನೇ ಸಾಲಿನ ಕೇಂದ್ರ ಸಾಹಿತ್ಯ ಅಕಾಡೆಮಿ ಅನುವಾದ ಪ್ರಶಸ್ತಿ ಲಭಿಸಿದೆ. ಇದು ಕಾಳಿದಾಸನ ಪ್ರಸಿದ್ಧ ಮಾಲವಿಕಾಗ್ನಿಮಿತ್ರ ನಾಟಕದ ಅನುವಾದವಾಗಿದೆ. ಅವರ ಅಭಿನಂದನಾ ಕಾರ್ಯಕ್ರಮವು, ಕೇವಲ ಸಾಂಪ್ರದಾಯಿಕವಾಗಿರದೇ ಅದು ಕನ್ನಡ ಸೃಜನಾತ್ಮಕ ಪರಂಪರೆಯನ್ನು ಯುವಪೀಳಿಗೆಗೆ ದಾಟಿಸಿ ಅವರನ್ನು ಸಾಹಿತ್ಯಕ, ಸಾಂಸ್ಕೃತಿಕ ಹಾಗೂ ಸಾಮಾಜಿಕ ಚಟುವಟಿಕೆಗಳಲ್ಲಿ ತೊಡಗಿಸುವ ಆಶಯವನ್ನು ಹೊಂದಿದೆ ಎಂದು ಹೇಳಲಾಗಿದೆ.
ಹಲವು ಪ್ರಗತಿರ ಚಟುವಟಿಕೆಗಳ ಮೂಲಕ ಗುರುತಿಸಿಕೊಂಡ ಪಿಸಿಎಐ ಸಂಸ್ಥೆಯು ಧಾರವಾಡದಲ್ಲಿ ಅವಿಷ್ಕಾರ ಪ್ರಗತಿಪರ ಸಾಂಸ್ಕೃತಿಕ ವೇದಿಕೆಯ ಮೂಲಕ ಜನೋತ್ಸವ, ಸದಭಿರುಚಿಯ ಸಿನಿಮಾ ಪ್ರದರ್ಶನ, ನಾಟಕ ಪ್ರದರ್ಶನ ಹಾಗೂ ಪುಸ್ತಕ ಬಿಡುಗಡೆಯಂತಹ ಅನೇಕ ಕಾರ್ಯಕ್ರಮಗಳನ್ನು ಆಯೋಜಿಸುತ್ತ ಬಂದಿದೆ. ಈ ಕಾರ್ಯಕ್ರಮವನ್ನು ಗೋವಾ ರಾಜ್ಯದ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ದಾಮೋದರ್ ಮಾವುಜೊ ಉದ್ಘಾಟಿಸಲಿದ್ದಾರೆ. ಸಿದ್ಧಲಿಂಗ ಪಟ್ಟಣಶೆಟ್ಟಿಯವರ ಕಾವ್ಯದ ಬಗ್ಗೆ ಬೆಂಗಳೂರಿನ ಬುಕ್ ಬ್ರಹ್ಮದ ದೇವು ಪತ್ತಾರ, ಗದ್ಯದ ಬಗ್ಗೆ ಧಾರವಾಡದ ಲೇಖಕಿ ಡಾ. ಪ್ರಜ್ಞಾ ಮತ್ತೀಹಳ್ಳಿ ಹಾಗೂ ನಾಟಕಗಳ ಬಗ್ಗೆ ಬೆಳಗಾವಿಯ ರಂಗರ‍್ಮಿ ಶಿರೀಷ ಜೋಶಿ ಅವರು ಮಾತನಾಡಲಿದ್ದಾರೆ.
ಇದನ್ನೂ ಓದಿ ಧಾರವಾಡ | ಯುವಕರು ಜಾಗೃತರಾಗಿ ಇತರರಿಗೆ ಮತದಾನದ ಮಹತ್ವ ತಿಳಿಸಬೇಕು: ಡಾ. ಎಂ.ಬಿ. ದಳಪತಿ
ಧಾರವಾಡ ಜನಜಾಗೃತಿ ಅಭಿಯಾನದ ರಾಮಾಂಜನಪ್ಪ ಆಲ್ದಳ್ಳಿ ಅದ್ಯಕ್ಷತೆ ವಹಿಸಲಿದ್ದಾರೆ. ಕವಯಿತ್ರಿ, ಸಂಘಟಕಿ ಡಾ.ಹೇಮಾ ಪಟ್ಟಣಶೆಟ್ಟಿ, ಬೆಂಗಳೂರಿನ ಆವಿಷ್ಕಾರ ಜಿಲ್ಲಾ ಸಂಚಾಲಕ ಡಾ.ಸುನೀತ್‌ಕುಮಾರ್ ಶೆಟ್ಟಿ, ಪಿಸಿಎಐ ರಾಜ್ಯ ಸಂಘಟನಾಕಾರ, ಚಿತ್ರಕಲಾವಿದ ಅಲಕಾ ರಾವ್ ಉಪಸ್ಥಿತರಿರುತ್ತಾರೆ. ಧಾರವಾಡ ಜಿಲ್ಲೆಯ ಪಿಸಿಎಐ ನ ಜಿಲ್ಲಾ ಸಂಚಾಲಕ ಎಂ. ಬಿ. ಹುಡೇದ ಪ್ರಾಸ್ತಾವಿಕವಾಗಿ ಮಾತನಾಡಲಿದ್ದಾರೆ. ಕಳಕೇಶ್ ಎಸ್. ನಿರೂಪಣೆ ಮಾಡುವರು. ಅಭಿನಂದನ ಕಾರ‍್ಯಕ್ರಮದ ಬಳಿಕ ಡಾ.ಸಿದ್ಧಲಿಂಗ ಪಟ್ಟಣಶೆಟ್ಟಿಯವರ ಜೊತೆ ಸಂವಾದವಿದ್ದು, ಸಂವಾದ ಕಾರ್ಯಕ್ರಮವನ್ನು ಸುನಂದಾ ಕಡಮೆ, ವಿಠ್ಠಲ್ ದಳವಾಯಿ ನಡೆಸಿಕೊಡಲಿದ್ದಾರೆ.
