ಇಸ್ರೇಲ್ ವಾಯು ದಾಳಿಗೆ ಗಾಜಾದಲ್ಲಿ ಸುಮಾರು 500 ಪ್ಯಾಲಿಸ್ತೀನ್ ಕ್ರೈಸ್ತರು ಹಾಗೂ ಮುಸ್ಲಿಮರು ಆಶ್ರಯ ಪಡೆದಿದ್ದ ಆರ್ಥೊಡಾಕ್ಸ್‌ ಗ್ರೀಕ್‌ ಚರ್ಚ್ ನಾಶಗೊಂಡಿದೆ ಎಂದು ಹಮಾಸ್‌ ನಿಯಂತ್ರಿತ ಗಾಜಾದ ಆಂತರಿಕ ಸಚಿವಾಲಯ ಹೇಳಿದೆ.
ಈ ದಾಳಿಗೆ ಇಸ್ರೇಲ್ ಕಾರಣ ಎಂದು ಚರ್ಚ್ ಆಡಳಿತವೂ ಹೇಳಿದ್ದು, ದಾಳಿಯಲ್ಲಿ ಕನಿಷ್ಠ 17 ಮಂದಿ ಮೃತಪಟ್ಟಿದ್ದಾರೆ. ಆದರೆ ಸಾವಿನ ಪ್ರಮಾಣ ನೂರಕ್ಕು ಹೆಚ್ಚಿದೆ ಎಂದು ವರದಿಗಳು ಹೇಳುತ್ತಿವೆ.
ಈ ಗ್ರೀಕ್‌ ಆರ್ಥೊಡಾಕ್ಸ್‌ ಸೈಂಟ್‌ ಪೊರ್ಫಿರಿಯಸ್‌ ಚರ್ಚ್ ಗಾಜಾದಲ್ಲಿನ ಅತ್ಯಂತ ಹಳೆಯ ಚರ್ಚ್ ಆಗಿದೆ. ಅಲ್ಲಿ ಮುಸ್ಲಿಂ ಮತ್ತು ಕ್ರೈಸ್ತ ಸಮುದಾಯದವರೂ ಆಶ್ರಯ ಪಡೆದಿರುವುದರಿಂದ ಚರ್ಚ್‌ಅನ್ನು ಗುರಿ ಮಾಡುವ ಸಾಧ್ಯತೆಯಿದೆ ಎಂದು ಅಲ್ಲಿನ ಧರ್ಮಗುರುಗಳು ಈ ಹಿಂದೆಯೇ ಆತಂಕ ವ್ಯಕ್ತಪಡಿಸಿದ್ದರು. ಈ ಚರ್ಚ್ ಮೇಲೆ ದಾಳಿ ನಡೆದರೆ ಅದು ಧರ್ಮದ ಮೇಲಿನ ದಾಳಿ ಮಾತ್ರವಲ್ಲದೆ ಮನುಕುಲದ ಮೇಲೆ ದಾಳಿ ನಡೆಸಿದಂತೆ ಎಂದು ಹೇಳಿದ್ದರು.
ಈ ಸುದ್ದಿ ಓದಿದ್ದೀರಾ? ಇಂಡಿಯಾಗೆ ಸಣ್ಣ ಶಾಕಿಂಗ್ ಸುದ್ದಿ: ನ್ಯೂಜಿಲೆಂಡ್ ಪಂದ್ಯಕ್ಕೆ ಆಲ್‌ರೌಂಡರ್‌ ಹಾರ್ದಿಕ್‌ ಪಾಂಡ್ಯ ಇಲ್ಲ!
ಈ ಚರ್ಚ್‌ಗೆ ಸಂಬಂಧಿಸಿದ ಆರ್ಡರ್‌ ಆಫ್‌ ಸೈಂಟ್‌ ಜಾರ್ಜ್‌ ಹೇಳಿಕೆ ಬಿಡುಗಡೆಗೊಳಿಸಿ ದಾಳಿಯಿಂದ ಚರ್ಚ್ ನಾಶವಾಗಿದೆ ಎಂದು ದೃಢಪಡಿಸಿದೆ. ಆರ್ಚ್‌ ಬಿಷಪ್‌ ಅಲೆಕ್ಸಿಯೋಸ್‌ ಅವರನ್ನು ಪತ್ತೆಹಚ್ಚಲಾಗಿದ್ದು ಅವರು ಜೀವಂತವಾಗಿದ್ದಾರೆ. ಅವರು ಗಾಯಗೊಂಡಿದ್ದಾರೆಯೆ ಎಂದು ತಿಳಿದಿಲ್ಲ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಅಲ್ಲಿದ್ದ 500ಕ್ಕೂ ಹೆಚ್ಚು ಮಂದಿಯ ಬಗ್ಗೆ ಏನೂ ತಿಳಿದಿಲ್ಲ ಎಂದು ಅದು ಹೇಳಿದೆ. ಮಕ್ಕಳು, ಶಿಶುಗಳು ಸಹಿತ ನಿರಾಶ್ರಿತರು ಮಲಗಿದ್ದ ಸಂದರ್ಭ ಚರ್ಚಿನ ಎರಡು ಗೋಡೆಗಳಿಗೆ ಬಾಂಬ್‌ ಬಿದ್ದಿದೆ. ಸುಮಾರು 150-200 ಜನರು ಸಾವಿಗೀಡಾಗಿರುವ ಸಾಧ್ಯತೆಯಿದೆ ಎಂದು ಆರ್ಡರ್‌ ಆಫ್‌ ಸೈಂಟ್‌ ಜಾರ್ಜ್‌ ಹೇಳಿದೆ.
