ದೇಶದ ಕೌಟುಂಬಿಕ ನ್ಯಾಯಾಲಯಗಳಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಪ್ರಕರಣಗಳ ಹೊರೆಯನ್ನು ಕಡಿಮೆ ಮಾಡಲು ಮತ್ತು ಕೌಟುಂಬಿಕ ವಿವಾದಗಳನ್ನು ಶೀಘ್ರವಾಗಿ ಬಗೆಹರಿಸಲು ಪರ್ಯಾಯ ವಿವಾದ ಪರಿಹಾರ (ADR) ಮಾರ್ಗವಾದ ‘ಮಧ್ಯಸ್ಥಿಕೆ’ ಪ್ರಕ್ರಿಯೆಯನ್ನು ವ್ಯಾಪಕವಾಗಿ ಬಳಸಿಕೊಳ್ಳಬೇಕೆಂದು ಸುಪ್ರೀಂ ಕೋರ್ಟ್ನ ಹಿರಿಯ ನ್ಯಾಯಮೂರ್ತಿ ಬಿ ವಿ ನಾಗರತ್ನ ಸಲಹೆ ನೀಡಿದ್ದಾರೆ.
ಗೌಹಾಟಿಯಲ್ಲಿ ಸುಪ್ರೀಂ ಕೋರ್ಟ್ನ ಕೌಟುಂಬಿಕ ನ್ಯಾಯಾಲಯಗಳ ಸಮಿತಿಯು ಆಯೋಜಿಸಿದ್ದ ಪ್ರಾದೇಶಿಕ ಸಮ್ಮೇಳನದಲ್ಲಿ ‘ಕೌಟುಂಬಿಕ ವಿವಾದಗಳಲ್ಲಿ ನ್ಯಾಯಾಲಯದ ತೀರ್ಪು vs ಮಧ್ಯಸ್ಥಿಕೆ’ ವಿಷಯದ ಕುರಿತು ಮಾತನಾಡಿದರು.
ಇದನ್ನೂ ಓದಿ: ಶಬರಿಮಲೆ ಪ್ರವೇಶ | ಮಾಸಿಕ ಮೂರು ದಿನ ಮಹಿಳೆಯರನ್ನು ಅಸ್ಪೃಶ್ಯರಂತೆ ಕಾಣುವುದು ಸಲ್ಲದು: ಸುಪ್ರೀಂ ನ್ಯಾಯಮೂರ್ತಿ ನಾಗರತ್ನ
ನ್ಯಾಯಾಲಯಗಳಲ್ಲಿ ದೀರ್ಘಾವಧಿ ವ್ಯಾಜ್ಯಗಳನ್ನು ನಡೆಸುವ ಬದಲು, ಮಧ್ಯಸ್ಥಿಕೆ ಮೂಲಕ ರಹಸ್ಯಾತ್ಮಕತೆ ಮತ್ತು ಶೀಘ್ರ ಪರಿಹಾರ ಕಂಡುಕೊಳ್ಳಬಹುದು. ಇದು ದಂಪತಿಗಳು ಹಾಗೂ ಕುಟುಂಬ ಸದಸ್ಯರ ನಡುವಿನ ಮನಸ್ತಾಪವನ್ನು ಶಮನಗೊಳಿಸಲು ನೆರವಾಗುತ್ತದೆ ಎಂದು ಹೇಳಿದ್ದಾರೆ.
ಮಕ್ಕಳ ಪಾಲನೆ ಹಾಗೂ ಭೇಟಿಯ ಹಕ್ಕುಗಳ ವ್ಯಾಜ್ಯಗಳಲ್ಲಿ ಕೇವಲ ಕೋರ್ಟ್ ಆದೇಶ ನೀಡುವುದಕ್ಕಿಂತ, ತರಬೇತಿ ಪಡೆದ ಮಕ್ಕಳ ಮನಶ್ಶಾಸ್ತ್ರಜ್ಞರ ನೆರವಿನಿಂದ ದಂಪತಿಗಳ ಒಪ್ಪಂದದ ಮೂಲಕ ‘ಮಧ್ಯಸ್ಥಿಕೆ ಪೋಷಕರ ಯೋಜನೆ’ ರೂಪಿಸುವುದು ಮಗುವಿನ ಹಿತದೃಷ್ಟಿಯಿಂದ ಉತ್ತಮ ಎಂದು ಅಭಿಪ್ರಾಯಿಸಿದ್ದಾರೆ.
ದೇಶಾದ್ಯಂತ ಇರುವ ಸುಮಾರು 820ಕ್ಕೂ ಹೆಚ್ಚು ಕೌಟುಂಬಿಕ ನ್ಯಾಯಾಲಯಗಳಲ್ಲಿ ಶಾಶ್ವತ ಹಾಗೂ ಅರ್ಹ ಕೌನ್ಸಿಲಿಂಗ್ ಮತ್ತು ಮಧ್ಯಸ್ಥಿಕೆ ಘಟಕಗಳನ್ನು ಸ್ಥಾಪಿಸಬೇಕು. ಇವುಗಳಲ್ಲಿ ಮನಃಶಾಸ್ತ್ರಜ್ಞರು ಮತ್ತು ಸಮಾಜ ಸೇವಕರು ಇರಬೇಕು ಎಂದು ನ್ಯಾಯಮೂರ್ತಿ ಬಿ ವಿ ನಾಗರತ್ನ ಪ್ರತಿಪಾದಿಸಿದರು.
ಗೃಹಬಂಧನ, ತೀವ್ರ ದೌರ್ಜನ್ಯ ಅಥವಾ ಶೋಷಣೆಗೆ ಒಳಗಾದ ಮಹಿಳೆಯರ ಪ್ರಕರಣಗಳಲ್ಲಿ ಮಧ್ಯಸ್ಥಿಕೆ ನಡೆಸುವುದು ಸೂಕ್ತವಲ್ಲ. ಅಂತಹ ಸೂಕ್ಷ್ಮ ಸನ್ನಿವೇಶಗಳಲ್ಲಿ ನ್ಯಾಯಾಲಯದ ಕಾನೂನಾತ್ಮಕ ತೀರ್ಪೇ ಸರಿಯಾದ ಮಾರ್ಗ ಎಂದೂ ಎಚ್ಚರಿಸಿದರು.
ಹಿರಿಯ ನಾಗರಿಕರ ನಿರ್ವಹಣೆ ಮತ್ತು ಕಲ್ಯಾಣ ಕಾಯ್ದೆಯಡಿ ಬರುವ ಪ್ರಕರಣಗಳ ಶೀಘ್ರ ವಿಲೇವಾರಿಗೆ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದಲ್ಲಿ ಪ್ರತ್ಯೇಕ ‘ವೃದ್ಧಾಪ್ಯ ಮಧ್ಯಸ್ಥಿಕೆ ಪ್ಯಾನಲ್’ ರಚಿಸಬೇಕೆಂದು ನ್ಯಾ. ನಾಗರತ್ನ ಒತ್ತಾಯಿಸಿದರು.
