ಸ್ವಾತಂತ್ರ್ಯ ಹೋರಾಟದ ಅತ್ಯಂತ ಪ್ರಭಾವಶಾಲಿ ನಾಯಕರಲ್ಲಿ ಒಬ್ಬರಾದ ಸುಭಾಷ್ ಚಂದ್ರ ಬೋಸ್ ಅವರ ‘ಮೊಮ್ಮಗ’ ಚಂದ್ರ ಕುಮಾರ್ ಬೋಸ್ ಅವರು “ಬಿಜೆಪಿ ಸೇರಿದ್ದು ನಾನು ಮಾಡಿದ ಐತಿಹಾಸಿಕ ಪ್ರಮಾದ” ಎಂದು ಹೇಳಿದ್ದಾರೆ.
ಚಂದ್ರ ಕುಮಾರ್ ಬೋಸ್ 2016ರಲ್ಲಿ ಬಿಜೆಪಿ ಸೇರಿದ್ದರು. ಪಶ್ಚಿಮ ಬಂಗಾಳ ಬಿಜೆಪಿಯ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ಆದರೆ ಸೈದ್ಧಾಂತಿಕ ಭಿನ್ನಾಭಿಪ್ರಾಯದ ಕಾರಣ 2023ರ ಸೆಪ್ಟೆಂಬರ್‌ನಲ್ಲಿ ಬಿಜೆಪಿಯ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದಾರೆ.
ಇದನ್ನು ಓದಿದ್ದೀರಾ? 80 ವರ್ಷ ಕಳೆದರೂ ಭಾರತಕ್ಕೆ ತಲುಪಿಲ್ಲ ನೇತಾಜಿ ಚಿತಾಭಸ್ಮ
ಈ ಬಗ್ಗೆ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದು, “ಬಿಜೆಪಿಗೆ ಸೇರಿದ್ದು, ಒಂದು ‘ಐತಿಹಾಸಿಕ ಪ್ರಮಾದ’ – ಆದರೆ ನಾನು ಅದನು ಬೇಗ ಅಥವಾ ತಡವಾಗಿಯಾದರೂ ಅರಿತುಕೊಂಡೆ! ಚುನಾವಣೆಗಳಲ್ಲಿ ಗೆಲ್ಲಲು ಮತದಾರರನ್ನು ವಿಭಜಿಸುವುದು-ಧ್ರುವೀಕರಣ ಮಾಡುವುದು ಒಂದು ಪಕ್ಷದ ಉದ್ದೇಶವಾದರೆ ಅದು ನನ್ನ ನಿಲುವಲ್ಲ” ಎಂದು ಹೇಳಿದ್ದಾರೆ.
ಹಾಗೆಯೇ, “ಕೋಮುವಾದದಿಂದ ಕೋಮುವಾದವನ್ನು ಎದುರಿಸಲು ಸಾಧ್ಯವಿಲ್ಲ! ನಮ್ಮ ರಾಷ್ಟ್ರವನ್ನು ರಕ್ಷಿಸಲು ನಾವು ಎಲ್ಲಾ ಸಮುದಾಯಗಳನ್ನು ಒಗ್ಗೂಡಿಸೋಣ. ಒಂದೇ ರೀತಿಯ ಮನಸ್ಸಿನ ಪಕ್ಷಗಳು, ಕಾರ್ಯಕರ್ತರು ಮತ್ತು ಜನರು ದೇಶವನ್ನು ಹಾಳುಮಾಡಲು ಹೊರಟಿರುವ ವಿಭಜಕ ಶಕ್ತಿಗಳನ್ನು ಸೋಲಿಸಲು ಒಗ್ಗೂಡಬೇಕು. ಜೈ ಹಿಂದ್!” ಎಂದು ಎಕ್ಸ್‌ ಪೋಸ್ಟ್‌ನಲ್ಲಿ ಬರೆದುಕೊಂಡಿದ್ದಾರೆ.
ಇನ್ನೊಂದು ಪೋಸ್ಟ್‌ನಲ್ಲಿ, “ಭ್ರಷ್ಟಾಚಾರ ವಿರೋಧಿ ಆಂದೋಲನ, ಆರೋಗ್ಯ ಸೌಲಭ್ಯ, ಶಿಕ್ಷಣದ ಹಕ್ಕು, ಕೈಗಾರಿಕೆ, ರೈತರ ಕಲ್ಯಾಣ ಮತ್ತು ರಕ್ಷಣೆಯಂತಹ ವಿಷಯಗಳಲ್ಲಿ ರಾಜಕೀಯ ಹೋರಾಟ ನಡೆಸಬೇಕು. ಆದರೆ ಈಗ ಧರ್ಮ, ಜಾತಿ, ಮತ ಮತ್ತು ವಿಭಜನೆಯ ಹೋರಾಟವಾಗಿದೆ. ಸ್ವಾತಂತ್ರ್ಯದ 79 ವರ್ಷಗಳ ನಂತರವೂ ನಾವು ಕ್ಷುಲ್ಲಕ ರಾಜಕೀಯವನ್ನು ಮೀರಿ ಬೆಳೆಯಲು ವಿಫಲರಾಗಿದ್ದೇವೆ” ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಇದನ್ನು ಓದಿದ್ದೀರಾ? ಎಡ್ವಿನ್ ಲುಟ್ಯನ್ ಪ್ರತಿಮೆ ಕಿತ್ತೊಗೆದು ರಾಜಾಜಿ ಪ್ರತಿಮೆ ಸ್ಥಾಪನೆಯ ಹಿಂದೆ ಮೋದಿ ಚುನಾವಣಾ ಗಿಮಿಕ್?
ಚಂದ್ರ ಕುಮಾರ್ ಬೋಸ್ ಅವರು ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಹಿರಿಯ ಸಹೋದರ ಶರತ್ ಚಂದ್ರ ಬೋಸ್ ಅವರ ಮಗ ಅಮಿಯ ನಾಥ್ ಬೋಸ್‌ರ ಮಗ. ಅಂದರೆ ನೇತಾಜಿ ಅಣ್ಣನ ಮೊಮ್ಮಗ. ಕೇಂದ್ರ ಸರ್ಕಾರವು ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರಿಗೆ ಸಂಬಂಧಿಸಿದ 100 ರಹಸ್ಯ ಕಡತಗಳನ್ನು 2016ರ ಜನವರಿ 23ರಂದು ಬಿಡುಗಡೆ ಮಾಡಿತ್ತು. ಇದಾದ ಎರಡು ದಿನಗಳಲ್ಲೇ ಚಂದ್ರ ಕುಮಾರ್ ಬಿಜೆಪಿ ಸೇರಿದರು. 2016ರ ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಯಲ್ಲಿ ಮಮತಾ ಬ್ಯಾನರ್ಜಿ ಅವರ ವಿರುದ್ಧ ಸ್ಪರ್ಧಿಸಿ ಪರಾಭವಗೊಂಡಿದ್ದರು.
ಬಿಜೆಪಿ ಸೇರಿದ ಕೆಲವೇ ವರ್ಷಗಳಲ್ಲಿ ಅದರ ಸಿದ್ಧಾಂತವನ್ನು ಬೋಸ್ ವಿರೋಧಿಸಲು ಆರಂಭಿಸಿದರು. ನೇತಾಜಿ ಅವರ ಅಂತರ್ಗತ ಜಾತ್ಯತೀತ ಸಿದ್ಧಾಂತಕ್ಕೂ ಮತ್ತು ಬಿಜೆಪಿಯ ಪ್ರಸ್ತುತ ರಾಜಕೀಯಕ್ಕೂ ಹೊಂದಾಣಿಕೆಯಾಗುತ್ತಿಲ್ಲ ಎಂದು ದೂರಿದ್ದರು. ಹಾಗೆಯೇ ಬಿಜೆಪಿ ಧರ್ಮದ ಆಧಾರದ ಮೇಲೆ ರಾಜಕೀಯ ಮಾಡುತ್ತಿದೆ ಮತ್ತು ಜನರನ್ನು ವಿಭಜಿಸುತ್ತಿದೆ, ಇದು ನೇತಾಜಿಯವರ ತತ್ವಗಳಿಗೆ ವಿರುದ್ಧವಾಗಿದೆ ಎಂದು ಹೇಳಿದ್ದರು.
