ಪಶ್ಚಿಮ ಬಂಗಾಳದ ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಸೋತು TMC (ತೃಣಮೂಲ ಕಾಂಗ್ರೆಸ್) ಅಧಿಕಾರ ಕಳೆದುಕೊಂಡ ಬೆನ್ನಲ್ಲೇ ಪಕ್ಷದಲ್ಲಿ ಉಂಟಾಗಿರುವ ಭಿನ್ನಮತ ಮತ್ತು ಸಂಸದರು-ಶಾಸಕರ ಪಕ್ಷಾಂತರದ ಕುರಿತು TMC ಸಂಸದೆ ಮಹುವಾ ಮೊಯಿತ್ರಾ ತೀವ್ರ ಬೇಸರ ಹೊರಹಾಕಿದ್ದಾರೆ. ‘ದಿ ಇಂಡಿಯನ್ ಎಕ್ಸ್‌ಪ್ರೆಸ್’ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿರುವ ಅವರು, ಪಕ್ಷದ ಪ್ರಸ್ತುತ ಪರಿಸ್ಥಿತಿ, ಸಹೋದ್ಯೋಗಿಗಳ ದ್ರೋಹ ಮತ್ತು ಮಮತಾ ಬ್ಯಾನರ್ಜಿ ಅವರ ನಾಯಕತ್ವದ ಕುರಿತು ಮುಕ್ತವಾಗಿ ಮಾತನಾಡಿದ್ದಾರೆ.
ಪಕ್ಷದ ನಾಯಕರ ಸರಣಿ ರಾಜೀನಾಮೆಗಳ ಕುರಿತು ಪ್ರತಿಕ್ರಿಯಿಸಿರುವ ಮಹುವಾ, “ದುರಾಸೆ ಮತ್ತು ದ್ರೋಹಕ್ಕೆ ಯಾವುದೇ ಮಿತಿ ಇರುವುದಿಲ್ಲ. ಲೋಕಸಭೆಯಲ್ಲಿ ಹಿನ್ನಡೆ ಅನುಭವಿಸಿದ ಬಿಜೆಪಿ, ಹೇಗಾದರೂ ಮಾಡಿ 40-50 ಸಂಸದರನ್ನು ತನ್ನತ್ತ ಸೆಳೆದುಕೊಳ್ಳಲು ‘ಜೋಡ್-ತೋಡ್’ (ಪಕ್ಷ ಒಡೆಯುವ) ರಾಜಕಾರಣ ಮಾಡುತ್ತಿದೆ. ಕೇಂದ್ರೀಯ ತನಿಖಾ ಸಂಸ್ಥೆಗಳ ಮೂಲಕ ನಾಯಕರಲ್ಲಿ ಭಯ ಹುಟ್ಟಿಸಿ, ಬೆದರಿಸುವ ತಂತ್ರವನ್ನು ಬಿಜೆಪಿ ಬಳಸುತ್ತಿದೆ” ಎಂದು ಆರೋಪಿಸಿದ್ದಾರೆ.
“ಟಿಎಂಸಿ ಯುವ ನಾಯಕಿ ಸಾಯೋನಿ ಘೋಷ್ ನನಗೆ ಮಗಳಿದ್ದಂತೆ, ತಂಗಿಯಿದ್ದಂತೆ. ಅವಳು ತುಂಬಾ ಪ್ರತಿಭಾವಂತೆ ಮತ್ತು ಕಷ್ಟಪಟ್ಟು ಮೇಲೆ ಬಂದವಳು. ಕಳೆದ 5 ವರ್ಷಗಳಲ್ಲಿ ಪಕ್ಷ ಅವಳಿಗೆ ಶಾಸಕ ಸ್ಥಾನ, ರಾಷ್ಟ್ರೀಯ ಯುವ ಅಧ್ಯಕ್ಷೆ ಹುದ್ದೆ ಹಾಗೂ ಪ್ರತಿಷ್ಠಿತ ಜಾದವ್‌ಪುರ ಲೋಕಸಭಾ ಟಿಕೆಟ್ ನೀಡಿದೆ. ಇಷ್ಟೆಲ್ಲಾ ಆದ ಮೇಲೂ ಅವಳು ಪಕ್ಷ ತೊರೆಯುವ ಆಲೋಚನೆ ಮಾಡುತ್ತಿರುವುದು ಅತ್ಯಂತ ಬೇಸರದ ಸಂಗತಿ. ಭಯವನ್ನು ಮೆಟ್ಟಿನಿಂತು ಹೋರಾಡುವಂತೆ ನಾನು ಅವಳಿಗೆ ಸಲಹೆ ನೀಡುತ್ತೇನೆ” ಎಂದಿದ್ದಾರೆ.
“ನಾವೆಲ್ಲರೂ ಲೋಕಸಭೆಗೆ ಆಯ್ಕೆಯಾಗಿದ್ದು ಮಮತಾ ಬ್ಯಾನರ್ಜಿ ಅವರ ಹೆಸರಿನಿಂದ. ಪಕ್ಷ ಎಂದರೆ ಮಮತಾ ಬ್ಯಾನರ್ಜಿ ಅಷ್ಟೇ. ಮಮತಾ ದಿ ತುಂಬಾ ಭಾವುಕರು ಮತ್ತು ಕ್ಷಮಾಗುಣ ಉಳ್ಳವರು. ಆದರೆ ನಾವು ಎದುರಿಸುತ್ತಿರುವುದು ಯಾವುದೇ ದಯೆ-ದಾಕ್ಷಿಣ್ಯವಿಲ್ಲದ ಕ್ರೂರ ಬಿಜೆಪಿಯನ್ನು. ಹಾಗಾಗಿ ನಾವು ಕೂಡ ಅಷ್ಟೇ ಕಠಿಣವಾಗಬೇಕಿದೆ” ಎಂದು ಪಕ್ಷದ ನಾಯಕತ್ವಕ್ಕೆ ಕರೆ ನೀಡಿದ್ದಾರೆ. ಕಾನೂನಿನ ಪ್ರಕಾರ ಪಕ್ಷದ ಸೀಳಿಕೆ ಸಾಧ್ಯವಿಲ್ಲ, ಬಂಡಾಯಗಾರರು ಧೈರ್ಯವಿದ್ದರೆ ರಾಜೀನಾಮೆ ನೀಡಿ ಬಿಜೆಪಿ ಟಿಕೆಟ್‌ನಿಂದ ಸ್ಪರ್ಧಿಸಿ ಗೆದ್ದು ಬರಲಿ” ಎಂದು ಸವಾಲು ಹಾಕಿದ್ದಾರೆ.
ಕಳೆದ ವರ್ಷ ಸಂಸದ ಕಲ್ಯಾಣ್ ಬ್ಯಾನರ್ಜಿ ಅವರೊಂದಿಗೆ ಇದ್ದ ಸಾರ್ವಜನಿಕ ಭಿನ್ನಾಭಿಪ್ರಾಯಗಳ ಕುರಿತು ಮಾತನಾಡಿರುವ ಮಹುವಾ, “ನಮ್ಮ ನಡುವೆ ಭಿನ್ನಾಭಿಪ್ರಾಯಗಳಿದ್ದರೂ, ಕಲ್ಯಾಣ್ ದಾ ಮಮತಾ ದಿ ಅವರಿಗೆ 2000% ನಿಷ್ಠಾವಂತರಾಗಿದ್ದಾರೆ. ಸಂಕಷ್ಟದ ಸಮಯದಲ್ಲಿ ಪಕ್ಷದ ಪರವಾಗಿ ಧೈರ್ಯದಿಂದ ಹೋರಾಡುತ್ತಿರುವ ಅವರ ನಿಷ್ಠೆಯನ್ನು ನಾನು ಗೌರವಿಸುತ್ತೇನೆ ಮತ್ತು ಈಗ ನಾವಿಬ್ಬರೂ ಜೊತೆಯಾಗಿ ಕೆಲಸ ಮಾಡುತ್ತಿದ್ದೇವೆ” ಎಂದು ಸ್ಪಷ್ಟಪಡಿಸಿದ್ದಾರೆ.
ಇದನ್ನೂ ಓದಿ: 12ನೇ ತರಗತಿ ಅಂಕಗಳ ಆಧಾರದ ಮೇಲೆ MBBSಗೆ ಪ್ರವೇಶ ನೀಡಿ: ಮೋದಿಗೆ ವಿಜಯ್ ಒತ್ತಾಯ
ಮಮತಾ ಬ್ಯಾನರ್ಜಿ ಮತ್ತು ಅಭಿಷೇಕ್ ಬ್ಯಾನರ್ಜಿ ಅವರು ಕಾಂಗ್ರೆಸ್ ನಾಯಕರನ್ನು ಭೇಟಿ ಮಾಡಿರುವ ಕುರಿತು ಮಾತನಾಡಿ, “ಇಂಡಿಯಾ (INDIA) ಮೈತ್ರಿಕೂಟದ ಪಕ್ಷಗಳು ತಮ್ಮ ಅಹಂಕಾರವನ್ನು ಬದಿಗಿಟ್ಟು ಒಟ್ಟಾಗಬೇಕಿದೆ. ಇದು ಅಸ್ತಿತ್ವದ ಪ್ರಶ್ನೆ. ದೇಶದಲ್ಲಿ ಬಿಜೆಪಿಯೇತರ ಮತಗಳ ಸಂಖ್ಯೆ ಹೆಚ್ಚಿದೆ, ನಾವು ಒಟ್ಟಾಗಿ ಒಂದಕ್ಕೆ ಪ್ರತಿಯಾಗಿ ಒಂದು (one-to-one) ಸ್ಥಾನದಲ್ಲಿ ಹೋರಾಡಿದರೆ ಬಿಜೆಪಿಯನ್ನು ಸೋಲಿಸಬಹುದು” ಎಂದಿದ್ದಾರೆ.
ಪಕ್ಷದಲ್ಲಿ ಲೋಪದೋಷಗಳಿದ್ದರೂ, ಫ್ಯಾಸಿಸ್ಟ್ ಶಕ್ತಿಗಳ ವಿರುದ್ಧ ಹೋರಾಡಲು ಟಿಎಂಸಿ ತಮಗೆ ಅತ್ಯುತ್ತಮ ವೇದಿಕೆಯಾಗಿದೆ ಎಂದು ಪುನರುಚ್ಚರಿಸಿದ್ದಾರೆ ಮಹುವಾ ಮೊಯಿತ್ರಾ, ತಾವು ಪಕ್ಷದಲ್ಲೇ ಉಳಿದು ಹೋರಾಟ ಮುಂದುವರಿಸುವುದಾಗಿ ದೃಢ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
