ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯ ಫಲಿತಾಂಶಕ್ಕೆ ಕ್ಷಣಗಣನೆ ಆರಂಭವಾಗಿರುವ ಬೆನ್ನಲ್ಲೇ, ರಾಜ್ಯ ರಾಜಕೀಯದಲ್ಲಿ ಭಾರೀ ಬಿರುಗಾಳಿ ಜೊತೆಗೆ ರಾಜಕೀಯ ಹೈಡ್ರಾಮ ನಡೆಯುತ್ತಿದೆ. ಮೇ 4ರಂದು ನಡೆಯಲಿರುವ ಮತ ಎಣಿಕೆಗೂ ಮುನ್ನವೇ ಮತಗಳ ಸುರಕ್ಷತೆಯ ಕುರಿತು ಆಡಳಿತಾರೂಢ ತೃಣಮೂಲ ಕಾಂಗ್ರೆಸ್ (TMC) ಗಂಭೀರ ಆರೋಪಗಳನ್ನು ಮಾಡಿದೆ. ಚುನಾವಣಾ ಆಯೋಗ ಮತ್ತು ಬಿಜೆಪಿ ಶಾಮೀಲಾಗಿ “ಚುನಾವಣಾ ವಂಚನೆ” ಮಾಡುತ್ತಿವೆ ಎಂಬ ಟಿಎಂಸಿಯ ಈ ಆರೋಪ, ಬಂಗಾಳದ ರಾಜಕೀಯ ವಾತಾವರಣವನ್ನು ಮತ್ತಷ್ಟು ಕಾವೇರಿಸುವಂತೆ ಮಾಡಿದೆ.
ವಿವಾದಕ್ಕೆ ಪ್ರಮುಖ ಕಾರಣವಾಗಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಒಂದು ಸಿಸಿಟಿವಿ ದೃಶ್ಯಾವಳಿ. ಈ ವೀಡಿಯೊದಲ್ಲಿ ಮತಪತ್ರಗಳಿರುವ ಕೋಣೆ ಅದನ್ನ ಸ್ಟ್ರಾಂಗ್ ರೂಮ್ ಅಂತ ಕರೆಯಲಾಗುತ್ತೆ. ಈ ಕೋಣೆಯ ಒಳಗೆ ಕೆಲವು ವ್ಯಕ್ತಿಗಳು ಅಧಿಕೃತ ನಿಯಮಗಳನ್ನು ಗಾಳಿಗೆ ತೂರಿ ಬ್ಯಾಲೆಟ್ ಯುನಿಟ್‌ಗಳನ್ನು ತೆರೆಯುತ್ತಿರುವುದು ಕಂಡುಬಂದಿದೆ ಎಂದು ಟಿಎಂಸಿ ಪ್ರತಿಪಾದಿಸಿದೆ. ಪಕ್ಷದ ಮುಖಂಡರಾದ ಶಶಿ ಪಂಜಾ ಮತ್ತು ಕುನಾಲ್ ಘೋಷ್ ಈ ದೃಶ್ಯಗಳನ್ನು ಹಂಚಿಕೊಳ್ಳುವ ಮೂಲಕ, “ಇದು ಪ್ರಜಾಪ್ರಭುತ್ವದ ಹಗಲು ದರೋಡೆ” ಎಂದು ಬಣ್ಣಿಸಿದ್ದಾರೆ. ಯಾವುದೇ ಪಕ್ಷದ ಏಜೆಂಟರ ಉಪಸ್ಥಿತಿಯಿಲ್ಲದೆ ಇಂತಹ ಚಟುವಟಿಕೆಗಳು ನಡೆಯುತ್ತಿರುವುದು ಚುನಾವಣಾ ಪಾರದರ್ಶಕತೆಯ ಬಗ್ಗೆ ಅನುಮಾನ ಮೂಡಿಸಿದೆ.
ಇದನ್ನು ಓದಿದ್ದೀರಾ? ಬಂಗಾಳ ಚುನಾವಣೆ | ಪಶ್ಚಿಮ ರಾಜ್ಯದಲ್ಲಿ ಕಾಂಗ್ರೆಸ್‌ನ 50 ವರ್ಷಗಳ ವನವಾಸ!
ಚುನಾವಣಾ ಆಯೋಗ ಮಾತ್ರ ಟಿಎಂಸಿ ನಾಯಕರ ಈ ಆರೋಪವನ್ನು ತಳ್ಳಿಹಾಕಿದೆ. ಸ್ಟ್ರಾಂಗ್ ರೂಮ್‌ಗಳು ಸಂಪೂರ್ಣ ಸುರಕ್ಷಿತವಾಗಿವೆ ಮತ್ತು ಎಲ್ಲಾ ಇವಿಎಂಗಳ ಮೇಲೆ ನಿಗಾ ಇರಿಸಲಾಗಿದೆ ಎಂದು ಹೇಳಿಕೊಂಡಿದೆ. ಇನ್ನು ವಿಡಿಯೋದಲ್ಲಿ ಕಂಡುಬರುವ ಚಟುವಟಿಕೆಯು ಇವಿಎಂ ಸ್ಟ್ರಾಂಗ್ ರೂಮ್‌ನದ್ದಲ್ಲ. ಇದು ಪೋಸ್ಟಲ್ ಬ್ಯಾಲೆಟ್‌ಗಳನ್ನು ನಿಯಮಾನುಸಾರ ವರ್ಗೀಕರಿಸುವ ಪ್ರಕ್ರಿಯೆಯದ್ದು. ಸ್ಟ್ರಾಂಗ್ ರೂಮ್‌ಗಳ ಹೊರಗಿನ ಕಾರಿಡಾರ್‌ನಲ್ಲಿ ನಡೆದಿದೆ ಎಂದೂ ಹೇಳಿಕೊಂಡಿದೆ.
ಇನ್ನು “ಸೋಲಿನ ಭೀತಿಯಿಂ ಟಿಎಂಸಿ ನಾಟಕ ಮಾಡುತ್ತಿದೆ” ಎಂದು ಹೇಳುವ ಮೂಲಕ ಎಂದಿನಂತೆ ಬಿಜೆಪಿ ಚುನಾವಣಾ ಆಯೋಗವನ್ನು ಸಮರ್ಥಿಸಿಕೊಂಡಿದೆ. “ಟಿಎಂಸಿ ಅಭ್ಯರ್ಥಿಗಳು ತಮ್ಮ ಸೋಲು ನಿಶ್ಚಿತ ಎಂದು ಈಗಾಗಲೇ ತಿಳಿದಿದ್ದಾರೆ. ಆದ್ದರಿಂದ ಇವಿಎಂ ಮತ್ತು ಸ್ಟ್ರಾಂಗ್ ರೂಮ್‌ಗಳ ಮೇಲೆ ಗೂಬೆ ಕೂರಿಸುತ್ತಿದ್ದಾರೆ” ಎಂದು ಬಿಜೆಪಿ ಸಂಸದ ಸೌಮಿತ್ರ ಖಾನ್ ಮತ್ತು ಇತರ ನಾಯಕರು ಹೇಳಿದ್ದಾರೆ. ಇನ್ನು ಟಿಎಂಸಿ ನಾಯಕರು ಅನಗತ್ಯವಾಗಿ ವದಂತಿಗಳನ್ನು ಹರಡುತ್ತಿದ್ದಾರೆ ಮತ್ತು ಮತ ಎಣಿಕೆಗೆ ಮುನ್ನ ಗೊಂದಲ ಸೃಷ್ಟಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ಬಿಜೆಪಿ ನಾಯಕ ತಾಪಸ್ ರಾಯ್ ಆರೋಪಿಸಿದ್ದಾರೆ.
ಸಾಮಾನ್ಯವಾಗಿ ಒಮ್ಮೆ ಸ್ಟ್ರಾಂಗ್ ರೂಮ್ ಅನ್ನು ಸೀಲ್ ಮಾಡಿದ ಮೇಲೆ ಮತ ಎಣಿಕೆ ಪ್ರಕ್ರಿಯೆಗಾಗಿ ನಿಗದಿಪಡಿಸಿದ ದಿನಾಂಕದಂದು ಸ್ಟ್ರಾಂಗ್ ರೂಮ್ ತೆರೆಯಬಹುದು. ಅಧಿಕೃತ ಸೂಚನೆ ಇಲ್ಲದೆ ಸ್ಟ್ರಾಂಗ್ ರೂಮ್ ತೆರೆಯುವಂತಿಲ್ಲ. ಅದೂ ಚುನಾವಣಾ ಅಧಿಕಾರಿಗಳು ಅಭ್ಯರ್ಥಿಗಳು ಅಥವಾ ಅವರ ಅಧಿಕೃತ ಪ್ರತಿನಿಧಿಗಳ ಸಮ್ಮುಖದಲ್ಲಿ ಮಾತ್ರ ಸ್ಟ್ರಾಂಗ್ ರೂಮ್ ತೆರೆಯಲು ಅವಕಾಶವಿದೆ. ಹಾಗಿದ್ದಾಗ ಯಾರ ಉಪಸ್ಥಿತಿಯೂ ಇಲ್ಲದೆ ಸ್ಟ್ರಾಂಗ್ ರೂಮ್ ತೆರೆದಿರುವುದು ಯಾಕೆ ಎಂಬ ಪ್ರಶ್ನೆಯನ್ನು ಟಿಎಂಸಿ ಎತ್ತಿದೆ.
“ಮೊದಲು ಅವರು ಇವಿಎಂ ಯಂತ್ರಗಳನ್ನು ಸೀಲ್ ಮಾಡಿದರು. ಅವರು ಸ್ಟ್ರಾಂಗ್ ರೂಮ್ ಅನ್ನು ಸೀಲ್ ಮಾಡಿದರು. ಆದರೆ ನಂತರ ಮತಪತ್ರಗಳನ್ನು ಹೊರತೆಗೆದು ಮತಗಳನ್ನು ಎಣಿಸಲು ಪ್ರಾರಂಭಿಸಿದರು. ಈ ರೀತಿ ಎಲ್ಲಿ ನಡೆಯುತ್ತದೆ? ನಾವು ಆಕ್ಷೇಪಿಸಿದರೆ ಬಿಜೆಪಿ ಕಾರ್ಯಕರ್ತರು ಗದ್ದಲ ಸೃಷ್ಟಿಸುತ್ತಾರೆ” ಎಂದು ಟಿಎಂಸಿ ದೂರಿದೆ.
