ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು (MeitY) WhatsAppಗೆ ನೋಟಿಸ್ ನೀಡಿದ ಕೇವಲ ಒಂದು ದಿನದ ಬಳಿಕ ಟೆಲಿಗ್ರಾಂ ಹಾಗೂ ಸಿಗ್ನಲ್ ಮೆಸೇಜಿಂಗ್ ವೇದಿಕೆಗಳಿಗೂ ನೋಟಿಸ್ ನೀಡಿದೆ. ಮೊಬೈಲ್ ಸಂಖ್ಯೆಯನ್ನು ಗೌಪ್ಯವಾಗಿಟ್ಟು ಕೇವಲ ‘ಯೂಸರ್ನೇಮ್’ (ಬಳಕೆದಾರರ ಹೆಸರು) ಮೂಲಕ ಸಂವಹನ ನಡೆಸಲು ಅವಕಾಶ ನೀಡುವ ಈ ಫೀಚರ್‌ನಿಂದಾಗಿ ಆನ್‌ಲೈನ್ ವಂಚನೆ ಮತ್ತು ಸೈಬರ್ ಅಪರಾಧಗಳು ಹೆಚ್ಚಾಗಲಿವೆ ಎಂಬ ಕಳವಳವನ್ನು ಸರ್ಕಾರ ವ್ಯಕ್ತಪಡಿಸಿದೆ.
ಹೊಸದಾಗಿ ಯೂಸರ್ನೇಮ್ ಫೀಚರ್ ಪರಿಚಯಿಸಲು ಮುಂದಾಗಿರುವ WhatsAppಗೆ ಆ ಪ್ರಕ್ರಿಯೆಯನ್ನು ತಾತ್ಕಾಲಿಕವಾಗಿ ತಡೆಹಿಡಿಯುವಂತೆ ಸೂಚಿಸಲಾಗಿದ್ದು, 3 ದಿನಗಳ ಒಳಗೆ ವಿವರಣೆ ನೀಡಲು ಸರ್ಕಾರ ಕೇಳಿತ್ತು. ಇದೀಗ ಅದೇ ರೀತಿ ಯೂಸರ್ನೇಮ್ ಸೌಲಭ್ಯವನ್ನು ಈಗಾಗಲೇ ಹೊಂದಿರುವ ಟೆಲಿಗ್ರಾಂ ಮತ್ತು ಸಿಗ್ನಲ್ ಆ್ಯಪ್‌ಗಳಿಗೂ ತಮ್ಮ ವೇದಿಕೆಗಳಲ್ಲಿ ವಂಚನೆ ಮತ್ತು ನಕಲಿ ಖಾತೆಗಳ ಹಾವಳಿಯನ್ನು ತಡೆಯಲು ಯಾವ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಕೇಂದ್ರ ಸರ್ಕಾರ ಪ್ರಶ್ನಿಸಿದೆ. ಜೊತೆಗೆ, ಈ ಯೂಸರ್ನೇಮ್ ಸೌಲಭ್ಯವನ್ನು ಮುಂದುವರಿಸಲು ಏಕೆ ಅವಕಾಶ ನೀಡಬೇಕು ಎಂಬುದಕ್ಕೂ ಸ್ಪಷ್ಟನೆ ಕೇಳಿದೆ.
ಮೊಬೈಲ್ ಸಂಖ್ಯೆಯ ಬದಲಾಗಿ ಯೂಸರ್ನೇಮ್ ಬಳಸುವುದರಿಂದ, ವಂಚಕರು ಸುಲಭವಾಗಿ ಬೇರೆಯವರ ಹೆಸರು ಬಳಸಿಕೊಂಡು (ಇಂಪರ್ಸನೇಷನ್) ನಕಲಿ ಖಾತೆಗಳನ್ನು ಸೃಷ್ಟಿಸುವ ಅಪಾಯವಿದೆ ಎಂಬುದು ಸರ್ಕಾರದ ಮುಖ್ಯ ಆತಂಕವಾಗಿದೆ. ಪ್ರಖ್ಯಾತ ವ್ಯಕ್ತಿಗಳು, ಸರ್ಕಾರಿ ಅಧಿಕಾರಿಗಳು ಅಥವಾ ಪರಿಚಿತರ ಹೆಸರಿನಲ್ಲಿ ಯೂಸರ್ನೇಮ್ ರಚಿಸಿ, ಆನ್‌ಲೈನ್ ವಂಚನೆ, ಫಿಶಿಂಗ್ ಮತ್ತು ಇತ್ತೀಚೆಗೆ ಹೆಚ್ಚಾಗುತ್ತಿರುವ ‘ಡಿಜಿಟಲ್ ಅರೆಸ್ಟ್’ ನಂತಹ ಅಪರಾಧ ಕೃತ್ಯಗಳನ್ನು ಎಸಗಲು ಇದು ಹಾದಿ ಮಾಡಿಕೊಡುತ್ತದೆ ಎಂದು ಸಚಿವಾಲಯ ಎಚ್ಚರಿಸಿದೆ.
ಭಾರತದಲ್ಲಿ WhatsApp ಅತಿದೊಡ್ಡ ಮಾರುಕಟ್ಟೆಯನ್ನು ಹೊಂದಿದ್ದು, 50 ಕೋಟಿಗೂ ಅಧಿಕ ಬಳಕೆದಾರರಿದ್ದಾರೆ. ಅಧಿಕಾರಿಗಳ ಮಾಹಿತಿಯ ಪ್ರಕಾರ, WhatsAppನಲ್ಲಿ ಪ್ರತಿದಿನ ಸರಿಸುಮಾರು 50 ಕೋಟಿ ಕರೆಗಳು ನಡೆಯುತ್ತವೆ; ಅದೇ ಟೆಲಿಗ್ರಾಂ ಆ್ಯಪ್‌ನಲ್ಲಿ ದಿನಕ್ಕೆ ಸುಮಾರು 2.5 ಕೋಟಿ ಕರೆಗಳು ನಡೆಯುತ್ತವೆ. WhatsAppನ ಈ ಬೃಹತ್ ವ್ಯಾಪ್ತಿಯಿಂದಾಗಿ ಮತ್ತು ಜನರ ಕುರುಡು ನಂಬಿಕೆಯಿಂದಾಗಿ ವಂಚನೆಗಳ ಪ್ರಮಾಣವೂ ಮಿತಿಮೀರಬಹುದು ಎಂಬುದು ಸರ್ಕಾರದ ವಾದವಾಗಿದೆ. ಮತ್ತೊಂದೆಡೆ, ನೀಟ್ (NEET-UG) ಪರೀಕ್ಷೆಯ ಪ್ರಶ್ನೆಪತ್ರಿಕೆ ಸೋರಿಕೆ ಮತ್ತು ನಕಲಿ ಮಾಹಿತಿಗಳ ಹರಡುವಿಕೆಯ ಆರೋಪದ ಮೇಲೆ ಇತ್ತೀಚೆಗಷ್ಟೇ ಟೆಲಿಗ್ರಾಂ ಆ್ಯಪ್ ಅನ್ನು ಜೂನ್ 22ರವರೆಗೆ ಕೇಂದ್ರ ಸರ್ಕಾರ ತಾತ್ಕಾಲಿಕವಾಗಿ ನಿರ್ಬಂಧಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.
ತನ್ನ ಹೊಸ ಫೀಚರ್ ಕುರಿತು ಸ್ಪಷ್ಟನೆ ನೀಡಿರುವ ಮೆಟಾ ಒಡೆತನದ WhatsApp, “ಈ ಫೀಚರ್ ಇನ್ನೂ ಅಧಿಕೃತವಾಗಿ ಬಿಡುಗಡೆಯಾಗಿಲ್ಲ. ವಂಚನೆಗಳನ್ನು ತಡೆಯಲು ಮತ್ತು ಬಳಕೆದಾರರ ಸುರಕ್ಷತೆಗಾಗಿ ನಾವು ಹಲವು ಸುರಕ್ಷತಾ ಕ್ರಮಗಳನ್ನು ಅಳವಡಿಸಿಕೊಂಡಿದ್ದೇವೆ. ಪ್ರಖ್ಯಾತ ವ್ಯಕ್ತಿಗಳು, ಸೆಲೆಬ್ರಿಟಿಗಳು ಹಾಗೂ ಸರ್ಕಾರಿ ಸಂಸ್ಥೆಗಳ ಯೂಸರ್‌ನೇಮ್‌ಗಳನ್ನು ಬೇರೆ ಯಾರೂ ದುರ್ಬಳಕೆ ಮಾಡಿಕೊಳ್ಳದಂತೆ ತಡೆಯಲು ವಿಶೇಷ ನಿಗಾ ವಹಿಸಲಾಗಿದೆ,” ಎಂದು ಸಮರ್ಥಿಸಿಕೊಂಡಿದೆ. ಆದಾಗ್ಯೂ, ಸರ್ಕಾರದೊಂದಿಗಿನ ಸಮಾಲೋಚನೆ ಮತ್ತು ತೃಪ್ತಿದಾಯಕ ಪರಿಹಾರ ದೊರಕುವವರೆಗೆ ಯೂಸರ್ನೇಮ್ ಸೌಲಭ್ಯವನ್ನು ಬಿಡುಗಡೆ ಮಾಡದಂತೆ ಕೇಂದ್ರ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ಜತೆಗೆ, ಸ್ಥಳೀಯ ಮೆಸೇಜಿಂಗ್ ಆ್ಯಪ್ ‘ಅರಟೆ’ (Arattai) ಕೂಡ ನಿಯಮಾವಳಿಗಳಿಗೆ ಬದ್ಧವಾಗಿ ತನ್ನ ಯೂಸರ್ನೇಮ್ ಸೌಲಭ್ಯವನ್ನು ಹಿಂಪಡೆಯುವುದಾಗಿ ಘೋಷಿಸಿದೆ.
