ನೆದರ್ಲ್ಯಾಂಡ್ಸ್ನ ವ್ಯಾಗನರ್ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಎಫ್ಐಹೆಚ್ ಪುರುಷರ ಹಾಕಿ ವಿಶ್ವಕಪ್ 2026ರ ತನ್ನ ಮೊದಲ ಪಂದ್ಯದಲ್ಲಿ ಭಾರತ ತಂಡವು ವೇಲ್ಸ್ ವಿರುದ್ಧ 3-1 ಗೋಲುಗಳ ಅಂತರದ ಭರ್ಜರಿ ಜಯ ಸಾಧಿಸಿ ಅಭಿಯಾನವನ್ನು ಆರಂಭಿಸಿದೆ.
ಸ್ವಾತಂತ್ರ್ಯ ದಿನಾಚರಣೆಯಂದೇ ನಡೆದ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಭಾರತದ ಪರ ನಾಯಕ ಹರ್ಮನ್ಪ್ರೀತ್ ಸಿಂಗ್ ಎರಡು ಗೋಲು ಹಾಗೂ ಸಂಜಯ್ ರಾಣಾ ಒಂದು ಗೋಲು ಗಳಿಸಿ ಗೆಲುವಿನ ರೂವಾರಿಯಾದರು. ಈ ಮಹತ್ವದ ಗೆಲುವಿನೊಂದಿಗೆ ಭಾರತ ತಂಡವು ‘ಪೂಲ್ ಡಿ’ ಅಂಕಪಟ್ಟಿಯಲ್ಲಿ ಸದ್ಯಕ್ಕೆ ಅಗ್ರಸ್ಥಾನಕ್ಕೇರಿದೆ.
ಪಂದ್ಯ ಆರಂಭವಾದ ಮೊದಲ ಕ್ವಾರ್ಟರ್ನಲ್ಲೇ ಭಾರತ ಆಕ್ರಮಣಕಾರಿ ಆಟಕ್ಕೆ ಮುಂದಾಯಿತು. 8ನೇ ನಿಮಿಷದಲ್ಲಿ ಸಿಕ್ಕ ಪೆನಾಲ್ಟಿ ಕಾರ್ನರ್ ಅವಕಾಶವನ್ನು ತಮ್ಮ ಚೊಚ್ಚಲ ವಿಶ್ವಕಪ್ ಆಡುತ್ತಿರುವ 25 ವರ್ಷದ ಸಂಜಯ್ ರಾಣಾ ಗೋಲಾಗಿ ಪರಿವರ್ತಿಸಿ ತಂಡಕ್ಕೆ 1-0 ಮುನ್ನಡೆ ತಂದುಕೊಟ್ಟರು. ನಂತರ 11ನೇ ನಿಮಿಷದಲ್ಲಿ ಸಿಕ್ಕ ಮತ್ತೊಂದು ಪೆನಾಲ್ಟಿ ಕಾರ್ನರ್ನಲ್ಲಿ ನಾಯಕ ಹರ್ಮನ್ಪ್ರೀತ್ ಸಿಂಗ್ ತಮ್ಮ ಕ್ಲಾಸಿಕ್ ಡ್ರ್ಯಾಗ್ ಫ್ಲಿಕ್ ಮೂಲಕ ಚೆಂಡನ್ನು ಗೋಲುಪೆಟ್ಟಿಗೆಗೆ ಸೇರಿಸಿ ಮುನ್ನಡೆಯನ್ನು 2-0ಗೆ ಹೆಚ್ಚಿಸಿದರು. ಎರಡನೇ ಕ್ವಾರ್ಟರ್ನಲ್ಲಿ ವೇಲ್ಸ್ ತಂಡವು ತನ್ನ ರಕ್ಷಣಾ ತಂತ್ರವನ್ನು ಬಲಪಡಿಸಿಕೊಂಡಿದ್ದರಿಂದ ಗೋಲು ಗಳಿಸಲು ಸಾಧ್ಯವಾಗಲಿಲ್ಲ. ಬಳಿಕ 42ನೇ ನಿಮಿಷದಲ್ಲಿ ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಹರ್ಮನ್ಪ್ರೀತ್ ವೈಯಕ್ತಿಕ ಎರಡನೇ ಗೋಲು ದಾಖಲಿಸಿ ಭಾರತದ ಮುನ್ನಡೆಯನ್ನು 3-0ಗೆ ವಿಸ್ತರಿಸಿದರು.
ನಾಲ್ಕನೇ ಕ್ವಾರ್ಟರ್ನ 57ನೇ ನಿಮಿಷದಲ್ಲಿ ವೇಲ್ಸ್ ತಂಡದ ಸ್ಯಾಮ್ ವೆಲ್ಷ್ ತಮ್ಮ ತಂಡದ ಪರ ಏಕೈಕ ಸಮಾಧಾನಕರ ಗೋಲು ಗಳಿಸಿದರು. ಈ ಗೋಲಿನ ಸಂದರ್ಭದಲ್ಲಿ ಅಂಪೈರ್ ವಿಜಿಲ್ ಜಾರಿ ಬಿದ್ದು ಗಾಯಗೊಂಡ ನಾಟಕೀಯ ಬೆಳವಣಿಗೆ ನಡೆಯಿತಾದರೂ, ಟಿವಿ ಅಂಪೈರ್ ಪರಿಶೀಲನೆಯ ನಂತರ ಗೋಲು ನೀಡಲಾಯಿತು. ಪಂದ್ಯದ ವೇಳೆ ಭಾರತದ ಕೋಚ್ ಕ್ರೇಗ್ ಫುಲ್ಟನ್ ಗೋಲ್ಕೀಪರ್ ರೊಟೇಷನ್ ತಂತ್ರ ಅನುಸರಿಸಿ ಸೂರಜ್ ಕರ್ಕೆರಾ ಬದಲಿಗೆ ಮೋಹಿತ್ ಅವರನ್ನು ಕಣಕ್ಕಿಳಿಸಿದರು. ಮೋಹಿತ್ 54ನೇ ನಿಮಿಷದಲ್ಲಿ ಅದ್ಭುತವಾಗಿ ಗೋಲು ತಡೆದು ತಂಡದ ಮುನ್ನಡೆ ಕಾಯ್ದುಕೊಳ್ಳಲು ನೆರವಾದರು. ಇದೇ ವೇಳೆ ಭಾರತದ ಆಟಗಾರ ಶಿಲಾನಂದ್ ಲಾಕ್ರಾ ಗಾಯಗೊಂಡು ಮೈದಾನ ತೊರೆದರು.
ವಿಶ್ವಕಪ್ ಅಭಿಯಾನದಲ್ಲಿ ಶುಭಾರಂಭ ಕಂಡಿರುವ ಭಾರತ ಪುರುಷರ ತಂಡವು ತನ್ನ ಮುಂದಿನ ಪಂದ್ಯದಲ್ಲಿ ಆಗಸ್ಟ್ 17 ರಂದು ಸಂಜೆ 6:30ಕ್ಕೆ ಬಲಿಷ್ಠ ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ. ಇದಕ್ಕೂ ಮುನ್ನ, ಭಾರತದ ಮಹಿಳಾ ಹಾಕಿ ತಂಡವು ಆಗಸ್ಟ್ 16 ರಂದು ಚೀನಾ ವಿರುದ್ಧ ಸೆಣಸುವ ಮೂಲಕ ತನ್ನ ವಿಶ್ವಕಪ್ ಅಭಿಯಾನವನ್ನು ಆರಂಭಿಸಲಿದೆ.
