ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಯನ್ನು ವಿದ್ಯಾರ್ಥಿಗಳ ಹೋರಾಟದ ಮೊದಲ ಗೆಲುವು ಎಂದು ಬಣ್ಣಿಸಿರುವ ಪ್ರಜಾಸತ್ತಾತ್ಮಕ ಚಿಂತನ ವೇದಿಕೆ, ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್‌ಟಿಎ) ರದ್ದತಿ, ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್‌ಇಪಿ–2020) ಹಿಂಪಡೆಯುವುದು ಸೇರಿದಂತೆ ಉಳಿದ ಬೇಡಿಕೆಗಳು ಈಡೇರುವವರೆಗೂ ಹೋರಾಟ ಮುಂದುವರಿಯಬೇಕು ಎಂದು ಕರೆ ನೀಡಿದೆ.
ಈ ಕುರಿತು ಪ್ರಕಟಣೆ ನೀಡಿರುವ ವೇದಿಕೆ, ‘ದೇಶದ ವಿದ್ಯಾರ್ಥಿಗಳು, ಯುವಜನರು ಹಾಗೂ ಪ್ರಜಾಸತ್ತಾತ್ಮಕ ಹೋರಾಟಗಾರರಿಗೆ ಅಭಿನಂದನೆ ಸಲ್ಲಿಸಿದೆ. ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆ ವಿದ್ಯಾರ್ಥಿಗಳ ಐಕ್ಯ ಹೋರಾಟದ ಫಲವಾಗಿದ್ದು, ಇದು ಮೊದಲ ಹೆಜ್ಜೆ ಮಾತ್ರ’ ಎಂದು ತಿಳಿಸಿದೆ.
‘ಎನ್‌ಟಿಎ ನಡೆಸುವ ಪರೀಕ್ಷಾ ವ್ಯವಸ್ಥೆಯನ್ನು ಸಂಪೂರ್ಣವಾಗಿ ರದ್ದುಗೊಳಿಸಬೇಕು. ವಿದ್ಯಾರ್ಥಿ ವಿರೋಧಿ, ವಾಣಿಜ್ಯೀಕರಣ ಹಾಗೂ ಕೋಮುವಾದಿ ಎಂದು ಟೀಕಿಸಿರುವ ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್‌ಇಪಿ–2020)ಯನ್ನು ಹಿಂಪಡೆಯಬೇಕು. ಪ್ರತಿಭಟನಾಕಾರರ ವಿರುದ್ಧ ದಾಖಲಿಸಿರುವ ಪ್ರಕರಣಗಳನ್ನು ವಾಪಸ್ ಪಡೆಯಬೇಕು ಹಾಗೂ ಪ್ರತಿಭಟನಾ ನಿರತ ವಿದ್ಯಾರ್ಥಿಗಳ ಮೇಲೆ ಹಲ್ಲೆ ನಡೆಸಿದ ಪೊಲೀಸ್ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು’ ಎಂದು ಆಗ್ರಹಿಸಿದೆ.
‘ಅಭಿಜೀತ್ ದಿಪ್ಕೆ, ಸೋನಮ್ ವಾಂಗ್ಚುಕ್, ನೇಹಾ ಹಾಗೂ ಎಸ್‌ಎಫ್‌ಐ ಸೇರಿದಂತೆ ವಿವಿಧ ವಿದ್ಯಾರ್ಥಿ ಸಂಘಟನೆಗಳು ಬೆದರಿಕೆಗಳ ನಡುವೆಯೂ ಹೋರಾಟವನ್ನು ದೃಢವಾಗಿ ಮುನ್ನಡೆಸಿರುವುದನ್ನು ವೇದಿಕೆ ಶ್ಲಾಘಿಸಿದೆ. ಐಕ್ಯ ಹೋರಾಟಗಳಿಂದಲೇ ಜನರ ಬೇಡಿಕೆಗಳಿಗೆ ನ್ಯಾಯ ದೊರೆಯುತ್ತದೆ ಎಂಬುದನ್ನು ಈ ಹೋರಾಟ ಸಾಬೀತುಪಡಿಸಿದೆ’ ಎಂದು ತಿಳಿಸಿದೆ.
ಇದನ್ನು ಓದಿದ್ದೀರಾ? ದೆಹಲಿ ವಿದ್ಯಾರ್ಥಿಗಳ ಮೇಲಿನ ದೌರ್ಜನ್ಯ ವಿರೋಧಿಸಿ ಯಾದಗಿರಿಯಲ್ಲಿ ಪಂಜಿನ ಪ್ರತಿಭಟನೆ
ವೇದಿಕೆಯ ಪ್ರಕಟಣೆಗೆ ಆರ್.ಕೆ. ಹುಡಗಿ, ಮೀನಾಕ್ಷಿ ಬಾಳಿ, ಕೆ. ನೀಲಾ, ಆರ್.ಜಿ. ಶಟಗಾರ, ಅರ್ಜುನ ಭದ್ರೆ, ರವಿ ಸಜ್ಜನ, ಲಕ್ಷ್ಮಣ ದಸ್ತಿ, ಮಹೇಶ ಎಸ್.ಬಿ., ಪದ್ಮಿನಿ ಕಿರಣಗಿ, ಲವಿತ್ರ, ಸರ್ವೇಶ್, ಮರೆಪ್ಪ ಹಳ್ಳಿ, ಪದ್ಮಾ ಮಾಲಿಪಾಟೀಲ, ಧನರಾಜ ತಾಂಬೋಳೆ, ಶಿವಕುಮಾರ ಬಿದ್ರಿ, ದತ್ತಾತ್ರೇಯ ಇಕ್ಕಳಕಿ, ಶಿವಶರಣ ಮುಳೆಗಾಂವ, ಸುಧಾಮ ಧನ್ನಿ, ಇಮಾಮ್ ನದಾಫ್ ಹಾಗೂ ತಾಯಣ್ಣ ಸಹಿ ಹಾಕಿದ್ದಾರೆ.
