ಭಾರತದಲ್ಲಿ ತಮ್ಮ ಸಾಮಾಜಿಕ ಜಾಲತಾಣ (ಮೆಟಾ/ಇನ್‌ಸ್ಟಾಗ್ರಾಮ್) ಖಾತೆಯನ್ನು ನಿರ್ಬಂಧಿಸಲಾಗಿದೆ ಎಂದು ಆಮ್ ಆದ್ಮಿ ಪಕ್ಷದ (ಆಪ್) ರಾಷ್ಟ್ರೀಯ ಸಂಚಾಲಕ, ದೆಹಲಿ ಮಾಜಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಆರೋಪಿಸಿದ್ದಾರೆ. ಹಾಗೆಯೇ “ಪ್ರಧಾನಿ ನರೇಂದ್ರ ಮೋದಿಗೆ ತಲೆಬಾಗಬೇಡಿ” ಎಂದು ಮೆಟಾ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ಈ ಬಗ್ಗೆ ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿರುವ ಕೇಜ್ರಿವಾಲ್, “ಮೆಟಾದ ಭಾರತೀಯ ಕಚೇರಿಯನ್ನು ವಿಚಾರಿಸಿದಾಗ ತಮ್ಮ ಖಾತೆಯು ಭಾರತದಲ್ಲಿ ನಿರ್ಬಂಧಕ್ಕೊಳಗಾಗಿದ್ದು, ಬಳಕೆದಾರರಿಗೆ ಲಭ್ಯವಿಲ್ಲದಿರುವುದು ತಿಳಿದುಬಂದಿದೆ” ಎಂದು ತಿಳಿಸಿದ್ದಾರೆ. ಹಾಗೆಯೇ ಇದರ ಸ್ಕ್ರೀನ್‌ಶಾಟ್ ಅನ್ನು ಕೂಡಾ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಪ್ರಧಾನಿ ಮೋದಿ ವಿಡಿಯೋ ಕಿತ್ತೆಸೆದಿದ್ದ ಫೇಸ್‌ಬುಕ್; ಕೊನೆಗೂ ಮಾರ್ಕ್ ಜುಕರ್‌ಬರ್ಗ್ ಕ್ಷಮೆಯಾಚನೆ
ಇನ್ನು ಸ್ಕ್ರೀನ್‌ಶಾಟ್‌ನಲ್ಲಿ ಕಾಣುವಂತೆ “ಕೆಲವು ಸ್ಥಳಗಳಲ್ಲಿ ಖಾತೆ ಲಭ್ಯವಿಲ್ಲ” (Unavailable in some locations) ಎಂದು ಬರೆಯಲಾಗಿದ್ದರೂ, ನಿರ್ಬಂಧಕ್ಕೆ ಕಾರಣ ಉಲ್ಲೇಖಿಸಲಾಗಿಲ್ಲ. ಯಾವುದೇ ಸ್ಪಷ್ಟ ಮಾಹಿತಿ ನೀಡದೆ ಈ ರೀತಿ ಖಾತೆಯನ್ನು ನಿರ್ಬಂಧಿಸಿರುವುದನ್ನು ಕೇಜ್ರಿವಾಲ್ ಖಂಡಿಸಿದ್ದಾರೆ.
ಈ ಸಂದರ್ಭದಲ್ಲೇ ಕೇಂದ್ರದ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿರುವ ಅರವಿಂದ್ ಕೇಜ್ರಿವಾಲ್, “ಪ್ರಧಾನಿಯವರ ಮುಂದೆ ಅಷ್ಟೊಂದು ತಲೆಬಾಗಬೇಡಿ. ಹೀಗೆಯೇ ನಡೆದರೆ ಭಾರತದಲ್ಲಿ ಅವರೊಬ್ಬರ (ಪ್ರಧಾನಿ ಮೋದಿ) ಖಾತೆಯನ್ನು ಮಾತ್ರ ನಡೆಸಲು ಅವರು (ಮೋದಿ) ನಿಮಗೆ ಅನುಮತಿ ನೀಡುತ್ತಾರೆ” ಎಂದು ಚಾಟಿ ಬೀಸಿದ್ದಾರೆ.
ಇನ್ನು ಕೇಜ್ರಿವಾಲ್ ಅವರ ಈ ಆರೋಪಗಳ ಕುರಿತು ಮೆಟಾ ಸಂಸ್ಥೆಯಿಂದ ತಕ್ಷಣಕ್ಕೆ ಯಾವುದೇ ಅಧಿಕೃತ ಸ್ಪಷ್ಟನೆ ಬಂದಿಲ್ಲ. ಆದರೆ, ಇತ್ತೀಚಿನ ದಿನಗಳಲ್ಲಿ ಭಾರತದಲ್ಲಿ ಮೆಟಾ ಸಂಸ್ಥೆಯು ತೀವ್ರ ಪರಿಶೀಲನೆ ಹಾಗೂ ತನಿಖೆಯನ್ನು ಎದುರಿಸುತ್ತಿದೆ.
ಇತ್ತೀಚೆಗೆ ಪ್ರಧಾನಿ ನರೇಂದ್ರ ಮೋದಿ ಅವರ ವಿಡಿಯೋವೊಂದನ್ನು ಫೇಸ್‌ಬುಕ್‌ನಿಂದ ತೆಗೆದುಹಾಕಲಾಗಿತ್ತು. ತಾಂತ್ರಿಕ ದೋಷದಿಂದ ಹೀಗಾಗಿದೆ ಎಂದು ಸ್ಪಷ್ಟನೆ ನೀಡಿದ್ದ ಮೆಟಾದ ಜಾಗತಿಕ ವ್ಯವಹಾರಗಳ ಮುಖ್ಯಸ್ಥ ಜೋಯಲ್ ಕಾಪ್ಲಾನ್ ಮತ್ತು ಸಿಇಒ ಮಾರ್ಕ್ ಜುಕರ್‌ಬರ್ಗ್, ಸರ್ಕಾರ ಹಾಗೂ ಸಂಸದೀಯ ಸಮಿತಿಗೆ ಬೇಷರತ್ ಕ್ಷಮೆಯಾಚಿಸಿದ್ದರು.
ಇನ್ನೊಂದೆಡೆ ಬಾಲ ಲೈಂಗಿಕ ಶೋಷಣೆ ವಿಷಯ (CSAM) ಹಾಗೂ ಡೀಪ್‌ಫೇಕ್ ವಿಷಯಗಳು ವೇದಿಕೆಯಲ್ಲಿ ಪ್ರಚಾರವಾಗುತ್ತಿರುವ ಕುರಿತು ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY) ಮೆಟಾ ಸಂಸ್ಥೆಯನ್ನು ತನಿಖೆಗೊಳಪಡಿಸಿದೆ. ಐಟಿ ಕಾಯ್ದೆಯ ಸೆಕ್ಷನ್ 79 ರ ಅಡಿಯಲ್ಲಿ ನೀಡಲಾಗುವ ‘ಸುರಕ್ಷಿತ ವಲಯ’ ಕಾನೂನು ವಿನಾಯಿತಿಗಳನ್ನು ರದ್ದುಗೊಳಿಸುವ ಎಚ್ಚರಿಕೆಯನ್ನು ಸರ್ಕಾರ ಮೆಟಾ ಸಂಸ್ಥೆಗೆ ನೀಡಿದೆ.
