ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಯುದ್ಧದ ಉದ್ವಿಗ್ನತೆಯಿಂದಾಗಿ ಭಾರತ ಭೀಕರ “ಆರ್ಥಿಕ ಸುನಾಮಿ”ಯನ್ನು ಎದುರಿಸಲಿದೆ ಎಂಬ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ಎಚ್ಚರಿಕೆಯು ದೇಶದ ರಾಜಕೀಯ ವಲಯದಲ್ಲಿ ತೀವ್ರ ವಾದ-ಪ್ರತಿವಾದಗಳಿಗೆ ಕಾರಣವಾಗಿದೆ. ರಾಹುಲ್ ಅವರ ಹೇಳಿಕೆಯನ್ನು “ಸಾರ್ವಜನಿಕರಲ್ಲಿ ಭಯ ಬಿತ್ತುವ ತಂತ್ರ” ಎಂದು ತಳ್ಳಿಹಾಕಿರುವ BJP, ಭಾರತದ ಆರ್ಥಿಕತೆಯು ಯಾವುದೇ ಜಾಗತಿಕ ಆಘಾತವನ್ನು ತಡೆದುಕೊಳ್ಳುವಷ್ಟು ಸದೃಢವಾಗಿದೆ ಎಂದು ಹೇಳಿಕೊಂಡಿದೆ. ಆದರೆ, ಇದೇ ವೇಳೆ ಕಾಂಗ್ರೆಸ್ ಮತ್ತು ವಿರೋಧ ಪಕ್ಷಗಳು ಈ ಹಿಂದೆ ಕೋವಿಡ್-19 ಸಂದರ್ಭದಲ್ಲೂ ಬಿಜೆಪಿ ಇದೇ ರೀತಿಯ ಬೇಜವಾಬ್ದಾರಿಯ ನಿಲುವನ್ನು ತಳೆದಿತ್ತು ಎಂದು ಇತಿಹಾಸವನ್ನು ನೆನಪಿಸಿವೆ.
ಮಧ್ಯಪ್ರಾಚ್ಯದ ಯುದ್ಧದ ಬಿಕ್ಕಟ್ಟು ಜಾಗತಿಕ ಮಾರುಕಟ್ಟೆಯ ಮೇಲೆ ಪ್ರಭಾವ ಬೀರುತ್ತಿರುವುದನ್ನು ಉಲ್ಲೇಖಿಸಿ ಮಾತನಾಡಿದ್ದ ರಾಹುಲ್ ಗಾಂಧಿ, ಕೇಂದ್ರದ ಬಿಜೆಪಿ ಸರ್ಕಾರವು ದೇಶದ ಆರ್ಥಿಕ ರಕ್ಷಣಾ ವ್ಯವಸ್ಥೆಯನ್ನು ಧ್ವಂಸಗೊಳಿಸಿದೆ ಎಂದು ಆರೋಪಿಸಿದ್ದರು.
“ಭಾರತಕ್ಕೆ ಭೀಕರ ಆರ್ಥಿಕ ಸುನಾಮಿ ಆಗಮಿಸುತ್ತಿದೆ. ಅಂತಾರಾಷ್ಟ್ರೀಯ ಆರ್ಥಿಕ ಹೊಡೆತಗಳಿಂದ ಭಾರತವನ್ನು ರಕ್ಷಿಸುತ್ತಿದ್ದ ‘ಶಾಕ್ ಅಬ್ಸಾರ್ಬರ್’ (ರಕ್ಷಣಾತ್ಮಕ ಕವಚ) ಗಳನ್ನು ಬಿಜೆಪಿ ಸರ್ಕಾರ ತೆಗೆದುಹಾಕಿದೆ. ಈಗ ಹೆಚ್ಚಾಗುತ್ತಿರುವ ಬೆಲೆ ಏರಿಕೆ ಕೇವಲ ಆರಂಭವಷ್ಟೇ, ಮುಂದೆ ಪರಿಸ್ಥಿತಿ ಇನ್ನೂ ಭೀಕರವಾಗಲಿದೆ,” ಎಂದು ರಾಹುಲ್ ಎಚ್ಚರಿಸಿದ್ದರು.
ರಾಹುಲ್ ಗಾಂಧಿ ಅವರ ಆರೋಪಗಳಿಗೆ ಎಕ್ಸ್ (ಟ್ವಿಟರ್) ಮೂಲಕ ಸರಣಿ ಆರ್ಥಿಕ ಸೂಚಕಗಳನ್ನು ಮುಂದಿಟ್ಟು ಉತ್ತರಿಸಿದ ಬಿಜೆಪಿ ಮುಖ್ಯಸ್ಥ ಅಮಿತ್ ಮಾಳವೀಯ, “ಭಾರತವು ಜಾಗತಿಕ ಬಿಕ್ಕಟ್ಟಿನ ನಡುವೆಯೂ ಅಸಹಾಯಕವಾಗಿ ನಿಂತಿಲ್ಲ, ದೇಶದ ಆರ್ಥಿಕತೆ ಅತ್ಯಂತ ಉತ್ತಮವಾಗಿದೆ” ಎಂದು ಬರೆದುಕೊಂಡಿದ್ದಾರೆ.
ದೇಶೀಯ ವ್ಯಾಪಾರ ಚಟುವಟಿಕೆಗಳು ಉತ್ತಮವಾಗಿದ್ದು, ಮೇ 2026 ರಲ್ಲಿ ಇ-ವೇ ಬಿಲ್ ಜನರೇಷನ್ ಶೇ. 12.9 ರಷ್ಟು ಬೆಳವಣಿಗೆ ಕಂಡಿದೆ. ಉತ್ಪಾದನಾ ವಲಯದ PMI 56.6 ಮತ್ತು ಸೇವಾ ವಲಯದ PMI 58.9 ರಷ್ಟಿದ್ದು, ಉದ್ಯಮ ಕ್ಷೇತ್ರ ವಿಸ್ತರಣೆಯಾಗುತ್ತಿರುವುದನ್ನು ತೋರಿಸುತ್ತದೆ. ಏಪ್ರಿಲ್‌ನಲ್ಲಿ ಭಾರತದ ಚಿಲ್ಲರೆ ಹಣದುಬ್ಬರ ದರವು ಶೇ. 3.48 ರಷ್ಟಿತ್ತು, ಇದು ರಿಸರ್ವ್ ಬ್ಯಾಂಕ್ನ ಶೇ. 4ರ ಗುರಿಗಿಂತಲೂ ಕೆಳಗಿದೆ. ಆರ್ಥಿಕ ವರ್ಷ 2026 ರಲ್ಲಿ ಭಾರತಕ್ಕೆ ದಾಖಲೆಯ 94.5 ಬಿಲಿಯನ್ ಡಾಲರ್‌ನಷ್ಟು ಒಟ್ಟು ವಿದೇಶಿ ನೇರ ಹೂಡಿಕೆ ಹರಿದುಬಂದಿದೆ. ದೇಶದ ಬಲಿಷ್ಠ ಫಾರೆಕ್ಸ್ ರಿಸರ್ವ್ಸ್ ಮತ್ತು ಹೆಚ್ಚುತ್ತಿರುವ ಸೇವಾ ರಫ್ತುಗಳು ಜಾಗತಿಕ ಏರಿಳಿತಗಳ ನಡುವೆಯೂ ರೂಪಾಯಿಗೆ ಸ್ಥಿರತೆಯನ್ನು ಒದಗಿಸುತ್ತಿವೆ. ಜಾಗತಿಕ ತೈಲ ಬೆಲೆ ಏರಿಕೆಯ ಆಘಾತದಿಂದ ಜನರನ್ನು ರಕ್ಷಿಸಲು ಪೆಟ್ರೋಲ್-ಡೀಸೆಲ್ ಮೇಲಿನ ಅಬಕಾರಿ ಸುಂಕ ಕಡಿತಗೊಳಿಸಿರುವುದು, ಸಣ್ಣ ಕೈಗಾರಿಕೆಗಳಿಗೆ (MSME) ಉದ್ಯೋಗ ರಕ್ಷಣೆಗಾಗಿ ECLGS 5.0 ಅಡಿಯಲ್ಲಿ ಸಾಲದ ಗ್ಯಾರಂಟಿ ನೀಡಿರುವುದು ಮತ್ತು ಭವಿಷ್ಯದ ಇಂಧನ ಭದ್ರತೆಗಾಗಿ ಕಲ್ಲಿದ್ದಲು ಅನಿಲೀಕರಣ ಯೋಜನೆಗೆ 37,500 ಕೋಟಿ ರೂ. ಮಂಜೂರು ಮಾಡಿರುವುದನ್ನು ಬಿಜೆಪಿ ಪಟ್ಟಿ ಮಾಡಿದೆ. ಅಲ್ಲದೆ, 2009-2014 ರ ಯುಪಿಎ ಆಡಳಿತದಲ್ಲಿ ರೂಪಾಯಿ ಮೌಲ್ಯ ಶೇ. 36 ರಷ್ಟು ಕುಸಿದಿದ್ದನ್ನು ನೆನಪಿಸಿ, “ರಾಹುಲ್ ಗಾಂಧಿ ಮೊದಲು ಭಯವನ್ನ ಮಾರಾಟ ಮಾಡುವುದನ್ನು ನಿಲ್ಲಿಸಲಿ” ಎಂದಿದೆ ಬಿಜೆಪಿ.
ಬಿಜೆಪಿಯ ಈ ಅಂಕಿ-ಅಂಶಗಳ ಸಮರ್ಥನೆ ಮತ್ತು ರಾಹುಲ್ ಅವರ ಹೇಳಿಕೆಯನ್ನು ʼಹಗುರʼ ಎಂದು ಕರೆದ ನಿಲುವಿಗೆ ವಿರೋಧ ಪಕ್ಷಗಳು ಮತ್ತು ಕಾಂಗ್ರೆಸ್ ಬೆಂಬಲಿಗರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪ್ರಸ್ತುತ ನಡೆಯುತ್ತಿರುವ ಈ ಜಟಾಪಟಿಯು 2020ರ ಆರಂಭದಲ್ಲಿ ದೇಶದಲ್ಲಿದ್ದ ಕೋವಿಡ್-19 ಸಾಂಕ್ರಾಮಿಕದ ಮುನ್ಸೂಚನೆಯ ಸಂದರ್ಭವನ್ನು ನೆನಪಿಸುತ್ತಿದೆ ಎಂದಿದ್ದಾರವರು.
2020ರ ಫೆಬ್ರವರಿ ಮತ್ತು ಮಾರ್ಚ್ ತಿಂಗಳ ಆರಂಭದಲ್ಲಿ, ಕೋವಿಡ್-19 ಸಾಂಕ್ರಾಮಿಕವು ಭಾರತಕ್ಕೆ ಇನ್ನು ಭೀಕರವಾಗಿ ವಕ್ಕರಿಸದಿದ್ದ ಸಮಯದಲ್ಲಿ ರಾಹುಲ್ ಗಾಂಧಿ, “ಭಾರತಕ್ಕೆ ಕರೋನಾ ವೈರಸ್ ಕೇವಲ ರೋಗವಲ್ಲ, ಅದು ದೇಶದ ಆರ್ಥಿಕತೆ ಮತ್ತು ಜನಜೀವನವನ್ನು ಧ್ವಂಸ ಮಾಡಲಿರುವ ದೊಡ್ಡ ಸುನಾಮಿ ಇದ್ದಂತೆ. ಸರ್ಕಾರ ಈಗಲೇ ಎಚ್ಚೆತ್ತುಕೊಂಡು ರಕ್ಷಣಾತ್ಮಕ ಸಿದ್ಧತೆ ಮಾಡಿಕೊಳ್ಳದಿದ್ದರೆ ಭೀಕರ ಪರಿಣಾಮ ಎದುರಿಸಬೇಕಾಗುತ್ತದೆ” ಎಂದು ಸರಣಿ ಟ್ವೀಟ್ ಹಾಗೂ ಪತ್ರಿಕಾಗೋಷ್ಠಿಗಳನ್ನು ನಡೆಸಿದ್ದರು.
ಆ ಸಮಯದಲ್ಲಿ ಕೇಂದ್ರ ಸರ್ಕಾರ ಮತ್ತು ಬಿಜೆಪಿ ನಾಯಕರು ರಾಹುಲ್ ಗಾಂಧಿ ಅವರ ಎಚ್ಚರಿಕೆಯನ್ನು ಅತ್ಯಂತ ಬೇಜವಾಬ್ದಾರಿತನದಿಂದ ಪರಿಗಣಿಸಿದ್ದರು. ರಾಹುಲ್ ಗಾಂಧಿ ಅವರು ದೇಶದ ಜನರಲ್ಲಿ ಸುಖಾಸುಮ್ಮನೆ “ಭಯ ಮತ್ತು ಆತಂಕ” ಹುಟ್ಟಿಸುತ್ತಿದ್ದಾರೆ ಎಂದು ತಮಾಷೆ ಮಾಡಿದ್ದರು. ದೇಶದಲ್ಲಿ ಪರಿಸ್ಥಿತಿ ಸಂಪೂರ್ಣ ಹತೋಟಿಯಲ್ಲಿದೆ ಎಂದು ಬಿಂಬಿಸಿದ್ದರು. ಆದರೆ, ನಂತರದ ದಿನಗಳಲ್ಲಿ ದೇಶ ಎದುರಿಸಿದ ಕೋವಿಡ್ ಮೊದಲ ಹಾಗೂ ಎರಡನೇ ಅಲೆಯ ಭೀಕರತೆ, ಆಮ್ಲಜನಕದ ಕೊರತೆ, ದಿಢೀರ್ ಲಾಕ್‌ಡೌನ್‌ನಿಂದಾಗಿ ಆರ್ಥಿಕತೆ ಅನುಭವಿಸಿದ ಪೆಟ್ಟು ಮತ್ತು ಲಕ್ಷಾಂತರ ವಲಸೆ ಕಾರ್ಮಿಕರು ಬೀದಿಗೆ ಬಿದ್ದ ಭೀಕರ ದೃಶ್ಯಗಳು ರಾಹುಲ್ ಗಾಂಧಿ ಅವರ ಅಂದಿನ ಮುನ್ಸೂಚನೆ ನೂರಕ್ಕೆ ನೂರರಷ್ಟು ನಿಜವಾಗಿತ್ತು ಎಂಬುದನ್ನು ಸಾಬೀತುಪಡಿಸಿದವು. ಆಗ ಸರ್ಕಾರದ ಸಿದ್ಧತೆಯ ಕೊರತೆ ಮತ್ತು ಅತಿವಿಶ್ವಾಸದ ಬೇಜವಾಬ್ದಾರಿ ಹೇಳಿಕೆಗಳು ದೇಶಾದ್ಯಂತ ತೀವ್ರ ಟೀಕೆಗೆ ಒಳಗಾಗಿದ್ದವು.
ಇದೇ ಕಾರಣಕ್ಕೆ, ಇಂದು ಇರಾನ್ ಯುದ್ಧ ಹಾಗೂ ಜಾಗತಿಕ ಪರಿಸ್ಥಿತಿಯಿಂದ ಭಾರತಕ್ಕೆ “ಆರ್ಥಿಕ ಸುನಾಮಿ” ಬರಲಿದೆ ಎಂದು ರಾಹುಲ್ ಗಾಂಧಿ ಎಚ್ಚರಿಸಿದಾಗ, ವಿರೋಧ ಪಕ್ಷಗಳು ಹಳೆಯ ಇತಿಹಾಸವನ್ನು ಮುನ್ನೆಲೆಗೆ ತರುತ್ತಿವೆ. “ಅಂದೂ ಕೂಡ ಕರೋನಾ ಸುನಾಮಿ ಬರುತ್ತದೆ ಎಂದಾಗ ಬಿಜೆಪಿ ಇದೇ ರೀತಿ ಅತಿವಿಶ್ವಾಸದ ಮಾತುಗಳನ್ನಾಡಿ ಕೈತೊಳೆದುಕೊಂಡಿತ್ತು. ಇಂದೂ ಕೂಡ ಯಾವುದೋ ಅಂಕಿ-ಅಂಶಗಳನ್ನಿಟ್ಟುಕೊಂಡು ದೇಶದ ಆರ್ಥಿಕತೆಗೆ ಯಾವುದೇ ಅಪಾಯವಿಲ್ಲ ಎಂದು ಬೇಜವಾಬ್ದಾರಿಯ ಮಾತುಗಳನ್ನಾಡುತ್ತಿದೆ” ಎಂಬುದು ವಿಪಕ್ಷಗಳ ಪ್ರಬಲ ವಾದ.
ಇರಾನ್ ಮತ್ತು ಮಧ್ಯಪ್ರಾಚ್ಯದ ಬಿಕ್ಕಟ್ಟು ಜಾಗತಿಕ ಮಾರುಕಟ್ಟೆಯ ಮೇಲೆ ಪ್ರಭಾವ ಬೀರುತ್ತಿರುವುದು ಆರ್ಥಿಕ ತಜ್ಞರ ಮಟ್ಟದಲ್ಲೂ ಕಳವಳ ಮೂಡಿಸಿದೆ. ಈ ಸನ್ನಿವೇಶದಲ್ಲಿ, ರಾಹುಲ್ ಗಾಂಧಿ ಅವರು ದೇಶಕ್ಕೆ ಮುನ್ನೆಚ್ಚರಿಕೆಯ ರಕ್ಷಣಾ ಕವಚಗಳ ಅಗತ್ಯವನ್ನು ಪ್ರತಿಪಾದಿಸುತ್ತಿದ್ದರೆ, ಆಡಳಿತಾರೂಢ ಬಿಜೆಪಿ ಮಾತ್ರ ದೇಶದ ಆರ್ಥಿಕ “ಶಾಕ್ ಅಬ್ಸಾರ್ಬರ್‌ಗಳು” ಎಂದಿಗಿಂತಲೂ ಈಗ ಹೆಚ್ಚು ಸದೃಢವಾಗಿವೆ ಎಂದು ವಾದಿಸುತ್ತಿದ್ದು, ದೇಶದ ಆರ್ಥಿಕ ಭವಿಷ್ಯದ ಮೇಲಿನ ಈ ಚರ್ಚೆ ಈಗ ರಾಜಕೀಯ ಯುದ್ಧವಾಗಿ ಮಾರ್ಪಟ್ಟಿದೆ.
ಜಿಎಸ್‌ಟಿ ಜಾರಿಯಾದ ಆರಂಭದಲ್ಲೇ ರಾಹುಲ್ ಗಾಂಧಿ ಇದನ್ನು ‘ಗಬ್ಬರ್ ಸಿಂಗ್ ಟ್ಯಾಕ್ಸ್’ ಎಂದು ಕರೆದಿದ್ದರು. ತರಾತುರಿಯಲ್ಲಿ, ಯಾವುದೇ ಪೂರ್ವ ಸಿದ್ಧತೆ ಇಲ್ಲದೆ, ಸಣ್ಣ ಉದ್ಯಮಗಳ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳದೆ ಜಾರಿಗೊಳಿಸಿದ ಈ ತೆರಿಗೆ ವ್ಯವಸ್ಥೆಯಿಂದ ದೇಶದ ಆರ್ಥಿಕತೆ ಮತ್ತು ಸಣ್ಣ ಉದ್ಯಮಗಳು ಧ್ವಂಸವಾಗುತ್ತವೆ ಎಂದು ಎಚ್ಚರಿಸಿದ್ದರು.
ಜಿಎಸ್‌ಟಿಯನ್ನು ಸ್ವಾತಂತ್ರ್ಯದ ನಂತರದ ಅತಿ ದೊಡ್ಡ ಆರ್ಥಿಕ ಸುಧಾರಣೆ ಎಂದು ಬಿಂಬಿಸಿದ ಬಿಜೆಪಿ, ರಾಹುಲ್ ಗಾಂಧಿ ಅವರಿಗೆ ಆರ್ಥಿಕತೆಯ ಜ್ಞಾನವಿಲ್ಲ ಎಂದು ಲೇವಡಿ ಮಾಡಿತ್ತು.
ಆದರೆ, ಜಿಎಸ್‌ಟಿಯಲ್ಲಿದ್ದ ಸಂಕೀರ್ಣ ನಿಯಮಗಳು ಮತ್ತು ತಾಂತ್ರಿಕ ದೋಷಗಳಿಂದಾಗಿ ಲಕ್ಷಾಂತರ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು (MSMEs) ಮುಚ್ಚಿಹೋದವು. ನಂತರದ ತ್ರೈಮಾಸಿಕಗಳಲ್ಲಿ ಭಾರತದ ಜಿಡಿಪಿ (GDP) ಬೆಳವಣಿಗೆ ದರ ತೀವ್ರವಾಗಿ ಕುಸಿಯಿತು. ಸ್ವತಃ ಆರ್ಥಿಕ ತಜ್ಞರು ಮತ್ತು ಆರ್‌ಬಿಐ ಮಾಜಿ ಗವರ್ನರ್‌ಗಳು ಕೂಡ ಜಿಎಸ್‌ಟಿ ಜಾರಿಯಲ್ಲಾದ ಗೊಂದಲಗಳೇ ಆರ್ಥಿಕ ಮಂದಗತಿಗೆ ಕಾರಣ ಎಂದು ಒಪ್ಪಿಕೊಂಡರು. ನಂತರ ಸರ್ಕಾರವೇ ನೂರಾರು ಬಾರಿ ಜಿಎಸ್‌ಟಿ ನಿಯಮಗಳನ್ನು ತಿದ್ದುಪಡಿ ಮಾಡಬೇಕಾಗಿ ಬಂತು.
ಕರೋನಾ ಆರಂಭದಲ್ಲಿ ದೇಶಾದ್ಯಂತ ಯಾವುದೇ ಮುನ್ಸೂಚನೆ ಇಲ್ಲದೆ ದಿಢೀರ್ ಲಾಕ್‌ಡೌನ್ ಘೋಷಿಸಿದಾಗ ರಾಹುಲ್ ಗಾಂಧಿ ಆಕ್ರೋಶ ಹೊರಹಾಕಿದ್ದರು. “ಲಾಕ್‌ಡೌನ್ ಕೇವಲ ರೋಗ ಹರಡುವುದನ್ನು ತಡೆಯಬಹುದೇ ಹೊರತು, ಕರೋನಾವನ್ನು ಮುಗಿಸುವುದಿಲ್ಲ. ಆದರೆ, ಬಡವರು, ಕಾರ್ಮಿಕರು ಮತ್ತು ಸಣ್ಣ ಕೈಗಾರಿಕೆಗಳಿಗೆ ಆರ್ಥಿಕ ಪ್ಯಾಕೇಜ್ ನೀಡದೆ ಹೀಗೆ ಲಾಕ್‌ಡೌನ್ ಮಾಡಿದರೆ ದೇಶದ ಬೆನ್ನೆಲುಬು ಮುರಿಯುತ್ತದೆ” ಎಂದು ಎಚ್ಚರಿಸಿದ್ದರು.
ಪ್ರಧಾನಿ ಮೋದಿಯವರ ಈ ನಿರ್ಧಾರವನ್ನು ಜಾಗತಿಕ ಮಟ್ಟದ ಶ್ರೇಷ್ಠ ನಿರ್ಧಾರ ಎಂದು ಬಿಜೆಪಿ ನಾಯಕರು ಕೊಂಡಾಡಿದರು ಮತ್ತು ವಿಪಕ್ಷಗಳು ಜಾಗತಿಕ ಬಿಕ್ಕಟ್ಟಿನ ಸಮಯದಲ್ಲೂ ರಾಜಕೀಯ ಮಾಡುತ್ತಿವೆ ಎಂದರು. ಆದರೆ, ಯಾವುದೇ ಆರ್ಥಿಕ ರಕ್ಷಣಾ ಕವಚ ಇಲ್ಲದೆ ಜಾರಿಯಾದ ಲಾಕ್‌ಡೌನ್‌ನಿಂದಾಗಿ, ಭಾರತದ ಇತಿಹಾಸದಲ್ಲೇ ಮೊದಲ ಬಾರಿಗೆ ಆ ತ್ರೈಮಾಸಿಕದ ಜಿಡಿಪಿ ಭಾರೀ ಪ್ರಮಾಣದಲ್ಲಿ ಕುಸಿತ ಕಂಡಿತು. ವಲಸೆ ಕಾರ್ಮಿಕರು ಉದ್ಯೋಗವಿಲ್ಲದೆ ಬೀದಿಗೆ ಬಿದ್ದರು. ತದನಂತರ ವಿಪಕ್ಷಗಳ ಒತ್ತಡಕ್ಕೆ ಮಣಿದು ಕೇಂದ್ರ ಸರ್ಕಾರವು ಉದ್ಯಮಗಳಿಗೆ ಮತ್ತು ಬಡವರಿಗೆ ಉಚಿತ ರೇಷನ್ ಹಾಗೂ ಸಾಲದ ನೆರವಿನ ಪ್ಯಾಕೇಜ್‌ಗಳನ್ನು ಘೋಷಿಸಬೇಕಾಯಿತು.
ಕೇಂದ್ರ ಸರ್ಕಾರ ಮೂರು ಕೃಷಿ ಕಾಯ್ದೆಗಳನ್ನು ತಂದಾಗ, ಇವು ರೈತರ ಕಲ್ಯಾಣಕ್ಕಾಗಿ ಅಲ್ಲ, ಬದಲಿಗೆ ಭಾರತದ ಕೃಷಿ ವಲಯವನ್ನು ಇಬ್ಬರು-ಮೂವರು ದೊಡ್ಡ ಕಾರ್ಪೊರೇಟ್ ಉದ್ಯಮಿಗಳ ಕೈಗೆ ಒಪ್ಪಿಸಲು ತರಲಾಗಿದೆ. ಇದರಿಂದ ಕನಿಷ್ಠ ಬೆಂಬಲ ಬೆಲೆ (MSP) ವ್ಯವಸ್ಥೆ ನಾಶವಾಗಿ, ಭವಿಷ್ಯದಲ್ಲಿ ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೇರಲಿದೆ ಎಂದು ರಾಹುಲ್ ಸಂಸತ್ತಿನ ಒಳಗೂ ಹೊರಗೂ ಹೋರಾಟ ಮಾಡಿದ್ದರು.
ಈ ಕಾಯ್ದೆಗಳು ರೈತರಿಗೆ ಸ್ವಾತಂತ್ರ್ಯ ತಂದುಕೊಡುತ್ತವೆ, ರಾಹುಲ್ ಗಾಂಧಿ ಮತ್ತು ಕಾಂಗ್ರೆಸ್ ರೈತರನ್ನು ದಿಕ್ಕು ತಪ್ಪಿಸುತ್ತಿದ್ದಾರೆ ಎಂದು ಬಿಜೆಪಿ ದೇಶಾದ್ಯಂತ ಪ್ರಚಾರ ಹಮ್ಮಿಕೊಂಡಿತು.
ವರ್ಷವಿಡೀ ನಡೆದ ರೈತರ ಐತಿಹಾಸಿಕ ಹೋರಾಟ, ನೂರಾರು ರೈತರ ಸಾವು ಮತ್ತು ಉತ್ತರ ಪ್ರದೇಶ, ಪಂಜಾಬ್ ಚುನಾವಣೆಗಳ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರು ಸ್ವತಃ ಟಿವಿ ಮುಂದೆ ಬಂದು “ನಮ್ಮ ಪ್ರಯತ್ನದಲ್ಲಿ ಏನೋ ಕೊರತೆಯಾಗಿದೆ, ರೈತರನ್ನು ಒಪ್ಪಿಸಲು ನಮಗೆ ಸಾಧ್ಯವಾಗಲಿಲ್ಲ” ಎಂದು ಕ್ಷಮೆ ಯಾಚಿಸಿ ಮೂರೂ ಕಾಯ್ದೆಗಳನ್ನು ಹಿಂಪಡೆದರು. ರಾಹುಲ್ ಗಾಂಧಿ ಅಂದು ಹೇಳಿದ ಮಾತೇ ಅಂತಿಮವಾಗಿ ನಿಜವಾಯಿತು.
ಅದಾನಿ ಸಮೂಹದ ಅತಿಯಾದ ಬೆಳವಣಿಗೆ, ಸಾರ್ವಜನಿಕ ಬ್ಯಾಂಕುಗಳಾದ ಎಸ್‌ಬಿಐ (SBI) ಮತ್ತು ಎಲ್‌ಐಸಿ (LIC) ಹಣವನ್ನು ನಿಯಮ ಮೀರಿ ಅದಾನಿ ಕಂಪನಿಗಳಲ್ಲಿ ಹೂಡಿಕೆ ಮಾಡುತ್ತಿರುವುದರ ಬಗ್ಗೆ ರಾಹುಲ್ ಗಾಂಧಿ ಸತತವಾಗಿ ಸಂಸತ್ತಿನಲ್ಲಿ ಧ್ವನಿ ಎತ್ತಿದ್ದರು. ಒಂದು ಕಂಪನಿಯ ಅತಿಯಾದ ಸಾಲದ ಮುಖವಾಡ ಕಳಚಿದರೆ ದೇಶದ ಸಾಮಾನ್ಯ ಜನರ ಹೂಡಿಕೆಗೆ ಧಕ್ಕೆಯಾಗುತ್ತದೆ ಎಂದು ಎಚ್ಚರಿಸಿದ್ದರು.
ಇದನ್ನೂ ಓದಿ: ಶಿಕ್ಷಕರನ್ನು ʼಕವಡೆʼ ಕಿಮ್ಮತ್ತಿಲ್ಲದವರು ಎಂದ ಅಂಜನಾ ಕಶ್ಯಪ್; ಹುರಿದು ಮುಕ್ಕಿದ ಬಬಿತಾ ಟೀಚರ್!
ಬಿಜೆಪಿ ಇದನ್ನು ದೇಶದ ಯಶಸ್ವಿ ಉದ್ಯಮಿಯೊಬ್ಬರ ಮೇಲಿನ ವೈಯಕ್ತಿಕ ದ್ವೇಷ ಮತ್ತು ದೇಶದ ಪ್ರಗತಿಯನ್ನು ಸಹಿಸದ ವಿಪಕ್ಷಗಳ ಕುತಂತ್ರ ಎಂದು ಜರೆದಿತ್ತು.
2023ರ ಆರಂಭದಲ್ಲಿ ಅಮೆರಿಕದ ‘ಹಿಂಡನ್‌ಬರ್ಗ್’ ವರದಿ ಹೊರಬಂದಾಗ, ಅದಾನಿ ಗ್ರೂಪ್‌ನ ಷೇರುಗಳು ಪಾತಾಳಕ್ಕೆ ಕುಸಿದವು. ಲಕ್ಷಾಂತರ ಕೋಟಿ ರೂಪಾಯಿ ಹೂಡಿಕೆದಾರರ ಹಣ ಮಣ್ಣಾಯಿತು. ಎಸ್‌ಬಿಐ ಮತ್ತು ಎಲ್‌ಐಸಿ ಷೇರುಗಳೂ ತಲ್ಲಣಿಸಿದವು. ಆರ್ಥಿಕ ನಿಯಂತ್ರಣ ಸಂಸ್ಥೆಯಾದ ಸೆಬಿ (SEBI) ಮತ್ತು ಸುಪ್ರೀಂ ಕೋರ್ಟ್ ಈ ವಿಚಾರದಲ್ಲಿ ತನಿಖೆಗೆ ಆದೇಶಿಸಬೇಕಾಯಿತು. ತಾನು ಈ ಹಿಂದೆ ಹೇಳಿದ್ದ ಆತಂಕವೇ ಇಲ್ಲಿ ನಿಜವಾಗಿದೆ ಎಂದು ರಾಹುಲ್ ಗಾಂಧಿ ಅಂದು ಮತ್ತೆ ಸಾಬೀತುಪಡಿಸಿದ್ದರು.
ರಾಜಕೀಯವಾಗಿ ಇಬ್ಬರ ನಡುವೆ ಭಿನ್ನಾಭಿಪ್ರಾಯಗಳಿದ್ದರೂ, ಆರ್ಥಿಕ ಮುನ್ಸೂಚನೆಗಳ ವಿಚಾರಕ್ಕೆ ಬಂದಾಗ ರಾಹುಲ್ ಗಾಂಧಿ ಅವರ ಎಚ್ಚರಿಕೆಗಳನ್ನು ನಿರ್ಲಕ್ಷಿಸಿದ ಸರ್ಕಾರ, ನಂತರದ ದಿನಗಳಲ್ಲಿ ಕಳ್ಳಬೆಕ್ಕಿನಂತೆ ಅನಿವಾರ್ಯವಾಗಿ ಎದುರಿಸಬೇಕಾಗಿ ಬಂದದ್ದು ಈಗ ಇತಿಹಾಸ.
