ಸುಪ್ರೀಂ ಕೋರ್ಟ್‌ನ ಕ್ಷಮಿಸುವ ಮತ್ತು ದಯೆ ತೋರುವ ಪ್ರವೃತ್ತಿಯಿಂದಾಗಿಯೇ ಇಂದು ದೇಶದಲ್ಲಿ ಅಪರಾಧಗಳ ಸಂಖ್ಯೆ ಹೆಚ್ಚುತ್ತಿದೆ ಎಂದು ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿ ದೀಪಾಂಕರ್ ದತ್ತಾ ಕಳವಳ ವ್ಯಕ್ತಪಡಿಸಿದ್ದಾರೆ. ಸಜಾ ಮಾಫಿ ಮತ್ತು ಮರಣದಂಡನೆ ಶಿಕ್ಷೆಯನ್ನು ಜೀವಾವಧಿ ಶಿಕ್ಷೆಯಾಗಿ ಪರಿವರ್ತಿಸುವ ಅರ್ಜಿ ವಿಚಾರಣೆ ವೇಳೆ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.
ವಿಚಾರಣೆ ವೇಳೆ ಗಂಭೀರ ಅಪರಾಧ ಪ್ರಕರಣವೊಂದನ್ನು ಉಲ್ಲೇಖಿಸಿದ ಜಸ್ಟಿಸ್ ದತ್ತಾ, “ತಂದೆಯೊಬ್ಬ ತನ್ನ ಹಿರಿಯ ಮಗಳ ಮೇಲೆ ಅತ್ಯಾಚಾರ ಎಸಗಿ, ಅವಳನ್ನು ಕೊಲೆ ಮಾಡಿದ್ದ ಪ್ರಕರಣದಲ್ಲಿ ನ್ಯಾಯಾಲಯ ಮರಣದಂಡನೆಯನ್ನು ಜೀವಾವಧಿ ಶಿಕ್ಷೆಗೆ ಇಳಿಸಿತ್ತು. ಆ ವ್ಯಕ್ತಿ ಮುಂದೆ ಪೆರೋಲ್ ಮೇಲಿಂದ ಹೊರಬಂದು, ತನ್ನ ಕಿರಿಯ ಮಗಳ ಎದುರಲ್ಲೇ ಆಕೆಯ ತಾಯಿಯನ್ನೂ ಕೊಲೆ ಮಾಡಿದ. ಇಂತಹ ಕ್ರೂರ ಅಪರಾಧಗಳಲ್ಲೂ ಕ್ಷಮೆ ತೋರಿದರೆ ಸಮಾಜಕ್ಕೆ ಕಳುಹಿಸುವ ಸಂದೇಶವೇನು” ಎಂದು ಪ್ರಶ್ನಿಸಿದರು.
ಇದನ್ನೂ ಓದಿ: ಅಪರಾಧಿಯೆಂದು ಸಾರಿದರೂ, ಜೈಲು ಶಿಕ್ಷೆ ರದ್ದುಗೊಳಿಸಿದ್ದೇಕೆ ಸುಪ್ರೀಂ ಕೋರ್ಟ್?
ಅಲ್ಲದೆ, “ಸುಪ್ರೀಂ ಕೋರ್ಟ್‌ನ ಈ ಕ್ಷಮಿಸುವ ಪ್ರವೃತ್ತಿಗೆ ಎಲ್ಲಾದರೂ ಒಂದು ಕಡೆ ಕೊನೆ ಹಾಡಲೇಬೇಕಿದೆ. ಈ ರೀತಿಯ ಅಪರಿಮಿತ ಉದಾರತನದ ಕಾರಣದಿಂದಾಗಿಯೇ ದೇಶ ಇಂದು ಇಂತಹ ಗಂಭೀರ ಅಪರಾಧಗಳನ್ನು ಎದುರಿಸಬೇಕಾಗಿ ಬಂದಿದೆ” ಎಂದು ಜಸ್ಟಿಸ್ ದತ್ತಾ ಚಾಟಿ ಬೀಸಿದರು.
“ಒಂದು ಕಾಲದಲ್ಲಿ ಕೊಲೆ ಪ್ರಕರಣಗಳಲ್ಲಿ ಮಾತ್ರ ‘ವಿರಳಾತಿ ವಿರಳ’ (Rarest of Rare) ತತ್ವವನ್ನು ಅನ್ವಯಿಸಲಾಗುತ್ತಿತ್ತು. ಏಕೆಂದರೆ ಆಗ ಅಪರಾಧಗಳ ಸಂಖ್ಯೆ ಕಡಿಮೆಯಿತ್ತು. ಆದರೆ ಇಂದಿನ ಸನ್ನಿವೇಶ ಸಂಪೂರ್ಣ ಬದಲಾಗಿದ್ದು, ಅಪರಾಧ ತಡೆಯಲು ಶಿಕ್ಷೆಯ ವಿಚಾರದಲ್ಲಿ ಕಟ್ಟುನಿಟ್ಟಿನ ನಿಯಮ ಅನುಸರಿಸುವುದು ಅಗತ್ಯ” ಎಂದೂ ಅಭಿಪ್ರಾಯಪಟ್ಟಿದ್ದಾರೆ.
