ಮಹಾರಾಷ್ಟ್ರದಲ್ಲಿ ಹಬ್ಬದ ಋತುವಿನ ಸಂದರ್ಭದಲ್ಲಿ ಕಳಪೆ ಮತ್ತು ಕಲಬೆರಕೆ ಆಹಾರ ಪದಾರ್ಥಗಳ ಮಾರಾಟ ತಡೆಯಲು ‘ಆಹಾರ ಮತ್ತು ಔಷಧ ನಿಯಂತ್ರಣ ಮಂಡಳಿ’ (ಎಫ್‌ಡಿಎ) ಬೃಹತ್ ಕಾರ್ಯಾಚರಣೆ ನಡೆಸಿದೆ. ಈ ವಿಶೇಷ ಕಾರ್ಯಾಚರಣೆಯಲ್ಲಿ ರಾಜ್ಯದಾದ್ಯಂತ ಒಟ್ಟು 114 ಸಂಸ್ಥೆಗಳಿಂದ ಅಂದಾಜು 9.01 ಕೋಟಿ ರೂಪಾಯಿ ಮೌಲ್ಯದ 3.53 ಲಕ್ಷ ಕೆ.ಜಿ ಆಹಾರ ಪದಾರ್ಥಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಆಹಾರ ಭದ್ರತೆ ಮತ್ತು ನೈರ್ಮಲ್ಯ ನಿಯಮಗಳನ್ನು ತೀವ್ರವಾಗಿ ಉಲ್ಲಂಘಿಸಿದ್ದಕ್ಕಾಗಿ 19 ಆಹಾರ ಉದ್ದಿಮೆಗಳ ಪರವಾನಗಿ ಮತ್ತು ನೋಂದಣಿಯನ್ನು ಅಮಾನತುಗೊಳಿಸಲಾಗಿದೆ.
ಈ ಕಾರ್ಯಾಚರಣೆಯಲ್ಲಿ, ಛತ್ರಪತಿ ಸಂಭಾಜಿನಗರದ ಸುಂದರವಾಡಿಯ ಮೂಲದ ‘ದಿವ್ಯಾ ಮಹಾವಿತಾರಕ್’ ಎಂಬ ಕಂಪನಿಯ ಸೂಪರ್ ಡಿಸ್ಟ್ರಿಬ್ಯೂಟರ್‌ನಿಂದ ಪತಂಜಲಿ ಕಂಪನಿ (ಬ್ರಾಂಡ್‌)ನ 20.20 ಲಕ್ಷ ರೂಪಾಯಿ ಮೌಲ್ಯದ 2,279.7 ಲೀಟರ್ ಹಸುವಿನ ತುಪ್ಪವನ್ನು ಎಫ್‌ಡಿಎ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ. ಈ ತುಪ್ಪದಲ್ಲಿ ಕಲಬೆರಕೆ ಮಾಡಿರುವ ಮತ್ತು ತಪ್ಪು ಲೇಬಲಿಂಗ್ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ.
ಅಕ್ಟೋಬರ್ ತಿಂಗಳಾದ್ಯಂತ ನಡೆಸಲಾದ ಈ ಸುದೀರ್ಘ ಕಾರ್ಯಾಚರಣೆಯಲ್ಲಿ, ಅಕ್ಟೋಬರ್ 28 ರಿಂದ 31ರ ನಡುವೆ ತೀವ್ರ ತಪಾಸಣೆಗಳನ್ನು ನಡೆಸಲಾಗಿದೆ. ಈ ನಾಲ್ಕು ದಿನಗಳ ಅವಧಿಯಲ್ಲಿ 13 ಎಫ್‌ಐಆರ್‌ಗಳನ್ನು ದಾಖಲಿಸಲಾಗಿದ್ದು, 16 ಜನರನ್ನು ಬಂಧಿಸಲಾಗಿದೆ. ಅಲ್ಲದೆ, ಏಳು ಸಂಸ್ಥೆಗಳನ್ನು ಸೀಲ್ ಮಾಡಿ, ಆರು ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಇಡೀ ಕಾರ್ಯಾಚರಣೆಯಲ್ಲಿ ಖಾದ್ಯ ತೈಲ, ಮಸಾಲೆ ಪದಾರ್ಥಗಳು, ಅಕ್ಕಿ, ಬೇಳೆಕಾಳು, ಬೆಲ್ಲ, ಗೋಧಿ ಹಿಟ್ಟು, ಕಡಲೆ ಹಿಟ್ಟು, ಹಾಲಿನ ಉತ್ಪನ್ನಗಳು, ಸಿಹಿ ತಿಂಡಿಗಳು, ಖಾರ, ಒಣ ಹಣ್ಣುಗಳು, ಬೇಕರಿ ಉತ್ಪನ್ನಗಳು ಹಾಗೂ ನೂಡಲ್ಸ್‌ಗಳನ್ನು ಜಪ್ತಿ ಮಾಡಲಾಗಿದೆ.
ಈ ಲೇಖನ ಓದಿದ್ದೀರಾ?: ಅಮೆರಿಕ ಮಧ್ಯಂತರ ಚುನಾವಣೆ: ಡೊನಾಲ್ಡ್ ಟ್ರಂಪ್ ಕುರ್ಚಿಗಿಲ್ಲ ಕುತ್ತು; ಬಹುಮತ ಕಳೆದುಕೊಂಡರೆ ಸರ್ಕಾರ ‘ಹಲ್ಲು…
ಪ್ರದೇಶವಾರು ಕಾರ್ಯಾಚರಣೆಯಲ್ಲಿ ಕೊಂಕಣ ವಿಭಾಗದಲ್ಲಿ ಅತೀ ಹೆಚ್ಚಿನ ಆಹಾರ ಪದಾರ್ಥಗಳು ಜಪ್ತಿಗೊಂಡಿವೆ. ಭಿವಂಡಿಯಲ್ಲಿರುವ ‘ಅವೆನ್ಯೂ ಸೂಪರ್‌ಮಾರ್ಟ್ಸ್ ಲಿಮಿಟೆಡ್’ ಸಂಸ್ಥೆಯಿಂದಲೇ ವಿವಿಧ ಬ್ರ್ಯಾಂಡ್‌ಗಳ 1.44 ಲಕ್ಷ ಕೆ.ಜಿ ಖಾದ್ಯ ತೈಲವನ್ನು ವಶಪಡಿಸಿಕೊಳ್ಳಲಾಗಿದ್ದು, ಕೊಂಕಣ ವಿಭಾಗದಲ್ಲಿ ಒಟ್ಟಾರೆ 22 ಸಂಸ್ಥೆಗಳಿಂದ ಒಟ್ಟು 5.27 ಕೋಟಿ ಮೌಲ್ಯದ ಆಹಾರ ಧಾನ್ಯ ಜಪ್ತಿಯಾಗಿದೆ. ಇನ್ನುಳಿದಂತೆ ಪುಣೆಯ 29 ಸಂಸ್ಥೆಗಳಿಂದ 1.47 ಕೋಟಿ ರೂ. ಮೌಲ್ಯದ, ಛತ್ರಪತಿ ಸಂಭಾಜಿನಗರದ 22 ಸಂಸ್ಥೆಗಳಿಂದ 89.41 ಲಕ್ಷ ರೂ. ಮೌಲ್ಯದ ಹಾಗೂ ನಾಗಪುರದ 20 ಸಂಸ್ಥೆಗಳಿಂದ 53.57 ಲಕ್ಷ ರೂ. ಮೌಲ್ಯದ ಅಕ್ರಮ/ಕಳಪೆ ಆಹಾರ ಧಾನ್ಯಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಕಾರ್ಯಾಚರಣೆ ಸಂದರ್ಭದಲ್ಲಿ ಗಂಭೀರ ನೈರ್ಮಲ್ಯ ಲೋಪಗಳು ಕಂಡುಬಂದಿದ್ದ ಗ್ರೇಟರ್ ಮುಂಬೈ, ಅಮರಾವತಿ ಹಾಗೂ ಛತ್ರಪತಿ ಸಂಭಾಜಿನಗರದ 19 ಸಿಹಿ ತಿಂಡಿ, ಖಾರ ತಯಾರಿಕಾ ಘಟಕ ಹಾಗೂ ಮಸಾಲೆ ಘಟಕಗಳ ಪರವಾನಗಿಯನ್ನು ಅಮಾನತು ಮಾಡಲಾಗಿದೆ. ಇವುಗಳಲ್ಲಿ; ಕ್ರಿಮಿಕೀಟ ಮತ್ತು ಹೆಗ್ಗಣಗಳ ಕಾಟ, ನೈರ್ಮಲ್ಯವಿಲ್ಲದ ವಾತಾವರಣ, ತೆರೆದಿಟ್ಟ ಆಹಾರ ಪದಾರ್ಥಗಳು, ಅವ್ಯವಸ್ಥಿತ ದಾಸ್ತಾನು ವ್ಯವಸ್ಥೆ, ಕ್ರಿಮಿನಾಶಕ ಸಿಂಪಡಣೆಯ ದಾಖಲೆಗಳಿಲ್ಲದಿರುವುದು ಹಾಗೂ ಕಾರ್ಮಿಕರಿಗೆ ವೈದ್ಯಕೀಯ ಫಿಟ್‌ನೆಸ್ ಪ್ರಮಾಣಪತ್ರಗಳಿಲ್ಲದಿರುವುದು ಕಂಡುಬಂದಿದೆ.
ಇದರ ಜೊತೆಗೆ ನಾಸಿಕ್, ಸಂಭಾಜಿನಗರ ಮತ್ತು ನಾಗಪುರ ಭಾಗದ 34 ಹೋಟೆಲ್ ಮತ್ತು ಧಾಬಾಗಳನ್ನು ತಪಾಸಣೆ ನಡೆಸಿ, ಲೋಪದೋಷ ತಿದ್ದಿಕೊಳ್ಳಲು 29 ನೋಟಿಸ್‌ಗಳನ್ನು ಜಾರಿಗೊಳಿಸಲಾಗಿದೆ.
