ಒಂದು ಕಡೆ ಗ್ಯಾರಂಟಿ ಯೋಜನೆಗಳ ಮರುಪರಿಶೀಲನೆ, ಪಿಂಚಣಿ ಪರಿಷ್ಕರಣೆ ಹಾಗೂ ಸರ್ಕಾರಿ ವೆಚ್ಚ ನಿಯಂತ್ರಣದ ಚರ್ಚೆ ನಡೆಯುತ್ತಿರುವಾಗ, ಮತ್ತೊಂದೆಡೆ ಸರ್ಕಾರ ರಾಯಧನ ಮತ್ತು ದಂಡ ಬಾಕಿ ಉಳಿಸಿಕೊಂಡಿರುವ ಕ್ರಷರ್ ಮಾಲೀಕರಿಗೆ ಒನ್ ಟೈಂ ಸೆಟಲ್‌ಮೆಂಟ್(ಒಟಿಎಸ್) ಮೂಲಕ ಭಾರೀ ರಿಯಾಯಿತಿ ನೀಡುತ್ತಿದ್ದು, ʼನಿಯಮ ಉಲ್ಲಂಘಿಸಿದ ಕ್ರಷರ್‌ಗಳಿಗೆ ಒಟಿಎಸ್ ಭಾಗ್ಯವೇಕೆ? ಎಂಬುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ತುಮಕೂರು ಜಿಲ್ಲೆಯಲ್ಲಿ ರಾಯಧನ ಮತ್ತು ದಂಡವನ್ನು ಹಲವು ವರ್ಷಗಳಿಂದ ಪಾವತಿಸದೆ ಉಳಿಸಿಕೊಂಡಿರುವ ಕ್ರಷರ್‌ಗಳಿಗೆ ಸರ್ಕಾರ ಒಟಿಎಸ್ ಅವಕಾಶ ನೀಡಿದೆ. ನಿಯಮ ಉಲ್ಲಂಘಿಸಿದವರಿಗೆ ದಂಡ ಮನ್ನಾ ಅಥವಾ ದೊಡ್ಡ ಪ್ರಮಾಣದ ರಿಯಾಯಿತಿ ನೀಡುವ ಕ್ರಮವು, ನಿಯಮ ಪಾಲಿಸಿ ಸಮಯಕ್ಕೆ ಸರಿಯಾಗಿ ಹಣ ಪಾವತಿಸಿದವರಲ್ಲಿ ಅಸಮಾಧಾನ ಮೂಡಿಸಿದೆ.
ಈ ವಿಚಾರವಾಗಿ ಮಾಧ್ಯಮಗಳಲ್ಲಿ ವರದಿಯಾದ ಬಳಿಕ ಸರ್ಕಾರವೂ ಎಚ್ಚೆತ್ತುಕೊಂಡಿದ್ದು, ಪಾವಗಡ ಶಾಸಕ ಹೆಚ್ ವಿ ವೆಂಕಟೇಶ್ ಅವರಿಗೆ ಸೇರಿದ ಕ್ರಷರ್‌ಗೆ ಒಟಿಎಸ್ ಅಡಿಯಲ್ಲಿ ಬಾಕಿ ಹಣ ಪಾವತಿಸುವಂತೆ ನೋಟಿಸ್ ಜಾರಿಯಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ಸುಮಾರು 10 ಕೋಟಿ ರೂಪಾಯಿ ಬಾಕಿಯಲ್ಲಿ 6 ಕೋಟಿ ರೂಪಾಯಿ ರಿಯಾಯಿತಿ ನೀಡಿ, ಉಳಿದ 4 ಕೋಟಿ ರೂಪಾಯಿ ಪಾವತಿಸುವಂತೆ ಸೂಚಿಸಲಾಗಿದೆ ಎನ್ನಲಾಗುತ್ತಿದೆ. ಈ ಬೆಳವಣಿಗೆ ಒಟಿಎಸ್ ನೀತಿಯ ಉದ್ದೇಶ ಹಾಗೂ ಪಾರದರ್ಶಕತೆ ಕುರಿತು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಮಾಹಿತಿಯ ಪ್ರಕಾರ, “ತುಮಕೂರು ಜಿಲ್ಲೆಯಲ್ಲಿ 186 ಕ್ರಷರ್‌ಗಳು ಕಾರ್ಯನಿರ್ವಹಿಸುತ್ತಿದ್ದು, ಅವುಗಳಲ್ಲಿ 146 ಕ್ರಷರ್‌ಗಳು ರಾಯಧನ ಮತ್ತು ದಂಡವನ್ನು ಪೂರ್ಣ ಪ್ರಮಾಣದಲ್ಲಿ ಪಾವತಿಸಿಲ್ಲ. ಈ ಹಿನ್ನೆಲೆಯಲ್ಲಿ ಆ 146 ಕ್ರಷರ್‌ಗಳಿಗೆ ಒಟಿಎಸ್ ಅಡಿಯಲ್ಲಿ ನೋಟಿಸ್ ನೀಡಲಾಗಿದೆ. ಜಿಲ್ಲೆಯಲ್ಲಿ ಒಟ್ಟು 437 ಕೋಟಿ ರೂಪಾಯಿಗೂ ಅಧಿಕ ರಾಯಧನ ಮತ್ತು ದಂಡ ಬಾಕಿ ಇದೆ. ಈ ಮೊತ್ತವನ್ನು ಒಟಿಎಸ್ ಯೋಜನೆಯಡಿ ಆರು ತಿಂಗಳೊಳಗೆ ನಾಲ್ಕು ಕಂತುಗಳಲ್ಲಿ ಪಾವತಿಸಬೇಕು” ಎಂದು ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಉಪನಿರ್ದೇಶಕ ಲಿಂಗರಾಜು ತಿಳಿಸಿದ್ದಾರೆ.
ಒಟಿಎಸ್ ಅಗತ್ಯವೇ? ಅಥವಾ ತಪ್ಪು ಸಂದೇಶವೇ?
ಸರ್ಕಾರದ ವಾದದ ಪ್ರಕಾರ, ಹಲವು ವರ್ಷಗಳಿಂದ ವಸೂಲಾಗದ ಬಾಕಿಯನ್ನು ಒಟಿಎಸ್ ಮೂಲಕವಾದರೂ ಸಂಗ್ರಹಿಸುವುದು ಉತ್ತಮ. ನ್ಯಾಯಾಲಯದ ವ್ಯಾಜ್ಯಗಳು ಮತ್ತು ದೀರ್ಘಾವಧಿಯ ವಸೂಲಾತಿ ಪ್ರಕ್ರಿಯೆಗಿಂತ, ಕನಿಷ್ಠ ಒಂದು ಭಾಗವಾದರೂ ಸರ್ಕಾರದ ಖಜಾನೆಗೆ ಬರಲಿದೆ ಎಂಬುದು ಆಡಳಿತದ ದೃಷ್ಟಿಕೋನವಾಗಿರಬಹುದು. ಆದರೆ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿರುವ ಪ್ರಶ್ನೆಗಳು ಬೇರೆ ರೀತಿಯವು.
ನಿಯಮ ಉಲ್ಲಂಘಿಸಿದವರಿಗೆ ರಿಯಾಯಿತಿ ನೀಡಿದರೆ, ಪ್ರಾಮಾಣಿಕವಾಗಿ ಹಣ ಪಾವತಿಸಿದವರಿಗೆ ನ್ಯಾಯ ಎಲ್ಲಿದೆ? ಕೋಟಿ ಕೋಟಿ ರೂಪಾಯಿ ದಂಡ ಮನ್ನಾ ಮಾಡುವ ಮೂಲಕ ಸರ್ಕಾರ ತಪ್ಪಿತಸ್ಥರಿಗೆ ಪ್ರೋತ್ಸಾಹ ನೀಡುತ್ತಿರುವುದೇ? ಇದೇ ಮಾದರಿಯನ್ನು ಮುಂದೆಯೂ ಅನುಸರಿಸಿದರೆ, ಭವಿಷ್ಯದಲ್ಲಿ ಯಾರು ಸಮಯಕ್ಕೆ ಸರಿಯಾಗಿ ರಾಯಧನ ಪಾವತಿಸುತ್ತಾರೆ? ಜನರ ಆಸ್ತಿಯ ಹಣ ಯಾರಿಗಾಗಿ? ರಾಯಧನ ಎಂಬುದು ಖಾಸಗಿ ಆದಾಯವಲ್ಲ. ರಾಜ್ಯದ ಖನಿಜ ಸಂಪತ್ತನ್ನು ಬಳಸಿದ ಪ್ರತಿಫಲವಾಗಿ ಸರ್ಕಾರಕ್ಕೆ ಬರುವ ಆದಾಯ. ಈ ಹಣ ರಸ್ತೆ, ಶಾಲೆ, ಆಸ್ಪತ್ರೆ, ಕುಡಿಯುವ ನೀರು ಸೇರಿದಂತೆ ಸಾರ್ವಜನಿಕ ಅಭಿವೃದ್ಧಿಗೆ ಬಳಕೆಯಾಗಬೇಕಾದ ಸಂಪನ್ಮೂಲ. ಆದ್ದರಿಂದ ಬಾಕಿ ಮೊತ್ತವನ್ನು ಸಂಪೂರ್ಣವಾಗಿ ವಸೂಲಿ ಮಾಡಬೇಕೇ ಹೊರತು, ಭಾರೀ ರಿಯಾಯಿತಿ ನೀಡಬಾರದು” ಎಂಬ ಅಭಿಪ್ರಾಯ ಹಲವರಿಂದ ವ್ಯಕ್ತವಾಗುತ್ತಿದೆ.
ವಿಶೇಷವಾಗಿ ಜನಪ್ರತಿನಿಧಿಗಳು ಅಥವಾ ಪ್ರಭಾವಿ ವ್ಯಕ್ತಿಗಳಿಗೆ ಸೇರಿದ ಕ್ರಷರ್‌ಗಳಿಗೂ ಇದೇ ಸೌಲಭ್ಯ ಸಿಗುತ್ತಿರುವುದು ಪಾರದರ್ಶಕತೆ ಕುರಿತು ಅನುಮಾನಗಳಿಗೆ ಕಾರಣವಾಗಿದೆ.
ಇದನ್ನೂ ಓದಿದ್ದೀರಾ? ಬೀದರ್‌ | ಮಳೆ ಕೊರತೆ : ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ರೈತರು, ಬರಪೀಡಿತ ಜಿಲ್ಲೆ ಘೋಷಿಸಲು ಸಿಎಂಗೆ ಮನವಿ
ಒಟಿಎಸ್ ಮೂಲಕ ವರ್ಷಗಳಿಂದ ಸಿಲುಕಿದ್ದ ಹಣ ಸರ್ಕಾರಕ್ಕೆ ಮರಳುವುದೇ ಮುಖ್ಯವೇ? ಅಥವಾ ನಿಯಮ ಉಲ್ಲಂಘಿಸಿದವರಿಗೆ ರಿಯಾಯಿತಿ ನೀಡುವುದರಿಂದ ಕಾನೂನು ಪಾಲನೆಯ ಮೌಲ್ಯ ಕುಗ್ಗುವುದೇ ದೊಡ್ಡ ಸಮಸ್ಯೆಯೇ? ಎಂಬುದರ ನಡುವೆ ಸಮತೋಲನ ಸಾಧಿಸುವುದು ಸರ್ಕಾರಕ್ಕೆ ಸವಾಲಾಗಿದೆ. ಆದರೆ ಒಂದು ವಿಷಯ ಸ್ಪಷ್ಟ. 437 ಕೋಟಿ ರೂಪಾಯಿ ಸಾರ್ವಜನಿಕರ ಹಣ, ಸಂಪೂರ್ಣವಾಗಿ ಸರ್ಕಾರದ ಖಜಾನೆಗೆ ಸೇರಿ ಜನರ ಅಭಿವೃದ್ಧಿಗೆ ಬಳಸಬೇಕು ಎಂಬುದು ಜನಸಾಮಾನ್ಯರ ನಿರೀಕ್ಷೆಯಾಗಿದೆ.
ಸರ್ಕಾರ ಒಟಿಎಸ್ ಅನ್ನು ಕೇವಲ ಬಾಕಿ ವಸೂಲಾತಿಯ ಸಾಧನವಾಗಿಯೇ ಬಳಸುತ್ತದೆಯೇ, ಅಥವಾ ದೊಡ್ಡ ಪ್ರಮಾಣದ ರಿಯಾಯಿತಿ ನೀಡುವ ಮೂಲಕ ಹೊಸ ವಿವಾದಕ್ಕೆ ಕಾರಣವಾಗುತ್ತದೆಯೇ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗಲಿದೆ.
