ಮೈಸೂರಿನ ದೇಸಿರಂಗ ಸಾಂಸ್ಕೃತಿಕ ಟ್ರಸ್ಟ್ ಏರ್ಪಡಿಸಿದ್ದ ದೇಸಿರಂಗ ನಾಟಕೋತ್ಸವದ ಸಮಾರೋಪ ಸಮಾರಂಭದಲ್ಲಿ ‘ಮೇರಾ ಭಾರತ್ ಮಹಾನ್’ ನಾಟಕದ ಮೂಲ ರಚನಕಾರ ಹಾಗು ವಕೀಲರಾದ ಬಾಬುರಾವ್ ಪಲ್ಲದನ್ ಮಾತನಾಡಿ, ‘ಸಂವಿಧಾನದ ಆಶಯ-ಉದ್ದೇಶವನ್ನು ಯುವಜನತೆ ಮರೆಯಬಾರದು’ ಎಂದರು.
“ಸಂವಿಧಾನ ಪ್ರಸ್ತಾವನೆಯು ಕೇವಲ ಓದಿಗೆ ಮಾತ್ರ ಸೀಮಿತಗೊಳ್ಳದೆ, ಅದರ ಮೂಲ ಉದ್ದೇಶ ಮತ್ತು ಆಶಯಗಳನ್ನು ಯುವಜನತೆ ಮರೆಯಬಾರದೆಂದರೆ ಪ್ರಸ್ತಾವನೆಯ ಪ್ರಸ್ತುತತೆಯನ್ನು ದೃಶ್ಯ ಮಾಧ್ಯಮದ ಮೂಲಕ ಸಮರ್ಥವಾಗಿ ಕಟ್ಟಿಕೊಡಬೇಕು. ಈ ಹಿನ್ನೆಲೆಯಲ್ಲಿ ಮೆರಾ ಭಾರತ್ ಮಹಾನ್ ನಾಟಕವನ್ನು ರಚಿಸಲಾಗಿದೆ. ಸಂವಿಧಾನದ ಮೂಲ ಆಶಯಗಳಿಗೆ ಧಕ್ಕೆ ತರುವಂತಹ ಪ್ರಸಂಗಗಳು ನಾಡಿನಾದ್ಯಂತ ನಡೆಯುತ್ತಿರುವುದನ್ನು ನೋಡಿಯು ನೋಡದವರಂತೆ ಇರುವುದು ಈ ದೇಶದ ನಾಗರೀಕನಿಗೆ ತಕ್ಕ ಗುಣವಲ್ಲ. ಅದರಲ್ಲಿಯೂ, ಯುವ ಜನತೆಗೆ ಈ ಬಗ್ಗೆ ಹೆಚ್ಚು ಅರಿವು ಮೂಡಿಸುವ ಅಗತ್ಯ ಎಂದಿಗಿಂತಲೂ ಇಂದು ಹೆಚ್ಚಾಗಿದೆ” ಎಂದು ಅಭಿಪ್ರಾಯಪಟ್ಟರು.
ಲೇಖಕರಾದ ನಾ. ದಿವಾಕರ್ ಮಾತನಾಡಿ, “ದೃಶ್ಯ ಮಾಧ್ಯಮದ ಮೇಲುಗೈ ಹೆಚ್ಚಾಗಿರುವ ಈ ದಿನಗಳಲ್ಲಿ ಸಂವಿಧಾನದ ಆಶಯಗಳನ್ನು ಸಹ ದೃಶ್ಯ ಮಾಧ್ಯಮದಿಂದಲೇ ಸಮರ್ಥವಾಗಿ ತಲುಪಿಸಿದರೆ ಅದು ಆರೋಗ್ಯಕರ ಸಮಾಜದ ನಿರ್ಮಾಣಕ್ಕೆ ಸಹಕಾರಿಯಾಗುವುದು. ಕನ್ನಡದಲ್ಲಿ ಇಂತಹ ರಂಗಪ್ರಯೋಗಗಳು ಹೆಚ್ಚಬೇಕೆಂದು” ಆಶಯ ವ್ಯಕ್ತಪಡಿಸಿದರು.
ದೇಸಿರಂಗದ ಶಿಬಿರಾರ್ಥಿಗಳಿಂದ ಪ್ರದರ್ಶನಗೊಂಡ ಮೇರಾ ಭಾರತ್ ಮಹಾನ್ ನಾಟಕದ ಮೊಟ್ಟ ಮೊದಲರಂಗ ಪ್ರಯೋಗ ಇದಾಗಿದ್ದು, ಸಮಾಜದ ಸ್ವಾಸ್ಥ್ಯ ಕಾಯುವ ನಿಟ್ಟಿನಲ್ಲಿ ಈ ನಾಟಕ ಅತ್ಯಂತ ಅಗತ್ಯವಾಗಿದೆ. ಮುಂಬರುವ ದಿನಗಳಲ್ಲಿ ಈ ನಾಟಕದ ಪ್ರಯೋಗಗಳನ್ನು ಹೆಚ್ಚಿನ ವೇದಿಕೆಗಳಲ್ಲಿ ಮಾಡುತ್ತೇವೆ ಎಂದು ಟ್ರಸ್ಟ್ ನ ಸಂಸ್ಥಾಪಕರು ಹಾಗೂ ನಾಟಕದ ನಿರ್ದೇಶಕರು ಆದ ಕೃಷ್ಣ ಜನಮನ ಹೇಳಿದರು.
ಈ ಸುದ್ದಿ ಓದಿದ್ದೀರಾ? ಮೈಸೂರು | ನಂಜನಗೂಡಿನಲ್ಲಿ ಮರಗಳ ಹನನ; ಸಂಘಟನೆಗಳಿಂದ ಪ್ರತಿಭಟನೆ
ಸಮಾರೋಪ ಕಾರ್ಯಕ್ರಮದಲ್ಲಿ ಹಿರಿಯ ಸಾಹಿತಿ, ವಿಮರ್ಶಕರಾದ ಕಾಳೇಗೌಡ ನಾಗವಾರ, ನಾಟಕದ ಸಹನಿರ್ದೇಶಕಿ ಡಾ. ಬಿ.ಎಸ್ ದಿನಮಣಿ, ಮೈಸೂರಿನ ರಂಗಕರ್ಮಿ ಡಿ. ನಾಗೇಂದ್ರ ಕುಮಾರ್ ಹಾಗೂ ಕನ್ನಡಕ್ಕೆ ಅನುವಾದಿಸಿದ ಮಧುರಾಣಿ ಇದ್ದರು.
