ಗೌರಿ ಲಂಕೇಶ್‌ರವರನ್ನು ಕೊಂದ ಹಂತಕರನ್ನು ಸನ್ಮಾನಗೈದ ಹಿನ್ನೆಲೆಯಲ್ಲಿ ಎಲ್ಲ ಪ್ರಗತಿಪರ ಚಿಂತಕರು, ಸಂಘಟನೆಗಳಿಂದ ರಾಜ್ಯಾದ್ಯಂತ ಎಲ್ಲ ಜಿಲ್ಲಾ ಕಚೇರಿಗಳ ಮುಂದೆ ಹಂತಕರ ಬಂಧನಕ್ಕೆ ಒತ್ತಾಯಿಸಿ ಪ್ರತಿಭಟನೆ ನಡೆಸಿದರು. ಆ ದಿಸೆಯಲ್ಲಿ ಧಾರವಾಡ ಜಿಲ್ಲಾಧಿಕಾರಿ ಕಚೇರಿ ಎದುರು ಪ್ರತಿಭಟನೆ ನಡೆಸಿ ಕೂಡಲೇ ಆರೋಪಿಗಳ ವಿರುದ್ಧ ಸೂಕ್ತ ಕಾನೂನು ಕ್ರಮ ಜರುಗಿಸಲು ಆಗ್ರಹಿಸಿದರು.
ಬಸವರಾಜ ಸೂಳಿಭಾವಿ ಮಾತನಾಡಿ, ಯಾರೂ ಸಹಿತ ಸಮಾಜದಲ್ಲಿ ಸಮಾನತೆ, ಪ್ರಜಾಪ್ರಭುತ್ವವನ್ನು ಪ್ರತಿಪಾದನೆ ಮಾಡಬಾರದು ಎಂಬ ಉದ್ದೇಶದಿಂದ ಹಂತಕರು ಪ್ರಜಾಪ್ರಭುತ್ವಕ್ಕೆ, ಸಮಾನತೆಗೆ ಗುಂಡಿಟ್ಟು ಕೊಲ್ಲುತ್ತಿದ್ದಾರೆ. ಪ್ರಜಾಪ್ರಭುತ್ವದ ಪ್ರತಿಪಾದನೆ ಮಾಡಿದ ಗೌರಿ ಲಂಕೇಶ್ ಮತ್ತು ಎಮ್ ಎಮ್ ಕಲ್ಬುರ್ಗಿ ಮೇಲೆ ಗುಂಡಿಟ್ಟರು. ಹಿಂದುತ್ವ ಸಂಘಟನೆಯಿಂದ ಹಂತಕರಿಗೆ ಸನ್ಮಾನವಾಗಿದೆ. ಇಬ್ಬರು ವಿಚಾರವಂತರ ಕೊಲ್ಲಲು ಸನಾತನ ಸಂಸ್ಥೆಯಾದ ಸಂಘಪರಿವಾರ ತಾತ್ವಿಕ ಹಿನ್ನೆಲೆ ಒದಗಿಸಿದೆ ಎಂದು ಆರೋಪಿಸಿದರು. ಹಂತಕರನ್ನು ಸನ್ಮಾನ ಮಾಡಿದವರ ಮೇಲೆ ಹಾಲಿ ಸರ್ಕಾರ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.
ಜಾಗೃತ ಕರ್ನಾಟಕ ಸಂಘಟನೆಯ ನೂರ್ ಶ್ರೀಧರ ಮಾತನಾಡಿ, ಅಸಂವಿಧಾನಿಕ ನಡತೆ, ಪ್ರಜಾಪ್ರಭುತ್ವ ವಿರೋಧಿ ನಡುವಳಿಕೆಗಳನ್ನು ಗುಜರಾತ್ ಮತ್ತು ಉತ್ತರ ಪ್ರದೇಶದಲ್ಲಿ ಕಾಣುತ್ತಿದ್ದೆವು. ಆದರೆ ಅಂತಹ ಅವಹೇಳನಕಾರಿ ಹಾಗೂ ಅವಮಾನಕರ ಕೃತ್ಯ ಕರ್ನಾಟಕದಲ್ಲೇ ನಡೆದಿದೆ. ಕೊಲೆಗಾರರಿಗೆ ಸನ್ಮಾನ ಮಾಡುವ ಸಂಸ್ಕೃತಿ ಕರ್ನಾಟಕದಲ್ಲಿ ಬೆಳೆಯುತ್ತಿರುವುದು ಬೇಸರದ ಸಂಗತಿ. ಗೌರಿ ಲಂಕೇಶ್ ಕೊಲೆಯಾಗಿ 7 ವರ್ಷವಾದರೂ ಕೊಲೆಗೈದವರಿಗೆ ಇದುವರೆಗೂ ಶಿಕ್ಷೆ ಆಗಿಲ್ಲ. ಇದಾವುದೂ ವಯಕ್ತಿಕ ಧ್ವೇಷದಿಂದ ಆಗಿದ್ದಲ್ಲ, ಒಂದು ಚಿಂತನೆಗಳ ವಿರುದ್ಧ ಆಗುತ್ತಿರುವ ಕೊಲೆಗಳಾಗಿವೆ. ಸಂವಿಧಾನವಾದಿ ಚಿಂತನೆಗಳನ್ನು ಸಂಪೂರ್ಣ ನಾಶಮಾಡಲು ಮನುವಾದಿ ಸಂಸ್ಥೆಗಳು ಇದರ ಹಿಂದೆ ಇದಾವೆ. ಫನಸಾರೆ, ನರೇಂದ್ರ ದಾಬೋಲ್ಕರ್, ಗೌರಿ ಲಂಕೇಶ್, ಎಮ್ ಎಮ್ ಕಲ್ಬುರ್ಗಿ ಈ ನಾಲ್ಕೂ ಜನ ವಿಚಾರವಂತರನ್ನು ಕೊಂದಿದ್ದು ಒಂದೇ ಸಂಘಟನೆಯಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಮುಸ್ತಾಕ್ ಅಹಮದ್ ಹಾವೇರಿಪೇಟ್ ಮಾತನಾಡಿ, ಕೊಲೆಗಾರರನ್ನು ಗೌರವಿಸುವುದು ಹೇಯಕೃತ್ಯವಾಗಿದೆ. ರಾಜ್ಯದಲ್ಲಿ ಕಾಂಗ್ರೆಸ್ ಸರ್ಕಾರವಿದ್ದರೂ ಆರೋಪಿಗಳನ್ನು ಬಂಧಿಸದೇ ಇರುವುದು ಸಂವಿಧಾನ ವಿರೋಧಿ ನಡೆಯಾಗಿದೆ. ಹಾಲಿ ಸರ್ಕಾರ ಅಧಿಕಾರಕ್ಕೆ ಬಂದಿದ್ದು ಜಾತ್ಯಾತೀತ ಮತ್ತು ದಲಿತ, ಅಹಿಂದ ಸಮುದಾಯಗಳ ಸಹಕಾರದಿಂದ. ಈ ನಡೆಯನ್ನೆಲ್ಲ ಗಮನಿಸಿದರೆ ಇವರೂ ಮನುವಾದಿಗಳ ಕೈಗೊಂಬೆ ಆಗಿದ್ದಾರೆ ಏನೋ ಅನಿಸುತ್ತಿದೆ. ಕಾಂಗ್ರೆಸ್ ನಲ್ಲೂ ಮನುವಾದಿ ಚಿಂತನೆಗಳು ಸೇರಿಕೊಂಡಿದ್ದು, ಈ ಕೂಡಲೆ ಸಿಎಂ ಮತ್ತು ಗೃಹ ಸಚಿವರು ಇಂತಹ ಕೆಟ್ಟ ಮನಸ್ಸುಗಳ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲು ಒತ್ತಾಯಿಸಿದರು.
ಇದನ್ನು ಓದಿದ್ದೀರಾ? ಧಾರವಾಡ | ಭಾರೀ ಮಳೆಗೆ ಕೊಚ್ಚಿಹೋದ ಸೇತುವೆ; ಎಚ್ಚರಗೊಳ್ಳುವರೇ ಜನಪ್ರತಿನಿಧಿಗಳು?
ಪ್ರತಿಭಟನೆಯಲ್ಲಿ ಜನಪರ ಚಿಂತಕರು, ಸಾಹಿತಿಗಳು, ಹೋರಾಟಗಾರರು, ವಿವಿಧ ಸಂಘಟನೆಗಳ ಮುಖಂಡರು, ಸಮಾನ ಮನಸ್ಕರು ಭಾಗವಹಿಸಿದ್ದರು.
