ನವಂಬರ್ 28-29ರಂದು ಮಂಗಳೂರಿನ ಬಿಷಪ್ ಜತ್ತನ್ನ ಸಭಾಂಗಣ ಸಹೋದಯದಲ್ಲಿ ನಡೆಯಲಿರುವ ಜನನುಡಿ ಕಾರ್ಯಕ್ರಮದ ಪೋಸ್ಟರ್ ಅನ್ನು ಗದಗ ಜಿಲ್ಲೆಯ ಗಜೇಂದ್ರಗಡ ನಗರದ ತಹಶಿಲ್ದಾರರ ಕಛೇರಿ ಆವರಣದಲ್ಲಿ ಬಿಡುಗಡೆ ಮಾಡಲಾಯಿತು.
ಈ ಸಂದರ್ಭದಲ್ಲಿ ಎಸ್ಎಫ್ಐ ರಾಜ್ಯ ಅಧ್ಯಕ್ಷರು ಗಣೇಶ ರಾಠೋಡ ಮಾತನಾಡಿ, “ವಿದ್ಯಾರ್ಥಿ-ಯುವಜನರ ಉದ್ಯೋಗ, ಶಿಕ್ಷಣ, ಬದುಕು, ಘನತೆ, ಹಕ್ಕುಗಳು ಕುರಿತು ಚರ್ಚೆ ನಡೆಯಲಿದೆ. ‘ನುಡಿಯ ಸಿರಿಯಲ್ಲ ಬದುಕು’ ಎಂಬ ಹೆಸರಿನಲ್ಲಿ ಜನನುಡಿಯನ್ನು ಸಂಘಟಿಸಲಾಗಿದೆ’ ರಾಜ್ಯ ಸಾಹಿತ್ಯ ಲೋಕ, ಸಾಂಸ್ಕೃತಿಕ ಚಿಂತಕರು, ವಿದ್ಯಾರ್ಥಿ- ಯುವಜನರು ಭಾಗಿಯಾಗಲಿದ್ದಾರೆ” ಎಂದರು.
ಸಿಐಟಿಯು ಕಾರ್ಮಿಕ ಸಂಘಟನೆ ಮುಖಂಡರಾದ ಪೀರು ರಾಠೋಡ ಮಾತನಾಡಿ, “ಶ್ರಮಿಕರ ಸಾಂಸ್ಕೃತಿಕ ಧ್ವನಿಯಾಗಿ ನಡೆಯುತ್ತಿರುವ ಈ ಕಾರ್ಯಕ್ರಮದಲ್ಲಿ ಸಮಾನ ಮನಸ್ಕರು ಪಾಲ್ಗೊಳ್ಳಬೇಕು” ಎಂದರು.
ಎಸ್ಎಫ್ಐ ಗದಗ ಜಿಲ್ಲಾಧ್ಯಕ್ಷ ಚಂದ್ರು ರಾಠೋಡ, ಪ್ರಾಸ್ತಾವಿಕವಾಗಿ ಮಾತನಾಡಿ, “ಪ್ರಜಾಪ್ರಭುತ್ವದ ಉಳಿವು, ಸಾಮಾಜಿಕ ನ್ಯಾಯ ಮತ್ತು ಫ್ಯಾಸಿಸಂ ವಿರೋಧಿ ಹೋರಾಟಗಳ ಕುರಿತು ಕಾರ್ಯ ಯೋಜನೆ ರೂಪಿಸುವುದು ಕಾರ್ಯಕ್ರಮದ ಆಶಯವಾಗಿದೆ” ಎಂದರು.
ಈ ಸಂದರ್ಭದಲ್ಲಿ ರೈತ ಸಂಘಟನೆ ಕೆಪಿಆರ್ ಎಸ್ ಮುಖಂಡರಾದ ಚನ್ನಪ್ಪ ಗುಗಲೊತ್ತರ, ಜಿಲ್ಲಾ ಉಪಾಧ್ಯಕ್ಷ ತನುಜಾ ರಾಯಬಾಗಿ, ಅನಿಲ್ ಆರ್, ಜಂಟಿ ಕಾರ್ಯದರ್ಶಿ ಶರಣು ಮಾಟರಂಗಿ, ಜಿಲ್ಲಾ ಮುಖಂಡರು ರವಿತೇಜ್, ರೇಣುಕಾ ಜೋಗಿನ, ಕವಿತಾ ಆರ್, ಅಕ್ಕಮ್ಮ ರಾಠೋಡ, ಪ್ರವೀಣ್ ಹಾಗೂ ಇತರರು ಭಾಗಿಯಾಗಿದ್ದರು.



