- ಜುಲೈ 6ರಂದು ಮೆಟಾದಿಂದ ಥ್ರೆಡ್ಸ್ ಅಪ್ಲಿಕೇಶನ್‌ ಬಿಡುಗಡೆ
- ಮೆಟಾ ಸಿಇಒ ಮಾರ್ಕ್‌ ಜುಕರ್‌ಬರ್ಗ್‌ಗೆ ಟ್ವಿಟರ್‌ ಬೆದರಿಕೆ ಪತ್ರ
ಮೆಟಾ ಸಂಸ್ಥೆಯ ಥ್ರೆಡ್ಸ್ ಅಪ್ಲಿಕೇಶನ್‌ ಟ್ವಿಟರ್‌ ಸಂಸ್ಥೆಯ ಪ್ರತಿಸ್ಪರ್ಧಿ ಎಂತಲೇ ಬಿಂಬಿತವಾಗಿದ್ದು ಬಿಡುಗಡೆಯಾದ 24 ಗಂಟೆಗಳಲ್ಲಿ 5 ಕೋಟಿ ಬಳಕೆದಾರರನ್ನು ದಾಟಿದೆ. ಆದರೆ ಈ ಅಪ್ಲಿಕೇಶನ್‌ ಈಗ ಟ್ವಿಟರ್‌ನಿಂದ ಕಾನೂನು ಬೆದರಿಕೆ ಎದುರಿಸುವಂತಾಗಿದೆ.
ಗುರುವಾರ ಈ ಮೆಟಾದ ಥ್ರೆಡ್ಸ್ ಅಪ್ಲಿಕೇಶನ್‌ ಬಿಡುಗಡೆಯಾಗಿತ್ತು. ಇದು ತನ್ನ ಬೌದ್ಧಿಕ ಆಸ್ತಿ ಹಕ್ಕುಗಳನ್ನು ಉಲ್ಲಂಘಿಸಿದೆ ಎಂದು ಟ್ವಿಟರ್‌ ಮೊಕದ್ದಮೆ ಹೂಡುವ ಬೆದರಿಕೆ ಹಾಕಿದೆ.
ಥ್ರೆಡ್ಸ್ ಒಡೆತನ ಹೊಂದಿರುವ ಮೆಟಾದ ಸಿಇಒ ಮಾರ್ಕ್‌ ಜುಕರ್‌ಬರ್ಗ್ ಅವರು ಕಾನೂನುಬಾಹಿರವಾಗಿ ಟ್ವಿಟರ್‌ನ ವ್ಯಾಪಾರಿ ರಹಸ್ಯಗಳು ಮತ್ತು ಇತರ ಬೌದ್ಧಿಕ ಆಸ್ತಿಗಳನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂದು ಆರೋಪಿಸಿ ಎಲಾನ್‌ ಮಸ್ಕ್‌ ಅವರ ವಕೀಲ ಅಲೆಕ್ಸ್‌ ಸುಪಿರೊ ಅವರು ಜುಕರ್‌ಬರ್ಗ್ ಅವರಿಗೆ ಪತ್ರ ಬರೆದಿದ್ದಾರೆ ಎಂದು ಸುದ್ದಿ ಪತ್ರಿಕೆ ಸಮಾಫೋರ್‌ ವರದಿ ಮಾಡಿದೆ.
“ಮೆಟಾ ಸಂಸ್ಥೆಯು ಅಪ್ಲಿಕೇಶನ್‌ನಲ್ಲಿ ಟ್ವಿಟರ್‌ನ ವ್ಯಾಪಾರಿ ರಹಸ್ಯಗಳು ಮತ್ತು ಇತರ ಗೋಪ್ಯ ಮಾಹಿತಿಗಳು ತಿಳಿದಿರುವ ಮಾಜಿ ಉದ್ಯೋಗಿಗಳನ್ನು ನೇಮಿಸಿಕೊಂಡಿದೆ” ಎಂದು ಪತ್ರದಲ್ಲಿ ಆರೋಪಿಸಲಾಗಿದೆ.
“ಥ್ರೆಡ್ಸ್ ಅಪ್ಲಿಕೇಶನ್‌ನಲ್ಲಿ ಟ್ವಿಟರ್‌ ವ್ಯಾಪಾರಿ ತಂತ್ರಗಳನ್ನು ಬಳಸುವುದನ್ನು ಮೆಟಾ ಸಂಸ್ಥೆ ಈ ಕೂಡಲೇ ನಿಲ್ಲಿಸಬೇಕು” ಎಂದು ಪತ್ರದಲ್ಲಿ ಸೂಚಿಸಲಾಗಿದೆ.
ಈ ಸುದ್ದಿ ಓದಿದ್ದೀರಾ? ಮೇಕೆದಾಟು ಯೋಜನೆಗೆ ಕರ್ನಾಟಕಕ್ಕೆ ಅವಕಾಶ ನೀಡುವುದಿಲ್ಲ: ತಮಿಳುನಾಡು ಸಚಿವ
ಮೆಟಾದ ಅಪ್ಲಿಕೇಶನ್‌ಗೆ ಸಂಬಂಧಿಸಿ ಎಲಾನ್‌ ಮಸ್ಕ್‌ ಪ್ರತಿಕ್ರಿಯಿಸಿದ್ದು, “ಸ್ಪರ್ಧೆ ಒಳ್ಳೆಯದು ಆದರೆ ಮೋಸ ಸಲ್ಲ” ಎಂದು ಹೇಳಿದ್ದಾರೆ.
“ಥ್ರೆಡ್ಸ್ ಅಪ್ಲಿಕೇಶನ್‌ ನಿರ್ವಹಿಸುವ ಎಂಜಿನಿಯರಿಂಗ್‌ ತಂಡದಲ್ಲಿ ಯಾರೊಬ್ಬರೂ ಟ್ವಿಟರ್‌ ಮಾಜಿ ಉದ್ಯೋಗಿಯಿಲ್ಲ” ಎಂದು ಟ್ವಿಟರ್‌ ಆರೋಪಕ್ಕೆ ಮೆಟಾ ವಕ್ತಾರ ಆಂಡಿ ಸ್ಟೋನ್ ಪ್ರತಿಕ್ರಿಯಿಸಿದ್ದಾರೆ.
ಥ್ರೆಡ್ಸ್ ಅಪ್ಲಿಕೇಶನ್‌ನಲ್ಲಿ ಟ್ವಿಟರ್‌ನಲ್ಲಿ ಇರುವಂತೆ ಸಂದೇಶ ಬರೆದು ಲಿಂಕ್‌ ಜೊತೆಗೆ ಹಂಚಿಕೊಳ್ಳಬಹುದು. ಅಲ್ಲದೆ ಇತರರ ಸಂದೇಶಗಳಿಗೆ ಇದರಲ್ಲಿ ಪ್ರತಿಕ್ರಿಯೆಗಳನ್ನು ನೀಡಬಹುದು.
