ಕಾಂಗ್ರೆಸ್‌ಗೆ ಮತ ಹಾಕಬೇಡಿ. ನೀವು ಕಾಂಗ್ರೆಸ್‌ಗೆ ಮತ ಹಾಕಿದರೆ ಬಿಜೆಪಿಯೇತರ ಮತಗಳ ವಿಭಜನೆಯಾಗಿ ಕೇಸರಿ ಪಕ್ಷಕ್ಕೆ ಲಾಭವಾಗುತ್ತದೆ. ಬಿಜೆಪಿಯನ್ನು ಬಲಪಡಿಸುತ್ತದೆ ಎಂದು ಟಿಎಂಸಿಯ ಹಿರಿಯ ನಾಯಕ ಅಭಿಷೇಕ್ ಬ್ಯಾನರ್ಜಿ ಸೋಮವಾರ ಹೇಳಿದ್ದಾರೆ.
ಪಶ್ಚಿಮ ಬಂಗಾಳದ ಮುರ್ಷಿದಾಬಾದ್ ಜಿಲ್ಲೆಯ ಜಲಂಗಿಯಲ್ಲಿ ನಡೆದ ಚುನಾವಣಾ ಪ್ರಚಾರದಲ್ಲಿ ಮಾತನಾಡಿದ ಅಭಿಷೇಕ್, “ಕಾಂಗ್ರೆಸ್ ಪಕ್ಷವು ಬಿಜೆಪಿ ಮತ್ತು ಎಡಪಂಥೀಯರೊಂದಿಗೆ ಸಂಬಂಧ ಹೊಂದಿದೆ. 2024ರಲ್ಲಿ, ಟಿಎಂಸಿ ಸರ್ಕಾರ 2026ರವರೆಗೆ ಇರುತ್ತದೆ ಎಂದು ತಿಳಿದಿದ್ದರಿಂದ ಅನೇಕರು ಸಿಪಿಐ(ಎಂ) ಮತ್ತು ಕಾಂಗ್ರೆಸ್‌ಗೆ ಮತ ಹಾಕಿದರು. ಆದರೆ ಈ ಚುನಾವಣೆ ಟಿಎಂಸಿಗೆ ನಾಲ್ಕನೇ ಗೆಲುವು ತರುವ ವಿಚಾರವಲ್ಲ. ಇದು ಬಿಜೆಪಿಯ ಬಿ ಮತ್ತು ಸಿ ತಂಡಗಳನ್ನು ಹೊರಹಾಕುವ ಚುನಾವಣೆ. ಕೇಂದ್ರದಲ್ಲಿ ಅಧಿಕಾರದಲ್ಲಿರುವ, ನಿಮ್ಮ ಕೇಂದ್ರ ನಿಧಿಯನ್ನು ನಿಲ್ಲಿಸಿದವರಿಗೆ ಪಾಠ ಕಲಿಸುವ ಸಮಯ” ಎಂದರು.
ಇದನ್ನು ಓದಿದ್ದೀರಾ? ಬಂಗಾಳ ಚುನಾವಣೆ | ಮಮತಾ-ಅಭಿಷೇಕ್ ಜಂಟಿ ತಂತ್ರ – ಒಂಟಿ ಪ್ರಚಾರ; ಬಿಜೆಪಿ ಅತಂತ್ರ?
ಇನ್ನು ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದ ಅಭಿಷೇಕ್ ಬ್ಯಾನರ್ಜಿ, “ಬಿಜೆಪಿ ಮುರ್ಷಿದಾಬಾದ್ ಜಿಲ್ಲೆಯಲ್ಲಿ ಮೂರು ಏಜೆನ್ಸಿಗಳನ್ನು ನಿಯೋಜಿಸಿದೆ. ಅದರ ಉಸ್ತುವಾರಿಯಲ್ಲಿ ಮೂವರು ಏಜೆಂಟರು ಇದ್ದಾರೆ. ಮೊದಲನೆಯದು ಜ್ಞಾನೇಶ್ ಕುಮಾರ್ ನೇತೃತ್ವದ ಚುನಾವಣಾ ಆಯೋಗ. ಅವರು ಜನರ ಹೆಸರುಗಳನ್ನು ಅಳಿಸುವಲ್ಲಿ ನಿರತರಾಗಿದ್ದಾರೆ. ಎರಡನೇ ಏಜೆಂಟ್ ಕಾಂಗ್ರೆಸ್‌ನ ಅಧೀರ್ ರಂಜನ್ ಚೌಧರಿ. ಅವರಿಗೆ ಅಮಿತ್ ಶಾ ಅವರ ಕೇಂದ್ರ ಪಡೆಗಳು ಭದ್ರತೆಯನ್ನು ಒದಗಿಸುತ್ತವೆ. ಮೂರನೇ ಏಜೆಂಟ್ ಹುಮಾಯೂನ್ ಕಬೀರ್ ಅವರ ಜನತಾ ಉನ್ನಾಯನ್ ಪಕ್ಷ ಮತ್ತು ಅಸಾದುದ್ದೀನ್ ಓವೈಸಿ ಅವರ ಎಐಎಂಐಎಂ” ಎಂದು ಆರೋಪಿಸಿದರು.
ಎಸ್‌ಐಆರ್ ವಿಚಾರವನ್ನು ಪ್ರಸ್ತಾಪಿಸಿದ ಬ್ಯಾನರ್ಜಿ, “ಎಸ್‌ಐಆರ್ ಕಾರಣದಿಂದಾಗಿ ಮತದಾರರ ಪಟ್ಟಿಯಿಂದ ನಿಮ್ಮ ಹೆಸರು ಕಾಣೆಯಾದಾಗ ಅವರು (ಕಾಂಗ್ರೆಸ್) ನಿಮಗೆ (ಚುನಾವಣೆಗೆ ಸಂಬಂಧಿಸಿ) ಸಹಾಯ ಮಾಡಿದ್ದಾರೆಯೇ? ಟಿಎಂಸಿ ಹೊರತುಪಡಿಸಿ ಬೇರೆ ಯಾವುದೇ ಪಕ್ಷವು ಮತದಾರರ ಪಟ್ಟಿಯಲ್ಲಿ ನಿಮ್ಮ ಹೆಸರುಗಳು ಸೇರ್ಪಡೆಯಾಗುವಂತೆ ಚುನಾವಣಾ ಆಯೋಗ ಮತ್ತು ಬಿಜೆಪಿ ವಿರುದ್ಧ ಧೈರ್ಯದಿಂದ ಹೋರಾಡಲಿಲ್ಲ” ಎಂದು ಹೇಳಿದರು.
ಪಶ್ಚಿಮ ಬಂಗಾಳದಲ್ಲಿ 294 ಸದಸ್ಯ ಬಲದ ವಿಧಾನಸಭಾ ಚುನಾವಣೆಯು ಎರಡು ಹಂತಗಳಲ್ಲಿ ನಡೆಯಲಿದೆ. 152 ಕ್ಷೇತ್ರಗಳಲ್ಲಿ ಮೊದಲ ಹಂತದ ಮತದಾನ ಏಪ್ರಿಲ್ 23ರಂದು ನಡೆಯಲಿದೆ. 142 ಕ್ಷೇತ್ರಗಳಲ್ಲಿ ಎರಡನೇ ಹಂತದಲ್ಲಿ ಮತದಾನ ಏಪ್ರಿಲ್ 29ರಂದು ನಡೆಯಲಿದೆ. ಮತ ಎಣಿಕೆ ಮೇ 4ರಂದು ನಡೆಯಲಿದೆ.
