ಭಾರತದ ಮೂರು ಆಯಕಟ್ಟಿನ ತೈಲ ಸಂಗ್ರಹಾಗಾರಗಳು (SPR) ಪ್ರಸ್ತುತ ಅಂದಾಜು 3.372 ಮಿಲಿಯನ್ ಟನ್ ಕಚ್ಚಾ ತೈಲವನ್ನು ಹೊಂದಿವೆ. ಇದು ಅವುಗಳ ಒಟ್ಟು ಸಾಮರ್ಥ್ಯದ ಮೂರನೇ ಎರಡರಷ್ಟು ಭಾಗವಾಗಿದೆ ಎಂದು ಪೆಟ್ರೋಲಿಯಂ ರಾಜ್ಯ ಸಚಿವ ಸುರೇಶ್ ಗೋಪಿ ತಿಳಿಸಿದ್ದಾರೆ.
ಸೋಮವಾರ, ಸಂಸತ್ತಿನಲ್ಲಿ ಉತ್ತರ ನೀಡಿದ ಸಚಿವರು, ಎಸ್ಪಿಆರ್ಗಳನ್ನು ಮೇಲ್ವಿಚಾರಣೆ ಮಾಡುವ ಫೆಡರಲ್ ಸಂಸ್ಥೆಯಾದ ‘ಇಂಡಿಯನ್ ಸ್ಟ್ರಾಟೆಜಿಕ್ ಪೆಟ್ರೋಲಿಯಂ ರಿಸರ್ವ್ ಲಿಮಿಟೆಡ್’ ಬಿಡುಗಡೆ ಮಾಡಿದ ದತ್ತಾಂಶವನ್ನು ವಿವರಿಸಿದ್ದಾರೆ. ಮಾರುಕಟ್ಟೆಯ ಪೂರೈಕೆ ಮತ್ತು ಬಳಕೆಯ ಸ್ಥಿತಿಗತಿಗಳಿಗೆ ಅನುಗುಣವಾಗಿ ಈ ಸಂಗ್ರಹದ ಮಟ್ಟವು ಬದಲಾಗುತ್ತಿರುತ್ತದೆ ಎಂದು ತಿಳಿಸಿದ್ದಾರೆ.
ಇದರ ಜೊತೆಗೆ, ಸಂಸ್ಕರಿಸದ ಕಚ್ಚಾ ತೈಲ (SPR) ಮತ್ತು ತೈಲ ಮಾರಾಟ ಕಂಪನಿಗಳ ಬಳಿ ಇರುವ ಸಿದ್ಧ ಇಂಧನ (ಪೆಟ್ರೋಲ್, ಡೀಸೆಲ್) ಸೇರಿದಂತೆ ಭಾರತದ ಬಳಿ ಸದ್ಯ ಒಟ್ಟು 74 ದಿನಗಳಿಗೆ ಆಗುವಷ್ಟು ಇಂಧನ ಸಂಗ್ರಹವಿದೆ ಎಂದು ತಿಳಿಸಿದ್ದಾರೆ.
ಭಾರತದ ಎಸ್ಪಿಆರ್ ಸಾಮರ್ಥ್ಯವನ್ನು ಇನ್ನೂ 65 ಲಕ್ಷ ಟನ್ ಹೆಚ್ಚಿಸಲಾಗುತ್ತಿದೆ. ಈ ಪೈಕಿ, ಒಡಿಶಾದಲ್ಲಿ 40 ಲಕ್ಷ ಟನ್ ಮತ್ತು ಕರ್ನಾಟಕದಲ್ಲಿ 25 ಲಕ್ಷ ಟನ್ನಷ್ಟು ವಿಸ್ತರಿಸಲಾಗುತ್ತಿದೆ ಎಂದು ಹೇಳಿದ್ದಾರೆ.
ಪ್ರಸ್ತುತ ಆಂಧ್ರಪ್ರದೇಶದಲ್ಲಿ ಒಂದು ಮತ್ತು ಕರ್ನಾಟಕದಲ್ಲಿ ಎರಡು ಭೂಗತ ಸಂಗ್ರಹಾಗಾರಗಳಿದ್ದು, ಇವುಗಳ ಒಟ್ಟು ಸಾಮರ್ಥ್ಯ 53.3 ಲಕ್ಷ ಟನ್ ಆಗಿದೆ. ಇವುಗಳು 100% ರಷ್ಟು ಭರ್ತಿಯಾಗಿದ್ದರೆ, ಇರಾನ್ ಯುದ್ಧದಂತಹ ತುರ್ತು ಸಂದರ್ಭಗಳಲ್ಲಿ ಸುಮಾರು 9.5 ದಿನಗಳ ಕಾಲ ತೈಲ ಪೂರೈಕೆ ಮಾಡಲು ಸಾಧ್ಯವಾಗುತ್ತದೆ ಎಂದು ತಿಳಿಸಿದ್ದಾರೆ.
ವಿಶ್ವದ ಮೂರನೇ ಅತಿದೊಡ್ಡ ಇಂಧನ ಗ್ರಾಹಕನಾಗಿರುವ ಭಾರತವು ತನ್ನ ಕಚ್ಚಾ ತೈಲದ ಅಗತ್ಯಕ್ಕಾಗಿ ಆಮದಿನ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಭಾರತಕ್ಕೆ ಪ್ರತಿದಿನ 55 ರಿಂದ 60 ಲಕ್ಷ ಬ್ಯಾರೆಲ್ ಕಚ್ಚಾ ತೈಲದ ಅಗತ್ಯವಿದೆ. 2026ರ ಹಣಕಾಸು ವರ್ಷದಲ್ಲಿ (FY26) ಈವರೆಗೆ ಸರ್ಕಾರವು ತನ್ನ ಅಗತ್ಯದ 88.7%ರಷ್ಟು ಅಥವಾ 22.6 ಕೋಟಿ ಟನ್ ತೈಲವನ್ನು ಆಮದು ಮಾಡಿಕೊಳ್ಳಲು 110 ಶತಕೋಟಿ ಯುಎಸ್ ಡಾಲರ್ ವ್ಯಯಿಸಿದೆ.
ಯುದ್ಧದ ಮೊದಲು, ಭಾರತವು ತನ್ನ ಆಮದಿನ ಅರ್ಧದಷ್ಟು ಭಾಗವನ್ನು ಇರಾಕ್, ಸೌದಿ ಅರೇಬಿಯಾ, ಯುಎಇ ಹಾಗೂ ಕುವೈತ್ನಂತಹ ಗಲ್ಫ್ ರಾಷ್ಟ್ರಗಳಿಂದ ಪಡೆಯುತ್ತಿತ್ತು. ಹಾರ್ಮುಜ್ ಮೂಲಕ ಬರುತ್ತಿದ್ದ ಈ ತೈಲವು ಭಾರತದ ಒಟ್ಟು ಆಮದಿನ 40% ರಷ್ಟಿತ್ತು.
ಯುದ್ಧದಿಂದಾಗಿ ಪೂರೈಕೆ ಮಾರ್ಗಕ್ಕೆ ಅಡ್ಡಿಯಾದ ಹಿನ್ನೆಲೆಯಲ್ಲಿ ಭಾರತವು ತನ್ನ ಆಮದು ಮೂಲಗಳನ್ನು ಬದಲಾಯಿಸಿದೆ. ಅಮೆರಿಕ, ನೈಜೀರಿಯಾ, ಅಂಗೋಲಾ, ಕೆನಡಾ, ಕೊಲಂಬಿಯಾ, ಬ್ರೆಜಿಲ್ ಹಾಗೂ ಮೆಕ್ಸಿಕೊಗಳಿಂದ ತೈಲ ಆಮದು ಮಾಡಿಕೊಳ್ಳುತ್ತಿದೆ. ಈ ದೇಶಗಳಿಂದ ಬರುವ ಹಡಗುಗಳು ಭಾರತವನ್ನು ತಲುಪಲು ಹಾರ್ಮುಜ್ ಜಲಸಂಧಿಯನ್ನು ದಾಟುವ ಅಗತ್ಯವಿಲ್ಲ ಎಂದು ಸಚಿವರು ಹೇಳಿದ್ದಾರೆ.
ಈ ಲೇಖನ ಓದಿದ್ದೀರಾ?: ಕೇಂದ್ರವನ್ನು ಟೀಕಿಸಿದ ಸಾಮಾಜಿಕ ಮಾಧ್ಯಮ ಖಾತೆಗಳು ಮಂಗಮಾಯ: ಉಳಿಯುವುದು ಬರೀ ಮೋದಿಮಯ!
ಆದಾಗ್ಯೂ, ಹಾರ್ಮುಜ್ ಮೂಲಕ ಬರುವ ತೈಲವು ಆರ್ಥಿಕವಾಗಿ ಹೆಚ್ಚು ಲಾಭದಾಯಕವಾಗಿದೆ. ಹೀಗಾಗಿ ಯುದ್ಧವು ಬೇಗನೆ ಕೊನೆಗೊಳ್ಳುವುದು ಅಥವಾ ಇಂಧನ ವ್ಯಾಪಾರಕ್ಕೆ ಯುದ್ಧದಿಂದ ವಿನಾಯಿತಿ ಸಿಗುವುದು ಭಾರತ ಸೇರಿದಂತೆ ನಾನಾ ರಾಷ್ಟ್ರಗಳಿಗೆ ಮುಖ್ಯವಾಗಿದೆ.
ಈ ನಡುವೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಕದನ ವಿರಾಮ ಘೋಷಿಸಲು ಯತ್ನಿಸುತ್ತಿದ್ದಾರೆ. ಆದರೆ, ತಮ್ಮ ಮೇಲಿನ ನಿರ್ಬಂಧಗಳ ತೆರವು ಸೇರಿದಂತೆ ಪ್ರಮುಖ ಮೂರು ಬೇಡಿಕೆಗಳನ್ನು ಮುಂದಿಟ್ಟಿರುವ ಇರಾನ್, ತಮ್ಮ ಬೇಡಿಕೆಗೆ ಅಮೆರಿಕ ಒಪ್ಪಿಕೊಳ್ಳದೆ, ಯುದ್ಧ ನಿಲ್ಲುವುದಿಲ್ಲ ಎಂದು ಹೇಳಿದೆ.
