ಲಕ್ಕವಳ್ಳಿಯ ಭದ್ರಾ ಜಲಾಶಯದ ನೀರು ಕುಡಿಯಲು ಮಾತ್ರ ಬಳಸುವಂತೆ ಶಿವಮೊಗ್ಗ ಜಿಲ್ಲಾಡಳಿತ ಸೂಚಿಸಿದೆ. ಮುಂಗಾರು ಕೊರತೆಯ ಪರಿಣಾಮ ಜಲಾಶಯದ ನೀರಿನ ಸಂಗ್ರಹ ಗಣನೀಯ ಪ್ರಮಾಣದಲ್ಲಿ ಇಳಿಕೆಯಾಗಿದ್ದು, ರೈತರಲ್ಲಿ ತೀವ್ರ ಆತಂಕ ಸೃಷ್ಟಿಸಿದೆ.
ಶಿವಮೊಗ್ಗ ಜಿಲ್ಲೆಯ ಲಕ್ಕವಳ್ಳಿಯ ಭದ್ರಾ ಜಲಾಶಯ ಈ ಭಾಗದ ರೈತರ ಜೀವನಾಡಿ. ಮಳೆ ಕೊರತೆ ಹೀಗೆಯೇ ಮುಂದುವರೆದರೆ ನೀರಿನ ತೀವ್ರ ಅಭಾವ ಸೃಷ್ಟಿಯಾಗುವ ಸಾಧ್ಯತೆಯನ್ನು ಊಹಿಸಲಾಗಿದೆ. ಜಲಸಂಪನ್ಮೂಲ ಇಲಾಖೆ ಮತ್ತು ಮೈಸೂರು ಪ್ರಾದೇಶಿಕ ಆಯುಕ್ತರ ನಿರ್ದೇಶನದ ಮೇರೆಗೆ ಶಿವಮೊಗ್ಗ ಜಿಲ್ಲಾಧಿಕಾರಿ ಭನ್ವರ್ ಸಿಂಗ್ ಮೀನಾ ಭದ್ರಾ ಜಲಾಶಯದ ನೀರನ್ನು ಕುಡಿಯಲು ಮಾತ್ರವೇ ಮೀಸಲಿರಿಸುವ ಆದೇಶವನ್ನು ಹೊರಡಿಸಿದ್ದಾರೆ.
ಜಲಾಶಯದ ಪ್ರಸ್ತುತ ಒಳಹರಿವು 13,123 ಕ್ಯೂಸೆಕ್‌ಗಳಿದ್ದರೂ, ನೀರನ್ನು ಸಂರಕ್ಷಿಸುವ ಸಲುವಾಗಿ ಆಡಳಿತವು ಹೊರಹರಿವನ್ನು 218 ಕ್ಯೂಸೆಕ್‌ಗಳಿಗೆ ನಿರ್ಬಂಧಿಸಿದೆ. ಇದರಲ್ಲಿ, 50 ಕ್ಯೂಸೆಕ್‌ಗಳನ್ನು ಎಡದಂಡೆ ಕಾಲುವೆಗೆ ಮತ್ತು 10 ಕ್ಯೂಸೆಕ್‌ಗಳನ್ನು ಬಲದಂಡೆ ಕಾಲುವೆಗೆ ಬಿಡಲಾಗುತ್ತಿದೆ. ಸುಮಾರು 6 ಕ್ಯೂಸೆಕ್ ನೀರು ಆವಿಯಾಗುವಿಕೆಯಿಂದಾಗಿ ಖಾಲಿಯಾಗುತ್ತಿದೆ.
71.535 ಟಿಎಂಸಿ ಸಾಮರ್ಥ್ಯದ ಭದ್ರಾ ಜಲಾಶಯದಲ್ಲಿ ಈಗ 31.257 ಟಿಎಂಸಿ ನೀರಿನ ಶೇಖರಣೆ ಇದ್ದು, ಕಳೆದ ವರ್ಷ ಈ ವೇಳೆಗೆ ನೀರಿನ ಮಟ್ಟ 173.7 ಅಡಿ ತಲುಪಿತ್ತು. ಈ ಬಾರಿ ಕೇವಲ 146 ಅಡಿ ಇದ್ದು, ಸಾಮಾನ್ಯವಾಗಿ ಕೃಷಿಗೆ ಕಾಲುವೆಗಳ ನೀರನ್ನು ಅವಲಂಬಿಸಿರುವ ಸುತ್ತಲಿನ ರೈತರಿಗೆ ಅಗತ್ಯ ನೀರಾವರಿ ಸೌಲಭ್ಯ ಒದಗಿಸುವುದು ಸವಾಲಾಗಿ ಪರಿಣಮಿಸಿದೆ.
