ಮತದಾರರ ಪಟ್ಟಿಯ ಶುದ್ಧೀಕರಣ ಅಗತ್ಯ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಅರ್ಹ ಮತದಾರರ ಹೆಸರು ತಪ್ಪಾಗಿ ಕೈಬಿಡದಂತೆ ನೋಡಿಕೊಳ್ಳುವುದು ಚುನಾವಣಾ ಆಯೋಗ ಮತ್ತು ಜಿಲ್ಲಾಡಳಿತದ ಹೊಣೆಗಾರಿಕೆಯೂ ಆಗಿದೆ. ವಿಶೇಷವಾಗಿ ಫಾರಂ ತಲುಪದವರು, ಎಪಿಕ್ ಕಾರ್ಡ್ ಇದ್ದರೂ ಹೆಸರು ಕಾಣದವರು, ಒಂದೇ ಕುಟುಂಬದ ಕೆಲವರ ಹೆಸರು ಮಾತ್ರ ಉಳಿದಿರುವಂತಹ ಪ್ರಕರಣಗಳಲ್ಲಿ ತಕ್ಷಣ ಸ್ಪಷ್ಟನೆ ಹಾಗೂ ಪರಿಹಾರ ನೀಡಬೇಕಿದೆ.
ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ(Special Intensive Revision) ಪ್ರಕ್ರಿಯೆ ತುಮಕೂರು ಜಿಲ್ಲೆಯಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಅನರ್ಹ ಮತದಾರರನ್ನು ಪಟ್ಟಿಯಿಂದ ತೆಗೆದುಹಾಕುವ ಉದ್ದೇಶದಿಂದ ನಡೆಯುತ್ತಿರುವ ಈ ಪ್ರಕ್ರಿಯೆಯಲ್ಲಿ, ಅರ್ಹ ಮತದಾರರ ಹೆಸರನ್ನೂ ಕೂಡ ಪಟ್ಟಿಯಿಂದ ಕೈಬಿಡಲಾಗುತ್ತಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಜುಲೈ 28ರವರೆಗಿನ ಮಾಹಿತಿಯಂತೆ ಜಿಲ್ಲಾದ್ಯಂತ 1,38,550 ಮಂದಿ ಮತದಾರರು ಕರಡು ಮತದಾರರ ಪಟ್ಟಿಯಿಂದ ಹೊರಗುಳಿಯುವ ಸಾಧ್ಯತೆ ಕಂಡುಬಂದಿದ್ದು, ಸಾವಿರಾರು ಮತದಾರರಲ್ಲಿ ಆತಂಕ ಮನೆ ಮಾಡಿದೆ.
ತುಮಕೂರು ಜಿಲ್ಲೆಯ 11 ವಿಧಾನಸಭಾ ಕ್ಷೇತ್ರಗಳಲ್ಲಿ ಒಟ್ಟು 22,98,879 ಮತದಾರರು ಇದ್ದಾರೆ. ಚುನಾವಣಾ ಅಧಿಕಾರಿಗಳ ಮಾಹಿತಿ ಪ್ರಕಾರ ಶೇ.100ರಷ್ಟು ಎನ್ಯುಮರೇಷನ್ ಫಾರಂಗಳನ್ನು ವಿತರಿಸಲಾಗಿದೆ. ಆದರೆ ವಿವಿಧ ಕಾರಣಗಳಿಂದ ಹಲವು ಅರ್ಹ ಮತದಾರರಿಗೆ ಫಾರಂಗಳೇ ತಲುಪಿಲ್ಲ ಎಂಬ ದೂರುಗಳು ವ್ಯಾಪಕವಾಗಿ ಕೇಳಿಬರುತ್ತಿವೆ. ವಿತರಿಸಿದ ಫಾರಂಗಳ ಪೈಕಿ ಸುಮಾರು ಶೇ.85ರಷ್ಟು ಫಾರಂಗಳು ವಾಪಸ್ಸಾಗಿದ್ದು, ಆನ್‌ಲೈನ್ ಮೂಲಕ 11,447 ಅರ್ಜಿಗಳು ಸಲ್ಲಿಕೆಯಾಗಿವೆ.
ಎಎಸ್‌ಡಿಡಿಓ ಪಟ್ಟಿಯಲ್ಲಿರುವ ಒಟ್ಟ 1.38 ಲಕ್ಷ ಮಂದಿ
| ವಿವರ | ಸಂಖ್ಯೆ |
|---|---|
| ಎಎಸ್‌ಡಿಡಿಓ ಪಟ್ಟಿಯಲ್ಲಿ ಒಟ್ಟು | 1,38,550 |
| ಪತ್ತೆಯಾಗದವರು | 11,278 |
| ಶಾಶ್ವತವಾಗಿ ಸ್ಥಳಾಂತರಗೊಂಡವರು | 73,353 |
| ನಿಧನ ಹೊಂದಿದವರು | 41,226 |
| ಒಂದಕ್ಕಿಂತ ಹೆಚ್ಚು ಕಡೆ ಹೆಸರು ಹೊಂದಿದವರು | 12,250 |
| ಇತರೆ | 443 ಎಂದು ಗುರುತಿಸಲಾಗಿದೆ. |
ಚುನಾವಣಾ ಆಯೋಗದ ಮಾರ್ಗಸೂಚಿ ಪ್ರಕಾರ, “ಈ ವರ್ಗಕ್ಕೆ ಸೇರಿದ ಮತದಾರರನ್ನು ಕರಡು ಪಟ್ಟಿಯಿಂದ ಕೈಬಿಡಲಾಗುತ್ತದೆ. ಆದರೆ ಈ ಪಟ್ಟಿಯಲ್ಲಿಯೇ ಹಲವಾರು ಅರ್ಹ ಮತದಾರರೂ ಸೇರಿದ್ದಾರೆ” ಎಂಬ ಆರೋಪಗಳು ಕೇಳಿಬರುತ್ತಿವೆ.
ತುಮಕೂರು ನಗರ ಸೇರಿದಂತೆ ಜಿಲ್ಲೆಯ ಹಲವು ಭಾಗಗಳಲ್ಲಿ ವಿಚಿತ್ರ ಪರಿಸ್ಥಿತಿ ನಿರ್ಮಾಣವಾಗಿದೆ. 2023ರ ವಿಧಾನಸಭಾ ಚುನಾವಣೆಯಲ್ಲಿ ಮತದಾನ ಮಾಡಿದ್ದ ಹಲವರ ಹೆಸರುಗಳು ಈಗ ಮತದಾರರ ಪಟ್ಟಿಯಲ್ಲಿ ಕಾಣಿಸುತ್ತಿಲ್ಲ. ಒಂದೇ ಕುಟುಂಬದಲ್ಲಿ ಮೂವರು ಮತದಾರರಿದ್ದರೆ ಒಬ್ಬರ ಹೆಸರು ಮಾತ್ರ ಉಳಿದು, ಉಳಿದ ಇಬ್ಬರ ಹೆಸರುಗಳು ಕಾಣೆಯಾಗಿರುವ ಉದಾಹರಣೆಗಳು ಬೆಳಕಿಗೆ ಬಂದಿವೆ. ಕೆಲ ಮನೆಗಳಲ್ಲಿ ಪತಿಗೆ ಎನುಮರೇಷನ್ ಫಾರಂ ನೀಡಲಾಗಿದ್ದರೆ, ಪತ್ನಿಯನ್ನು “ಪತ್ತೆಯಾಗದವರು” ಎಂದು ವರ್ಗೀಕರಿಸಲಾಗಿದೆ. ಇನ್ನೂ ಕೆಲವೆಡೆ ಪತ್ನಿಯ ಹೆಸರು ಪಟ್ಟಿಯಲ್ಲಿದ್ದರೆ, ಪತಿಯ ಹೆಸರು ಸಂಪೂರ್ಣವಾಗಿ ಕಾಣಿಸುತ್ತಿಲ್ಲ. ಇದರಿಂದ ʼಎಪಿಕ್ (EPIC) ಕಾರ್ಡ್ ಇದ್ದರೂ ಹೆಸರು ಏಕೆ ಇಲ್ಲʼ ಎಂಬುದು ಮತದಾರರ ಪ್ರಶ್ನೆಯಾಗಿದೆ.
ʼನಾಟ್ ಫೌಂಡ್ʼ, ʼಎರರ್ʼ ತೋರಿಸುತ್ತಿರುವ ಪೋರ್ಟಲ್
ಹೆಸರು ಕಾಣೆಯಾಗಿರುವ ಹಲವರು ಆನ್‌ಲೈನ್‌ನಲ್ಲಿ ಪರಿಶೀಲಿಸಿದಾಗ ʼNot Foundʼ ಅಥವಾ ʼErrorʼ ಎಂಬ ಮಾಹಿತಿ ಬರುತ್ತಿದ್ದು, ಎಪಿಕ್ ಕಾರ್ಡ್ ಕೈಯಲ್ಲಿದ್ದರೂ ಹೆಸರು ಕಾಣದಿರುವುದು ಮತದಾರರಲ್ಲಿ ಗೊಂದಲ ಉಂಟುಮಾಡಿದೆ ಎಂಬ ಆರೋಪ ವ್ಯಕ್ತವಾಗುತ್ತಿದೆ.
ಎನ್ಯುಮರೇಷನ್ ಫಾರಂ ಸಿಗದವರು ಏನು ಮಾಡಬೇಕು ಎಂಬುದರ ಕುರಿತು ಸ್ಪಷ್ಟ ಮಾಹಿತಿ ಸಿಗದೆ ಜನರು ಕಚೇರಿಯಿಂದ ಕಚೇರಿಗೆ ಅಲೆದಾಡುತ್ತಿದ್ದಾರೆ. ಕೆಲ ಅಧಿಕಾರಿಗಳು ಆಗಸ್ಟ್ ನಂತರ ಅರ್ಜಿ ನೀಡಿ ಎಂದು ಹೇಳುತ್ತಿದ್ದರೆ, ಇನ್ನೂ ಕೆಲವರು ಆಗಸ್ಟ್ 25ರ ನಂತರ ಎಂದು ಸೂಚಿಸುತ್ತಿದ್ದಾರೆ. ಮತ್ತಷ್ಟು ಕಡೆಗಳಲ್ಲಿ ನಮೂನೆ-6 ಅನ್ನು ಆನ್‌ಲೈನ್‌ನಲ್ಲಿ ಭರ್ತಿ ಮಾಡಿ ಎಂದು ತಿಳಿಸಲಾಗುತ್ತಿದೆ. ಒಂದೇ ವಿಷಯಕ್ಕೆ ವಿಭಿನ್ನ ಮಾಹಿತಿ ಸಿಗುತ್ತಿರುವುದರಿಂದ ಮತದಾರರು ಇನ್ನಷ್ಟು ಗೊಂದಲಕ್ಕೀಡಾಗಿದ್ದಾರೆ.
ಜೀವಂತ ವ್ಯಕ್ತಿಯನ್ನೇ ‘ಮೃತ’ ಎಂದು ಗುರುತು
ಕೆಲವೆಡೆ ಜೀವಂತವಾಗಿರುವ ಮತದಾರರನ್ನು ʼಮೃತʼ ಎಂದು ವರ್ಗೀಕರಿಸಿರುವ ಆರೋಪಗಳೂ ಕೇಳಿಬಂದಿವೆ. ತಿಪಟೂರು ವಿಧಾನಸಭಾ ಕ್ಷೇತ್ರದ ಕಂಚಾಘಟ್ಟ ಮತಗಟ್ಟೆಯಲ್ಲಿ ಕೆಲವು ಮತದಾರರ ಹೆಸರು ʼಡೆತ್ʼ ಎಂದು ದಾಖಲಿಸಲಾಗಿದೆ ಎನ್ನಲಾಗಿದೆ.
ತುಮಕೂರು ಜಿಲ್ಲೆಯಲ್ಲಿ ತುಮಕೂರು ನಗರ ವಿಧಾನಸಭಾ ಕ್ಷೇತ್ರದಲ್ಲೆ ಹೆಚ್ಚು ಅನರ್ಹ ಮತದಾರರನ್ನು ಗುರುತಿಸಲಾಗಿದೆ.
| ವಿವರ | ಸಂಖ್ಯೆ |
|---|---|
| ಒಟ್ಟು ಮತದಾರರು | 2,73,825 |
| ಮೃತರು | 5,772 |
| ಪತ್ತೆಯಾಗದವರು | 8,841 |
| ಶಾಶ್ವತ ಸ್ಥಳಾಂತರ | 23,892 |
| ಬೇರೆಡೆ ನೋಂದಣಿ | 1,640 |
| ಕರಡು ಪಟ್ಟಿಯಿಂದ ಹೊರಗುಳಿಯುವ ಸಾಧ್ಯತೆ | 38,709 |
ಕರುಡು ಪಟ್ಟಿಯಿಂದ 38,709 ಮಂದಿ ಹೊರಗುಳಿಯುವ ಸಾಧ್ಯತೆ ಇದೆ. ಇವರಲ್ಲಿ ಬಹುತೇಕರು ಬಾಡಿಗೆ ಮನೆಗಳಲ್ಲಿ ವಾಸವಾಗಿದ್ದು, ಒಂದೇ ವಿಧಾನಸಭಾ ಕ್ಷೇತ್ರದೊಳಗೆ ವಾರ್ಡ್ ಬದಲಿಸಿ ವಾಸವಾಗಿರುವವರೂ ಸೇರಿದ್ದಾರೆ ಎನ್ನಲಾಗಿದೆ. ಇಂತಹವರ ಹೆಸರುಗಳು ಹಳೆಯ ಮತಗಟ್ಟೆಯಲ್ಲೂ ಇಲ್ಲ, ಹೊಸ ಸ್ಥಳದಲ್ಲೂ ಇಲ್ಲದ ಪರಿಸ್ಥಿತಿ ಉಂಟಾಗಿದೆ ಎಂದು ದೂರುಗಳು ಕೇಳಿಬರುತ್ತಿವೆ.
ಶುದ್ಧೀಕರಣ ಅಗತ್ಯ, ಆದರೆ ಅರ್ಹರು ಕೈಬಿಡಬಾರದು
ಮೃತರು, ಶಾಶ್ವತವಾಗಿ ಸ್ಥಳಾಂತರಗೊಂಡವರು ಹಾಗೂ ಒಂದಕ್ಕಿಂತ ಹೆಚ್ಚು ಕಡೆ ಹೆಸರು ಹೊಂದಿರುವ ಮತದಾರರನ್ನು ಪಟ್ಟಿಯಿಂದ ತೆಗೆದುಹಾಕುವುದು ಮತದಾರರ ಪಟ್ಟಿಯ ಶುದ್ಧೀಕರಣಕ್ಕೆ ಅಗತ್ಯ ಎಂಬುದು ಅಧಿಕಾರಿಗಳ ಅಭಿಪ್ರಾಯ. ಹಲವು ವರ್ಷಗಳಿಂದ ಮೃತರ ಹೆಸರುಗಳು ಹಾಗೂ ಡುಪ್ಲಿಕೇಟ್ ಹೆಸರುಗಳು ಪಟ್ಟಿಯಲ್ಲೇ ಉಳಿದಿದ್ದವು. ಇವುಗಳನ್ನು ತೆರವುಗೊಳಿಸುವುದರಿಂದ ಮತದಾರರ ಪಟ್ಟಿಯ ವಿಶ್ವಾಸಾರ್ಹತೆ ಹೆಚ್ಚಲಿದೆ. ಆದರೆ, ಇದೇ ಪ್ರಕ್ರಿಯೆಯಲ್ಲಿ ಅರ್ಹ ಮತದಾರರ ಹೆಸರೂ ಕೈಬಿಡುತ್ತಿರುವ ಆರೋಪಗಳು ಗಂಭೀರವಾಗಿದ್ದು, ಪ್ರತಿಯೊಂದು ಪ್ರಕರಣವನ್ನೂ ಸೂಕ್ಷ್ಮವಾಗಿ ಪರಿಶೀಲಿಸಬೇಕೆಂಬ ಒತ್ತಾಯ ಕೇಳಿಬರುತ್ತಿದೆ.
ಅಪರ ಜಿಲ್ಲಾಧಿಕಾರಿ ಡಾ. ತಿಪ್ಪೇಸ್ವಾಮಿ ಅವರ ಪ್ರಕಾರ, “ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ ಒಂದು ಶುದ್ಧೀಕರಣ ಪ್ರಕ್ರಿಯೆಯಾಗಿದ್ದು, ಅರ್ಹರನ್ನು ಕೈಬಿಡುವ ಉದ್ದೇಶ ಇಲ್ಲ; ಅರ್ಹ ಮತದಾರರು ಆತಂಕ ಪಡುವ ಅಗತ್ಯವಿಲ್ಲ. ಆಗಸ್ಟ್ 8ರಂದು ಕರಡು ಮತದಾರರ ಪಟ್ಟಿ ಪ್ರಕಟವಾದ ನಂತರವೂ ಹೆಸರು ಸೇರ್ಪಡೆಗೆ ಅವಕಾಶ ಇರುತ್ತದೆ. ಹೆಸರು ಕೈಬಿಟ್ಟಿದ್ದರೆ ನಮೂನೆ-6 ಭರ್ತಿ ಮಾಡಿ ಅಗತ್ಯ ದಾಖಲೆಗಳೊಂದಿಗೆ ಸಲ್ಲಿಸಿದರೆ ಅಂತಿಮ ಮತದಾರರ ಪಟ್ಟಿಯಲ್ಲಿ ಹೆಸರು ಸೇರಿಸಲಾಗುತ್ತದೆ. ಈಗ ನಡೆಯುತ್ತಿರುವುದು ಕರಡು ಪಟ್ಟಿಯ ಪ್ರಕ್ರಿಯೆ ಮಾತ್ರ” ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿದ್ದೀರಾ? ವಿಜಯಪುರ | ಮನೆಗೂ ಬಾರದ, ಕರೆಗೂ ಸಿಗದ ಬಿಎಲ್‌ಒ; ಪಟ್ಟಿಯಿಂದ ಹೊರಗುಳಿವ ಆತಂಕದಲ್ಲಿ ಮತದಾರ
ಮತದಾರರ ಪಟ್ಟಿಯ ಶುದ್ಧೀಕರಣ ಅಗತ್ಯ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಅರ್ಹ ಮತದಾರರ ಹೆಸರು ತಪ್ಪಾಗಿ ಕೈಬಿಡದಂತೆ ನೋಡಿಕೊಳ್ಳುವುದು ಚುನಾವಣಾ ಆಯೋಗ ಮತ್ತು ಜಿಲ್ಲಾಡಳಿತದ ಹೊಣೆಗಾರಿಕೆಯೂ ಆಗಿದೆ. ವಿಶೇಷವಾಗಿ ಫಾರಂ ತಲುಪದವರು, ಎಪಿಕ್ ಕಾರ್ಡ್ ಇದ್ದರೂ ಹೆಸರು ಕಾಣದವರು, ಒಂದೇ ಕುಟುಂಬದ ಕೆಲವರ ಹೆಸರು ಮಾತ್ರ ಉಳಿದಿರುವಂತಹ ಪ್ರಕರಣಗಳಲ್ಲಿ ತಕ್ಷಣ ಸ್ಪಷ್ಟನೆ ಹಾಗೂ ಪರಿಹಾರ ನೀಡಬೇಕಿದೆ. ಕರಡು ಪಟ್ಟಿ ಪ್ರಕಟವಾಗುವ ಮುನ್ನವೇ ಈ ಗೊಂದಲಗಳಿಗೆ ತೆರೆ ಬೀಳದಿದ್ದರೆ, ಅಂತಿಮ ಮತದಾರರ ಪಟ್ಟಿಯ ಮೇಲಿನ ಸಾರ್ವಜನಿಕರ ವಿಶ್ವಾಸಕ್ಕೂ ಧಕ್ಕೆ ಉಂಟಾಗುವ ಸಾಧ್ಯತೆ ಇದೆ.
