ಆದಾಯ ತೆರಿಗೆ ಇಲಾಖೆ ಕಾಯ್ದೆಗೆ ಕೇಂದ್ರ ಸರ್ಕಾರ ಕೆಲವೊಂದು ಬದಲಾವಣೆಗಳನ್ನು ತಂದಿದೆ. ನಗದು ವ್ಯವಹಾರಕ್ಕೆ ಕಡಿವಾಣ ಹಾಕಲು ಕ್ರಮ ಕೈಗೊಳ್ಳಲಾಗಿದೆ. ಇದು ನಾಳೆಯಿಂದ(ಏ.01) ಜಾರಿಗೆ ಬರಲಿದೆ. ಸಾರ್ವಜನಿಕರು ಈ ಕುರಿತು ಗಮನ ಹರಿಸಬೇಕಾದುದು ಅಗತ್ಯವಾಗಿದೆ.
2025ರ ಆದಾಯ ತೆರಿಗೆ ಕಾಯ್ದೆಯ ಹೊಸ ನಿಯಮಗಳ ಪ್ರಕಾರ, ವಾರ್ಷಿಕ 12.75 ಲಕ್ಷ ರೂಪಾಯಿಗಳವರೆಗಿನ ಆದಾಯಕ್ಕೆ ತೆರಿಗೆ ರಿಯಾಯಿತಿ ದೊರಕಲಿದೆ. ಮನೆ ಬಾಡಿಗೆ ಮತ್ತು ಮಕ್ಕಳ ಶಿಕ್ಷಣದ ಮೇಲಿನ ವಿನಾಯಿತಿಗಳು ಮುಂದುವರಿಯಲಿವೆ. ಮುಖ್ಯವಾಗಿ, ಇನ್ನು ಮುಂದೆ ‘ಫಿನಾನ್ಸಿಯಲ್ ಇಯರ್’/ಆರ್ಥಿಕ ವರ್ಷ ಮತ್ತು ‘ಅಸೆಸ್ಮೆಂಟ್ ಇಯರ್’ ಎಂಬ ಗೊಂದಲಕಾರಿ ಪದಗಳ ಬದಲಿಗೆ ‘ಟ್ಯಾಕ್ಸ್ ಇಯರ್’/ತೆರಿಗೆ ವರ್ಷ ಎಂಬ ಏಕರೂಪದ ಪದವನ್ನು ಬಳಸಲಾಗುತ್ತಿದೆ
ಸ್ಟಾಂಡರ್ಡ್ ಡಿಡಕ್ಷನ್ ಏರಿಕೆ
ವೇತನ ಪಡೆಯುವ ಉದ್ಯೋಗಿಗಳಿಗೆ ನೀಡಲಾಗುವ ಪ್ರಮಾಣಿತ ಕಡಿತದ ಮಿತಿಯನ್ನು 50,000 ರೂ.ಗಳಿಂದ 75,000 ರೂ.ಗೆ ಏರಿಕೆ ಮಾಡಲಾಗಿದೆ. ಇದರಿಂದ ತೆರಿಗೆದಾರರ ಕೈಯಲ್ಲಿ ಹೆಚ್ಚಿನ ಹಣ ಉಳಿಯಲಿದೆ. ಇನ್ನು, ಐಟಿಆರ್ ಸಲ್ಲಿಕೆಯ ಅಂತಿಮ ಗಡುವನ್ನು ಆಗಸ್ಟ್ 31ರವರೆಗೆ ವಿಸ್ತರಿಸಿರುವುದು ತೆರಿಗೆದಾರರಿಗೆ ನಿರಾಳ ತಂದಿದೆ. ಆದರೆ, ಹೆಚ್ಆರ್‌ಎ ನಿಯಮಗಳು ಇನ್ನು ಮುಂದೆ ಹೆಚ್ಚು ಕಟ್ಟುನಿಟ್ಟಾಗಿರಲಿವೆ. ಮಾತ್ರವಲ್ಲದೆ, ಬ್ಯಾಂಕಿಂಗ್ ವಲಯದಲ್ಲಿಯೂ ಕೆಲವು ಬದಲಾವಣೆಗಳಾಗಿದ್ದು, ತಿಂಗಳಿಗೆ ಗರಿಷ್ಠ 5 ಬಾರಿ ಮಾತ್ರ ಉಚಿತವಾಗಿ ಎಟಿಎಂನಿಂದ ಹಣ ಪಡೆಯಬಹುದು. ನಿಗದಿತ ಮಿತಿಗಿಂತ ಹೆಚ್ಚಿನ ಬಾರಿ ಹಣ ಡ್ರಾ ಮಾಡಿದರೆ ಪ್ರತಿ ವಹಿವಾಟಿಗೆ 23 ರೂ. ಹೆಚ್ಚುವರಿ ಶುಲ್ಕ ಪಾವತಿಸಬೇಕಾಗುತ್ತದೆ. ಅಲ್ಲದೆ, ನಿಮ್ಮ ಡೆಬಿಟ್ ಕಾರ್ಡ್ ನ ಮಾದರಿಗೆ ಅನುಗುಣವಾಗಿ ಪ್ರತಿದಿನದ ಹಣ ವಿಥ್‌ಡ್ರಾ ಮಿತಿಯಲ್ಲಿ ವ್ಯತ್ಯಾಸವಾಗಲಿದೆ.
ಆನ್ಲೈನ್ ವಹಿವಾಟುಗಳನ್ನು ಹೆಚ್ಚು ಭದ್ರಪಡಿಸಲು ಟು-ಫ್ಯಾಕ್ಟರ್ ಅಥೆಂಟಿಕೇಶನ್ ಕಡ್ಡಾಯಗೊಳಿಸಲಾಗಿದೆ. ಸಣ್ಣ ಮೊತ್ತದ ಪಾವತಿಗಳಿಗೂ ಇನ್ಮುಂದೆ ಒಟಿಪಿ ಅಥವಾ ಬಯೋಮೆಟ್ರಿಕ್ ದೃಢೀಕರಣ ಅನಿವಾರ್ಯವಾಗಲಿದೆ. ಇದು ಸೈಬರ್ ವಂಚನೆಗಳನ್ನು ತಡೆಯಲು ಸಹಕಾರಿಯಾಗಲಿದೆ.
ಇನ್ನೇನೆಲ್ಲಾ ಬದಲಾವಣೆಯಾಗಲಿದೆ ?
ಐಟಿಆರ್-ಯು ಫೈಲ್: ಆದಾಯ ತೆರಿಗೆ ರಿಟರ್ನ್ ಬಗ್ಗೆ ರಿಪೂರ್ಟ್ ಮಾಡುವುದನ್ನು ತಪ್ಪಿಸಿದ್ದರೆ, ನವೀಕರಿಸಿದ ಆದಾಯ ತೆರಿಗೆ ರಿಟರ್ನ್ (ಐಟಿಆರ್-ಯು) ಫೈಲ್ ಮಾಡಬೇಕಾಗಿದೆ. ಹೆಚ್ಚುವರಿ ತೆರಿಗೆ, ದಂಡ ಪಾವತಿಸಬೇಕಾಗಬಹುದಾಗಿದೆ. ಆದರೆ ಇದು ಮುಂದೆ ಆದಾಯ ತೆರಿಗೆ ಇಲಾಖೆಯಿಂದ ಪರಿಶೀಲನೆಗೆ ಒಳಗಾಗುವುದನ್ನು ತಪ್ಪಿಸುತ್ತದೆ.
ಪಾನ್ ಕಾರ್ಡ್ ಪಡೆಯಲು ಹೊಸ ನಿಯಮ : ಪಾನ್ ಕಾರ್ಡ್ ಗೆ ಅರ್ಜಿ ಸಲ್ಲಿಸಲು ಏಪ್ರಿಲ್ 1ರಿಂದ ಹೆಚ್ಚುವರಿ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ. ಪ್ರಮುಖವಾಗಿ ಆಧಾರ್ ದೃಢೀಕರಣ ಪ್ರಕ್ರಿಯೆಯನ್ನು ಮಾಡಲಾಗುತ್ತದೆ. ಪಾನ್ ಕಾರ್ಡ್ನಲ್ಲಿರುವ ಹೆಸರು ಆಧಾರ್ ಕಾರ್ಡ್ನಲ್ಲಿರುವಂತೆಯೇ ಇರಲಿದೆ. ಅರ್ಜಿ ಸಲ್ಲಿಸುವವರು ತಮ್ಮ ಆಧಾರ್ ವಿವರಗಳು ಸರಿಯಾಗಿವೆಯೇ ಎನ್ನುವುದನ್ನು ಮೊದಲು ಖಚಿತಪಡಿಸಿಕೊಳ್ಳಬೇಕಾಗುತ್ತದೆ.
ಎಸ್‌ಬಿಐ ಕ್ರೆಡಿಟ್ ಕಾರ್ಡ್: ಏಪ್ರಿಲ್ 1ರಿಂದ ಎಸ್.ಬಿ.ಐ ಕಾರ್ಡ್ ಗ್ರಾಹಕರು ರಿವಾರ್ಡ್ ಪಾಯಿಂಟ್ಗಳನ್ನು ಸ್ಟೇಟ್ಮೆಂಟ್ ಕ್ರೆಡಿಟ್ ಆಗಿ ಹೇಗೆ ಪರಿವರ್ತಿಸಬಹುದು ಎನ್ನುವುದರ ಮೇಲೆ ಪರಿಷ್ಕೃತ ನಿಯಮಗಳು ಜಾರಿಯಾಗಲಿವೆ. ಇದರ ಕುರಿತು ಸಂಪೂರ್ಣ ಮಾಹಿತಿಯು ಬ್ಯಾಂಕ್ ವೆಬ್ ಸೈಟ್ ನಲ್ಲಿ ಲಭ್ಯವಿದೆ.
ಹೆಚ್ ಡಿಎಫ್ ಸಿ ಬ್ಯಾಂಕ್ ನಿಯಮ ಬದಲಾವಣೆ:ಸಾಲ ದರಗಳಲ್ಲಿನ ಬದಲಾವಣೆ, ಸ್ಥಿರ ಠೇವಣಿ ಬಡ್ಡಿದರ, ಎಟಿಎಂ ನಗದು ಪಡೆಯುವಿಕೆ ನಿಯಮಗಳು ಮತ್ತು ಲಾಕರ್ ಶುಲ್ಕಗಳು ಒಳಗೊಂಡಂತೆ ಹಲವು ನವೀಕರಣಗಳನ್ನು ಹೆಚ್ ಡಿಎಫ್ ಸಿ ಬ್ಯಾಂಕ್ ಪ್ರಕಟಿಸಿದೆ.
ಫಾಸ್ಟ್ ಟ್ಯಾಗ್ ಪಾಸ್ ಶುಲ್ಕ ಹೆಚ್ಚಳ:
ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ 2026–27ರ ಹಣಕಾಸು ವರ್ಷದಲ್ಲಿ ಫಾಸ್ಟ್ ಟ್ಯಾಗ್ ವಾರ್ಷಿಕ ಪಾಸ್ ಅನ್ನು ಪರಿಷ್ಕರಿಸುವುದಾಗಿ ಘೋಷಣೆ ಮಾಡಿದೆ. ವಾರ್ಷಿಕ ಪಾಸ್ ಶುಲ್ಕವನ್ನು 3,000 ರೂ.ಗಳಿಂದ 3,075 ರೂ.ಗಳಿಗೆ ಹೆಚ್ಚಳ ಮಾಡಲಾಗುವುದು ಎಂದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಘೋಷಣೆ ಮಾಡಿದೆ. ಏಪ್ರಿಲ್ 1ರಿಂದ ಪರಿಷ್ಕೃತ ದರ ಜಾರಿಗೆ ಬರಲಿದೆ.
ರೂಪೇ ಡೆಬಿಟ್ ಕಾರ್ಡ್:ಏಪ್ರಿಲ್ 1ರಿಂದ ರೂಪೇ ಡಿಬಿಟ್ ಕಾರ್ಡ್ ಹೊಂದಿರುವವರು ಉಚಿತವಾಗಿ ದೇಶೀಯ ಮತ್ತು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ರೈಲು ಲಾಂಜ್ಗಳನ್ನು ಪ್ರವೇಶಿಸಲು ಸಾಧ್ಯವಾಗುವುದಿಲ್ಲ. ವಿಮಾನ ನಿಲ್ದಾಣ ಅಥವಾ ರೈಲ್ವೆ ಲೌಂಜ್ ಪ್ರವೇಶ ಪ್ರಯೋಜನಗಳಿಗೆ ಅರ್ಹತೆ ಪಡೆಯಲು ಗ್ರಾಹಕರು ಬ್ಯಾಂಕ್ ನಿರ್ದಿಷ್ಟ ಪಡಿಸಿದ ಖರ್ಚು ಮಾನದಂಡಗಳನ್ನು ಪೂರೈಸಿರಬೇಕಾಗುತ್ತದೆ.
ಪಾವತಿ ದೃಢೀಕರಣಕ್ಕೆ ಹೆಚ್ಚುವರಿ ನಿಯಮ : ನಾಳೆಯಿಂದ ಎಲ್ಲಾ ಡಿಜಿಟಲ್ ಪಾವತಿ ವಹಿವಾಟುಗಳು ದೃಢೀಕರಣದ ಎರಡು ಅಂಶಗಳನ್ನು ಪೂರೈಸಬೇಕಾಗುತ್ತದೆ. ಡಿಜಿಟಲ್ ಪಾವತಿ ವ್ಯವಸ್ಥೆ ಪ್ರಾಥಮಿಕವಾಗಿ ಒನ್ ಟೈಮ್ ಪಾಸ್ವರ್ಡ್ (ಒಟಿಪಿ) ಅನ್ನು ಹೆಚ್ಚುವರಿ ಅಂಶವಾಗಿ ಅಳವಡಿಸಿಕೊಂಡಿದೆ. ಒಟಿಪಿ ಇನ್ನು ಮುಂದೆ ಎಸ್ಎಂಎಸ್ ಬದಲಿಗೆ ಗ್ರಾಹಕರು ಬಳಸುವ ಬ್ಯಾಂಕಿಂಗ್ ಅಪ್ಲಿಕೇಶನ್’ನಲ್ಲಿಯೇ ದೊರೆಯಲಿದೆ. ಹಾಗಾಗಿ ಯಾವ ಬ್ಯಾಂಕ್ ಅಲ್ಲಿ ಖಾತಾದಾರರಾಗಿರುತ್ತಿರೋ ಆ ಬ್ಯಾಂಕುಗಳ ಅಪ್ಲಿಕೇಶನ್ ಗಳನ್ನು ಇನ್ಸ್ಟಾಲ್ ಮಾಡಿಕೊಳ್ಳವುದು ಅಗತ್ಯ.
ವಹಿವಾಟಿಗೆ 5 ಲಕ್ಷ ಮಿತಿ : ಬ್ಯಾಂಕಿಂಗ್ ಅಪ್ಲಿಕೇಶನ್ ಮೂಲಕ ಐದು ಲಕ್ಷಕ್ಕಿಂತ ಮೇಲ್ಪಟ್ಟು ಮಾಡುವ ಎಲ್ಲಾ ವಹಿವಾಟಿಗೆ ಆಧಾರ್ ಲಿಂಕ್, ಫಿಂಗರ್ ಪ್ರಿಂಟ್ ಅಥವಾ ಫೇಸ್ ಸ್ಕ್ಯಾನ್ ಮಾಡಲೇಬೇಕು. ಇಲ್ಲವಾದರೆ ಯಾವುದೇ ಪಾವತಿಯನ್ನು ಮಾಡಲು ಸಾಧ್ಯವಾಗುವುದಿಲ್ಲ. ಇದರೊಂದಿಗೆ ಆನ್ಲೈನ್ ಪಾವತಿಯ ಸಂದರ್ಭದಲ್ಲಿ ಹೆಚ್ಚುವರಿ ಪ್ರಶ್ನೆಗಳನ್ನು(Queries) ಕೇಳಲಾಗುತ್ತದೆ.
ಬಿಹೇವಿಯರ್ ಬಯೋಮೆಟ್ರಿಕ್ಸ್ : ಬ್ಯಾಂಕಿಂಗ್ ಅಪ್ಲಿಕೇಶನ್ ನಲ್ಲಿ ಬಿಹೇವಿಯರ್ ಬಯೋಮೆಟ್ರಿಕ್ಸ್ ಅನ್ನು ಅಳವಡಿಸಲಾಗಿದೆ. ಇನ್ನು ಮುಂದೆ ಗ್ರಾಹಕರು ಬ್ಯಾಂಕಿಂಗ್ ಅಪ್ಲಿಕೇಶನ್ ಬಳಸುವಾಗ ಅವರು ಟೈಪ್ ಮಾಡುವ ವಿಧಾನ, ವೇಗ, ಸ್ಕ್ರೀನ್ ನಿರ್ವಹಣೆ ಮೂಲಕ ಗ್ರಾಹಕರ ಗುರುತು ಪತ್ತೆ ಹಚ್ಚುತ್ತದೆ.
ಅಲರ್ಟ್ ಸಂದೇಶ : ಏಪ್ರಿಲ್ 1ರಿಂದ ನಕಲಿ ಆಪ್ ಅಥವಾ ಮಾಲ್ವೇರ್ ಡೌನ್’ಲೋಡ್ ಆದ ತಕ್ಷಣವೇ ಬ್ಯಾಂಕ್ ನಲ್ಲಿ ರಿಜಿಸ್ಟರ್ ಆಗಿರುವ ಮೊಬೈಲ್ ನಂಬರಿಗೆ ಎಚ್ಚರಿಕೆಯ ಸಂದೇಶಗಳು ದೊರೆಯಲಿದೆ.
ಸಮಯ ನಿರ್ಬಂಧ: ಇನ್ನು ಮುಂದೆ ಬ್ಯಾಂಕುಗಳು ತಮ್ಮ ಅಪ್ಲಿಕೇಶನ್’ಗಳಲ್ಲಿ ರಾತ್ರಿ 11 ರಿಂದ ಬೆಳಗ್ಗೆ 6 ಗಂಟೆಯವರೆಗೆ ಎಲ್ಲಾ ವಹಿವಾಟುಗಳನ್ನು ಲಾಕ್ ಮಾಡುವ ಸೌಲಭ್ಯವನ್ನು ಗ್ರಾಹಕರಿಗೆ ಒದಗಿಸಲಿದೆ.
ಡೈನಾಮಿಕ್- ಟು-ಫ್ಯಾಕ್ಟರ್ : ಇನ್ನು ಮುಂದೆ ಗ್ರಾಹಕರು ಎಲ್ಲಿಂದ ಪಾವತಿ ಮಾಡುತ್ತಾರೆ ಎಂಬುದನ್ನು ಕೂಡ ಪರಿಶೀಲಿಸಲಾಗುತ್ತದೆ. ಡೈನಾಮಿಕ್- ಟು-ಫ್ಯಾಕ್ಟರ್ ದೃಢೀಕರಣದ ಭಾಗವಾಗಿ ಪಾವತಿ ಸ್ಥಳವನ್ನು ಪತ್ತೆ ಹಚ್ಚಲಾಗುತ್ತದೆ. ಇದರೊಂದಿಗೆ ಪಾವತಿಯ ಸ್ಕ್ರೀನ್’ಶಾಟ್ ತೆಗೆಯಲು ಇನ್ನು ಅವಕಾಶವಿಲ್ಲ. ಇದು ಖಾತೆಯ ಸುರಕ್ಷತೆಯನ್ನು ಖಚಿತ ಪಡಿಸಿಕೊಳ್ಳಲು ಅಳವಡಿಸಿರುವ ವ್ಯವಸ್ಥೆಯಾಗಿದೆ.
