ಟಿಪ್ಪು ಸುಲ್ತಾನನ ಹುಲಿಯಂತೆ, ಬೋಸ್ರ ಐಎನ್ಎ ಹುಲಿಯಂತೆ, ಉಧಮ್ ಸಿಂಗ್ ಪ್ರತೀಕಾರದ ಹುಲಿಯಾಗಿದ್ದರು. ಸರ್ದಾರ್ ಉಧಮ್ ಸಿಂಗ್ ಕೇವಲ ಒಬ್ಬ ಕ್ರಾಂತಿಕಾರಿಯಲ್ಲ; ಅವರು ದೇಶಪ್ರೇಮಿಗಳಿಗೆ ಒಂದು ಸಂದೇಶ. ʼಅನ್ಯಾಯವನ್ನು ಸಹಿಸುವುದೂ ಕೂಡ ಮಹಾ ಪಾಪʼ ಎಂಬ ಸಂದೇಶದಿಂದ ಯುವ ಸ್ವಾತಂತ್ರ್ಯ ಹೋರಾಟಗಾರರೂ ಕೂಡ ಉಧಮ್ ಸಿಂಗ್ನಿಂದ ಪ್ರೇರಣೆ ಪಡೆದಿದ್ದರು.
ʼನಾನು ಹುತಾತ್ಮನಾಗುತ್ತಿದ್ದೇನೆ, ಆದರೆ ನನ್ನ ರಕ್ತದಿಂದ ಸ್ವಾತಂತ್ರ್ಯದ ಬೆಳೆ ಬೆಳೆಯಲಿದೆʼ ಎಂದು ಕೊನೆಯ ಉಸಿರಿನವರೆಗೂ ʼಇಂಕ್ವಿಲಾಬ್ ಜಿ಼ಂದಾಬಾದ್ʼ ಘೋಷಣೆ ಕೂಗಿದ ಮಹಾನ್ ಕ್ರಾಂತಿಕಾರಿ ಸರ್ದಾರ್ ಉಧಮ್ ಸಿಂಗ್ ಅವರ 86ನೇ ಪುಣ್ಯಸ್ಮರಣೆ ಇಂದು. ಪ್ರತಿ ವರ್ಷ ಜುಲೈ 31ರಂದು ಇಡೀ ದೇಶ ಅವರ ತ್ಯಾಗವನ್ನು ಸ್ಮರಿಸುತ್ತದೆ.
ಸ್ವಾತಂತ್ರ ಹೋರಾಟ ಎಂಬುದು ಇತಿಹಾಸದಲ್ಲೇ ಭಾರತೀಯರು ಮರೆಯಲಾಗದ ಕರಾಳ ಘಟನೆ. 1919ರ ಏಪ್ರಿಲ್ 13ರಂದು ಪಂಜಾಬ್ ರಾಜ್ಯದ ಅಮೃತಸರ ನಗರದ ಜಲಿಯನ್ ವಾಲಾಬಾಗ್ ಮೈದಾನದಲ್ಲಿ ವೈಶಾಖಿ ಹಬ್ಬದ ಸಭೆ ನಡೆಯುತ್ತಿತ್ತು. ಬ್ರಿಟಿಷ್ ಬ್ರಿಗೇಡಿಯರ್-ಜನರಲ್ ರೆಜಿನಾಲ್ಡ್ ಡೈಯರ್ ಆದೇಶದಂತೆ ಬ್ರಿಟಿಷ್ ಸೈನ್ಯ ಮನಬಂದಂತೆ ಗುಂಡಿನ ದಾಳಿ ನಡೆಸಿತು. ಈ ವೇಳೆ ಸಾವಿರಕ್ಕೂ ಹೆಚ್ಚು ನಿರಾಯುಧ ಭಾರತೀಯರು ಹುತಾತ್ಮರಾದರು.
ಜಲಿಯನ್ ವಾಲಾ ಬಾಗ್ ಹತ್ಯಾಕಾಂಡದಲ್ಲಿ ಗಾಯವಾದ 21 ವರ್ಷದ ಯುವಕನೇ ಸರ್ದಾರ್ ಉಧಮ್ ಸಿಂಗ್. ಗುಂಡು ತಗುಲಿ ಪ್ರಜ್ಞೆ ತಪ್ಪಿ ಬಿದ್ದರು. ಸತ್ತವರ ರಾಶಿಯಲ್ಲಿ ರಕ್ತದ ಮಡುವಿನೊಂದಿಗೆ ಮಲಗಿದ್ದ ಆತನ ಕಣ್ಣ ಮುಂದೆ ಸಾವಿರಾರು ಅಮಾಯಕರ ಸಾವು ಕಂಡಿತು. ಆ ದಿನವೇ ಆತ ʼಈ ರಕ್ತಕ್ಕೆ ಪ್ರತೀಕಾರ ತೀರಿಸುತ್ತೇನೆʼ ಎಂದು ಪ್ರತಿಜ್ಞೆ ಮಾಡಿದ.
21 ವರ್ಷಗಳವರೆಗೂ ಪ್ರತೀಕಾರದ ಯೋಜನೆ
ಗಾಯದಿಂದ ಚೇತರಿಸಿಕೊಂಡ ಉಧಮ್ ಸಿಂಗ್ ದೇಶ ಬಿಟ್ಟು ಹೋದರು. ಆಫ್ರಿಕಾ, ಅಮೆರಿಕ, ಜರ್ಮನಿ ಸುತ್ತಿದರು. ಅವರ ಒಂದೇ ಗುರಿ ಎಂದರೆ ಡೈಯರ್ನನ್ನು ಕೊಲ್ಲುವುದು. 1940ರ ಮಾರ್ಚ್ 13ರಂದು ಲಂಡನ್ನ ಕೇಕ್ಸ್ಟನ್ ಹಾಲ್ನಲ್ಲಿ ರಾಯಲ್ ಸೆಂಟ್ರಲ್ ಏಷ್ಯನ್ ಸೊಸೈಟಿ ಸಭೆ ಇತ್ತು. ಅಲ್ಲಿ ಅತಿಥಿಯಾಗಿ ಬಂದಿದ್ದ ಪಂಜಾಬ್ನ ಮಾಜಿ ಲೆಫ್ಟಿನೆಂಟ್ ಗವರ್ನರ್ ಡೈಯರ್ನ ಎದೆಯೊಳಗೆ ಉಧಮ್ ಸಿಂಗ್ 6 ಗುಂಡು ಹಾರಿಸಿದರು. ಡೈಯರ್ ಸ್ಥಳದಲ್ಲೇ ಕುಸಿದು ಬಿದ್ದ. ಜಲಿಯನ್ ವಾಲಾಬಾಗ್ ಹತ್ಯಾಕಾಂಡಕ್ಕೆ ಸೇಡು ತೀರಿಸಿಕೊಳ್ಳಲು ಉಧಮ್ ಸಿಂಗ್ ಈ ಐತಿಹಾಸಿಕ ಕೃತ್ಯವನ್ನು ಎಸಗಿದ್ದರು.
ಬ್ರಿಟಿಷ್ ಪೊಲೀಸರು ಆತನನ್ನು ಬಂಧಿಸಿದರು. ವಿಚಾರಣೆ ವೇಳೆ ನ್ಯಾಯಾಧೀಶ ʼನಿನ್ನ ಹೆಸರೇನು?ʼ ಎಂದು ಕೇಳಿದಾಗ ʼರಾಮ್ ಮೊಹಮ್ಮದ್ ಸಿಂಗ್ ಆಜಾದ್ʼ ಎಂದು ಉತ್ತರಿಸಿದರು. ಇದರ ಅರ್ಥ: ಭಾರತದ ಹಿಂದೂ, ಮುಸ್ಲಿಂ, ಸಿಖ್ ಎಲ್ಲರೂ ಒಂದೇ ಎಂಬುದಾಗಿತ್ತು.
1940ರ ಜುಲೈ 31ರಂದು ಲಂಡನ್ನ ಪೆಂಟನ್ ವಿಲ್ಲೆ ಜೈಲಿನಲ್ಲಿ ಉಧಮ್ ಸಿಂಗ್ ಅವರನ್ನು ಗಲ್ಲಿಗೇರಿಸಲಾಯಿತು. ಕೊನೆಯವರೆಗೂ ಆತನ ಮುಖದಲ್ಲಿ ಭಯವಿರಲಿಲ್ಲ. ʼನಾನು ಭಾರತದ ಮಗ. ನನ್ನ ಕೆಲಸ ಮುಗಿಸಿದೆʼ ಎಂದು ನಗುತ್ತಲೇ ಗಲ್ಲು ಹತ್ತಿದನು. ಆ ದೇಶಪ್ರೇಮಿಯ ಚಿತಾಭಸ್ಮವನ್ನು 33 ವರ್ಷಗಳ ನಂತರ 1974ರಲ್ಲಿ ಭಾರತಕ್ಕೆ ತರಲಾಯಿತು. ಇಂದು ಪಂಜಾಬ್ನ ಸುನಾಮ್ನಲ್ಲಿ ಆತನ ಸಮಾಧಿ ಇದೆ.
ಉಧಮ್ ಸಿಂಗ್ ನಮಗೆ ಕೊಟ್ಟ ಪಾಠವೇ ಸ್ವಾಭಿಮಾನ. ತನ್ನ ನೆಲದ ಅವಮಾನವನ್ನು ಸಹಿಸದ ಛಲ ಮತ್ತು ಸಾಮರಸ್ಯ ರಾಮ್-ಮೊಹಮ್ಮದ್-ಸಿಂಗ್ ಎಂಬ ಹೆಸರಿನಲ್ಲಿ ಧರ್ಮಾತೀತ ಭಾರತದ ಕನಸು ಇತ್ತು. ಅವರ ತ್ಯಾಗ ವೈಯಕ್ತಿಕ ಜೀವನ, ಸುಖ ಎಲ್ಲವನ್ನೂ ತ್ಯಜಿಸಿ ದೇಶಕ್ಕಾಗಿ ಜೀವನ ಸಮರ್ಪಣೆ ಮಾಡಿದರು.
ಇದನ್ನೂ ಓದಿದ್ದೀರಾ? ತುಮಕೂರು | ಎಸ್ಐಆರ್ ಗೊಂದಲ: 1.38 ಲಕ್ಷ ಮಂದಿ ಮತದಾರರು ಹೊರಗುಳಿಯುವ ಆತಂಕ
ಟಿಪ್ಪು ಸುಲ್ತಾನನ ಹುಲಿಯಂತೆ, ಬೋಸ್ರ ಐಎನ್ಎ ಹುಲಿಯಂತೆ, ಉಧಮ್ ಸಿಂಗ್ ಪ್ರತೀಕಾರದ ಹುಲಿಯಾಗಿದ್ದರು. ಸರ್ದಾರ್ ಉಧಮ್ ಸಿಂಗ್ ಕೇವಲ ಒಬ್ಬ ಕ್ರಾಂತಿಕಾರಿಯಲ್ಲ; ಅವರು ದೇಶಪ್ರೇಮಿಗಳಿಗೆ ಒಂದು ಸಂದೇಶ. ʼಅನ್ಯಾಯವನ್ನು ಸಹಿಸುವುದೂ ಕೂಡ ಮಹಾ ಪಾಪʼ ಎಂಬ ಸಂದೇಶದಿಂದ ಯುವ ಸ್ವಾತಂತ್ರ್ಯ ಹೋರಾಟಗಾರರೂ ಕೂಡ ಉಧಮ್ ಸಿಂಗ್ನಿಂದ ಪ್ರೇರಣೆ ಪಡೆದಿದ್ದರು.
ಇಂಥ ದೇಶಪ್ರೇಮಿಯ ಪುಣ್ಯಸ್ಮರಣೆಯಂದು, ʼದೇಶದ ಗೌರವಕ್ಕೆ ಚ್ಯುತಿಯಾದಾಗ ಮೌನವಾಗುವುದಿಲ್ಲʼವೆಂದು ಭಾರತೀಯರಾದ ನಾವೆಲ್ಲರೂ ಪ್ರತಿಜ್ಞೆ ಮಾಡೋಣ.
