ಭಾರತ ಜನಗಣತಿ – 2027ರ ಸಿದ್ಧತೆಗಳ ಭಾಗವಾಗಿ, ಸರ್ಕಾರದ ಸುತ್ತೋಲೆ ಅನುಸಾರ ಉಡುಪಿ ನಗರಸಭಾ ವ್ಯಾಪ್ತಿಯಲ್ಲಿ ಏಪ್ರಿಲ್ 16ರಿಂದ ಜನಗಣತಿ ಕಾರ್ಯ ಆರಂಭವಾಗಲಿದೆ ಎಂದು ನಗರಸಭೆ ಪೌರಾಯುಕ್ತರ ಕಚೇರಿ ಪ್ರಕಟಣೆ ತಿಳಿಸಿದೆ.
- Advertisement -
ಈ ಹಿನ್ನಲೆಯಲ್ಲಿ ಆಶಾ ಕಾರ್ಯಕರ್ತರು, ಅಂಗನವಾಡಿ ಕಾರ್ಯಕರ್ತರು ಹಾಗೂ ಶಾಲಾ ಶಿಕ್ಷಕರನ್ನು ಒಳಗೊಂಡ ಗಣತಿಗಾರರ ತಂಡ ಮನೆ ಮನೆಗೆ ಭೇಟಿ ನೀಡಿ ಪ್ರಾಥಮಿಕ ಮಾಹಿತಿ ಸಂಗ್ರಹಣೆ ಹಾಗೂ ಮನೆಪಟ್ಟಿ (ಹೌಸ್‌ ಲಿಸ್ಟಿಂಗ್‌) ಕಾರ್ಯ ನಡೆಸಲಿದೆ. ಪ್ರತಿ ಮನೆಯ ಸದಸ್ಯರ ವಿವರ, ವಾಸಸ್ಥಳದ ಸ್ಥಿತಿ, ಮೂಲಭೂತ ಸೌಕರ್ಯಗಳ ಮಾಹಿತಿ ಸೇರಿದಂತೆ ಅಗತ್ಯ ಮಾಹಿತಿಗಳನ್ನು ದಾಖಲಿಸಲಾಗುತ್ತದೆ.
ನಗರಸಭೆ ವ್ಯಾಪ್ತಿಯ ಎಲ್ಲಾ ನಾಗರಿಕರು ತಮ್ಮ ಮನೆಯ ವಿವರಗಳನ್ನು ಸರಿಯಾಗಿ ನೀಡುವುದರ ಮೂಲಕ ಗಣತಿಗಾರರಿಗೆ ಸಹಕರಿಸಬೇಕು. ಜನಗಣತಿ ಮಾಹಿತಿಯು ಸರ್ಕಾರದ ವಿವಿಧ ಅಭಿವೃದ್ಧಿ ಯೋಜನೆಗಳ ರೂಪುರೇಷೆ ಸಿದ್ಧಪಡಿಸಲು ಪ್ರಮುಖ ಆಧಾರವಾಗಿರುವುದರಿಂದ, ಇದು ಪ್ರತಿಯೊಬ್ಬ ನಾಗರಿಕರ ಜವಾಬ್ದಾರಿಯೂ ಆಗಿದೆ ಎಂದು ಪ್ರಕಟಣೆ ತಿಳಿಸಿದೆ.
