ಬಂಡೀಪುರದಲ್ಲಿ ನಡೆಯುತ್ತಿರುವ ಅಂತಾರಾಷ್ಟ್ರೀಯ ಬಿಗ್ ಕ್ಯಾಟ್ ಅಲಯನ್ಸ್ ಶೃಂಗಸಭೆ ವಿರೋಧಿಸಿ ಸಾಮೂಹಿಕ ನಾಯಕತ್ವದಲ್ಲಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗು ಹಸಿರು ಸೇನೆಯಿಂದ ಪ್ರತಿಭಟನೆ. ಇದೇ ಸಂದರ್ಭದಲ್ಲಿ ಕೇಂದ್ರ ಸರ್ಕಾರ ಅರಣ್ಯವನ್ನು ಖಾಸಗೀಕರಣ ಮಾಡಲು ನಡೆಸಿರುವ ಹುನ್ನಾರವನ್ನು ಖಂಡಿಸಿದ ರೈತ ಮುಖಂಡರನ್ನು ಪೊಲೀಸರು ಬಂಧಿಸಿ ತೆರಕಣಾಂಬಿ ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದಾರೆ.
ಚಾಮರಾಜನಗರ ಜಿಲ್ಲೆ, ಗುಂಡ್ಲುಪೇಟೆ ತಾಲ್ಲೂಕಿನ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ಮೇಲುಕಾಮನ ಹಳ್ಳಿಯಲ್ಲಿರುವ ಸಫಾರಿ ಕ್ಯಾಂಪಸ್ ನ ಸಭಾಂಗಣದಲ್ಲಿ ಕೇಂದ್ರ ಸರ್ಕಾರ ಆಯೋಜಿಸಿರುವ ಅಂತಾರಾಷ್ಟ್ರೀಯ ಬಿಗ್ ಕ್ಯಾಟ್ ಅಲಯನ್ಸ್ ಶೃಂಗಸಭೆ ಇದೇ ಫೆಬ್ರವರಿ.9 ರಿಂದ 11ರ ವರೆಗೆ ನಡೆಯುತ್ತಿದೆ. ಹಾಗೆಯೇ, 12 ಮತ್ತು 13ರಂದು ಕೊಡಗು ಜಿಲ್ಲೆ ನಾಗರಹೊಳೆಯಲ್ಲಿ ನಡೆಯಲಿದೆ.
ಈ ವಿಶೇಷ ಸುದ್ದಿ ಓದಿದ್ದೀರಾ? ನಾಗರಹೊಳೆ-ಬಂಡೀಪುರದಲ್ಲಿ ಅಂತಾರಾಷ್ಟ್ರೀಯ ಬಿಗ್ ಕ್ಯಾಟ್ ಅಲಯನ್ಸ್ ಶೃಂಗಸಭೆ: ಆದಿವಾಸಿಗಳ ಅಸ್ತಿತ್ವ ಕಸಿಯುವ ಹುನ್ನಾರವೇ?
ಕೇಂದ್ರ ಸರ್ಕಾರ ಬಜೆಟ್ ಮಂಡಿಸಿದ ಬೆನ್ನಲ್ಲೇ ಏಕಾಏಕಿ ಬಂಡೀಪುರ ಹಾಗು ನಾಗರಹೊಳೆಯಲ್ಲಿ ಶೃಂಗಸಭೆ ನಡೆಸುತ್ತಿರುವುದಕ್ಕೆ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ. ಒಂದು ಕಡೆ ಮಾನವ-ವನ್ಯಜೀವಿ ಸಂಘರ್ಷ, ಇನ್ನೊಂದೆಡೆ ಅರಣ್ಯ ವಾಸಿಗಳನ್ನು ಒಕ್ಕಲೆಬ್ಬಿಸುತ್ತಿರುವಾಗ ಯಾವುದೇ ಮುನ್ಸೂಚನೆ ಇರದೇ 18 ರಾಷ್ಟ್ರಗಳ ಪ್ರತಿನಿಧಿಗಳನ್ನೊಳಗೊಂಡ ಸಭೆ ನಡೆಸುತ್ತಿರುವುದು, ಅರಣ್ಯವನ್ನು ಖಾಸಗೀಕರಣ ನಡೆಸುವ ಹುನ್ನಾರವಾಗಿದೆ ಎಂದು ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದರು.
This video cannot be played in your browser. Open the video directly
ಮುಂದಿರುವ ಸವಾಲುಗಳು
- ಸಂರಕ್ಷಣೆಗಾಗಿ ಎಂಬ ಹೆಸರಿನಲ್ಲಿ ರಾಷ್ಟ್ರ ಮಟ್ಟದಲ್ಲಿ ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನಿಧಿ ಸಂಗ್ರಹಕ್ಕೆ ಚಾಲನೆ.
- ಹಣ ದುರ್ಬಳಕೆ.
- ಪಾರದರ್ಶಕತೆಯ ಕೊರತೆ.
- ಆದಿವಾಸಿ ಸಮುದಾಯಗಳ ಬಲವಂತದ ಸ್ಥಳಾಂತರ ಹಾಗು ಜೀವನೋಪಾಯಕ್ಕೆ ಹಾನಿ.
- ನಮ್ಮ ಜನರನ್ನೇ, ನಮ್ಮದೇ ಜಾಗದಲ್ಲಿ ಕಳ್ಳರಂತೆ, ದೇಶ ದ್ರೋಹಿಗಳಂತೆ ನಡೆಸಿಕೊಳ್ಳುತಾರೆ.
- ಅಬಿವೃದಿ ಹೆಸರಿನಲ್ಲಿ ಕಾಡಿನ ಒಡಲನ್ನು ಸೀಳಿ ಗಣಿಗಾರಿಕೆ ಮಾಡಲು ಅನುಮತಿ ಕೊಡುತ್ತಾರೆ.
- ಪ್ರವಾಸೋದ್ಯಮದ ಹೆಸರಿನಲ್ಲಿ ಕಾಡನ್ನು ಖಾಸಗೀಕರಣ ಮಾಡಿ ಕಾಡನ್ನು ಶೋಷಣೆ ಮಾಡುತ್ತಾರೆ.
- ತಂತ್ರಜ್ಞಾನದ ಹೆಸರಲ್ಲಿ ವ್ಯಾಪಾರ ಮತ್ತು ಡೇಟಾ ಸಾರ್ವಭೌಮತ್ವದ ಸಮಸ್ಯೆ ಉಂಟಾಗುತ್ತದೆ.
- ಪ್ರಬಲ ರಾಷ್ಟ್ರಗಳ ಕಾರ್ಯಸೂಚಿ ನಮ್ಮ ಮೇಲೆ ಹೇರಿಕೆಯಾಗುತ್ತದೆ.
- ದೊಡ್ಡ ಕಾರ್ಖಾನೆಗಳು ಮಾಡಿದ ಪರಿಸರದ ವಿನಾಶದ ಪಾಪ ಕಳೆದುಕೊಳ್ಳುವ carbon credit ದಂದೆಗೆ ಕೋಟೆ ಬಾಗಿಲು ತೆರೆದುಕೊಳ್ಳುತ್ತಿದೆ.
ಪ್ರತಿಭಟನೆಯಲ್ಲಿ ರೈತ ಸಂಘಟನೆಯ ಹಿರಿಯ ಮುಖಂಡರಾದ ಹೊನ್ನೂರು ಪ್ರಕಾಶ್, ಮಂಜು ಕಿರಣ್, ಶಿರ್ವಳ್ಳಿ ಮಂಜು ಹಾಗು ಗುಂಡ್ಲುಪೇಟೆ ಭಾಗದ ಹಲವು ಕಾರ್ಯಕರ್ತರು ಇದ್ದರು.
