ಏರ್ ಕೆನಡಾದ ಮಾಜಿ ಪೈಲಟ್ ಒಬ್ಬರು ದೊಡ್ಡ ಪ್ರಯಾಣಿಕರ ವಿಮಾನಗಳನ್ನು ಚಲಾಯಿಸಲು ಅಗತ್ಯವಿರುವ ಪರವಾನಗಿ (ಲೈಸೆನ್ಸ್) ಇಲ್ಲದೆಯೇ ನೂರಾರು ವಾಣಿಜ್ಯ ವಿಮಾನಗಳನ್ನು ಹಾರಿಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಸುಮಾರು 17 ವರ್ಷಗಳ ಕಾಲ ಬೃಹತ್ ವಿಮಾನಗಳನ್ನು ಹಾರಿಸಿದ್ದ ಪೈಲಟ್ ಜಾಫ್ರಿ ವಾಲ್ ಅವರನ್ನು ಕೆನಡಾ ಪೊಲೀಸರು ಬಂಧಿಸಿದ್ದಾರೆ. ಅವರ ವಿರುದ್ಧ ಮೊಕದ್ದಮೆ ಹೂಡಲಾಗಿದೆ.
ನಾಲ್ಕು ತಿಂಗಳ ಸುದೀರ್ಘ ತನಿಖೆಯ ನಂತರ ಒಂಟಾರಿಯೊದ ಪೀಲ್ ಪೊಲೀಸರು, ಒಂಟಾರಿಯೊದ ಬ್ಯಾರಿ ನಿವಾಸಿಯಾದ ಜಾಫ್ರಿ ವಾಲ್ (59) ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.ಅಧಿಕಾರಿಗಳ ಪ್ರಕಾರ, ವಾಲ್ ಅವರು 2009ರಿಂದ 2025ರವರೆಗೆ ವಿಮಾನಯಾನ ಸಂಸ್ಥೆಯ ಕ್ಯಾಪ್ಟನ್ ಆಗಿ ಸೇವೆ ಸಲ್ಲಿಸಿದ್ದಾರೆ. ಈ ವೇಳೆ, ಅವರು ವಾಣಿಜ್ಯ ವಿಮಾನಗಳ ಕ್ಯಾಪ್ಟನ್‌ಗಳಿಗೆ ಕಡ್ಡಾಯವಾಗಿ ಬೇಕಾಗುವ ಅತ್ಯುನ್ನತ ಮಟ್ಟದ ‘ಏರ್‌ಲೈನ್ ಟ್ರಾನ್ಸ್‌ಪೋರ್ಟ್ ಪೈಲಟ್ ಲೈಸೆನ್ಸ್’ (ATPL) ಇಲ್ಲದೆಯೇ 900ಕ್ಕೂ ಹೆಚ್ಚು ದೇಶೀಯ ಮತ್ತು ಅಂತರರಾಷ್ಟ್ರೀಯ ವಿಮಾನಗಳನ್ನು ಹಾರಿಸಿದ್ದಾರೆ.
ಇದೀಗ, ಜೂನ್ 1ರಂದು ಜಾಫ್ರಿ ವಾಲ್ ಅವರನ್ನು ಬಂಧಿಸಲಾಗಿದೆ. ತನಿಖಾಧಿಕಾರಿಗಳ ಪ್ರಕಾರ, ವಾಲ್ ಅವರು ಮಾನ್ಯವಾದ ವಾಣಿಜ್ಯ ಪೈಲಟ್ ಪರವಾನಗಿಯನ್ನು ಹೊಂದಿದ್ದರು. ಆದರೆ, ಅವರ ಹುದ್ದೆಗೆ ಅಗತ್ಯವಿರುವ ATPLಅನ್ನು ಹೊಂದಿರಲಿಲ್ಲ. ಅವರು ಹಲವಾರು ವರ್ಷಗಳ ಕಾಲ ಏರ್ ಕೆನಡಾ ಮತ್ತು ಕೆನಡಾದ ವಿಮಾನಯಾನ ಅಧಿಕಾರಿಗಳಿಗೆ ತಮ್ಮ ಅರ್ಹತೆಯ ಬಗ್ಗೆ ಸುಳ್ಳು ದಾಖಲೆಗಳನ್ನು ನೀಡಿ, ವಂಚಿಸಿದ್ದಾರೆ ಎಂದು ಪೊಲೀಸರು ಆರೋಪಿಸಿದ್ದಾರೆ.
ಇತ್ತೀಚೆಗೆ, ದಾಖಲೆಗಳ ಪರಿಶೀಲನೆಯ ಸಂದರ್ಭದಲ್ಲಿ ವಾಲ್ ಅವರಿಗೆ ಸಂಬಂಧಿಸಿದಂತೆ ಕೆಲವು ಅನುಮಾನಾಸ್ಪದ ಸಂಗತಿಗಳು ಬೆಳಕಿಗೆ ಬಂದಿವೆ. ಬಳಿಕ, ಕೆನಡಾದ ವಿಮಾನಯಾನ ನಿಯಂತ್ರಕ ಸಂಸ್ಥೆಯಾದ ‘ಟ್ರಾನ್ಸ್‌ಪೋರ್ಟ್ ಕೆನಡಾ’ ಪೊಲೀಸರನ್ನು ಸಂಪರ್ಕಿಸಿದ್ದು, ತನಿಖೆ ನಡೆಸಿದೆ. ವಾಲ್ ಅವರು ತಮ್ಮ ಪೈಲಟ್ ದಾಖಲೆಗಳು ಕಳ್ಳತನವಾಗಿವೆ ಎಂದು ಸುಳ್ಳು ದೂರನ್ನು ಸಹ ದಾಖಲಿಸಿದ್ದರು. ಆದರೆ, ಅವರು 2025ರಲ್ಲಿ ನಿವೃತ್ತರಾಗುವ ಮುನ್ನ ತಮ್ಮ ಅರ್ಹತೆಗಳ ಬಗ್ಗೆ ವಿಮಾನಯಾನ ಸಂಸ್ಥೆ ಮತ್ತು ನಿಯಂತ್ರಕರನ್ನು ವಂಚಿಸಿದ್ದಾರೆ ಎಂಬುದಕ್ಕೆ ಪುರಾವೆಗಳು ಲಭ್ಯವಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ಗೋವು ರಾಷ್ಟ್ರೀಯ ಪ್ರಾಣಿಯಲ್ಲ, ತಾಯಿಯಲ್ಲ; ಬಿಜೆಪಿಯ ಮತಬ್ಯಾಂಕ್
ವಾಲ್ ವಿರುದ್ಧ ಒಂದು ವಂಚನೆ ಪ್ರಕರಣ, ನಕಲಿ ದಾಖಲೆಗಳನ್ನು ಸೃಷ್ಟಿಸಿದ ಎರಡು ಪ್ರಕರಣಗಳು, ನಕಲಿ ಟ್ರೇಡ್‌ಮಾರ್ಕ್ ಹೊಂದಿದ್ದ ಮೂರು ಪ್ರಕರಣಗಳು ಹಾಗೂ ಸಾರ್ವಜನಿಕರಿಗೆ ತಪ್ಪು ಮಾಹಿತಿ ನೀಡಿದ ಒಂದು ಪ್ರಕರಣವನ್ನು ದಾಖಲಿಸಲಾಗಿದೆ.
ನಕಲಿ ದಾಖಲೆಗಳನ್ನು ಬಳಸಿಕೊಂಡು ಅವರು ಏರ್ ಕೆನಡಾದ ಅತಿ ದೊಡ್ಡ ಬೋಯಿಂಗ್ ಜೆಟ್‌ಗಳಾದ 787, 777 ಹಾಗೂ 767 ವಿಮಾನಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ. ಜೊತೆಗೆ, ಒಟ್ಟು 29 ಲಕ್ಷ ಡಾಲರ್ (ಸುಮಾರು 24 ಕೋಟಿ ರೂಪಾಯಿ) ಸಂಬಳ ಗಳಿಸಿದ್ದಾರೆ ಎಂದು ಡೆಪ್ಯುಟಿ ಚೀಫ್ ನಿಕ್ ಮಿಲಿನೋವಿಚ್ ತಿಳಿಸಿದ್ದಾರೆ. ಸದ್ಯ ಈ ಆರೋಪಗಳು ಇನ್ನೂ ನ್ಯಾಯಾಲಯದಲ್ಲಿ ಸಾಬೀತಾಗಬೇಕಿದೆ.
