ಪವಿತ್ರ ರಂಝಾನ್ ಹಬ್ಬದ ಮರುದಿನ ಬಾಬಾ ಬುಡನ್ ಗಿರಿ ದರ್ಗಾ ಝಿಯಾರತ್ಗೆ ತೆರಳಿದ ದರ್ಗಾ ವಂಶಸ್ಥರಾದ ಫಖ್ರುದ್ದೀನ್ ಶಾ ಖಾದ್ರಿ ಹಾಗೂ ಅನೇಕ ಭಕ್ತರಿಗೆ ಮುಜರಾಯಿ ಇಲಾಖೆಯ ಅಧಿಕಾರಿ ದರ್ಶನ್ ಮತ್ತು ಇತರ ಸಿಬ್ಬಂದಿ ಅಡ್ಡಿಪಡಿಸಿದ ಘಟನೆ ಬಗ್ಗೆ ಎಸ್ಡಿಪಿಐ ವತಿಯಿಂದ ಜಿಲ್ಲಾಧಿಕಾರಿಗೆ ಮನವಿ ನೀಡಲಾಗಿದೆ ಎಂದು ಜಿಲ್ಲಾ ಅಧ್ಯಕ್ಷ ಮುಸ್ತಫ ಅಲ್ದೂರು ತಿಳಿಸಿದರು.
ಪ್ರತಿ ವರ್ಷವೂ ರಂಝಾನ್ ಹಾಗೂ ಈದ್ ಹಬ್ಬದ ಮರುದಿನ, ಭಕ್ತರು ತಮ್ಮ ಪೂರ್ವಜರ ಗೊರಿಗಳ ದರ್ಶನ ಮಾಡುವುದು ಮತ್ತು ಕಬ್ರಸ್ತಾನದಲ್ಲಿ ಹೂಗಳನ್ನು ಸಮರ್ಪಿಸುವುದು ನಡೆದುಬಂದ ಧಾರ್ಮಿಕ ಸಂಪ್ರದಾಯವಾಗಿದೆ. ಈ ಸಂಪ್ರದಾಯವನ್ನು ತಡೆಯುವುದು ಧಾರ್ಮಿಕ ಸ್ವಾತಂತ್ರ್ಯದ ಮೇಲಿನ ನೇರ ಹಲ್ಲೆಯಾಗಿದೆ. ಕಬ್ರಸ್ತಾನ್ ಹಾಗೂ ಗೊರಿಗಳ ದರ್ಶನಕ್ಕೆ ಅವಕಾಶ ನೀಡದೆ, ಭಕ್ತರು ತಂದಿದ್ದ ಹೂಗಳನ್ನು ಸಮರ್ಪಿಸಲು ತಡೆದು, ಸುಮಾರು 3 ಗಂಟೆಗಳ ಕಾಲ ಗೇಟ್ ಬಳಿ ನಿಲ್ಲಿಸಿ ಧಾರ್ಮಿಕ ಗುರುಗಳು ಮತ್ತು ಭಕ್ತರನ್ನು ಅವಮಾನಿಸಿರುವುದು ಅತ್ಯಂತ ಗಂಭೀರ ವಿಷಯವಾಗಿದೆ ಎಂದು ಮುಸ್ತಾಫ ತಿಳಿಸಿದರು.
ಈ ಘಟನೆಯು ಮುಸ್ಲಿಂ ಸಮುದಾಯದ ಭಾವನೆಗಳಿಗೆ ತೀವ್ರ ಧಕ್ಕೆ ತಂದಿದೆ. ಇಂತಹ ಘಟನೆಯನ್ನು ಖಂಡಿಸಿ, ದರ್ಗಾ ಗೇಟ್ ಮುಂಭಾಗದಲ್ಲಿ ಎಸ್ಡಿಪಿಐ ಜಿಲ್ಲಾ ಅಧ್ಯಕ್ಷರಾದ ಮುಸ್ತಫ ಅಲ್ದೂರು ಅವರ ನೇತೃತ್ವದಲ್ಲಿ ಸುಮಾರು 3 ಗಂಟೆಗಳ ಕಾಲ ತೀವ್ರ ಪ್ರತಿಭಟನೆ ನಡೆಸಲಾಗಿದೆ. ಈ ಹಿನ್ನೆಲೆಯಲ್ಲಿ, ಸಂಬಂಧಪಟ್ಟ ಮುಜರಾಯಿ ಅಧಿಕಾರಿ ದರ್ಶನ್ ಅವರನ್ನು ತಕ್ಷಣವೇ ಅಮಾನತ್ತು ಮಾಡಬೇಕು. ಘಟನೆಯ ಕುರಿತು ಸಮಗ್ರ ತನಿಖೆ ನಡೆಸಿ ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಹಾಗೂ ಭಕ್ತರಿಗೆ ಯಾವುದೇ ಅಡ್ಡಿಯಿಲ್ಲದೆ ತಮ್ಮ ಧಾರ್ಮಿಕ ಆಚರಣೆಗಳನ್ನು ನೆರವೇರಿಸಲು ಸೂಕ್ತ ವ್ಯವಸ್ಥೆ ಕಲ್ಪಿಸಬೇಕು ಎಂದು ಆಗ್ರಹಿಸಲಾಗಿದೆ.
ಇದನ್ನೂ ಓದಿದ್ದೀರಾ?ಚಿಕ್ಕಮಗಳೂರು | ಸರ್ಕಾರಿ ಶಾಲೆ ಮುಚ್ಚಲು ಬಿಡುವುದಿಲ್ಲ; ಜೋಳದಾಳು ಗ್ರಾಮಸ್ಥರ ಆಗ್ರಹ
ಒಂದು ವೇಳೆ ನಮ್ಮ ಮನವಿಗೆ ತಕ್ಷಣ ಸ್ಪಂದನೆ ದೊರೆಯದಿದ್ದರೆ, ಎಸ್ಡಿಪಿಐ ಪಕ್ಷದ ವತಿಯಿಂದ ಜಿಲ್ಲಾದ್ಯಂತ ತೀವ್ರ ಹೋರಾಟ ಹಾಗೂ ಪ್ರತಿಭಟನೆಗಳನ್ನು ಹಮ್ಮಿಕೊಳ್ಳಲಾಗುವುದು ಎಂದು ಎಸ್ ಡಿಪಿಐ ಜಿಲ್ಲಾಧ್ಯಕ್ಷ ಮುಸ್ತಾಫ ಆಲ್ದೂರ್ ತಿಳಿಸಿದರು.
