ರಾಜ್ಯದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆಯು ಸಾಮಾಜಿಕ ನ್ಯಾಯ ಮತ್ತು ಸಮಾನತೆಯ ಕುರಿತು ಗಂಭೀರ ಆತಂಕಗಳನ್ನು ಹುಟ್ಟುಹಾಕಿದೆ. ರಾಜ್ಯದ 34 ಜಿಲ್ಲಾ ಮತ್ತು ನಗರ ಆಡಳಿತ ಘಟಕಗಳ ದತ್ತಾಂಶವನ್ನು ವಿಶ್ಲೇಷಿಸಿದಾಗ, ಮತದಾರರ ಪಟ್ಟಿಯಿಂದ ಹೆಸರು ಪರಿಶೀಲಿಸುವ ನೆಪದಲ್ಲಿ ಜಾರಿಯಾಗಿರುವ ನೋಟಿಸ್‌ಗಳಲ್ಲಿ ಮಹಿಳೆಯರೇ ಹೆಚ್ಚಿನ ಪ್ರಮಾಣದಲ್ಲಿ ಗುರಿಯಾಗಿರುವುದು ಕಂಡುಬಂದಿದೆ. ಇದು ಕೇವಲ ಒಟ್ಟು ಸಂಖ್ಯೆಯ ವ್ಯತ್ಯಾಸವಲ್ಲದೆ, ಒಟ್ಟು ಮಹಿಳಾ ಮತದಾರರ ಶೇಕಡಾವಾರು ದರದಲ್ಲೂ ಎದ್ದುಕಾಣುವ ತಾರತಮ್ಯವನ್ನು ಎತ್ತಿಹಿಡಿದಿದೆ.
ರಾಜ್ಯಮಟ್ಟದ ಒಟ್ಟಾರೆ ನೋಟಿಸ್ ವಿವರಣೆ
ರಾಜ್ಯಮಟ್ಟದ ಒಟ್ಟು ಅಂಕಿಅಂಶಗಳನ್ನು ಗಮನಿಸಿದಾಗ, ಎಸ್ಐಆರ್ ನೋಟಿಸ್ ಪಡೆದವರಲ್ಲಿ ಪುರುಷರಿಗಿಂತ ಮಹಿಳೆಯರ ಪಾಲು ಸ್ಪಷ್ಟವಾಗಿ ಹೆಚ್ಚಾಗಿದೆ. ನೋಟಿಸ್ ಪಡೆದ ಮಹಿಳೆಯರ ಸಂಖ್ಯೆ ಪುರುಷರಿಗಿಂತ 1,82,791ರಷ್ಟು ಅಧಿಕವಾಗಿದೆ. ರಾಜ್ಯದ 34 ಆಡಳಿತಾತ್ಮಕ ಘಟಕಗಳ ಪೈಕಿ 29 ಘಟಕಗಳಲ್ಲಿ ಮಹಿಳೆಯರಿಗೆ ಹೆಚ್ಚಿನ ನೋಟಿಸ್ ಹೋಗಿದ್ದರೆ, ಕೇವಲ 4 ಘಟಕಗಳಲ್ಲಿ ಪುರುಷರ ದರ ಹೆಚ್ಚಾಗಿದೆ ಹಾಗೂ 1 ಘಟಕದಲ್ಲಿ ಉಭಯ ಲಿಂಗಿಗಳ ದರ ಸಮಾನವಾಗಿದೆ.
| ವರ್ಗ | ನೋಟಿಸ್ ಪಡೆದವರ ಒಟ್ಟು ಸಂಖ್ಯೆ | ಒಟ್ಟು ನೋಟಿಸ್‌ಗಳಲ್ಲಿ ಪಾಲು (%) | ನೋಟಿಸ್ ದರ (ಒಟ್ಟು ಮತದಾರರಲ್ಲಿ %) |
| ಮಹಿಳೆಯರು | 22,68,364 | 52.09% | 10.24% |
| ಪುರುಷರು | 20,85,573 | 47.89% | 9.54% |
| ವ್ಯತ್ಯಾಸ (ಹೆಚ್ಚುವರಿ) | 1,82,791 | +4.20% | +0.70% |
ರಾಜಧಾನಿ ಬೆಂಗಳೂರು ಮತ್ತು ಸುತ್ತಮುತ್ತಲಿನ ವಲಯದ ಸ್ಥಿತಿ
ರಾಜ್ಯದ ಅತ್ಯಂತ ಹೆಚ್ಚು ನಗರೀಕರಣಗೊಂಡ ಮತ್ತು ಹೆಚ್ಚು ಮತದಾರರು ಇರುವ ರಾಜಧಾನಿ ಬೆಂಗಳೂರಿನಲ್ಲಿಯೂ ಇದೇ ರೀತಿಯ ಲಿಂಗ ಆಧಾರಿತ ತಾರತಮ್ಯ ಎದ್ದು ಕಾಣುತ್ತದೆ. ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ವ್ಯಾಪ್ತಿಯ ವಿವಿಧ ವಲಯಗಳು ಮತ್ತು ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳಲ್ಲಿ ಪುರುಷ ಮತದಾರರಿಗಿಂತ ಮಹಿಳಾ ಮತದಾರರೇ ಹೆಚ್ಚಿನ ಪ್ರಮಾಣದಲ್ಲಿ ನೋಟಿಸ್‌ಗಳಿಗೆ ಗುರಿಯಾಗಿದ್ದಾರೆ.
| ಆಡಳಿತಾತ್ಮಕ ವಲಯ | ಮಹಿಳಾ ನೋಟಿಸ್ ದರ (%) | ಪುರುಷರ ನೋಟಿಸ್ ದರ (%) | ವ್ಯತ್ಯಾಸ (%) |
| ಬಿಬಿಎಂಪಿ ಸೆಂಟ್ರಲ್ | 45.15% | 43.31% | +1.84% |
| ಬಿಬಿಎಂಪಿ ನಾರ್ತ್ | 51.69% | 51.34% | +0.35% |
| ಬಿಬಿಎಂಪಿ ಸೌತ್ | 41.23% | 39.74% | +1.49% |
| ಬೆಂಗಳೂರು ನಗರ | 44.56% | 44.35% | +0.21% |
| ಬೆಂಗಳೂರು ಗ್ರಾಮಾಂತರ | 7.52% | 6.61% | +0.91% |
ಜಿಲ್ಲಾವಾರು ಪ್ರಮುಖ ವ್ಯತ್ಯಾಸಗಳು
ರಾಜ್ಯದ ವಿವಿಧ ಜಿಲ್ಲೆಗಳನ್ನು ವಿಶ್ಲೇಷಿಸಿದಾಗ ಬೀದರ್, ರಾಮನಗರ, ಕಲಬುರಗಿ, ಕೋಲಾರ ಮತ್ತು ಹಾಸನದಂತಹ ಜಿಲ್ಲೆಗಳಲ್ಲಿ ಮಹಿಳೆಯರ ನೋಟಿಸ್ ದರ ಪುರುಷರಿಗಿಂತ ಗಮನಾರ್ಹವಾಗಿ ಹೆಚ್ಚಿರುವುದು ದಾಖಲಾಗಿದೆ.
| ಜಿಲ್ಲೆ | ಮಹಿಳಾ ನೋಟಿಸ್ ದರ (%) | ಪುರುಷರ ನೋಟಿಸ್ ದರ (%) |
| ರಾಮನಗರ | 2.80% | 2.08% |
| ಬೀದರ್ | 3.02% | 2.35% |
| ಕಲಬುರಗಿ | 6.24% | 5.24% |
| ಶಿವಮೊಗ್ಗ | 3.87% | 3.27% |
| ಹಾಸನ | 5.54% | 4.76% |
| ಕೋಲಾರ | 13.49% | 11.90% |
| ಚಿಕ್ಕಬಳ್ಳಾಪುರ | 6.24% | 5.55% |
| ಕೊಡಗು | 14.97% | 14.09% |
| ದಕ್ಷಿಣ ಕನ್ನಡ | 9.53% | 8.92% |
| ಬಾಗಲಕೋಟೆ | 3.25% | 3.45% |
| ಚಿಕ್ಕಮಗಳೂರು | 10.41% | 10.77% |
| ಮಂಡ್ಯ | 10.62% | 10.62% |
ನೋಟಿಸ್ ನೀಡಲು ತೋರಿಸಲಾಗಿರುವ ತಾಂತ್ರಿಕ ಕಾರಣಗಳು
ಚುನಾವಣಾ ಆಯೋಗವು ನೀಡಿರುವ ಒಂಬತ್ತು ಪ್ರಮುಖ ನೋಟಿಸ್ ವಿಭಾಗಗಳ ಪೈಕಿ ಏಳು ವಿಭಾಗಗಳಲ್ಲಿ ಮಹಿಳೆಯರೇ ಹೆಚ್ಚಿನ ಸಂಖ್ಯೆಯಲ್ಲಿ ನೋಟಿಸ್ ಪಡೆದಿದ್ದಾರೆ. ಹಿಂದಿನ ಎಸ್‌ಐಆರ್‌ನಲ್ಲಿ ಮ್ಯಾಪಿಂಗ್ ಆಗದಿರುವುದು, ಸ್ವಂತ ಹೆಸರಿನಲ್ಲಿನ ಸ್ಪೆಲ್ಲಿಂಗ್ ಮಿಸ್ಟೇಕ್ ಹಾಗೂ ಪೋಷಕರು ಮತ್ತು ಮತದಾರರ ನಡುವಿನ ವಯಸ್ಸಿನ ವ್ಯತ್ಯಾಸ 15 ವರ್ಷಕ್ಕಿಂತ ಕಡಿಮೆ ಇರುವುದು—ಈ ಎಲ್ಲ ಕಾರಣಗಳಲ್ಲೂ ಮಹಿಳೆಯರಿಗೆ ಜಾರಿಯಾದ ನೋಟಿಸ್‌ಗಳ ಸಂಖ್ಯೆಯೇ ಹೆಚ್ಚಿದೆ. ಆದರೆ, ಪೋಷಕರ ಹೆಸರಿನ ಸೆಲ್ಲಿಂಗ್ ಮಿಸ್ಟೇಕ್ ಎಂಬ ವಿಭಾಗದಲ್ಲಿ ಮಾತ್ರ ಪುರುಷರ ಸಂಖ್ಯೆ ಮಹಿಳೆಯರಿಗಿಂತ ಹೆಚ್ಚಾಗಿದೆ.
| ನೋಟಿಸ್ ನೀಡಲು ಮೂಲ ಕಾರಣ | ಮಹಿಳೆಯರು ಪಡೆದ ನೋಟಿಸ್ | ಪುರುಷರು ಪಡೆದ ನೋಟಿಸ್ |
| ಪೂರ್ವಾಪರ ಮ್ಯಾಪಿಂಗ್ ಆಗದಿರುವುದು | 12,58,396 | 10,77,892 |
| ಸ್ವಂತ ಹೆಸರಿನಲ್ಲಿನ ಸಣ್ಣ ತಪ್ಪುಗಳು | 2,99,567 | 2,32,860 |
| ಪೋಷಕರ ವಯಸ್ಸಿನ ಅಂತರ (<15 ವರ್ಷ) | 2,50,511 | 2,25,630 |
| ಪೋಷಕರ ಹೆಸರಿನ ಸಣ್ಣ ತಪ್ಪುಗಳು | 1,19,391 | 3,42,476 |
ಮಹಿಳೆಯರ ವಯೋಮಾನ ಹಾಗೂ ವೈವಾಹಿಕ ಸ್ಥಿತ್ಯಾಧಾರಿತ ವಿಶ್ಲೇಷಣೆ
ಮಹಿಳಾ ಮತದಾರರ ಒಳಗೆಯೇ ದತ್ತಾಂಶವನ್ನು ಪ್ರತ್ಯೇಕಿಸಿ ವಿಶ್ಲೇಷಿಸಿದಾಗ, ವೈವಾಹಿಕ ಸ್ಥಿತಿ ಮತ್ತು ವಯೋಮಾನದ ಆಧಾರದಲ್ಲೂ ನೋಟಿಸ್ ಪ್ರಮಾಣದಲ್ಲಿ ವ್ಯತ್ಯಾಸವಿರುವುದು ಬಹಿರಂಗವಾಗಿದೆ. ವಿವಾಹಿತ ಮಹಿಳೆಯರಿಗಿಂತ ಅವಿವಾಹಿತ ಮಹಿಳೆಯರು ಹೆಚ್ಚಿನ ಪ್ರಮಾಣದಲ್ಲಿ ನೋಟಿಸ್ ಪಡೆದಿದ್ದಾರೆ. ವಯಸ್ಸಿನ ಆಧಾರದಲ್ಲಿ ಪರಿಶೀಲಿಸಿದಾಗ, 36 ರಿಂದ 45 ವರ್ಷ ವಯೋಮಾನದ ಮಹಿಳೆಯರಲ್ಲಿ ಅತ್ಯಂತ ಗರಿಷ್ಠ ಪ್ರಮಾಣದ ಅಂದರೆ 12.57%ರಷ್ಟು ನೋಟಿಸ್ ದರ ದಾಖಲಾಗಿದೆ.
ಈ ಲೇಖನ ಓದಿದ್ದೀರಾ?: SIR ಅಕ್ರಮ | ಗ್ಯಾನೇಶ್ ಕುಮಾರ್ ‘ಅಪರಾಧಿ’ಯಾದ್ರೆ, ಮೋದಿ-ಅಮಿತ್ ಶಾ ಏನು?
| ವರ್ಗೀಕರಣ | ವಿಭಾಗ / ವಯೋಮಾನ | ನೋಟಿಸ್ ದರ (%) |
| ವೈವಾಹಿಕ ಸ್ಥಿತಿ | ಅವಿವಾಹಿತ ಮಹಿಳೆಯರು | 13.06% |
| ವಿವಾಹಿತ ಮಹಿಳೆಯರು | 9.54% | |
| ವಯೋಮಾನ | 18 ರಿಂದ 25 ವರ್ಷ | 8.66% |
| 26 ರಿಂದ 35 ವರ್ಷ | 9.46% | |
| 36 ರಿಂದ 45 ವರ್ಷ | 12.57% | |
| 46 ರಿಂದ 55 ವರ್ಷ | 10.88% | |
| 56 ರಿಂದ 65 ವರ್ಷ | 9.12% | |
| 66 ರಿಂದ 79 ವರ್ಷ | 9.21% | |
| 80 ವರ್ಷ ಮೇಲ್ಪಟ್ಟವರು | 7.70% |
ರಾಷ್ಟ್ರೀಯ ಸನ್ನಿವೇಶವೂ ಕರ್ನಾಟಕಕ್ಕೆ ಹೊರತಾಗಿಲ್ಲ
ಕರ್ನಾಟಕದಲ್ಲಿನ ಇದೇ ಪರಿಸ್ಥಿತಿ ರಾಷ್ಟ್ರೀಯವಾಗಿಯೂ ಕಂಡುಬಂದಿದೆ. ದೇಶಾದ್ಯಂತ ಎಸ್ಐಆರ್ ನಡೆದ ಮತ್ತು ನಡೆಯುತ್ತಿರುವ ಇತರ ರಾಜ್ಯಗಳಲ್ಲೂ ಇದೇ ರೀತಿಯ ಪರಿಣಾಮಗಳು ದಾಖಲಾಗಿವೆ. ಬಿಹಾರ, ಉತ್ತರ ಪ್ರದೇಶ, ತಮಿಳುನಾಡು ಹಾಗೂ ಪಶ್ಚಿಮ ಬಂಗಾಳದಂತಹ ರಾಜ್ಯಗಳಲ್ಲಿ ಎಸ್ಐಆರ್ ನಂತರ ಮತದಾರರ ಪಟ್ಟಿಯಿಂದ ಮಹಿಳೆಯರ ಹೆಸರುಗಳು ಭಾರೀ ಪ್ರಮಾಣದಲ್ಲಿ ಅಳಿಸಲ್ಪಟ್ಟಿವೆ.
| ರಾಜ್ಯ | ಎಸ್ಐಆರ್ ಪ್ರಕ್ರಿಯೆಯ ಲಿಂಗಾನುಪಾತದ ಪರಿಣಾಮ |
| ಬಿಹಾರ | 22.74 ಲಕ್ಷ ಮಹಿಳೆಯರು ಪಟ್ಟಿಯಿಂದ ಅಳಿಸಲ್ಪಟ್ಟಿದ್ದಾರೆ. ಮತದಾರರ ಲಿಂಗಾನುಪಾತ 914ರಿಂದ 892 ಕ್ಕೆ ಕುಸಿದಿದೆ. |
| ಉತ್ತರ ಪ್ರದೇಶ | ಕರಡು ಪಟ್ಟಿಯಿಂದ ಹೊರಬಿದ್ದ 2.89 ಕೋಟಿ ಹೆಸರುಗಳಲ್ಲಿ 1.55 ಕೋಟಿ ಮಹಿಳೆಯರು (ಲಿಂಗಾನುಪಾತ 824ಕ್ಕೆ ಇಳಿಕೆ). |
| ತಮಿಳುನಾಡು | ಪುರುಷರಿಗಿಂತ 2.6 ಲಕ್ಷ ಹೆಚ್ಚು ಮಹಿಳೆಯರ ಹೆಸರುಗಳು ಕರಡು ಪಟ್ಟಿಯಿಂದ ಕಡಿತ. |
| ಪಶ್ಚಿಮ ಬಂಗಾಳ | ಡಿಲೀಟ್ ಮಾಡಲಾದ ಅಥವಾ ವಿಚಾರಣೆಯಲ್ಲಿರುವ ಒಟ್ಟು ಮತದಾರರಲ್ಲಿ ಮಹಿಳೆಯರ ಪಾಲು 61.8% ಇದೆ. |
ಸಾಮಾಜಿಕ ವ್ಯವಸ್ಥೆಯಲ್ಲಿ ಮಹಿಳೆಯರು ವಿವಾಹದ ನಂತರ ಮನೆ, ವಿಳಾಸ, ಉಪನಾಮ ಹಾಗೂ ಕುಟುಂಬದ ಹೆಸರುಗಳ ಬದಲಾವಣೆಗೆ ಒಳಗಾಗುವುದು ಸಹಜ. ಎಸ್ಐಆರ್ ಪ್ರಕ್ರಿಯೆಯಲ್ಲಿ ಹಳೆಯ ದಾಖಲೆಗಳನ್ನು ಒದಗಿಸಲು ಸಾಧ್ಯವಾಗದೆ ಅಥವಾ ‘ಶಾಶ್ವತವಾಗಿ ಸ್ಥಳಾಂತರಗೊಂಡವರು’ ಎಂಬ ತಾಂತ್ರಿಕ ಕಾರಣ ನೀಡಿ ಅವರ ಹೆಸರುಗಳನ್ನು ಸುಲಭವಾಗಿ ಮತದಾರರ ಪಟ್ಟಿಯಿಂದ ಅಳಿಸಲಾಗಿದೆ.
