ಅಕ್ಟೋಬರ್ 31ರಂದು ದೀಪಾವಳಿಯ ದಿನ ಅಜಯ್ ದೇವಗನ್ ಅಭಿಯನದ ‘ಸಿಂಗಮ್ ಅಗೇನ್’ ಸಿನಿಮಾ ಬಿಡುಗಡೆಯಾಗಲಿದೆ. ಇದು, ‘ಸಿಂಮ್’ ಸಿನಿಮಾದ ಮುಂದುವರೆದ ಭಾಗವೆಂದು ಹೇಳಲಾಗಿದ್ದು, ಹೊಸ ಸಿನಿಮಾದ ಬಿಡುಗಡೆಗೂ ಮುನ್ನ ಮೂಲ ಕಥೆಯನ್ನು ಪ್ರೇಕ್ಷಕರ ಮುಂದೆ ತರಲು ಚಿತ್ರತಂಡ ನಿರ್ಧರಿಸಿದೆ. ‘ಸಿಂಗಂ’ ಸಿನಿಮಾವನ್ನು ಮತ್ತೆ ಬಿಡುಗಡೆ ಮಾಡುವುದಾಗಿ ಘೋಷಿಸಿದೆ. ಅಕ್ಟೋಬರ್ 18ರಂದು ‘ಸಿಂಗಮ್’ ಮರು-ಬಿಡುಗಡೆಯಾಗಲಿದೆ ಎಂದು ಸಿನಿಮಾ ನಿರ್ಮಾಪಕ ರೋಹಿತ್ ಶೆಟ್ಟಿ ತಿಳಿಸಿದ್ದಾರೆ.
ಸಿನಿಮಾ ಮರು-ಬಿಡುಗಡೆ ಬಗ್ಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿರುವ ರೋಹಿತ್, “ದೀಪಾವಳಿಯಂದು ‘ಸಿಂಗಮ್ ಅಗೇನ್’ ಪೂರ್ಣ ಬಲದೊಂದಿಗೆ ಬರುವ ಮೊದಲು! ಹಿಂದಿನ ಕತೆಯನ್ನು ಪ್ರೇಕ್ಷಕರಿಗೆ ನೆನಪಿಸಲು, ಆ ಅನುಭವವನ್ನು ಸಂಭ್ರಮಿಸಲು ಮತ್ತೊಮ್ಮೆ ‘ಸಿಂಗಮ್’ಅನ್ನು ಅಕ್ಟೋಬರ್ 18ರಂದು ಬಿಡುಗಡೆ ಮಾಡಲಾಗುತ್ತಿದೆ” ಎಂದು ಹೇಳಿದ್ದಾರೆ.
ಅಜಯ್ ಕೂಡ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಹಾಕಿದ್ದು, ‘ಸಿಂಗಮ್’ ಮರು-ಬಿಡುಗಡೆಯ ಬಗ್ಗೆ ತಮ್ಮ ಉತ್ಸಾಹವನ್ನು ವ್ಯಕ್ತಪಡಿಸಿದ್ದಾರೆ.
‘ಸಿಂಗಮ್’ ಚಿತ್ರ 2011ರಲ್ಲಿ ಬಿಡುಗಡೆಯಾಗಿತ್ತು. ಸಿನಿಮಾದಲ್ಲಿ ಅಜಯ್ ಪೊಲೀಸ್‌ಆಗಿ ನಟಿಸಿದ್ದರು. ಅವರೊಂದಿಗೆ ನಟಿ ಕಾಜಲ್ ಅಗರ್ವಾಲ್ ಮತ್ತು ಪ್ರಕಾಶ್ ರಾಜ್ ಬಣ್ಣ ಹಚ್ಚಿಸಿದ್ದರು. ಚಿತ್ರವು ಆ ವರ್ಷದ ದೊಡ್ಡ ಬ್ಲಾಕ್‌ಬಸ್ಟರ್‌ಗಳಲ್ಲಿ ಒಂದಾಗಿತ್ತು. 2014ರಲ್ಲಿ ಸಿಂಗಮ್-2 ಸಿನಿಮಾ ಕೂಡ ಬಂದಿತ್ತು. ಆ ಸಿನಿಮಾದಲ್ಲಿ ಕರೀನಾ ಕಪೂರ್ ಖಾನ್ ನಾಯಕಿಯ ಪಾತ್ರ ನಿಭಾಯಿಸಿದ್ದರು.
ಹಿಂದಿನ ಎರಡು ಭಾಗಗಳ ಯಶಸ್ಸಿನೊಂದಿಗೆ ಇದೀಗ ಮೂರನೇ ಕಂತು ‘ಸಿಂಗಮ್ ಅಗೇನ್’ ಬಿಡುಗಡೆಗೆ ಸಿದ್ಧವಾಗಿದೆ. ಸಿನಿಮಾದಲ್ಲಿ, ಅಜಯ್, ಕರೀನಾ, ರಣವೀರ್ ಸಿಂಗ್, ಟೈಗರ್ ಶ್ರಾಫ್, ಅಕ್ಷಯ್ ಕುಮಾರ್, ದೀಪಿಕಾ ಪಡುಕೋಣೆ ಹಾಗೂ ಅರ್ಜುನ್ ಕಪೂರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
