ಜಿನೀವಾ ಮೂಲದ ವಿಶ್ವ ಆರ್ಥಿಕ ವೇದಿಕೆಯು 2006ರಿಂದ ಈ ಸೂಚ್ಯಂಕವನ್ನು ಸಿದ್ಧಪಡಿಸುತ್ತಿದ್ದು, ಜಾಗತಿಕವಾಗಿ ಲಿಂಗ ಸಮಾನತೆಯಲ್ಲಿ ಪ್ರಗತಿಯಾಗಿದ್ದರೂ, ಸಂಪೂರ್ಣ ಸಮಾನತೆ (ಶೇ 100ರಷ್ಟು) ಸಾಧಿಸಲು ಇನ್ನೂ 120 ವರ್ಷಗಳು ಬೇಕಾಗಬಹುದು ಎಂದು ಅಂದಾಜಿಸಿದೆ. ಜಾಗತಿಕ ಮಟ್ಟದಲ್ಲಿ ಪ್ರಸ್ತುತ ಶೇ 69.2ರಷ್ಟು ಲಿಂಗ ಅಂತರ ಕಡಿಮೆಯಾಗಿದೆ. ಇದು ಕಳೆದ ವರ್ಷಕ್ಕಿಂತ ಕೇವಲ ಶೇ 0.4ರಷ್ಟು ಮಾತ್ರ ಹೆಚ್ಚಳವಾಗಿದೆ.
ವಿಶ್ವ ಆರ್ಥಿಕ ವೇದಿಕೆ (WEF) ಬಿಡುಗಡೆ ಮಾಡಿರುವ 2026ನೇ ಸಾಲಿನ ‘ಜಾಗತಿಕ ಲಿಂಗ ಸಮಾನತೆ ಸೂಚ್ಯಂಕ’ದಲ್ಲಿ (Global Gender Gap Index) ಭಾರತವು ತನ್ನ ಹಿಂದಿನ 131ನೇ ಶ್ರೇಯಾಂಕವನ್ನೇ ಕಾಯ್ದುಕೊಂಡಿದೆ. ಐಸ್‌ಲ್ಯಾಂಡ್, ಫಿನ್‌ಲ್ಯಾಂಡ್ ಮತ್ತು ನಾರ್ವೆ ದೇಶಗಳು ಕ್ರಮವಾಗಿ ಮೊದಲ ಮೂರು ಸ್ಥಾನಗಳಲ್ಲಿ ಮುಂದುವರಿದಿವೆ.
ಒಟ್ಟು 145 ದೇಶಗಳ ಪಟ್ಟಿಯಲ್ಲಿ ಕೇವಲ 14 ದೇಶಗಳು ಮಾತ್ರ ಭಾರತಕ್ಕಿಂತ ಕೆಳಗಿನ ಸ್ಥಾನದಲ್ಲಿವೆ. ಪಪುವಾ ನ್ಯೂಗಿನಿ, ಕುವೈತ್, ಒಮಾನ್, ಕತಾರ್, ತಜಿಕಿಸ್ತಾನ್, ಸೌದಿ ಅರೇಬಿಯಾ, ಈಜಿಪ್ಟ್, ಮೊರಾಕೊ, ಮಾಲಿ, ಅಲ್ಜೀರಿಯಾ ಮತ್ತು ಕಾಂಗೋ ದೇಶಗಳು ಭಾರತದ ನಂತರದ ಸ್ಥಾನದಲ್ಲಿವೆ. ಆಫ್ರಿಕಾದ ‘ಚಾಡ್’ ರಾಷ್ಟ್ರವು ಸೂಚ್ಯಂಕದಲ್ಲಿ ಅತ್ಯಂತ ಕೊನೆಯ ಸ್ಥಾನದಲ್ಲಿದ್ದರೆ, ಇರಾನ್ ಮತ್ತು ಪಾಕಿಸ್ತಾನ ದೇಶಗಳು ಕೊನೆಯ ಮೂರು ಸ್ಥಾನಗಳನ್ನು ಹಂಚಿಕೊಂಡಿವೆ.
ಜಿನೀವಾ ಮೂಲದ ವಿಶ್ವ ಆರ್ಥಿಕ ವೇದಿಕೆಯು 2006ರಿಂದ ಈ ಸೂಚ್ಯಂಕವನ್ನು ಸಿದ್ಧಪಡಿಸುತ್ತಿದ್ದು, ಜಾಗತಿಕವಾಗಿ ಲಿಂಗ ಸಮಾನತೆಯಲ್ಲಿ ಪ್ರಗತಿಯಾಗಿದ್ದರೂ, ಸಂಪೂರ್ಣ ಸಮಾನತೆ (ಶೇ 100ರಷ್ಟು) ಸಾಧಿಸಲು ಇನ್ನೂ 120 ವರ್ಷಗಳು ಬೇಕಾಗಬಹುದು ಎಂದು ಅಂದಾಜಿಸಿದೆ. ಜಾಗತಿಕ ಮಟ್ಟದಲ್ಲಿ ಪ್ರಸ್ತುತ ಶೇ 69.2ರಷ್ಟು ಲಿಂಗ ಅಂತರ ಕಡಿಮೆಯಾಗಿದೆ. ಇದು ಕಳೆದ ವರ್ಷಕ್ಕಿಂತ ಕೇವಲ ಶೇ 0.4ರಷ್ಟು ಮಾತ್ರ ಹೆಚ್ಚಳವಾಗಿದೆ.
ಸುಮಾರು 150 ಕೋಟಿ ಜನಸಂಖ್ಯೆಯನ್ನು ಹೊಂದಿರುವ ವಿಶ್ವದ ಅತಿ ಹೆಚ್ಚು ಜನಸಂಖ್ಯೆಯುಳ್ಳ ದೇಶವಾದ ಭಾರತದಲ್ಲಿ, ಲಿಂಗ ಸಮಾನತೆಯ ಪ್ರಗತಿಯು ಶೇ 64.5ರಷ್ಟಿದೆ. ಇದು ಜಾಗತಿಕ ಸರಾಸರಿಗಿಂತ ಕೆಳಗಿದೆ. ಭಾರತದ ಅಂಕಗಳಲ್ಲಿ ಕಳೆದ ವರ್ಷಕ್ಕಿಂತ ಸ್ವಲ್ಪ ಸುಧಾರಣೆಯಾಗಿದ್ದರೂ, ಜಾಗತಿಕ ಶ್ರೇಯಾಂಕದಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ಶೈಕ್ಷಣಿಕ ಸಾಧನೆಯಲ್ಲಿನ ಪ್ರಗತಿಯಿಂದಾಗಿ 2006ರಿಂದ ಭಾರತದ ಒಟ್ಟಾರೆ ಲಿಂಗ ಸಮಾನತೆಯು ಶೇ 4.3ರಷ್ಟು ಹೆಚ್ಚಾಗಿದೆ.
ಈ ಉಪ-ಸೂಚ್ಯಂಕದಲ್ಲಿ ಭಾರತವು ಶೇ 41.2ರಷ್ಟು ಅಂಕ ಪಡೆದಿದೆ. ಇದು ಹಿಂದಿನ ಆವೃತ್ತಿಗಿಂತ 0.5 ಅಂಕ ಹೆಚ್ಚಾಗಿದ್ದರೂ, 2013ರ ಅತ್ಯುತ್ತಮ ಸಾಧನೆಗೆ ಹೋಲಿಸಿದರೆ ಶೇ 3.5ರಷ್ಟು ಕಡಿಮೆಯಾಗಿದೆ. ಕಾರ್ಮಿಕ ಬಲದ ಭಾಗವಹಿಸುವಿಕೆಯಲ್ಲಿ ಕಳೆದ ಎರಡು ದಶಕಗಳಲ್ಲಿ ಅಲ್ಪ ಸುಧಾರಣೆ ಕಂಡುಬಂದಿದ್ದು, 2026ರಲ್ಲಿ ಶೇ 44.1ರಷ್ಟಿದೆ.
ವೃತ್ತಿಪರ ಮತ್ತು ತಾಂತ್ರಿಕ ಕೆಲಸಗಾರರ ವಿಭಾಗದಲ್ಲಿ ಮಹಿಳೆಯರ ಸಮಾನತೆಯು ಗಣನೀಯವಾಗಿ ಹೆಚ್ಚಾಗಿದ್ದು, 2006ರಲ್ಲಿದ್ದ ಶೇ 26.6ರಿಂದ 2026ರ ವೇಳೆಗೆ ಶೇ 49.9ಕ್ಕೆ (ಬಹುಪಾಲು ದ್ವಿಗುಣ) ಏರಿಕೆಯಾಗಿದೆ. ಶಾಸಕರು, ಹಿರಿಯ ಅಧಿಕಾರಿಗಳು ಮತ್ತು ವ್ಯವಸ್ಥಾಪಕರ ಪ್ರಾತಿನಿಧ್ಯವು 2006ರಿಂದ 10 ಅಂಕಗಳಷ್ಟು ಸುಧಾರಿಸಿದೆಯಾದರೂ, ಅದು ಶೇ 13.1ರಷ್ಟು ಮಾತ್ರವಿದ್ದು ಇನ್ನೂ ಅತ್ಯಂತ ಕೆಳಮಟ್ಟದಲ್ಲೇ ಇದೆ. ದಕ್ಷಿಣ ಏಷ್ಯಾವು ಆರ್ಥಿಕ ಅವಕಾಶಗಳಲ್ಲಿ ಅತ್ಯಂತ ಕಡಿಮೆ ಅಂಕ ಪಡೆದ ಪ್ರದೇಶವಾಗಿ ಹೊರಹೊಮ್ಮಿದೆ.
ಶೈಕ್ಷಣಿಕ ಸಾಧನೆಯ ವಿಭಾಗದಲ್ಲಿ ಭಾರತವು ಉತ್ತಮ ಸಾಧನೆ ಮಾಡಿದ್ದು ಶೇ 96.6ರಷ್ಟು ಸಮಾನತೆ ಅಂಕವನ್ನು ಪಡೆದಿದೆ. ಆದರೆ ಇದು ಕಳೆದ ವರ್ಷಕ್ಕಿಂತ ಶೇ 0.5ರಷ್ಟು ಕಡಿಮೆಯಾಗಿದೆ. ‘ಆರೋಗ್ಯ ಮತ್ತು ಬದುಕುಳಿಯುವಿಕೆ’ ವಿಭಾಗದಲ್ಲಿ ಹಿಂದಿನ ವರ್ಷಕ್ಕಿಂತ ಸುಧಾರಣೆ ಕಂಡು ಶೇ 95.6ರಷ್ಟು ಸಮಾನತೆ ತಲುಪಿದೆ. 2017ರಿಂದೀಚೆಗೆ ಜನನದ ಲಿಂಗಾನುಪಾತದಲ್ಲಿ ಏರುಮುಖ ವಲವು ಕಂಡುಬಂದಿದ್ದರೂ, 2026ರಲ್ಲಿನ ಈ ಪ್ರಮಾಣವು 2006ಕ್ಕೆ ಹೋಲಿಸಿದರೆ ಇನ್ನೂ ಶೇಕಡಾ ಒಂದರಷ್ಟು ಕಡಿಮೆಯಾಗಿಯೇ ಉಳಿದಿದೆ.
ರಾಜಕೀಯ ಸಬಲೀಕರಣವು ಜಾಗತಿಕವಾಗಿ ಭಾರತದ ಅತ್ಯಧಿಕ ಶ್ರೇಯಾಂಕದ (67ನೇ ಸ್ಥಾನ) ವಿಭಾಗವಾಗಿದೆ. ಇಲ್ಲಿ ಶೇ 24.5ರಷ್ಟು ಲಿಂಗ ಅಂತರವನ್ನು ಮುಚ್ಚಲಾಗಿದೆ. ಆರಂಭಿಕ ದಶಕದಲ್ಲಿ ಮಹಿಳಾ ರಾಷ್ಟ್ರ ಮುಖ್ಯಸ್ಥರ ಸೂಚ್ಯಂಕದಲ್ಲಿ ಭಾರತ ಅತ್ಯುತ್ತಮ ಸಾಧನೆ (ಶೇ 72.3ರಷ್ಟು) ಹೊಂದಿತ್ತು. ಆದರೆ 2021ರ ನಂತರ ಇದು ಶೇ 40.7ಕ್ಕೆ ಕುಸಿದಿದೆ.
ಸಂಸತ್ತಿನಲ್ಲಿ 2026ರಲ್ಲಿ ಶೇ 16.1ರಷ್ಟು ಲಿಂಗ ಅಂತರ ನಿವಾರಣೆಯಾಗಿದ್ದು, 2006ರಿಂದ 7 ಅಂಕಗಳ ಏರಿಕೆ ಕಂಡಿದೆ. ಸಚಿವರ ಮಟ್ಟದಲ್ಲಿ ಪ್ರಾತಿನಿಧ್ಯವು 2006ರಲ್ಲಿದ್ದ ಶೇ 3.5ರಿಂದ 2026ರಲ್ಲಿ ಶೇ 5.9ಕ್ಕೆ ಏರಿದೆ. ಆದರೆ ಇದು 2019ರ ಭಾರತದ ಗರಿಷ್ಠ ಮಟ್ಟವಾದ ಶೇ 30ಕ್ಕೆ ಹೋಲಿಸಿದರೆ ತೀರಾ ಹದಗೆಟ್ಟಿದೆ. ಜಾಗತಿಕವಾಗಿಯೂ 2016ರ ನಂತರ ರಾಜಕೀಯ ಸಬಲೀಕರಣದಲ್ಲಿ ಹಿನ್ನಡೆಯಾಗುತ್ತಿದೆ ಎಂದು ವರದಿ ಹೇಳಿದೆ.
ಮಹಿಳೆಯರು ಉನ್ನತ ಹುದ್ದೆಗಳನ್ನು ತಲುಪುತ್ತಿದ್ದರೂ, ಅತಿ ಹೆಚ್ಚು ಆರ್ಥಿಕ ಮತ್ತು ರಾಜಕೀಯ ಪ್ರಭಾವವಿರುವ ಪಾತ್ರಗಳಲ್ಲಿ ಅವರ ಪ್ರಾತಿನಿಧ್ಯ ಇನ್ನೂ ಕಡಿಮೆಯಿದೆ. ವಿಶ್ವಾದ್ಯಂತ ಕೇವಲ ಶೇ 19.1ರಷ್ಟು ಸಿಇಒ (CEO) ಹುದ್ದೆಗಳನ್ನು ಮಾತ್ರ ಮಹಿಳೆಯರು ಹೊಂದಿದ್ದಾರೆ. ಇನ್ನು ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದ ಎಂಜಿನಿಯರ್‌ಗಳಲ್ಲಿ ಐವರಲ್ಲಿ ಒಬ್ಬರಿಗಿಂತ ಕಡಿಮೆ ಮಹಿಳೆಯರಿದ್ದಾರೆ ಎಂದು ವರದಿ ಕಳವಳ ವ್ಯಕ್ತಪಡಿಸಿದೆ.
ಆಫ್ರಿಕಾದ ‘ನಮೀಬಿಯಾ’ ನಾಲ್ಕು ಸ್ಥಾನ ಮೇಲೇರಿ ನಾಲ್ಕನೇ ಸ್ಥಾನ ಪಡೆದುಕೊಂಡಿದೆ. ಯುನೈಟೆಡ್ ಕಿಂಗ್‌ಡಮ್, ನ್ಯೂಜಿಲೆಂಡ್, ಸ್ವೀಡನ್, ಆಸ್ಟ್ರೇಲಿಯಾ (ಮೊದಲ ಬಾರಿಗೆ ಟಾಪ್ 10 ಪ್ರವೇಶ), ಜರ್ಮನಿ ಮತ್ತು ಐರ್ಲೆಂಡ್ ಟಾಪ್ 10 ಪಟ್ಟಿಯಲ್ಲಿರುವ ಇತರ ದೇಶಗಳಾಗಿವೆ. 2006ರಿಂದ ಐಸ್‌ಲ್ಯಾಂಡ್, ಫಿನ್‌ಲ್ಯಾಂಡ್, ನಾರ್ವೆ ಮತ್ತು ಸ್ವೀಡನ್ ದೇಶಗಳು ಸತತವಾಗಿ ಟಾಪ್ 10ರಲ್ಲಿ ಸ್ಥಾನ ಉಳಿಸಿಕೊಂಡಿವೆ. ಐಸ್‌ಲ್ಯಾಂಡ್ ಶೇ 90ಕ್ಕೂ ಹೆಚ್ಚು (ಶೇ 93) ಲಿಂಗ ಅಂತರವನ್ನು ಮುಚ್ಚಿರುವ ವಿಶ್ವದ ಏಕೈಕ ದೇಶವಾಗಿ ಹೊರಹೊಮ್ಮಿದೆ.
”ಕಳೆದ 20 ವರ್ಷಗಳ ಡೇಟಾವನ್ನು ಗಮನಿಸಿದರೆ ಲಿಂಗ ಸಮಾನತೆ ಸಾಧಿಸುವುದು ಸಾಧ್ಯವಿದೆ ಎಂಬುದು ಸ್ಪಷ್ಟವಾಗುತ್ತದೆ. ಸಮಾನತೆಯು ಆರ್ಥಿಕ ಬೆಳವಣಿಗೆಗೆ ಅಡಿಪಾಯವಾಗಿದೆ. ಇದನ್ನು ವೇಗಗೊಳಿಸಲು ಸರ್ಕಾರಗಳು ಮತ್ತು ಉದ್ಯೋಗದಾತರು ಪರಿಣಾಮಕಾರಿ ನೀತಿಗಳನ್ನು ಜಾರಿಗೆ ತರಬೇಕು” ಎಂದು ವಿಶ್ವ ಆರ್ಥಿಕ ವೇದಿಕೆಯ ವ್ಯವಸ್ಥಾಪಕ ನಿರ್ದೇಶಕಿ ಸಾದಿಯಾ ಜಾಹಿದಿ ಅಭಿಪ್ರಾಯಪಟ್ಟಿದ್ದಾರೆ.
