ಭೀಕರ ಕಾರ್ಯಾಚರಣೆಗಳ ಮೂಲಕ ದೇಶವನ್ನು ನಕ್ಸಲ್ ಮುಕ್ತ ಮಾಡಲು ಮುಂದಾಗಿದ್ದ ಮೋದಿ ಸರ್ಕಾರ, ಕಳೆದ ವಾರವಷ್ಟೇ ‘ಭಾರತವು ನಕ್ಸಲ್ ಮುಕ್ತ’ವಾಗಿದೆ ಎಂದು ಘೋಷಿಸಿದೆ. ಇದಾದ ಕೆಲವೇ ದಿನಗಳಲ್ಲಿ, ಚುನಾವಣೆ ನಡೆಯುತ್ತಿರುವ ಪಶ್ಚಿಮ ಬಂಗಾಳದಲ್ಲಿ ‘ಮಾವೋವಾದಿ’ (ನಕ್ಸಲ್) ಶೈಲಿಯ ಪೋಸ್ಟರ್ ಕಾಣಿಸಿಕೊಂಡಿದೆ. ಚರ್ಚೆ ಹುಟ್ಟುಹಾಕಿದೆ.
ಬಂಗಾಳದ ಪುರುಲಿಯಾ ಜಿಲ್ಲೆಯ ಸೂಕ್ಷ್ಮಪ್ರದೇಶವಾದ ಜಂಗಲ್‌ಮಹಲ್‌ನ ಕೆಲವು ಭಾಗಗಳಲ್ಲಿ ಮಾವೋವಾದಿ ಶೈಲಿಯಲ್ಲಿ ಭಿತ್ತಿಪತ್ರಗಳು ಪತ್ತೆಯಾಗಿವೆ. ಘಾಟ್‌ಬೇರಾ-ಕೆರುವ ವಲಯದ ಬೀಟ್ ಕಚೇರಿಯೊಂದರ ಬಳಿ ಪತ್ತೆಯಾದ ಪೋಸ್ಟರ್‌ಗಲ್ಲಿ, ಬಿಳಿ ಕಾಗದದ ಮೇಲೆ ಕೆಂಪು ಶಾಯಿಯಿಂದ ಬರೆದ ಘೋಷಣೆಗಳು ಮತ್ತು ಸಂದೇಶಗಳಿವೆ. ಇವುಗಳ ಮೇಲೆ ‘ಸಿಪಿಐ (ಮಾವೋವಾದಿ)’ ಹೆಸರಿನ ಸಹಿಯೂ ಇದೆ ಎಂದು ಭದ್ರತಾ ಪಡೆಗಳು ಹೇಳಿವೆ.
ಪೋಸ್ಟರ್‌ಗಳಲ್ಲಿ; “ಜಂಗಲ್‌ಮಹಲ್ ಪ್ರದೇಶದಲ್ಲಿ ಸರಿಯಾದ ರಸ್ತೆಗಳ ನಿರ್ಮಾಣ, ಉದ್ಯೋಗಾವಕಾಶಗಳು, ಸರ್ಕಾರಿ ಯೋಜನೆಗಳಿಂದ ವಂಚಿತರಾದವರಿಗೆ ವಸತಿ ಸೌಕರ್ಯ ಒದಗಿಸಬೇಕು. ವಸತಿ ಹಂಚಿಕೆಯಲ್ಲಿನ ಅಕ್ರಮಗಳ ಬಗ್ಗೆ ತನಿಖೆ ನಡೆಸಬೇಕು” ಎಂಬ ಸ್ಥಳೀಯ ಸಮಸ್ಯೆಗಳು ಮತ್ತು ಬೇಡಿಕೆಗಳನ್ನು ಬರೆಯಲಾಗಿದೆ.
ಅಲ್ಲದೆ, ಸ್ಥಳೀಯ ಪಂಚಾಯತ್ ಪ್ರತಿನಿಧಿಗಳು ಮತ್ತು ಬ್ಲಾಕ್ ಮಟ್ಟದ ಅಧಿಕಾರಿಗಳಿಗೆ ಎಚ್ಚರಿಕೆಗಳನ್ನು ನೀಡಲಾಗಿದೆ. ಕೆಲವು ಪೋಸ್ಟರ್‌ಗಳಲ್ಲಿ ಅಕ್ರಮ ಮದ್ಯದ ದಂಧೆಯನ್ನು ಹತ್ತಿಕ್ಕಲು, ಅರಣ್ಯ ಪ್ರದೇಶಗಳಿಂದ ಅಕ್ರಮವಾಗಿ ಮರ ಕಡಿಯುವುದನ್ನು ನಿಷೇಧಿಸಲು ಕರೆ ನೀಡಲಾಗಿದೆ. ಅರಣ್ಯ ಇಲಾಖೆಯ ಅಧಿಕಾರಿಗಳಿಗೂ ಬೆದರಿಕೆ ಹಾಕಲಾಗಿದೆ.
ಪುರುಲಿಯಾದಲ್ಲಿ ಈ ಹಿಂದೆ ನಕ್ಸಲ್ ಚಟುವಟಿಕೆಗಳು ಹೆಚ್ಚಿನ ಪ್ರಮಾಣದಲ್ಲಿ ನಡೆಯುತ್ತಿದ್ದವು. ಹೀಗಾಗಿ, ಈ ಪೋಸ್ಟರ್‌ಗಳು ಹೆಚ್ಚು ಗಮನ ಸೆಳೆದಿವೆ. ಪೊಲೀಸರು ಮತ್ತು ಕೇಂದ್ರ ಭದ್ರತಾ ಪಡೆಗಳು ತಕ್ಷಣ ಸ್ಥಳಕ್ಕೆ ಧಾವಿಸಿ ಪೋಸ್ಟರ್‌ಗಳನ್ನು ತೆರವುಗೊಳಿಸಿವೆ, ಪೋಸ್ಟರ್ ಅಂಟಿಸಿದವರನ್ನು ಪತ್ತೆಹಚ್ಚಲು ಶೋಧ ಕಾರ್ಯಾಚರಣೆ ಪ್ರಾರಂಭಿಸಿವೆ.
ಕುತೂಹಲಕಾರಿ ಸಂಗತಿಯೆಂದರೆ, ಈ ಪೋಸ್ಟರ್‌ಗಳನ್ನು ಈ ಹಿಂದಿನ ಮಾವೋವಾದಿ ಹೋರಾಟಗಾರರು ಬಳಸುತ್ತಿದ್ದ ಕಾಗದಕ್ಕಿಂತ ಭಿನ್ನವಾಗಿ ಎ-4 ಗಾತ್ರದ ಕಾಗದದ ಮೇಲೆ ಮುದ್ರಿಸಲಾಗಿದೆ. ಈ ಪೋಸ್ಟರ್‌ಗಳ ಮೂಲ ಮತ್ತು ಅಧಿಕೃತತೆಯನ್ನು ನಿರ್ಧರಿಸಲು ತನಿಖೆಯನ್ನು ಪ್ರಾರಂಭಿಸಲಾಗಿದೆ. ಚುನಾವಣೆಗಳು ಸಮೀಪಿಸುತ್ತಿರುವ ಕಾರಣ, ಅಧಿಕಾರಿಗಳು ಈ ಬೆಳವಣಿಗೆಯನ್ನು ಗಂಭೀರ ಭದ್ರತಾ ಕಾಳಜಿಯೆಂದು ಪರಿಗಣಿಸಿದ್ದಾರೆ. ಪ್ರದೇಶದಲ್ಲಿ ಗಸ್ತು ಮತ್ತು ಕಣ್ಗಾವಲು ಚಟುವಟಿಕೆಗಳನ್ನು ತೀವ್ರಗೊಳಿಸಿದ್ದಾರೆ ಎಂದು ವರದಿಯಾಗಿದೆ.
