ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಪಕ್ಷದಲ್ಲಿ ಭುಗಿಲೆದ್ದಿರುವ ತೀವ್ರ ಸ್ವರೂಪದ ಬಂಡಾಯದ ಬೆನ್ನಲ್ಲೇ, ಪಕ್ಷದ ಯಾವುದೇ ಪ್ರತ್ಯೇಕ ಬಣಕ್ಕೆ ಸದನದಲ್ಲಿ ಮಾನ್ಯತೆ ನೀಡಬಾರದು ಎಂದು ಒತ್ತಾಯಿಸಿ ಟಿಎಂಸಿ ನಾಯಕ ಅಭಿಷೇಕ್ ಬ್ಯಾನರ್ಜಿ ಅವರು ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರಿಗೆ ಪತ್ರ ಬರೆದಿದ್ದಾರೆ.
ಟಿಎಂಸಿಯ ಬಂಡಾಯ ಸಂಸದರ ಗುಂಪೊಂದು ಸ್ವತಂತ್ರ ಬಣವಾಗಿ ಮಾನ್ಯತೆ ಕೋರುವ ಸಾಧ್ಯತೆಗಳಿದ್ದು, ಇದು ಸಂಪೂರ್ಣವಾಗಿ ಕಾನೂನುಬಾಹಿರ ಎಂದು ಅಭಿಷೇಕ್ ಬ್ಯಾನರ್ಜಿ ತಮ್ಮ ಪತ್ರದಲ್ಲಿ ಪ್ರತಿಪಾದಿಸಿದ್ದಾರೆ. “ಅಖಿಲ ಭಾರತ ತೃಣಮೂಲ ಕಾಂಗ್ರೆಸ್ (AITC) ಒಂದು ಅವಿಭಾಜ್ಯ ರಾಜಕೀಯ ಪಕ್ಷವಾಗಿದೆ. ಲೋಕಸಭೆಯಲ್ಲಿರುವ ಶಾಸಕಾಂಗ ಪಕ್ಷವು ಮೂಲ ರಾಜಕೀಯ ಪಕ್ಷದ ಅಂಗವಾಗಿಯೇ ಅಸ್ತಿತ್ವದಲ್ಲಿರುತ್ತದೆ. ಕಾನೂನಿನ ಪ್ರಕಾರ ಲೋಕಸಭೆಯಲ್ಲಿ ಪಕ್ಷಕ್ಕೆ ಒಬ್ಬರೇ ನಾಯಕ ಮತ್ತು ಒಬ್ಬರೇ ವಿಪ್ ಇರುತ್ತಾರೆ. ಯಾವುದೇ ಸದಸ್ಯರು ಅಥವಾ ಗುಂಪು ತಮ್ಮಿಚ್ಛೆಯಂತೆ ಸಮಾನಾಂತರ ‘ಗುಂಪು’ ಅಥವಾ ‘ಬಣ’ವನ್ನು ರಚಿಸಿಕೊಂಡು ಸದನದಲ್ಲಿ ಪ್ರತ್ಯೇಕ ಮಾನ್ಯತೆ ಪಡೆಯಲು ಬರುವುದಿಲ್ಲ,” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ತಮ್ಮ ವಾದಕ್ಕೆ ಪುಷ್ಟಿ ನೀಡಲು ಅಭಿಷೇಕ್ ಬ್ಯಾನರ್ಜಿ ಅವರು 2023ರ ಮಹಾರಾಷ್ಟ್ರದ ‘ಶಿವಸೇನೆ ಒಡಕು’ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌ನ ಸಂವಿಧಾನ ಪೀಠ ನೀಡಿದ ಐತಿಹಾಸಿಕ ತೀರ್ಪನ್ನು ಉಲ್ಲೇಖಿಸಿದ್ದಾರೆ. ಹತ್ತನೇ ಶೆಡ್ಯೂಲ್ (ಪಕ್ಷಾಂತರ ನಿಷೇಧ ಕಾಯ್ದೆ) ಅಡಿಯಲ್ಲಿ ಈಗ ‘ಒಡಕು’ ಎಂಬ ರಕ್ಷಣಾತ್ಮಕ ವಾದಕ್ಕೆ ಅವಕಾಶವಿಲ್ಲ. ಶಾಸಕಾಂಗ ಪಕ್ಷದ ಮೂರನೇ ಎರಡರಷ್ಟು ಸದಸ್ಯರು ಬೇರೆಯಾದರೂ, ಮೂಲ ರಾಜಕೀಯ ಪಕ್ಷವೇ ಬೇರೊಂದು ಪಕ್ಷದೊಡನೆ ವಿಲೀನವಾಗದ ಹೊರತು, ಕೇವಲ ಶಾಸಕರು/ಸಂಸದರು ವಿಲೀನವಾದರೆ ಅವರಿಗೆ ಪಕ್ಷಾಂತರ ನಿಷೇಧ ಕಾಯ್ದೆಯಡಿ ಯಾವುದೇ ರಕ್ಷಣೆ ಸಿಗುವುದಿಲ್ಲ ಎಂದು ಅವರು ಸ್ಪೀಕರ್ ಗಮನಕ್ಕೆ ತಂದಿದ್ದಾರೆ. ಈ ಹಿನ್ನೆಲೆಯಲ್ಲಿ ಬಂಡಾಯ ಬಣಕ್ಕೆ ಯಾವುದೇ ಸ್ಥಾನಮಾನ ಅಥವಾ ಸೌಲಭ್ಯಗಳನ್ನು ನೀಡಬಾರದು ಎಂದು ಅವರು ಕೋರಿದ್ದಾರೆ.
ಇದನ್ನು ಓದಿದ್ದೀರಾ? ಫಿಫಾ ಜಗತ್ತಿನಲ್ಲಿ ಭಾರತದ ಹೆಜ್ಜೆಗುರುತು – ಕನ್ನಡಿಗ ಕೆಂಪಯ್ಯನವರ ಮರೆಯಲಾಗದ ಸಾಧನೆ
ಲೋಕಸಭೆಯಲ್ಲಿರುವ ಒಟ್ಟು 28 ಟಿಎಂಸಿ ಸಂಸದರ ಪೈಕಿ 22 ಸಂಸದರು ತಮ್ಮ ಬಂಡಾಯ ಬಣದಲ್ಲಿದ್ದಾರೆ ಎಂದು ಬಂಡಾಯ ನಾಯಕಿ ಕಾಕೋಲಿ ಘೋಷ್ ದಸ್ತಿದಾರ್ ಇತ್ತೀಚೆಗೆ ಹೇಳಿಕೊಂಡಿದ್ದರು. ಈ 20ಕ್ಕೂ ಹೆಚ್ಚು ಬಂಡಾಯ ಸಂಸದರು ಈಗಾಗಲೇ ಸ್ಪೀಕರ್ ಓಂ ಬಿರ್ಲಾ ಅವರನ್ನು ಭೇಟಿಯಾಗಿ, ಸದನದಲ್ಲಿ ತಮಗೆ ಪ್ರತ್ಯೇಕವಾಗಿ ಕುಳಿತುಕೊಳ್ಳಲು ಅವಕಾಶ ನೀಡುವಂತೆ ಪತ್ರ ಸಲ್ಲಿಸಿದ್ದಾರೆ.
ಜೊತೆಗೆ, ತಾವು ಹೊಸದಾಗಿ ‘ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ’ಯೊಂದಿಗೆ ವಿಲೀನಗೊಳ್ಳುತ್ತಿರುವುದಾಗಿ ಮತ್ತು ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟಕ್ಕೆ (NDA) ಬೆಂಬಲ ಸೂಚಿಸುವುದಾಗಿ ಕಾಕೋಲಿ ಘೋಷ್ ದಸ್ತಿದಾರ್ ತಿಳಿಸಿದ್ದಾರೆ. ದೆಹಲಿಯಲ್ಲಿ ಹಿರಿಯ ಬಿಜೆಪಿ ನಾಯಕರೊಂದಿಗೂ ಬಂಡಾಯ ನಾಯಕರು ಸಭೆಗಳನ್ನು ನಡೆಸಿದ್ದು, ಮಮತಾ ಬ್ಯಾನರ್ಜಿ ನೇತೃತ್ವದ ಪಕ್ಷಕ್ಕೆ ಇದು ಅತಿದೊಡ್ಡ ರಾಜಕೀಯ ಬಿಕ್ಕಟ್ಟಾಗಿ ಪರಿಣಮಿಸಿದೆ.
