ಸ್ವಾತಂತ್ರ್ಯದ ನಂತರ ಮಹಾತ್ಮಾ ಗಾಂಧೀಜಿಯವರ ಪ್ರಭಾವದಿಂದಾಗಿ ಕಾಂಗ್ರೆಸ್ ದೇಶಾದ್ಯಂತ ಸಾಧಿಸಿದ್ದ ‘ಏಕಚಕ್ರಾಧಿತ್ಯ ಆಡಳಿತ’ದ ದಿಕ್ಕಿನತ್ತ ಈಗ ಬಿಜೆಪಿ ವೇಗವಾಗಿ ಮುನ್ನಡೆಯುತ್ತಿದೆ. ಪ್ರಸ್ತುತ, ಭಾರತದ ಒಟ್ಟು ಭೂಪ್ರದೇಶದ 80% ರಷ್ಟು ಭಾಗದಲ್ಲಿ ಬಿಜೆಪಿ ಅಥವಾ ಎನ್‌ಡಿಎ ಮೈತ್ರಿಕೂಟದ ಸರ್ಕಾರಗಳ ಆಡಳಿತ ನಡೆಸುತ್ತಿವೆ ಎಂದು ಹೇಳಿದ್ದಾರೆ.
ಗುಜರಾತ್‌ನ ಗಾಂಧಿನಗರದಲ್ಲಿ ಮಾತನಾಡಿರುವ ಅವರು, “ಪ್ರಸ್ತುತ ಗಂಗಾ ನದಿಯ ಉಗಮ ಸ್ಥಾನದಿಂದ ಹಿಡಿದು ಅದು ಸಾಗರವನ್ನು ಸೇರುವ ಪವಿತ್ರ ಜಾಗದ ವರೆಗಿನ ಇಡೀ ಭೂಪ್ರದೇಶವನ್ನು ಒಳಗೊಂಡಿರುವ ಉತ್ತರಾಖಂಡ, ಉತ್ತರ ಪ್ರದೇಶ, ಬಿಹಾರ ಹಾಗೂ ಪಶ್ಚಿಮ ಬಂಗಾಳದವರೆಗಿನ ಎಲ್ಲ ರಾಜ್ಯಗಳಲ್ಲೂ ಈಗ ಸಾಲು ಸಾಲಾಗಿ ಬಿಜೆಪಿಯೇ ಆಡಳಿತ ನಡೆಸುತ್ತಿದೆ. ಪಶ್ಚಿಮ ಬಂಗಾಳದಲ್ಲಿ ಕಳೆದ 50 ವರ್ಷಗಳ ನಿರಂತರ ದುರಾಡಳಿತದಿಂದ ಸಂಪೂರ್ಣವಾಗಿ ಬೇಸತ್ತಿದ್ದ ಪಶ್ಚಿಮ ಬಂಗಾಳದ ಪ್ರಜ್ಞಾವಂತ ಜನರು ಪ್ರಧಾನಿ ಮೋದಿಯವರ ಸಮರ್ಥ ನಾಯಕತ್ವವನ್ನು ನಂಬಿ ಮತ ಚಲಾಯಿಸಿ ಆಶೀರ್ವದಿಸಿದ್ದಾರೆ” ಎಂದು ಹೇಳಿಕೊಂಡಿದ್ದಾರೆ.
“ಪಶ್ಚಿಮ ಬಂಗಾಳದ ಭೀಕರ ಉರಿಬಿಸಿಲಿನ ನಡುವೆಯೂ ಪ್ರಧಾನಿ ಮೋದಿಯವರ ಚುನಾವಣಾ ರ‍್ಯಾಲಿಗಳಿಗೆ ಅಭೂತಪೂರ್ವ ಜನಸ್ತೋಮ ಹರಿದುಬರುತ್ತಿತ್ತು. ಅದನ್ನು ಕಂಡು ತಮಗೆ ಮೊದಲೇ ಬಿಜೆಪಿಯ ವಿಜಯದ ಬಗ್ಗೆ ಸಂಪೂರ್ಣ ವಿಶ್ವಾಸವಿತ್ತು. ಬಂಗಾಳದ ಜನರು ಬಿಜೆಪಿಗೆ 207 ಸ್ಥಾನಗಳನ್ನು ನೀಡುವ ಮೂಲಕ ಪಕ್ಷದ ಹೆಗಲ ಮೇಲೆ ಅತ್ಯಂತ ದೊಡ್ಡ ಜವಾಬ್ದಾರಿಯನ್ನು ಹೊರಿಸಿದ್ದಾರೆ” ಎಂದಿದ್ದಾರೆ.
“ಒಂದು ವೇಳೆ ಯಾರಾದರೂ 1964ರ ಅವಧಿಯ ಗುಜರಾತ್‌ನ ಹಳ್ಳಿಗಳು ಹೇಗಿದ್ದವು, ಅಲ್ಲಿನ ನಗರಗಳು ಹೇಗಿದ್ದವು ಹಾಗೂ ಅಲ್ಲಿನ ವಿದ್ಯುತ್ ದೀಪಗಳ ಪರಿಸ್ಥಿತಿ ಏನಾಗಿತ್ತು ಎಂಬುದನ್ನು ಸಾಕ್ಷ್ಯಚಿತ್ರದ ರೂಪದಲ್ಲಿ ಚಿತ್ರೀಕರಿಸಿದ್ದರೆ, ಅದೇ ರೀತಿ ಇಂದಿನ ಪಶ್ಚಿಮ ಬಂಗಾಳದ ಪರಿಸ್ಥಿತಿಯನ್ನು ಚಿತ್ರೀಕರಿಸಿದರೆ, ಈ ಎರಡನ್ನೂ ಹೋಲಿಕೆ ಮಾಡಿದರೆ, ಪ್ರಸ್ತುತ ಬಂಗಾಳಕ್ಕಿಂತ 1964ರ ಗುಜರಾತ್ ಆಡಳಿತವೇ ಎರಡು ಅಂಕಗಳನ್ನು ಹೆಚ್ಚು ಪಡೆಯುತ್ತದೆ. 1964ರಲ್ಲಿ ಗುಜರಾತ್ ಇದ್ದ ಪರಿಸ್ಥಿತಿಯಲ್ಲಿ ಇಂದು ಬಂಗಾಳ ಇದೆ” ಎಂದು ಲೇವಡಿ ಮಾಡಿದ್ದಾರೆ.
“ಕಳೆದ 50 ವರ್ಷಗಳಿಂದ ಬಂಗಾಳದಲ್ಲಿ ಯಾವುದೇ ನೈಜ ಅಭಿವೃದ್ಧಿ ಚಟುವಟಿಕೆಗಳು ನಡೆದಿಲ್ಲ. ಅಲ್ಲಿನ ಹಿಂದಿನ ಆಡಳಿತಾರೂಢ ಪಕ್ಷದ ನಾಯಕರು ಕೇವಲ ಒಂದು ಟ್ಯೂಬ್ ಲೈಟ್, ಇಟ್ಟಿಗೆ ಅಥವಾ ಸಿಮೆಂಟ್ ಖರೀದಿಯಲ್ಲೂ ಕಮಿಷನ್ ಪಡೆಯುತ್ತಿದ್ದರು. ಅಷ್ಟೇ ಅಲ್ಲದೆ, ಬಂಗಾಳದ ಯಾವುದೇ ಒಬ್ಬ ಸಾಮಾನ್ಯ ನಾಗರಿಕನು ನೆರೆಯ ರಾಜ್ಯಕ್ಕೆ ಹೋಗಿ ಅಲ್ಲಿ ಕೇವಲ 2,000 ರೂಪಾಯಿ ಅಗ್ಗವಾಗಿ ಸಿಗುವ ಒಂದು ಫ್ಯಾನ್ ಖರೀದಿಸಿ ತಂದರೂ ಸಹ, ಆತನಿಂದ ತೆರಿಗೆ ವಸೂಲಿ ಮಾಡಲು ಆಡಳಿತ ಪಕ್ಷದ ಏಜೆಂಟರು ರೈಲ್ವೆ ನಿಲ್ದಾಣಗಳಲ್ಲೇ ಬಂದು ನಿಲ್ಲುತ್ತಿದ್ದರು” ಎಂದು ಅಮಿತ್ ಶಾ ದೂರಿದ್ದಾರೆ.
“ಗುಜರಾತ್‌ನಲ್ಲಿ ಕಾಂಗ್ರೆಸ್ ಎಷ್ಟು ಘೋರವಾಗಿ ಧೂಳೀಪಟವಾಗಿದೆ ಎಂದರೆ, ಅದನ್ನು ಹುಡುಕಲು ಈಗ ದುರ್ಬೀನು ಹಿಡಿದು ನೋಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಇತ್ತೀಚಿನ, ಸ್ಥಳೀಯ ಚುನಾವಣೆಯಲ್ಲಿ ಬಿಜೆಪಿ ರಾಜ್ಯದ ಎಲ್ಲ ಮಹಾನಗರ ಪಾಲಿಕೆಗಳನ್ನು ಗೆದ್ದಿರುವುದಲ್ಲದೆ, 85 ಪುರಸಭೆಗಳ ಪೈಕಿ 77ರಲ್ಲಿ, 34 ಜಿಲ್ಲಾ ಪಂಚಾಯತ್‌ಗಳ ಪೈಕಿ 33 ರಲ್ಲಿ ಹಾಗೂ 260 ತಾಲೂಕು ಪಂಚಾಯತ್‌ಗಳ ಪೈಕಿ 253 ರಲ್ಲಿ ಅಭೂತಪೂರ್ವ ಜಯಭೇರಿ ಬಾರಿಸಿದೆ” ಎಂದು ವಿವರಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ಕನ್ನಡಿಗರೇ ಎಚ್ಚರ: ಎಸ್‌ಐಆರ್‌ – ಮತಪಟ್ಟಿ ಪರಿಶೀಲನೆಯಲ್ಲ, ಪೌರತ್ವ ಪರೀಕ್ಷೆ!
“ಮುಂದಿನ ಗುಜರಾತ್ ವಿಧಾನಸಭಾ ಚುನಾವಣೆಯಲ್ಲಿ ತಾವೇ ಗೆಲ್ಲಲಿದ್ದೇವೆ ಎಂದು ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಹೇಳುತ್ತಿದ್ದಾರೆ. ಆದರೆ, ನನ್ನ ಸಹೋದರನೇ (ರಾಹುಲ್ ಗಾಂಧಿ), ಮುಂದಿನ ಏಳು ಜನ್ಮಗಳೆತ್ತಿ ಬಂದರೂ ಗುಜರಾತ್‌ನಲ್ಲಿ ಕಾಂಗ್ರೆಸ್‌ಗೆ ಯಾವುದೇ ಅವಕಾಶವಿಲ್ಲ” ಎಂದು ಅಮಿತ್ ಶಾ ಹೇಳಿದ್ದಾರೆ.
“ನಾವು ಆಡುತ್ತಿರುವ ಈ ಮಾತುಗಳು ಯಾವುದೇ ಕಾರಣಕ್ಕೂ ಅಹಂಕಾರದ ಪ್ರದರ್ಶನವಲ್ಲ. ಏಕೆಂದರೆ ಅಹಂಕಾರ ಅಥವಾ ಗರ್ವ ಎಂಬುದು ಎಂದಿಗೂ ಒಬ್ಬ ಸಾಮಾನ್ಯ ಬಿಜೆಪಿ ಕಾರ್ಯಕರ್ತನ ಸ್ವಭಾವ ಆಗಿರಲು ಸಾಧ್ಯವೇ ಇಲ್ಲ. ಆದರೆ, ಕಳೆದ ಹಲವು ವರ್ಷಗಳಿಂದ ರಾಜ್ಯದಲ್ಲಿ ಬಿಜೆಪಿ ಸರ್ಕಾರಗಳು ಮಾಡಿರುವ ಜನಪರ ಹಾಗೂ ಅಭಿವೃದ್ಧಿ ಕೆಲಸಗಳ ಗಟ್ಟಿಯಾದ ಅಡಿಪಾಯ ಮತ್ತು ವಿಶ್ವಾಸದ ಮೇಲೆಯೇ ನಾವು ಇಷ್ಟು ಖಚಿತವಾಗಿ ಭವಿಷ್ಯ ನುಡಿಯುತ್ತಿದ್ದೇವೆ” ಎಂದು ಅಮಿತ್ ಶಾ ತಮ್ಮ ಬೆನ್ನನ್ನು ತಾವೇ ತಟ್ಟಿಕೊಂಡಿದ್ದಾರೆ.
