ಅಮೆರಿಕದ ಎಚ್-1ಬಿ ವೀಸಾ ನಿಯಮಗಳನ್ನು ಮತ್ತಷ್ಟು ಬಿಗಿಗೊಳಿಸಲು ಮುಂದಾಗಿರುವ ಅಲ್ಲಿನ ಆಂತರಿಕ ಭದ್ರತಾ ಇಲಾಖೆಯು (DHS), ವೀಸಾ ಅರ್ಜಿ ಶುಲ್ಕವನ್ನು 1,03,265 ಡಾಲರ್‌ಗಳಿಗೆ(ಸುಮಾರು 1 ಕೋಟಿ ರೂ.) ಹೆಚ್ಚಿಸುವ ಪ್ರಸ್ತಾವನೆಯನ್ನು ಮುಂದಿಟ್ಟಿದೆ. ಟ್ರಂಪ್ ಆಡಳಿತವು ಜಾರಿಗೆ ತಂದಿದ್ದ 1 ಲಕ್ಷ ಡಾಲರ್ ಶುಲ್ಕದ ನಿಯಮವನ್ನು ಇದೀಗ ಕಾಯಂಗೊಳಿಸಲು ಸರ್ಕಾರ ನಿರ್ಧರಿಸಿದ್ದು, ಈ ಕುರಿತು ಸಾರ್ವಜನಿಕರ ಅಭಿಪ್ರಾಯ ಸಂಗ್ರಹಿಸಲು 30 ದಿನಗಳ ಕಾಲಾವಕಾಶ ನೀಡಲಾಗಿದೆ.
ಈ ಶುಲ್ಕ ಹೆಚ್ಚಳದ ಕುರಿತು ಕಾನೂನು ಸಮರವೂ ನಡೆಯುತ್ತಿದೆ. ಕಳೆದ ಜೂನ್ 8 ರಂದು ಮ್ಯಾಸಚೂಸೆಟ್ಸ್‌ನ ಜಿಲ್ಲಾ ನ್ಯಾಯಾಲಯವು 1 ಲಕ್ಷ ಡಾಲರ್ ಶುಲ್ಕ ವಸೂಲಿ ಮಾಡುವ ಆದೇಶವನ್ನು ರದ್ದುಗೊಳಿಸಿತ್ತು. ಇದನ್ನು ಪ್ರಶ್ನಿಸಿ ಡಿಎಚ್‌ಎಸ್ ಸಲ್ಲಿಸಿದ್ದ ಮೇಲ್ಮನವಿಯನ್ನು ಜುಲೈ 24ರಂದು ಮೇಲ್ಮನವಿ ನ್ಯಾಯಾಲಯ ತಿರಸ್ಕರಿಸಿದೆ. ಸದ್ಯಕ್ಕೆ ನ್ಯಾಯಾಲಯದ ಆದೇಶ ಪಾಲಿಸುವುದಾಗಿ ತಿಳಿಸಿರುವ ಡಿಎಚ್‌ಎಸ್, ಮುಂದಿನ ದಿನಗಳಲ್ಲಿ ತಡೆಯಾಜ್ಞೆ ತೆರವಾದರೆ ಕಡ್ಡಾಯವಾಗಿ ಶುಲ್ಕ ವಸೂಲಿ ಮಾಡುವುದಾಗಿ ಸ್ಪಷ್ಟಪಡಿಸಿದೆ.
ಈ ಪ್ರಸ್ತಾವನೆಯು ಅಮೆರಿಕದಲ್ಲಿ ನೆಲೆಸಲು ಬಯಸುವ ಭಾರತೀಯ ವೃತ್ತಿಪರರ ಮೇಲೆ ತೀವ್ರ ಪರಿಣಾಮ ಬೀರಲಿದೆ. ವಿಶೇಷವಾಗಿ ತಮ್ಮ ಉದ್ಯೋಗಿಗಳನ್ನು ಅಮೆರಿಕಕ್ಕೆ ಕಳುಹಿಸುವ ಭಾರತೀಯ ಐಟಿ ಕಂಪನಿಗಳಿಗೆ ಈ ನಿಯಮ ನುಂಗಲಾರದ ತುತ್ತಾಗಲಿದೆ. ಹೀಗಾಗಿ, ಪ್ರಸ್ತುತ ಸಾಲಿನಲ್ಲಿ ಭಾರತೀಯ ಐಟಿ ಕಂಪನಿಗಳಿಗಿಂತ ಅಮೆಜಾನ್, ಮೆಟಾ, ಮೈಕ್ರೋಸಾಫ್ಟ್ ಮತ್ತು ಗೂಗಲ್‌ನಂತಹ ಬಹುರಾಷ್ಟ್ರೀಯ ಟೆಕ್ ದೈತ್ಯ ಕಂಪನಿಗಳೇ ಹೆಚ್ಚಿನ ಸಂಖ್ಯೆಯಲ್ಲಿ ಎಚ್-1ಬಿ ವೀಸಾಗೆ ಪ್ರಾಯೋಜಕತ್ವ ವಹಿಸುತ್ತಿವೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಈ ಎಲ್ಲ ಬೆಳವಣಿಗೆಗಳ ನಡುವೆಯೂ, ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವೆಗಳ (USCIS) ವಿಭಾಗವು 2027ನೇ ಹಣಕಾಸು ವರ್ಷದ ನಿಗದಿತ ಕೋಟಾವನ್ನು ಈಗಾಗಲೇ ಪೂರ್ಣಗೊಳಿಸಿದೆ. ವಾರ್ಷಿಕ ಮಿತಿಯಾದ 65,000 ಸಾಮಾನ್ಯ ಎಚ್-1ಬಿ ವೀಸಾ ಹಾಗೂ ಸ್ನಾತಕೋತ್ತರ ಪದವೀಧರರಿಗೆ ಮೀಸಲಾದ 20,000 ವೀಸಾಗಳಿಗೆ ಅಗತ್ಯವಿರುವಷ್ಟು ಅರ್ಜಿಗಳು ಈಗಾಗಲೇ ಸಲ್ಲಿಕೆಯಾಗಿದ್ದು, ಮುಂದಿನ ದಿನಗಳಲ್ಲಿ ವೀಸಾ ಪ್ರಕ್ರಿಯೆಯು ಮತ್ತಷ್ಟು ಕಠಿಣವಾಗುವ ಮುನ್ಸೂಚನೆ ನೀಡಿದೆ.
ಇದರ ಜೊತೆಗೆ, ವೇತನ ಆಧಾರಿತ ವೀಸಾ ಆಯ್ಕೆ ಪ್ರಕ್ರಿಯೆಯು ಭಾರತೀಯರ ಪಾಲಿಗೆ ಕಂಟಕವಾಗಿ ಪರಿಣಮಿಸಿದೆ. ‘ಬೌಂಡ್‌ಲೆಸ್ ಇಮಿಗ್ರೇಶನ್’ ಸಂಸ್ಥೆಯ ಮಾಹಿತಿಯ ಪ್ರಕಾರ, ಹೆಚ್ಚಿನ ವೇತನ ಪಡೆಯುವ ಹಿರಿಯ ಅಭ್ಯರ್ಥಿಗಳ (Level III) ಆಯ್ಕೆ ಪ್ರಮಾಣ ಶೇ. 68ರಷ್ಟಿದ್ದರೆ, ಕಡಿಮೆ ವೇತನದ ಆರಂಭಿಕ ಹಂತದ (Level I) ಅಭ್ಯರ್ಥಿಗಳ ಆಯ್ಕೆ ಪ್ರಮಾಣ ಶೇ. 40ರಷ್ಟಿದೆ. ಇದು ಅಮೆರಿಕದಲ್ಲಿ ವ್ಯಾಸಂಗ ಮುಗಿಸಿ ಮೊದಲ ಉದ್ಯೋಗ ಹುಡುಕುತ್ತಿರುವ ಭಾರತೀಯ ವಿದ್ಯಾರ್ಥಿಗಳಿಗೆ ಭಾರಿ ಹಿನ್ನಡೆಯನ್ನುಂಟು ಮಾಡಿದೆ.
ಮತ್ತೊಂದೆಡೆ, ಉದ್ದೇಶಿತ ‘ಎಚ್-1ಬಿ ವೀಸಾ ದುರ್ಬಳಕೆ ತಡೆ ಕಾಯ್ದೆ-2026’ ಜಾರಿಯಾದರೆ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ. ಹೊಸ ಎಚ್-1ಬಿ ವೀಸಾಗಳ ವಿತರಣೆಗೆ ಮೂರು ವರ್ಷಗಳ ಕಾಲ ತಡೆ ನೀಡುವಂತೆ ಈ ಮಸೂದೆಯಲ್ಲಿ ಶಿಫಾರಸು ಮಾಡಲಾಗಿದೆ. ಅಲ್ಲದೆ, ವಾರ್ಷಿಕ ವೀಸಾ ಮಿತಿಯನ್ನು 65,000 ದಿಂದ ಕೇವಲ 25,000 ಕ್ಕೆ ಇಳಿಸುವುದು ಹಾಗೂ ಉದ್ಯೋಗಿಗಳಿಗೆ ಕನಿಷ್ಠ ವಾರ್ಷಿಕ ವೇತನವನ್ನು 2 ಲಕ್ಷ ಡಾಲರ್‌ಗೆ(2 ಕೋಟಿ ರೂ.) ನಿಗದಿಪಡಿಸುವ ಕಠಿಣ ನಿಯಮಗಳನ್ನು ಇದು ಒಳಗೊಂಡಿದೆ.
