ಮಧ್ಯಪ್ರದೇಶದ ಇಂದೋರ್ ಜಿಲ್ಲೆಯಲ್ಲಿ ಒಟ್ಟು 1.36 ಲಕ್ಷಕ್ಕೂ ಹೆಚ್ಚು ಮತದಾರರ ಹೆಸರುಗಳನ್ನು ಮತಪಟ್ಟಿಯಿಂದ ತೆಗೆದುಹಾಕಲಾಗಿತ್ತು. ಆದರೂ, ಅದಕ್ಕೆ ಸಂಬಂಧಿಸಿದ ಸೂಕ್ತ ಡಿಜಿಟಲ್ ದಾಖಲೆಗಳನ್ನು ನಿರ್ವಹಿಸಲಾಗಿಲ್ಲ/ಇಟ್ಟುಕೊಂಡಿಲ್ಲ ಎಂದು ಅಧಿಕಾರಿಗಳು ಹೇಳಿರುವ ಆಘಾತಕಾರಿ ವಿಚಾರವು ಮಾಹಿತಿ ಹಕ್ಕು (ಆರ್‌ಟಿಐ) ಕಾಯ್ದೆಯಡಿ ಬಹಿರಂಗವಾಗಿದೆ.
ಪ್ರಸ್ತುತ ದೇಶಾದ್ಯಂತ ನಡೆಯುತ್ತಿರುವ ಎಸ್‌ಐಆರ್‌ ಮತ್ತು ಚುನಾವಣಾ ಪಾರದರ್ಶಕತೆ ಕುರಿತ ಭಾರೀ ವಿವಾದಗಳು ನಡೆಯುತ್ತಿವೆ. ಮೋದಿ-ಶಾ ಅಣತಿಯಂತೆ ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್ ಏಕಪಕ್ಷೀಯವಾಗಿ ಎಸ್‌ಐಆರ್‌ ಜಾರಿಗೊಳಿಸಿ, ಅಕ್ರಮವಾಗಿ ಅರ್ಹ ಮತದಾರರನ್ನು ಅಳಿಸಿ ಹಾಕುತ್ತಿದ್ದಾರೆ ಎಂಬ ಗಂಭೀರ ಸಂಗತಿಗಳು ಬಹಿರಂಗಗೊಂಡಿವೆ. ಇದೇ ಸಮಯದಲ್ಲಿ, ಇಂದೋರ್‌ನಲ್ಲಿ ಈ ಹಿಂದೆ ಡಿಲೀಟ್ ಆದ ಮತದಾರರ ಮಾಹಿತಿ/ದಾಖಲೆಗಳೇ ಆಯೋಗದ ಬಳಿ ಇಲ್ಲ ಎಂಬ ವಿಚಾರವು ಹೊರಬಂದಿದ್ದು, ಚುನಾವಣಾ ಆಯೋಗದ ಕಾರ್ಯವೈಖರಿಯ ಬಗ್ಗೆ ಹಲವು ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ.
ಇಂದೋರ್‌ನ ಮಾಜಿ ಕಾರ್ಪೊರೇಟರ್ ದಿಲೀಪ್ ಕೌಶಲ್ ಅವರು ಸಲ್ಲಿಸಿದ್ದ ಆರ್‌ಟಿಐ ಅರ್ಜಿಗೆ ಪ್ರತಿಕ್ರಿಯಿಸಿರುವ ಕ್ಷೇತ್ರದ ಚುನಾವಣಾಧಿಕಾರಿಗಳು ಆಘಾತಕಾರಿ ಮತ್ತು ಆಶ್ಚರ್ಯಕರ ಉತ್ತರ ನೀಡಿದ್ದಾರೆ. 2022ರ ಜನವರಿಯಿಂದ ಅದೇ ವರ್ಷದ ಅಕ್ಟೋಬರ್ ಅವಧಿಯಲ್ಲಿ ಇಂದೋರ್ ಜಿಲ್ಲೆಯ ನಾನಾ ಕ್ಷೇತ್ರಗಳಲ್ಲಿ ಒಟ್ಟು 1,36,552 ಮತದಾರರ ಹೆಸರುಗಳನ್ನು ಡಿಲೀಟ್ ಮಾಡಲಾಗಿತ್ತು. ಈ ಪ್ರಕ್ರಿಯೆಯಲ್ಲಿ ‘ಗರುಡ್’ ಆ್ಯಪ್ ಹಾಗೂ ‘ಇಆರ್‌ಒ ನೆಟ್’ ತಂತ್ರಜ್ಞಾನಗಳನ್ನು ಬಳಸಲಾಗಿತ್ತು. ಈ ಡಿಜಿಟಲ್ ದಾಖಲೆಗಳು, ಬಿಎಲ್‌ಒ ಕಾರ್ಯಾಚರಣೆಯ ವಿವರಗಳು ಅಥವಾ ವೀಡಿಯೋ ಸಾಕ್ಷ್ಯಗಳನ್ನು ಕಾಯ್ದುಕೊಂಡಿಲ್ಲ. ಆ ಸಮಯದಲ್ಲಿ ಅಂತಹ ದಾಖಲೆಗಳನ್ನು ಸಂಗ್ರಹಿಸಿಡಲು ಚುನಾವಣಾ ಆಯೋಗದಿಂದ ಯಾವುದೇ ನಿರ್ದಿಷ್ಟ ಸೂಚನೆಗಳಿರಲಿಲ್ಲ ಎಂಬ ಸಮಜಾಯಿಷಿಯನ್ನೂ ಅಧಿಕಾರಿಗಳು ನೀಡಿದ್ದಾರೆ.
ಈ ಲೇಖನ ಓದಿದ್ದೀರಾ?: ಸುದ್ದಿ ವಿವರ | ಇವಿಎಂ vs ಬ್ಯಾಲೆಟ್‌ ಪೇಪರ್‌: ಯಾಕೀ ವಿವಾದ?
ಆರ್‌ಟಿಐ ಅಂಕಿ-ಸಂಖ್ಯೆಗಳ ಪ್ರಕಾರ, ಇಂಧೋರ್-4 ಕ್ಷೇತ್ರದಲ್ಲಿ 28,391 ಮತ್ತು ಇಂದೋರ್-5 ಕ್ಷೇತ್ರದಲ್ಲಿ 28,091 ಹೆಸರುಗಳನ್ನು ಡಿಲೀಟ್ ಮಾಡಲಾಗಿದೆ. ಇವೆರಡೂ ಕ್ಷೇತ್ರಗಳಲ್ಲೇ ಸುಮಾರು 57%ರಷ್ಟು ಮತದಾರರ ಹೆಸರುಗಳು ಮಾಯವಾಗಿವೆ. ಉಳಿದಂತೆ ರಾವ್ ಕ್ಷೇತ್ರದಲ್ಲಿ 21,346, ಇಂದೋರ್-2ರಲ್ಲಿ 19,983 ಹಾಗೂ ಇಂದೋರ್-1 ರಲ್ಲಿ 12,102 ಹೆಸರುಗಳನ್ನು ಪಟ್ಟಿಯಿಂದ ಹೊರಗಿಡಲಾಗಿತ್ತು. ಈ ಪೈಕಿ ಹೆಚ್ಚಿನ ಕ್ಷೇತ್ರಗಳಲ್ಲಿ ನಿಯಮಿತ ಪ್ರಕ್ರಿಯೆಯಂತೆ ಕೆಲಸ ನಡೆದಿದೆಯೇ ವಿನಃ ಯಾವುದೇ ದಾಖಲೆಗಳನ್ನು ಕಾಯ್ದುಕೊಂಡಿಲ್ಲ ಎಂಬ ಉತ್ತರವನ್ನೇ ಅಧಿಕಾರಿಗಳು ನೀಡಿದ್ದಾರೆ.
ಅಂದಹಾಗೆ, ಆರ್‌ಟಿಐ ಅರ್ಜಿಗೆ ಆರಂಭದಲ್ಲಿ ಚುನಾವಣಾ ಅಧಿಕಾರಿಗಳು ಉತ್ತರ ನೀಡಿರಲಿಲ್ಲ. ಅವರ ಧೋರಣೆಯ ವಿರುದ್ಧ ದಿಲೀಪ್ ಕೌಶಲ್ ಅವರು ಮಧ್ಯಪ್ರದೇಶ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸಂದೀಪ್ ಎನ್. ಭಟ್ ಅವರ ಪೀಠವು, ಬಾಕಿ ಉಳಿದಿರುವ ಆರ್‌ಟಿಐ ಮೇಲ್ಮನವಿಯನ್ನು ಕಾನೂನು ಪ್ರಕಾರ ಪರಿಶೀಲಿಸಿ, ಮುಂದಿನ 45 ದಿನಗಳ ಒಳಗಾಗಿ ಸೂಕ್ತ ನಿರ್ಧಾರ ಕೈಗೊಳ್ಳುವಂತೆ ರಾಜ್ಯ ಮಾಹಿತಿ ಆಯೋಗಕ್ಕೆ ನಿರ್ದೇಶನ ನೀಡಿತ್ತು.
