ನ್ಯಾಯಾಲಯಗಳ ಬಗ್ಗೆ ಅವಹೇಳನಕಾರಿ ಮಾತುಗಳನ್ನಾಡಿ, ನ್ಯಾಯಾಂಗ ವ್ಯವಸ್ಥೆಯನ್ನು ‘ತಾನಾಶಾಹಿ’ (ಸರ್ವಾಧಿಕಾರ) ಮತ್ತು ‘ಮನ್‌ಮರ್ಜಿ’ (ಸ್ವೇಚ್ಛಾಚಾರ) ಎಂದು ಜರೆದ ಯೂಟ್ಯೂಬರ್ ಗುಲ್ಶನ್ ಪಹುಜಾ ಎಂಬಾತನಿಗೆ ದೆಹಲಿ ಹೈಕೋರ್ಟ್ ಆರು ತಿಂಗಳ ಜೈಲು ಶಿಕ್ಷೆ ಹಾಗೂ 2,000 ರೂ. ದಂಡ ವಿಧಿಸಿ ತೀರ್ಪು ನೀಡಿದೆ.
ನ್ಯಾಯಮೂರ್ತಿ ನವೀನ್ ಚಾವ್ಲಾ ಮತ್ತು ನ್ಯಾಯಮೂರ್ತಿ ರವೀಂದರ್ ದುಡೇಜಾ ಅವರನ್ನೊಳಗೊಂಡ ವಿಭಾಗೀಯ ಪೀಠವು ಈ ಆದೇಶ ಹೊರಡಿಸಿದೆ. ‘ಫೈಟ್ 4 ಜ್ಯುಡಿಷಿಯಲ್ ರಿಫಾರ್ಮ್ಸ್’ (Fight 4 Judicial Reforms) ಎಂಬ ತನ್ನ ಯೂಟ್ಯೂಬ್ ಚಾನೆಲ್‌ನಲ್ಲಿ ನ್ಯಾಯಾಧೀಶರು ಮತ್ತು ನ್ಯಾಯಾಲಯಗಳ ವಿರುದ್ಧ ಆಕ್ಷೇಪಾರ್ಹ ಹಾಗೂ ಅವಹೇಳನಕಾರಿ ವಿಡಿಯೊಗಳನ್ನು ಅಪ್‌ಲೋಡ್ ಮಾಡಿದ್ದಕ್ಕಾಗಿ ಮತ್ತು ಕೋರ್ಟ್ ಕಲಾಪದ ವೇಳೆ ಅಸಂಬದ್ಧ ಮಾತುಗಳನ್ನಾಡಿದ್ದಕ್ಕಾಗಿ ಪಹುಜಾ ವಿರುದ್ಧ ‘ಕ್ರಿಮಿನಲ್ ನ್ಯಾಯಾಲಯ ನಿಂದನೆ’ ಪ್ರಕರಣ ದಾಖಲಾಗಿತ್ತು. ಏಪ್ರಿಲ್ 21 ರಂದು ನ್ಯಾಯಾಲಯವು ಆತನನ್ನು ದೋಷಿ ಎಂದು ತೀರ್ಮಾನಿಸಿತ್ತು. ತದನಂತರ ಶಿಕ್ಷೆಯ ಪ್ರಮಾಣ ನಿರ್ಧರಿಸಲು ಪ್ರತ್ಯೇಕ ವಿಚಾರಣೆ ನಡೆಸಿತ್ತು.
ಶಿಕ್ಷೆಯ ವಿಚಾರಣೆ ಸಂದರ್ಭದಲ್ಲೂ ಪಹುಜಾ ತನ್ನ ತಪ್ಪನ್ನು ಒಪ್ಪಿಕೊಳ್ಳಲಿಲ್ಲ ಹಾಗೂ ಯಾವುದೇ ಪಶ್ಚಾತ್ತಾಪ ವ್ಯಕ್ತಪಡಿಸಲಿಲ್ಲ. ಬದಲಾಗಿ ಮತ್ತಷ್ಟು ಉದ್ದಟತನ ಪ್ರದರ್ಶಿಸಿದ ಆತ, “ಅದಾಲತೋನ್ ಕೀ ಮನ್‌ಮರ್ಜಿ ಬಢ್ತೀ ಜಾ ರಹೀ ಹೈ ಔರ್ ಮೈ ಕೋಯಿ ನ್ಯಾಯ್ ಕೀ ಉಮ್ಮೀದ್ ನಹೀ ಕರ್ ರಹಾ” (ನ್ಯಾಯಾಲಯಗಳ ಸ್ವೇಚ್ಛಾಚಾರ ಹೆಚ್ಚಾಗುತ್ತಿದೆ ಮತ್ತು ನಾನು ಭಾರತೀಯ ನ್ಯಾಯ ವ್ಯವಸ್ಥೆಯಿಂದ ಯಾವುದೇ ನ್ಯಾಯವನ್ನು ನಿರೀಕ್ಷಿಸುತ್ತಿಲ್ಲ) ಮತ್ತು “ಮನ್‌ಮರ್ಜಿ ಕಾ ದೂಸ್ರಾ ಅರ್ಥ್ ತಾನಾಶಾಹಿ ಹೋತಾ ಹೈ” (ಸ್ವೇಚ್ಛಾಚಾರದ ಇನ್ನೊಂದು ಅರ್ಥ ಸರ್ವಾಧಿಕಾರ) ಎಂದು ವಾದಿಸಿದ್ದ. ಈ ಮೂಲಕ ನ್ಯಾಯಾಲಯವನ್ನು ಸರ್ವಾಧಿಕಾರಕ್ಕೆ ಹೋಲಿಸಿರುವುದು ಆತನ ಮೊಂಡುತನವನ್ನು ತೋರಿಸುತ್ತದೆ ಎಂದು ಕೋರ್ಟ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ.
ಇದನ್ನು ಓದಿದ್ದೀರಾ? ‘ನೋಡ್ತಾ ಇರಿ, ಬಂಗಾಳದ ಥರ ಕೇರಳನೂ ಗೆಲ್ತೀವಿ’: ಪ್ರಲ್ಹಾದ್‌ ಜೋಷಿ ಬಡಾಯಿ!
ಇದೇ ವಿಡಿಯೊದಲ್ಲಿ ಭಾಗಿಯಾಗಿದ್ದ ವಕೀಲರಾದ ಶಿವನಾರಾಯಣ್ ಶರ್ಮಾ ಮತ್ತು ದೀಪಕ್ ಸಿಂಗ್ ಅವರು ನ್ಯಾಯಾಲಯದ ಬೇಷರತ್ ಕ್ಷಮೆಯಾಚಿಸಿದ್ದರಿಂದ ಅವರ ಮೇಲಿನ ನ್ಯಾಯಾಲಯ ನಿಂದನೆ ಪ್ರಕರಣವನ್ನು ಕೋರ್ಟ್ ಕೈಬಿಟ್ಟಿದೆ. ಆದರೆ, ಯಾವುದೇ ಪಶ್ಚಾತ್ತಾಪವಿಲ್ಲದ ಯೂಟ್ಯೂಬರ್ ಪಹುಜಾಗೆ ಕಡಿಮೆ ಶಿಕ್ಷೆ ನೀಡಿದರೆ, ಮುಂದೆ ಇಂತಹ ಕೃತ್ಯಗಳನ್ನು ಎಸಗಲು ಆತನಿಗೆ ಉತ್ತೇಜನ ನೀಡಿದಂತಾಗುತ್ತದೆ ಎಂದು ಅಭಿಪ್ರಾಯಪಟ್ಟ ನ್ಯಾಯಾಲಯ, ನ್ಯಾಯಾಲಯ ನಿಂದನೆ ಕಾಯ್ದೆಯಡಿಯ ಗರಿಷ್ಠ ಶಿಕ್ಷೆಯಾದ 6 ತಿಂಗಳ ಜೈಲುವಾಸವನ್ನು ಕಟ್ಟುನಿಟ್ಟಾಗಿ ವಿಧಿಸಿದೆ.
ಆದಾಗ್ಯೂ, ಗುಲ್ಶನ್ ಪಹುಜಾ ಅವರಿಗೆ ಸುಪ್ರೀಂ ಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಲು ಅವಕಾಶ ಕಲ್ಪಿಸುವ ದೃಷ್ಟಿಯಿಂದ, ಈ ಶಿಕ್ಷೆಯ ಜಾರಿಯನ್ನು 60 ದಿನಗಳ ಕಾಲ ತಡೆಹಿಡಿಯಲಾಗಿದೆ. “ನ್ಯಾಯಾಂಗವನ್ನು ಸುಧಾರಿಸುವ ಹೆಸರಿನಲ್ಲಿ ತನ್ನ ತಪ್ಪನ್ನು ಸಮರ್ಥಿಸಿಕೊಂಡು, ನ್ಯಾಯಾಲಯದ ಘನತೆಗೆ ಧಕ್ಕೆ ತರುವುದನ್ನು ಎಂದಿಗೂ ಸಹಿಸಲಾಗದು” ಎಂದು ಹೈಕೋರ್ಟ್ ತನ್ನ ತೀರ್ಪಿನಲ್ಲಿ ಸ್ಪಷ್ಟಪಡಿಸಿದೆ.
