ಬಾಲಿವುಡ್ ನಿರ್ದೇಶಕ ರಾಮ್ ಗೋಪಾಲ್ ವರ್ಮಾ ಅವರು ಇತ್ತೀಚಿನ ಆಕ್ಷನ್ ಸಿನಿಮಾಗಳ ಬಗ್ಗೆ ದೊಡ್ಡ ಚರ್ಚೆ ಹುಟ್ಟುಹಾಕಿದ್ದಾರೆ. ಅವರು ರಣವೀರ್ ಸಿಂಗ್ ನಟನೆಯ ‘ಧುರಂಧರ್ 2: ದ ರಿವೆಂಜ್’ ಸಿನಿಮಾವನ್ನು ಕೊಂಡಾಡಿದ್ದಾರೆ. ಅದೇ ಸಮಯದಲ್ಲಿ, ಹೆಸರೇಳದೆ ಹೃತಿಕ್ ರೋಷನ್ ಮತ್ತು ಜೂನಿಯರ್ ಎನ್‌ಟಿಆರ್ ಅವರ ‘ವಾರ್ 2’ ಸಿನಿಮಾವನ್ನು ಟೀಕಿಸಿದ್ದಾರೆ. ಇದು ಈಗ ಭಾರಿ ವೈರಲ್‌ ಆಗಿದ್ದು, ನೆಟ್ಟಿಗರು ನಿರ್ದೇಶಕನ ಇಬ್ಬಗೆ ನೀತಿಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ ಎಂದು ಟೈಮ್ಸ್‌ ಆಫ್ ಇಂಡಿಯಾ ವರದಿ ಮಾಡಿದೆ.
ಮಾಧ್ಯಮವೊಂದರ ಸಂದರ್ಶನದಲ್ಲಿ ಮಾತನಾಡಿದ ರಾಮ್ ಗೋಪಾಲ್ ವರ್ಮಾ, ‘ಧುರಂಧರ್ 2’ ಚಿತ್ರದಲ್ಲಿ ರಣವೀರ್ ಸಿಂಗ್ ಅವರ ಪಾತ್ರವು ಕೇವಲ ನಾಯಕನಾಗಿರದೆ, ಕೆಲವು ತಪ್ಪುಗಳನ್ನು ಮಾಡುವ ಸಾಮಾನ್ಯ ಮನುಷ್ಯನಂತೆ ಇದೆ ಎಂದಿದ್ದಾರೆ. ಪಾತ್ರಗಳನ್ನು ಬಹಳ ನೈಜವಾಗಿ ಮತ್ತು ಅದ್ಭುತವಾಗಿ ತೋರಿಸಿದ ನಿರ್ದೇಶಕ ಆದಿತ್ಯ ಧರ್ ಅವರ ಕೆಲಸವನ್ನು ವರ್ಮಾ ಮೆಚ್ಚಿಕೊಂಡಿದ್ದಾರೆ.
ಇದೇ ಸಂದರ್ಭದಲ್ಲಿ ಹೆಸರು ಹೇಳದೆ ‘ವಾರ್ 2’ ಚಿತ್ರವನ್ನು ಟೀಕಿಸಿದ ಅವರು, ಬಹುಕೋಟಿ ವೆಚ್ಚದ ಸಿನಿಮಾದಲ್ಲಿ ಇಬ್ಬರು ದೊಡ್ಡ ನಾಯಕರು ಕಾದಾಡುತ್ತಾರೆ. ಆದರೆ, ಏಟು ತಿಂದರೂ ಅವರ ಮುಖದಲ್ಲಿ ಯಾವುದೇ ನೋವಿನ ಭಾವನೆಗಳಿಲ್ಲ. ತಮ್ಮ ಇಮೇಜ್ ಉಳಿಸಿಕೊಳ್ಳಲು ಅವರು ನೋವು ಅರಿಯದ ಸೂಪರ್‌ಮ್ಯಾನ್‌ಗಳಂತೆ ಇರುತ್ತಾರೆ. ಇಂತಹ ಸಿನಿಮಾಗಳಲ್ಲಿ ನೈಜತೆ ಇರುವುದಿಲ್ಲ ಎಂದು ವರ್ಮಾ ತಮ್ಮ ಅಸಮಾಧಾನ ಹೊರಹಾಕಿದ್ದಾರೆ.
ಇದನ್ನು ಓದಿದ್ದೀರಾ? ಬಿಜೆಪಿ ಅಸ್ತ್ರಕ್ಕೆ ಟಿಎಂಸಿ ಪ್ರತ್ಯಸ್ತ್ರ; ಸುವೇಂದು ಎದುರು ಸ್ಪರ್ಧಿಸಿರುವ ‘ಪಬಿತ್ರ ಕರ್’ ಯಾರು ಗೊತ್ತೆ?
ಇದಕ್ಕೆ ತದ್ವಿರುದ್ಧವಾಗಿ, ‘ಧುರಂಧರ್ 2’ ಕ್ಲೈಮ್ಯಾಕ್ಸ್ ದೃಶ್ಯದಲ್ಲಿ ಅರ್ಜುನ್ ರಾಂಪಾಲ್ ಅವರು ರಣವೀರ್ ಸಿಂಗ್‌ಗೆ ಚಾಕುವಿನಿಂದ ಇರಿದಾಗ, ರಣವೀರ್ ಅವರ ಮುಖದಲ್ಲಿ ಅಪ್ಪಟ ನೈಜ ನೋವು ಕಾಣುತ್ತದೆ. ಹಾಲಿವುಡ್ ನಟ ಲಿಯೊನಾರ್ಡೊ ಡಿಕಾಪ್ರಿಯೊ ಅವರ ನಟನೆಯ ನಂತರ ನಾನು ಅಂತಹ ಅದ್ಭುತ ಮತ್ತು ನೈಜ ನಟನೆಯನ್ನು ರಣವೀರ್ ಅವರ ಮುಖದಲ್ಲಿ ಮಾತ್ರ ನೋಡಿದೆ ಎಂದು ಹೊಗಳಿದ್ದಾರೆ.
ರಕ್ತ ಸುರಿಸುವ, ನೋವು ಅನುಭವಿಸುವ ಮತ್ತು ಸಾಮಾನ್ಯ ಮನುಷ್ಯನಂತೆ ಅಳುವ ವ್ಯಕ್ತಿ ಮಾತ್ರವೇ ನಿಜವಾದ ದೊಡ್ಡ ಹೀರೊ ಆಗಬಲ್ಲ ಎಂದು ವರ್ಮಾ ಹೇಳಿದ್ದಾರೆ. ಕೃತಕವಾಗಿ ಬಿಲ್ಡಪ್ ಕೊಡುವ ಕಮರ್ಷಿಯಲ್ ಸಿನಿಮಾಗಳಿಗಿಂತ, ಪಾತ್ರಗಳನ್ನು ಬಹಳ ಮಾನವೀಯತೆಯಿಂದ ಮತ್ತು ನೈಜವಾಗಿ ತೆರೆಯ ಮೇಲೆ ತಂದಿರುವ ಆದಿತ್ಯ ಧರ್ ಅವರ ನಿರ್ದೇಶನದ ಶೈಲಿ ನಿಜಕ್ಕೂ ಶ್ರೇಷ್ಠ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಎರಡೂ ರಕ್ತಪಾತ ಚಿತ್ರಗಳಾಗಿದ್ದು ಎರಡರಲ್ಲೂ ಹಿಂಸೆ ಹೆಚ್ಚಾಗಿದೆ. ನಿರ್ದೇಶಕರ ಬಣ್ಣವೂ ಬಯಲಾಗಿದೆ ಎಂದು ಸಾಮಾಜಿಕ ಮಾಧ್ಯಮದಲ್ಲಿ ನೆಟ್ಟಿಗರು ಆಕ್ರೋಶ ಹೊರಹಾಕಿದ್ದಾರೆ
