ಕೋಲ್ಲತ್ತಾದ ಈಡನ್ ಗಾರ್ಡನ್ಸ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಭಾರತ – ದಕ್ಷಿಣ ಆಫ್ರಿಕಾ ನಡುವಿನ ಮೊದಲ ಟೆಸ್ಟ್ ಪಂದ್ಯದ ಎರಡನೇ ದಿನ ಮುಕ್ತಾಯಗೊಂಡಿದ್ದು, ಪ್ರವಾಸಿ ತಂಡವು ತನ್ನ ಎರಡನೇ ಇನಿಂಗ್ಸ್‌ನಲ್ಲಿ 93 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡು ಆತಂಕದ ಸ್ಥಿತಿಯಲ್ಲಿದೆ.
ಹರಿಣಗಳ ತಂಡ ಕೇವಲ 63 ರನ್‌ಗಳ ಮುನ್ನಡೆ ಹೊಂದಿದೆ. ಪಂದ್ಯವು ನಾಳೆ ನಡೆಯಲಿರುವ ಮೂರನೇ ದಿನದಲ್ಲಿಯೇ ಮುಗಿದು ಭಾರತಕ್ಕೆ ಗೆಲುವು ಸಿಗುವ ಸಂಭವವಿದೆ. ಆಲ್ರೌಂಡರ್ ರವೀಂದ್ರ ಜಡೇಜಾ 4 ವಿಕೆಟ್‌ಗಳನ್ನು ಪಡೆದು ಪ್ರಾಬಲ್ಯ ಮೆರೆದಿದ್ದು, ಆತಿಥೇಯರು ಸರಣಿಯಲ್ಲಿ ಮುನ್ನಡೆ ಸಾಧಿಸುವ ಹಾದಿಯಲ್ಲಿದ್ದಾರೆ.
ಮಧ್ಯಾಹ್ನದ ನಂತರ ದಕ್ಷಿಣ ಆಫ್ರಿಕಾ ತನ್ನ ಎರಡನೇ ಇನಿಂಗ್ಸ್ ಆರಂಭಿಸಿತು, ಆದರೆ ಭಾರತದ ಸ್ಪಿನ್ ದಾಳಿಯ ಮುಂದೆ ಕುಸಿಯಿತು. ಆರಂಭಿಕ ರಯಾನ್ ರಿಕೆಲ್ಟನ್ (11 ರನ್) ಕುಲದೀಪ್ ಯಾದವ್‌ಗೆ ವಿಕೆಟ್ ಒಪ್ಪಿಸಿದರೆ, ಏಡನ್ ಮಾರ್ಕ್ರಮ್ (4 ರನ್) ಮತ್ತು ವಿಯಾನ್ ಮುಲ್ಡರ್ (11 ರನ್) ಜಡೇಜಾ ಅವರ ಬೌಲಿಂಗ್‌ಗೆ ಔಟಾದರು. ನಾಯಕ ಟೆಂಬಾ ಬವುಮಾ (29 ಅಜೇಯ) ಏಕಾಂಗಿಯಾಗಿ ಹೋರಾಡುತ್ತಿದ್ದರೂ, ಟೋನಿ ಡಿ ಜೋರ್ಜಿ (2 ರನ್), ಟ್ರಿಸ್ಟನ್ ಸ್ಟಬ್ಸ್ (5 ರನ್), ಕೈಲ್ ವೆರ್ರೇಯ್ನೆ (9 ರನ್) ಮತ್ತು ಮಾರ್ಕೋ ಜಾನ್ಸೆನ್ (13 ರನ್) ಸ್ಪಿನ್ನರ್‌ಗಳಿಗೆ ವಿಕೆಟ್ ಒಪ್ಪಿಸಿದರು. ಜಡೇಜಾ (4/29) ಮತ್ತು ಕುಲದೀಪ್ (2/12) ಅವರ ಬೌಲಿಂಗ್‌ ದಿನದ ಪ್ರಮುಖ ಪ್ರದರ್ಶನವಾಗಿತ್ತು.
2ನೇ ದಿನದ ಆಟವು ಭಾರತದ ಮೊದಲ ಇನಿಂಗ್ಸ್‌ನ್‌ 37/1 ರನ್‌ಗಳಿಂದ ಮುಂದುವರಿಯಿತು. ಕೆಎಲ್ ರಾಹುಲ್ (39 ರನ್) ಮತ್ತು ವಾಷಿಂಗ್ಟನ್ ಸುಂದರ್ (29 ರನ್) ತಂಡಕ್ಕೆ ಉತ್ತಮ ಆರಂಭ ನೀಡಿದರೂ, ಶುಭಮನ್ ಗಿಲ್ (4 ರನ್) ಗಾಯದ ಕಾರಣ ಹೊರಗುಳಿದರು. ರಿಷಭ್ ಪಂತ್ (27 ರನ್) ಆಕ್ರಮಣಕಾರಿ ಬ್ಯಾಟಿಂಗ್ ಮಾಡಿದರೂ, ದಕ್ಷಿಣ ಆಫ್ರಿಕಾದ ಸ್ಪಿನ್ನರ್ ಸೈಮನ್ ಹಾರ್ಮರ್ (4/30) ಮತ್ತು ಮಾರ್ಕೋ ಜಾನ್ಸೆನ್ (3/35) ಅವರ ಬೌಲಿಂಗ್‌ನಿಂದ ಭಾರತದ ಇನಿಂಗ್ಸ್ 189 ರನ್‌ಗಳಿಗೆ ಮುಗಿಯಿತು. ಇದರೊಂದಿಗೆ ಭಾರತಕ್ಕೆ 30 ರನ್‌ಗಳ ಮುನ್ನಡೆ ದೊರಕಿತು.
ಇದನ್ನು ಓದಿದ್ದೀರಾ? ದೇಶಿ ಕ್ರಿಕೆಟ್‌ನಲ್ಲಿ ಆಡಿದರೆ ಮಾತ್ರ ಏಕದಿನಕ್ಕೆ ಅವಕಾಶ: ರೋಹಿತ್, ಕೊಹ್ಲಿಗೆ ಬಿಸಿಸಿಐ ಸಂದೇಶ
ಕಪಿಲ್ ದೇವ್ ಸರಿಗಟ್ಟಿದ ಜಡೇಜ
ಈ ಪಂದ್ಯದಲ್ಲಿ ಭಾರತದ ಆಲ್ರೌಂಡರ್ ರವೀಂದ್ರ ಜಡೇಜಾ ಅವರು ಮತ್ತೊಂದು ಮೈಲುಗಲ್ಲು ಸಾಧಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ 4,000 ರನ್‌ಗಳು ಮತ್ತು 338 ವಿಕೆಟ್‌ಗಳನ್ನು ಪಡೆದುಕೊಂಡು ಜಡೇಜಾ ಅವರು ಕ್ರಿಕೆಟ್ ದಿಗ್ಗಜ ಕಪಿಲ್ ದೇವ್ ಅವರ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಇದನ್ನು ಅವರು ತಮ್ಮ 88ನೇ ಟೆಸ್ಟ್ ಪಂದ್ಯದಲ್ಲಿ ಸಾಧಿಸಿದ್ದು, ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಮತ್ತೊಂದು ಹೆಮ್ಮೆಯ ಕ್ಷಣವಾಗಿದೆ.
