ಮಹಾರಾಷ್ಟ್ರದ ಕೊಲ್ಲಾಪುರ ಜಿಲ್ಲೆಯ ನಂದನಿ ಗ್ರಾಮದ ಐತಿಹಾಸಿಕ ಜೈನಮಠಕ್ಕೆ ಬರೋಬ್ಬರಿ 13 ತಿಂಗಳ ಬಳಿಕ ‘ಮಾಧುರಿ’ (ಮಹಾದೇವಿ) ಎಂಬ ಆನೆ ಮರಳಿದೆ. ಗುಜರಾತ್‌ನ ಜಾಮ್‌ನಗರದಲ್ಲಿರುವ ರಿಲಯನ್ಸ್ ಒಡೆತನದ ‘ವನತಾರಾ’ ಪ್ರಾಣಿಗಳ ಪುನರ್ವಸತಿ ಕೇಂದ್ರದಲ್ಲಿದ್ದ ಮಾಧುರಿಯನ್ನು ಶನಿವಾರ ಮುಂಜಾನೆ 2 ಗಂಟೆ ಸುಮಾರಿಗೆ ಮಠಕ್ಕೆ ಕರೆತರಲಾಗಿದ್ದು, ಗ್ರಾಮಸ್ಥರು ಹೂಮಳೆಗೈದು ಅದ್ದೂರಿಯಾಗಿ ಬರಮಾಡಿಕೊಂಡರು.
ಪ್ರಾಣಿ ದಯಾ ಸಂಘಟನೆ (PETA) ನಡೆಸಿದ ಕಾನೂನು ಹೋರಾಟದ ಫಲವಾಗಿ, ಉನ್ನತಾಧಿಕಾರ ಸಮಿತಿ, ಬಾಂಬೆ ಹೈಕೋರ್ಟ್ ಹಾಗೂ ಸುಪ್ರೀಂ ಕೋರ್ಟ್ ಸೂಚನೆಯಂತೆ 2025ರ ಜುಲೈ 28ರಂದು ಆನೆಯನ್ನು ವನತಾರಾಗೆ ಕಳುಹಿಸಲಾಗಿತ್ತು. ಇದೀಗ ಮಠದಲ್ಲಿ ಆನೆಗೆ ಕಲ್ಪಿಸಲಾಗಿರುವ ನೂತನ ಮೂಲಸೌಕರ್ಯಗಳನ್ನು ಪರಿಶೀಲಿಸಿದ ಉನ್ನತಾಧಿಕಾರ ಸಮಿತಿಯು, ಸೆಪ್ಟೆಂಬರ್ 9ರಂದು ಮಾಧುರಿಯನ್ನು ಮರಳಿ ಕೊಲ್ಲಾಪುರಕ್ಕೆ ಕಳುಹಿಸಲು ಹಸಿರು ನಿಶಾನೆ ತೋರಿತ್ತು.
ಆನೆಯ ಆಗಮನದ ಹಿನ್ನೆಲೆಯಲ್ಲಿ ಗ್ರಾಮದಲ್ಲಿ ದೀಪಾವಳಿಯಂತಹ ವಾತಾವರಣ ನಿರ್ಮಾಣವಾಗಿತ್ತು. ಜೆಸಿಬಿ ಮೂಲಕ ಹೂವು ಸುರಿಸಿ, ಪಟಾಕಿ ಸಿಡಿಸಿ, ಸಿಹಿ ಹಂಚಿ ಸ್ಥಳೀಯರು ಸಂಭ್ರಮಿಸಿದರು. ಆನೆಗೆ ದೀರ್ಘ ಪ್ರಯಾಣದ ಆಯಾಸವಾಗದಿರಲಿ ಎಂಬ ಕಾಳಜಿಯಿಂದ ಬೃಹತ್ ಮೆರವಣಿಗೆಯನ್ನು ಮೊಟಕುಗೊಳಿಸಿ, ಸರಳವಾಗಿ ಸ್ವಾಗತಿಸಲಾಯಿತು ಎಂದು ಮಾಜಿ ಸಂಸದ ಹಾಗೂ ರೈತ ಮುಖಂಡ ರಾಜು ಶೆಟ್ಟಿ ತಿಳಿಸಿದ್ದಾರೆ.
ಸದ್ಯ ಮಾಧುರಿಯನ್ನು ಮಠದ ಆವರಣದಲ್ಲಿ ನವೀಕರಿಸಲಾದ, ನೀರಿನ ಟ್ಯಾಂಕ್ ಒಳಗೊಂಡಿರುವ ವಿಶಾಲವಾದ ಶೆಡ್‌ನಲ್ಲಿ ಇರಿಸಲಾಗಿದೆ. ಹೊಸ ಪರಿಸರಕ್ಕೆ ಒಗ್ಗಿಕೊಳ್ಳಲು ಆನೆಗೆ ಸಮಯಾವಕಾಶ ನೀಡಲಾಗುತ್ತಿದೆ. ಮಠದ ಮಾವುತನಿಗೆ ಆನೆಯ ಆಹಾರ ಕ್ರಮ, ವ್ಯಾಯಾಮ ಹಾಗೂ ಔಷಧಿಗಳ ಬಗ್ಗೆ ವನತಾರಾದಲ್ಲಿ 13 ತಿಂಗಳ ಕಾಲ ವಿಶೇಷ ತರಬೇತಿ ನೀಡಲಾಗಿದೆ ಎಂದು ಮಠದ ಟ್ರಸ್ಟಿ ಸಾಗರ್ ಸಂಭುಶೆಟ್ಟೆ ಮಾಹಿತಿ ನೀಡಿದ್ದಾರೆ.
ಮಾಧುರಿಯ ಆರೋಗ್ಯ ಮತ್ತು ಘನತೆಗೆ ವನತಾರಾ ಸದಾ ಬದ್ಧವಾಗಿದೆ. ನಗರ ಯೋಜನಾ ನಿಯಮಗಳ ಮಿತಿಯೊಳಗೆ ಮಠದಲ್ಲಿ ಆನೆಗೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸಲಾಗಿದ್ದು, ಮುಂದಿನ ದಿನಗಳಲ್ಲಿ 4 ಎಕರೆ ಜಾಗದಲ್ಲಿ ಈಜುಕೊಳ ಹಾಗೂ ಉದ್ಯಾನವನ ಒಳಗೊಂಡ ಬೃಹತ್ ಆವರಣ ನಿರ್ಮಿಸಲು ಅಗತ್ಯ ನೆರವು ನೀಡುವುದಾಗಿ ವನತಾರಾ ಆಡಳಿತ ಮಂಡಳಿ ಸ್ಪಷ್ಟಪಡಿಸಿದೆ.
ಮತ್ತೊಂದೆಡೆ, ಮಾಧುರಿಯನ್ನು ಮರಳಿ ಮಠಕ್ಕೆ ಕಳುಹಿಸಿದ ನಿರ್ಧಾರವನ್ನು ಪೆಟಾ ತೀವ್ರವಾಗಿ ಖಂಡಿಸಿದೆ. ಆನೆಯನ್ನು ಮತ್ತೆ ಒಂಟಿತನ ಹಾಗೂ ಸರಪಳಿಯ ಬಂಧನಕ್ಕೆ ದೂಡಲಾಗಿದೆ ಎಂದು ಅದು ಆರೋಪಿಸಿದೆ. ಆದರೆ, ಪೆಟಾ ಆರೋಪವನ್ನು ತಳ್ಳಿಹಾಕಿರುವ ರಾಜು ಶೆಟ್ಟಿ, ಗ್ರಾಮೀಣ ಭಾಗದಲ್ಲಿ ಪ್ರಾಣಿಗಳನ್ನು ಕುಟುಂಬದ ಸದಸ್ಯರಂತೆ ನೋಡಿಕೊಳ್ಳುತ್ತೇವೆ ಹಾಗೂ ನ್ಯಾಯಾಲಯದ ನಿರ್ದೇಶನದಂತೆ ಪ್ರತಿ 15 ದಿನಗಳಿಗೊಮ್ಮೆ ಪಶುವೈದ್ಯರಿಂದ ಆನೆಯ ತಪಾಸಣೆ ನಡೆಸಲಾಗುವುದು ಎಂದು ಭರವಸೆ ನೀಡಿದ್ದಾರೆ.
