ರಸ್ತೆ ಅಪಘಾತಕ್ಕೆ ಕೊಲೆ ಯತ್ನದ ಹಣೆಪಟ್ಟಿ ಕಟ್ಟಿ 24 ವರ್ಷದ ಮುಸ್ಲಿಂ ಯುವಕನನ್ನು ಕಾವಡ್ ಯಾತ್ರೆ ಹೊರಟಿದ್ದ ಹಿಂದುತ್ವವಾದಿಗಳ ಗುಂಪು ಹೊಡೆದು ಕೊಂದಿದೆ ಎಂದು ಆರೋಪಿಸಲಾಗಿದೆ. ಘಟನೆ ಉತ್ತರ ಪ್ರದೇಶದ ಹಾಪುರ್ ಜಿಲ್ಲೆಯಲ್ಲಿ ನಡೆದಿದೆ. ಕೋಮುದ್ವೇಷಿ ಉದ್ರಿಕ್ತರ ಗುಂಪಿನಿಂದ ಹಲ್ಲೆಗೊಳಗಾಗಿದ್ದ ಮೊರಾದಾಬಾದ್ನ ಅಜೀಮ್ ಅವರು ದೆಹಲಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಿಸದೆ ಕೊನೆಯುಸಿರೆಳೆದಿದ್ದಾರೆ.
ಮೃತ ಯುವಕ ಅಜೀಮ್ ತನ್ನ ಪತ್ನಿ, ಪುಟ್ಟ ಮಗ ಹಾಗೂ ವರ್ಷಗಳಿಂದ ಅನಾರೋಗ್ಯಕ್ಕೆ ತುತ್ತಾಗಿ ಹಾಸಿಗೆ ಹಿಡಿದಿರುವ ತಂದೆ ಇಂತೇಜಾರ್ ಅವರನ್ನು ಅಗಲಿದ್ದಾರೆ. ತಮ್ಮ ಕುಟುಂಬಕ್ಕೆ ಏಕೈಕ ಆಧಾರ ಸ್ತಂಭವಾಗಿದ್ದ ಮಗನನ್ನು ಹೊಡೆದು ಕೊಂದಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ತಂದೆ ಇಂತೇಜಾರ್, ತಮಗೆ ನ್ಯಾಯಬೇಕೆಂದು ಆಗ್ರಹಿಸಿದ್ದಾರೆ.
ಜುಲೈ 31 ರಂದು ಬೆಳಿಗ್ಗೆ ಅಜೀಮ್ ತನ್ನ ಸಣ್ಣ ಟ್ರಕ್ ಚಲಾಯಿಸಿಕೊಂಡು ಮೊರಾದಾಬಾದ್ನಿಂದ ದೆಹಲಿಗೆ ಹೋಗುತ್ತಿದ್ದರು. ಈ ವೇಳೆ, ಹಾಪುರ್ನ ಬ್ರಿಜ್ಘಾಟ್ ಟೋಲ್ ಪ್ಲಾಜಾ ಸಮೀಪ ರಸ್ತೆಬದಿಯಲ್ಲಿ ನಿಲ್ಲಿಸಲಾಗಿದ್ದ ಆಟೋ ರಿಕ್ಷಾಕ್ಕೆ ಆತನ ವಾಹನ ಡಿಕ್ಕಿಯಾಗಿದೆ. ಈ ಅಪಘಾತದ ಬಳಿಕ, ಆಟೋ ಚಾಲಕ ಮತ್ತು ಅದರಲ್ಲಿದ್ದ ಪ್ರಯಾಣಿಕರು ಅಜೀಮ್ ಮೇಲೆ ತೀವ್ರವಾಗಿ ಹಲ್ಲೆ ನಡೆಸಿದ್ದಾರೆ. ಹಲ್ಲೆಗೈದವರು ಕಾವಡ್ ಯಾತ್ರೆಗೆ ತೆರಳುತ್ತಿದ್ದವರು ಎಂದು ಹೇಳಲಾಗಿದೆ. ಗಂಭೀರವಾಗಿ ಗಾಯಗೊಂಡ ಅಜೀಮ್ನನ್ನು ಮೊದಲು ಗಢಮುಕ್ತೇಶ್ವರದ ನರ್ಸಿಂಗ್ ಹೋಮ್ಗೆ, ನಂತರ ಮೀರತ್ನ ಎಸ್ಎಸ್ ಆಸ್ಪತ್ರೆಗೆ ಸೇರಿಸಲಾಗಿತ್ತು. ತೀವ್ರ ಕೋಮಾ ಸ್ಥಿತಿಯಲ್ಲಿದ್ದ ಆತನನ್ನು ಬಳಿಕ ದೆಹಲಿಯ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ. ಆದರೆ, ಪ್ರಜ್ಞೆ ಮರಳಿ ಬಾರದೆ ಅಜೀಮ್ ಕೊನೆಯುಸಿರೆಳೆದಿದ್ದಾರೆ.
ಈ ಲೇಖನ ಓದಿದ್ದೀರಾ?: FCRA ತಿದ್ದುಪಡಿ | ವಿದೇಶಿ ದೇಣಿಗೆ ನಿಯಂತ್ರಣವೋ, ಧಾರ್ಮಿಕ ಸಂಸ್ಥೆಗಳ ಮೇಲಿನ ಸರ್ಕಾರಿ ಹಿಡಿತವೋ?
ಈ ಘಟನೆಗೆ ಸಂಬಂಧಿಸಿದಂತೆ ಹಾಪುರ್ನ ಗಢಮುಕ್ತೇಶ್ವರ ಪೊಲೀಸ್ ಠಾಣೆಯಲ್ಲಿ ಎರಡು ಪ್ರತ್ಯೇಕ ಎಫ್ಐಆರ್ಗಳು ದಾಖಲಾಗಿವೆ. ಮೊದಲ ಎಫ್ಐಆರ್ ಜುಲೈ 31ರಂದು ಅಜೀಮ್ ಅವರ ತಂದೆ ಇಂತೇಜಾರ್ ನೀಡಿದ ದೂರಿನ ಆಧಾರದ ಮೇಲೆ ದಾಖಲಾಗಿದೆ. ಆಟೋ ಚಾಲಕ ಫರ್ಮನ್, ಕನ್ವರಿಯಾಗಳು ಎನ್ನಲಾದ ನಾಲ್ವರು ಪ್ರಯಾಣಿಕರು ಮತ್ತು ಇಬ್ಬರು ಅಪರಿಚಿತ ವ್ಯಕ್ತಿಗಳ ವಿರುದ್ಧ ಕೊಲೆ ಯತ್ನ, ಗಲಭೆ ಮತ್ತು ಹಲ್ಲೆ ಆರೋಪಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಮತ್ತೊಂದೆಡೆ, ಆಟೋ ಚಾಲಕ ಫರ್ಮನ್ ಅವರ ತಂದೆ ಇಮ್ರಾನ್ ನೀಡಿದ ದೂರಿನ ಆಧಾರದ ಮೇಲೆ ಆಗಸ್ಟ್ 3 ರಂದು ಅಜೀಮ್ ವಿರುದ್ಧವೇ ಕೊಲೆ ಯತ್ನದ ಆರೋಪದಡಿ ಎರಡನೇ ಎಫ್ಐಆರ್ ದಾಖಲಾಗಿದೆ. ಜುಲೈ 30ರ ರಾತ್ರಿ ತಮ್ಮ ಗ್ರಾಮಸ್ಥರು ಗಂಗಾ ನದಿಯಿಂದ ಕಾವಡ್ ನೀರು ತರಲು ಫರ್ಮನ್ ಅವರ ಆಟೋವನ್ನು ಬಾಡಿಗೆಗೆ ಪಡೆದಿದ್ದರು ಎಂದು ಇಮ್ರಾನ್ ಹೇಳಿದ್ದಾರೆ. ಜುಲೈ 31ರ ಬೆಳಗಿನ ಜಾವ ಸುಮಾರು 3 ಗಂಟೆಗೆ ಫರ್ಮನ್ ರಸ್ತೆಬದಿಯಲ್ಲಿ ನಿಂತಿದ್ದಾಗ ಅಜೀಮ್ ಚಲಾಯಿಸುತ್ತಿದ್ದ ಟ್ರಕ್ ಆತನಿಗೆ ಡಿಕ್ಕಿ ಹೊಡೆದಿದೆ. ಕೊಲ್ಲುವ ಉದ್ದೇಶದಿಂದ ಎರಡನೇ ಬಾರಿಯೂ ಫರ್ಮನ್ನ ಹೊಟ್ಟೆ ಮತ್ತು ಎದೆಯ ಮೇಲೆ ವಾಹನದ ಚಕ್ರಗಳನ್ನು ಹರಿಸಿಕೊಂಡು ಹೋಗಿದ್ದಾನೆ ಎಂದು ಇಮ್ರಾನ್ ಆರೋಪಿಸಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದ ಫರ್ಮನ್ ಪ್ರಸ್ತುತ ದೆಹಲಿಯ ಏಮ್ಸ್ ಟ್ರಾಮಾ ಸೆಂಟರ್ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈ ಎರಡೂ ಎಫ್ಐಆರ್ಗಳ ತನಿಖೆ ನಡೆಯುತ್ತಿದ್ದು, ಆಟೋದಲ್ಲಿದ್ದ ಪ್ರಯಾಣಿಕರು ಕನ್ವರಿಯಾಗಳು ಎಂಬುದು ದೃಢಪಟ್ಟಿದೆ. ಗಢಮುಕ್ತೇಶ್ವರ ಠಾಣೆಯ ಉಸ್ತುವಾರಿ ಅಧಿಕಾರಿ ನೀಡಿರುವ ಮಾಹಿತಿಯ ಪ್ರಕಾರ, ಘಟನೆಯಲ್ಲಿ ಅಜೀಮ್ ಗಾಯಗಳಿಂದ ಮೃತಪಟ್ಟಿರುವುದು ನಿಜವಾಗಿದ್ದರೂ, ಪ್ರಕರಣಕ್ಕೆ ಸಂಬಂಧಿಸಿದಂತೆ ಇದುವರೆಗೆ ಯಾರನ್ನೂ ಬಂಧಿಸಲಾಗಿಲ್ಲ.
