ಬಹುನಿರೀಕ್ಷಿತ ಐಪಿಎಲ್ ಪಂದ್ಯವನ್ನು ಕ್ರೀಡಾಂಗಣದಲ್ಲಿ ಕುಳಿತು ವೀಕ್ಷಿಸುವ ಆಸೆಯಿಂದ ಸಾಮಾಜಿಕ ಜಾಲತಾಣದ ಮೂಲಕ ಟಿಕೆಟ್ ಖರೀದಿಸಲು ಹೋದ 25 ವರ್ಷದ ಸಾಫ್ಟ್‌ವೇರ್ ಉದ್ಯೋಗಿಯೊಬ್ಬರು ಬರೋಬ್ಬರಿ 1.46 ಲಕ್ಷ ರೂಪಾಯಿ ಕಳೆದುಕೊಂಡು ವಂಚನೆಗೊಳಗಾದ ಘಟನೆ ನಗರದಲ್ಲಿ ವರದಿಯಾಗಿದೆ ಎಂದು ಡೆಕ್ಕನ್ ಹೆರಾಲ್ಡ್‌ ವರದಿ ಮಾಡಿದೆ.
ಭಾನುವಾರ ನಿಗದಿಯಾಗಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (RCB vs CSK) ನಡುವಿನ ಪಂದ್ಯದ ಟಿಕೆಟ್‌ಗಾಗಿ ಯುವಕ ಇನ್‌ಸ್ಟಾಗ್ರಾಮ್‌ನಲ್ಲಿ ಹುಡುಕಾಟ ನಡೆಸಿದ್ದರು. ಈ ವೇಳೆ ನಕಲಿ ಟಿಕೆಟ್ ಮಾರಾಟಗಾರನೊಬ್ಬನ ಖಾತೆಯನ್ನು ಅವರು ಸಂಪರ್ಕಿಸಿದ್ದಾರೆ.
ಈ ಆನ್‌ಲೈನ್ ವಂಚಕನು ಯುವಕನಿಗೆ ಕೇವಲ ಪಂದ್ಯದ ಟಿಕೆಟ್ ಮಾತ್ರವಲ್ಲದೆ, ‘ವಿಐಪಿ ಸೌಲಭ್ಯಗಳು’ ಉಚಿತ ಆಹಾರದ ಕೂಪನ್‌ಗಳು ಮತ್ತು ಸ್ನೇಹಿತರ ಪ್ರವೇಶಕ್ಕಾಗಿ ಹೆಚ್ಚುವರಿ ಐಡಿ ಕಾರ್ಡ್‌ಗಳನ್ನು ಒದಗಿಸುವುದಾಗಿ ನಂಬಿಸಿದ್ದನು. ವಂಚಕನ ಈ ಭರವಸೆಗಳನ್ನು ನಂಬಿದ ಟೆಕ್ಕಿ ಆತನ ಬಲೆಗೆ ಬಿದ್ದಿದ್ದಾರೆ.
ಆನ್‌ಲೈನ್ ಮೂಲಕ ಟಿಕೆಟ್ ಮತ್ತು ವಿಐಪಿ ಪಾಸ್ ಪಡೆಯುವ ಉತ್ಸಾಹದಲ್ಲಿ, ಟೆಕ್ಕಿಯು ವಂಚಕನಿಗೆ ಯುಪಿಐ ಮೂಲಕ ಹಂತ-ಹಂತವಾಗಿ ಹಣ ವರ್ಗಾವಣೆ ಮಾಡಿದ್ದಾರೆ. ತನ್ನ ಬ್ಯಾಂಕ್ ಖಾತೆ ಮಾತ್ರವಲ್ಲದೆ, ತನ್ನ ತಾಯಿಯ ಖಾತೆಯನ್ನು ಬಳಸಿಯೂ ಹಣ ಕಳುಹಿಸಿದ್ದಾರೆ. ಒಟ್ಟಾರೆ 1.46 ಲಕ್ಷ ರೂಪಾಯಿಗಳನ್ನು ಸ್ವೀಕರಿಸಿದ ಬಳಿಕ, ವಂಚಕನು ಯಾವುದೇ ಟಿಕೆಟ್ ನೀಡದೆ ಸಂಪರ್ಕ ಕಡಿದುಕೊಂಡು ಪರಾರಿಯಾಗಿದ್ದಾನೆ.
ಇದನ್ನು ಓದಿದ್ದೀರಾ? ‘ಸಂಜು ಬಂದರೆ ಋತುರಾಜ್‌ಗೆ ನಡುಕ’: CSK ನಾಯಕನ ಭವಿಷ್ಯದ ಬಗ್ಗೆ ಮಾಜಿ ದಿಗ್ಗಜರ ಅಚ್ಚರಿಯ ಹೇಳಿಕೆ
ಹಣ ಕಳೆದುಕೊಂಡ ಬಳಿಕ ತಾನು ವಂಚನೆಗೆ ಒಳಗಾಗಿರುವುದು ಯುವಕನಿಗೆ ಅರಿವಾಗಿದೆ. ಈ ಸಂಬಂಧ ಅವರು ಸೈಬರ್ ಕ್ರೈಮ್ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದು, ದೂರು ದಾಖಲಿಸಿದ್ದಾರೆ.
ಐಪಿಎಲ್ ಪಂದ್ಯಗಳ, ಅದರಲ್ಲೂ ವಿಶೇಷವಾಗಿ ಆರ್‌ಸಿಬಿ ಮತ್ತು ಸಿಎಸ್‌ಕೆ ಪಂದ್ಯಗಳ ಟಿಕೆಟ್‌ಗೆ ಇರುವ ಭಾರಿ ಬೇಡಿಕೆಯ ಲಾಭವನ್ನು ಸೈಬರ್ ವಂಚಕರು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಇನ್‌ಸ್ಟಾಗ್ರಾಮ್, ಟೆಲಿಗ್ರಾಮ್, ಫೇಸ್‌ಬುಕ್ ಮುಂತಾದ ಸಾಮಾಜಿಕ ಜಾಲತಾಣಗಳಲ್ಲಿ ನಕಲಿ ಖಾತೆಗಳನ್ನು ಸೃಷ್ಟಿಸಿ, ಟಿಕೆಟ್ ನೀಡುವುದಾಗಿ ಹೇಳಿ ಸಾರ್ವಜನಿಕರಿಂದ ಹಣ ದೋಚುತ್ತಿದ್ದಾರೆ.
ಕ್ರಿಕೆಟ್ ಅಭಿಮಾನಿಗಳು ಕೇವಲ ಅಧಿಕೃತ ವೆಬ್‌ಸೈಟ್‌ಗಳು ಮತ್ತು ಆ್ಯಪ್‌ಗಳ ಮೂಲಕ ಮಾತ್ರವೇ ಟಿಕೆಟ್ ಖರೀದಿಸಬೇಕು. ಯಾವುದೇ ಕಾರಣಕ್ಕೂ ಸಾಮಾಜಿಕ ಜಾಲತಾಣಗಳಲ್ಲಿ ಪರಿಚಯವಾಗುವ ಅಪರಿಚಿತ ವ್ಯಕ್ತಿಗಳ ಬ್ಯಾಂಕ್ ಖಾತೆಗಳಿಗೆ ಅಥವಾ ಅವರು ಕಳುಹಿಸುವ ಕ್ಯೂಆರ್ ಕೋಡ್‌ಗಳಿಗೆ ಹಣ ವರ್ಗಾವಣೆ ಮಾಡಬಾರದು ಎಂದು ಪೊಲೀಸರು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.
