ತುಮಕೂರು ನಗರದ ದೇವರಾಯಪಟ್ಟಣದಲ್ಲಿರುವ ಶ್ರೀ ಶಾರದಾಂಬ ಟ್ರಸ್ಟ್ ವೃದ್ಧಾಶ್ರಮದಲ್ಲಿ ಮಹಾತ್ಮಾ ಗಾಂಧೀಜಿ ಹಾಗೂ ಲಾಲ್ ಬಹದ್ದೂರ್ ಶಾಸ್ತ್ರೀಜಿ ಅವರ ಜಯಂತಿಯನ್ನು ಅತ್ಯಂತ ಅರ್ಥಪೂರ್ಣವಾಗಿ ಆಚರಿಸಲಾಯಿತು.
ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ನಿವೃತ್ತ ಶಿಕ್ಷಕ ಲಕ್ಷ್ಮೀಪುತ್ರ, “ಗಾಂಧೀಜಿ ಮತ್ತು ಅವರ ಚಿಂತನೆಗಳು ಇಂದಿಗೂ ಪ್ರಸ್ತುತವಾಗಿವೆ. ಮನೆಯಲ್ಲಿರುವ ಹೆತ್ತ ತಂದೆ-ತಾಯಿಯರನ್ನು ಹಾರೈಕೆ ಮಾಡುವುದೇ ನಿಜವಾದ ಆರಾಧನೆ. ವೃದ್ಧಾಶ್ರಮಗಳು ನಿರ್ಗತಿಕರ ಪಾಲಿನ ದೇವಾಲಯಗಳಿದ್ದಂತೆ ಹಾಗೂ ಇಲ್ಲಿರುವ ವೃದ್ಧರೇ ಸಾಕ್ಷಾತ್ ದೇವರುಗಳು. ಗಾಂಧೀಜಿಯವರ ‘ದರಿದ್ರ ನಾರಾಯಣ’ ಸೇವೆ ಮತ್ತು ಅಹಿಂಸಾ ತತ್ವಗಳು ಪ್ರತಿಯೊಬ್ಬರಿಗೂ ದಾರಿದೀಪ,” ಎಂದು ಅಭಿಪ್ರಾಯಪಟ್ಟರು
ಹಿರಿಯ ಪತ್ರಕರ್ತ ಚಿ. ನಿ. ಪುರುಷೋತ್ತಮ್ ಮಾತನಾಡಿ “ಇಂದಿನ ಶಿಕ್ಷಣ ವ್ಯವಸ್ಥೆಯು ಯುವಜನರಲ್ಲಿ ಮೌಲ್ಯಗಳನ್ನು ಮತ್ತು ತಂದೆ-ತಾಯAದಿರನ್ನು ಗೌರವಿಸುವ ಜಾಗೃತಿಯನ್ನು ಮೂಡಿಸುವಲ್ಲಿ ವಿಫಲವಾಗುತ್ತಿರುವುದು ನೋವಿನ ಸಂಗತಿ. ವೃದ್ಧಾಶ್ರಮಗಳ ಸಂಖ್ಯೆ ಕಡಿಮೆಯಾಗಬೇಕಾದರೆ ಮಕ್ಕಳಲ್ಲಿ ಮೌಲ್ಯಯುತ ಶಿಕ್ಷಣ ಮತ್ತು ಜಾಗೃತಿ ಮೂಡಿಸುವುದು ಅತ್ಯಗತ್ಯ,” ಎಂದರು.
ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾ ನಿರ್ದೇಶಕ ಜಯಣ್ಣ ಬೆಳಗರೆ ಮಾತನಾಡಿ, “ಮಹಾತ್ಮರ ಆದರ್ಶಗಳನ್ನು ಮರೆಯುತ್ತಿರುವ ಇಂದಿನ ದಿನಗಳಲ್ಲಿ ಯಶೋದಾ ಅವರು ಹಾಗೂ ಆಶ್ರಮದ ಸಿಬ್ಬಂದಿ ಈ ರೀತಿಯ ಅರ್ಥಪೂರ್ಣ ಕಾರ್ಯಕ್ರಮಗಳನ್ನು ಆಯೋಜಿಸಿ ಜಾಗೃತಿ ಮೂಡಿಸುತ್ತಿರುವುದು ಶ್ಲಾಘನೀಯ,” ಎಂದು ಬಣ್ಣಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಶ್ರೀ ಶಾರದಾಂಬ ಆಶ್ರಮದ ಮುಖ್ಯಸ್ಥೆ ಯಶೋಧ ಆರ್. ಪಿ. ಮಾತನಾಡಿ, “ಗಾಂಧೀಜಿಯವರ ಜೀವನ ಮತ್ತು ತತ್ವಗಳು ನನಗೆ ವೈಯಕ್ತಿಕವಾಗಿ ದೊಡ್ಡ ಪ್ರೇರಣೆ. ಆಶ್ರಮದ ಬೆನ್ನಲುಬಾಗಿ ನಿಂತಿರುವ ದಾನಿಗಳು ಮತ್ತು ಆದರ್ಶವಾದಿಗಳ ಪ್ರೇರಣೆಯಿಂದಲೇ ಈ ಆಶ್ರಮವನ್ನು ನಡೆಸಲು ಸಾಧ್ಯವಾಗುತ್ತಿದೆ. ಆಶ್ರಮವಾಸಿಗಳು ತಮ್ಮದೇ ಮನೆಯಂತೆ ಹೊಂದಿಕೊಂಡು ಬಾಳುತ್ತಿದ್ದಾರೆ. ಗಾಂಧಿ ಹಾಗೂ ಶಾಸ್ತ್ರೀಜಿಯವರ ತತ್ವಗಳನ್ನು ಅಳವಡಿಸಿಕೊಂಡು ಮೌಲ್ಯಯುತ ದೇಶ ಕಟ್ಟುವಲ್ಲಿ ನಾವೆಲ್ಲರೂ ಶ್ರಮಿಸಬೇಕು” ಎಂದು ಕರೆ ನೀಡಿದರು.
ಇದೇ ಸಂದರ್ಭದಲ್ಲಿ ಶ್ರೀ ಶಾರದಾಂಬ ಟ್ರಸ್ಟ್ ನ ನಿರ್ದೇಶಕರಾದ ದಿನೇಶ್, ರಂಗನಾಥ್, ವೃದ್ಧಾಶ್ರಮದ ಆಡಳಿತಾಧಿಕಾರಿ ವರುಣ್‌ರಾಜ್ ಜಿ., ಆಶ್ರಮದ ಸಿಬ್ಬಂದಿಗಳಾದ ಭವ್ಯ, ಸುದಾಮ, ಸಾಗರ್, ಆಶ್ರಮವಾಸಿಗಳು ಹಾಗೂ ಸಾರ್ವಜನಿಕರು ಉಪಸ್ಥಿತರಿದ್ದರು.
