ಡಾ. ಬಿ.ಆರ್. ಅಂಬೇಡ್ಕರ್ ಭೀಮವಾದ ಸೇನೆ (ರಿ) ವತಿಯಿಂದ ನಾಲ್ಕನೇ ವರ್ಷದ ಮಹಿಷಾ ದಸರಾ ಕಾರ್ಯಕ್ರಮವನ್ನು ಭಾನುವಾರದಂದು ಬೆಂಗಳೂರಿನ ಕಮಲಾನಗರದ ಡಾ. ಬಿ.ಆರ್. ಅಂಬೇಡ್ಕರ್ ಸಮುದಾಯ ಭವನದಲ್ಲಿ ಆಚರಿಸಲಾಯಿತು.
ಭಾನುವಾರ ಬೆಳಗ್ಗೆ 10.30ಕ್ಕೆ ನಡೆದ ಕಾರ್ಯಕ್ರಮದಲ್ಲಿ ಮಹಿಷಾಸುರನ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಸಲ್ಲಿಸುವ ಮೂಲಕ ಗೌರವ ನಮನ ಸಲ್ಲಿಸಲಾಯಿತು. ಬಳಿಕ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಗಣ್ಯರು ಮಹಿಷಾಸುರನ ಇತಿಹಾಸ ಮತ್ತು ಆತನ ಆಡಳಿತದ ಕುರಿತು ಮಾತನಾಡಿ, ಮಹಿಷಾ ದಸರಾವನ್ನು ಯಶಸ್ವಿಗೊಳಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಡಾ. ಬಿ.ಆರ್. ಅಂಬೇಡ್ಕರ್ ಭೀಮವಾದ ಸೇನೆಯ ರಾಜ್ಯಾಧ್ಯಕ್ಷ ಸಿದ್ದರಾಜು ಎ. ಮಾತನಾಡಿ, ಭಾರತದ ಮೂಲನಿವಾಸಿಗಳು ದ್ರಾವಿಡರು. ದ್ರಾವಿಡ ಸಂಸ್ಕೃತಿ, ಪರಂಪರೆ ಮತ್ತು ಇತಿಹಾಸವನ್ನು ಉಳಿಸಿ ಬೆಳೆಸುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ ಎಂದು ಹೇಳಿದರು.
ಮಹಿಷಾಸುರನು ಮಹಿಷ ಮಂಡಲದ ಅಧಿಪತಿಯಾಗಿ ಮೈಸೂರನ್ನು ಆಳಿದ ರಾಜನಾಗಿದ್ದು, ಉತ್ತಮ ಆಡಳಿತಗಾರನಾಗಿದ್ದನೆಂಬುದು ನಮ್ಮ ಪರಂಪರೆಯಲ್ಲಿರುವ ನಂಬಿಕೆಯಾಗಿದೆ. ಆದರೆ ಆರ್ಯರ ದಬ್ಬಾಳಿಕೆ ಮತ್ತು ಪ್ರಾಬಲ್ಯದ ಪರಿಣಾಮವಾಗಿ ಮಹಿಷಾಸುರನನ್ನು ರಾಕ್ಷಸನ ರೂಪದಲ್ಲಿ ಬಿಂಬಿಸಿ, ಆತನ ಇತಿಹಾಸವನ್ನು ತಿರುಚುವ ಪ್ರಯತ್ನಗಳು ನಡೆದಿವೆ. ಇಂತಹ ಇತಿಹಾಸದ ಮರುನಿರೂಪಣೆಯ ಬಗ್ಗೆ ನಾವು ಎಚ್ಚೆತ್ತುಕೊಳ್ಳಬೇಕು ಎಂದರು.
ಮಹಿಷಾಸುರನ ಇತಿಹಾಸವನ್ನು ಕೇವಲ ಧಾರ್ಮಿಕ ದೃಷ್ಟಿಕೋನದಿಂದ ನೋಡದೆ, ಸ್ಥಳೀಯ ಸಂಸ್ಕೃತಿ, ಜನಪದ ಪರಂಪರೆ ಮತ್ತು ದ್ರಾವಿಡ ಅಸ್ಮಿತೆಯ ಹಿನ್ನೆಲೆಯಲ್ಲಿ ಅಧ್ಯಯನ ಮಾಡಬೇಕಿದೆ. ನಮ್ಮ ಮೂಲ ಸಂಸ್ಕೃತಿ ಮತ್ತು ಇತಿಹಾಸವನ್ನು ಯುವ ಪೀಳಿಗೆಗೆ ಪರಿಚಯಿಸುವ ಮೂಲಕ ಮುಂದಿನ ಪೀಳಿಗೆಗೆ ತಲುಪಿಸಬೇಕು. ದ್ರಾವಿಡ ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಇಂತಹ ಕಾರ್ಯಕ್ರಮಗಳು ಮಹತ್ವದ್ದಾಗಿವೆ ಎಂದು ತಿಳಿಸಿದರು.
ಈ ವಿಶೇಷ ಲೇಖನ ಓದಿದ್ದೀರಾ? ಏಳು ಕೊಲೆಗಳು ಮತ್ತು ಮನುಷ್ಯ ಮೃಗ!: ಕ್ರೋಧ, ಕ್ರೌರ್ಯ, ವಿವೇಕದ ಕಾವಲು ಕಳಚಿದಾಗ…
ಮೈಸೂರು ಭಾಗದ ಕೆಲವು ಸ್ಥಳೀಯ ಜನಪದ ಮತ್ತು ಪರ್ಯಾಯ ಇತಿಹಾಸದ ವ್ಯಾಖ್ಯಾನಗಳಲ್ಲಿ ಮಹಿಷಾಸುರನನ್ನು ಮಹಿಷ ಮಂಡಲದ ರಾಜನಾಗಿ, ಸ್ಥಳೀಯ ಸಮುದಾಯಗಳ ಸಾಂಸ್ಕೃತಿಕ ಸಂಕೇತವಾಗಿ ಸ್ಮರಿಸಲಾಗುತ್ತದೆ. ಮೈಸೂರು ಎಂಬ ಹೆಸರು ಮಹಿಷಾಸುರನ ಹೆಸರಿನಿಂದ ಬಂದಿದೆ ಎಂಬ ಜನಪ್ರಿಯ ಸ್ಥಳೀಯ ಐತಿಹ್ಯವೂ ಇದೆ. ಈ ಹಿನ್ನೆಲೆಯಲ್ಲಿ ಮಹಿಷಾ ದಸರಾವನ್ನು ಆಚರಿಸುವವರು ಮಹಿಷಾಸುರನನ್ನು ತಮ್ಮ ಮೂಲನಿವಾಸಿ ಪರಂಪರೆ ಮತ್ತು ಸಾಂಸ್ಕೃತಿಕ ಅಸ್ಮಿತೆಯ ಸಂಕೇತವಾಗಿ ಸ್ಮರಿಸುತ್ತಾರೆ.
ಈ ವಿಶೇಷ ವರದಿ ಓದಿದ್ದೀರಾ? ಅಕ್ಕಿ ಬೆಲೆ ಏರಿಕೆಯ ಹಿಂದಿನ ಆಟ ಯಾರದ್ದು?: ಕಾರ್ಪೋರೇಟ್ ಮಾರುಕಟ್ಟೆಯ ಕರಾಮತ್ತು!
ಕಾರ್ಯಕ್ರಮದಲ್ಲಿ ಭೀಮ್ ಜಿ, ಕುಣಿಗಲ್ ರಾಮಚಂದ್ರ, ಶಿವರಾಜ್ ಎಂ., ಮಾಜಿ ಕಾರ್ಪೊರೇಟರ್ ನಟರಾಜ್, ವಕೀಲ ಅಶೋಕ ಎಚ್.ಸಿ., ಆನಂದ್ ಕುಮಾರ್, ಸುರೇಶ್ ಎಚ್‌ಎಎಲ್, ವಿಜಯ್ ಕುಮಾರ್, ಪೊಲೀಸ್ ಇಲಾಖೆಯ ತಿಮ್ಮಯ್ಯ, ಅರೆ ತಿಮ್ಮಯ್ಯ, ಚಿಕ್ಕ ರಾಮು, ಮ್ಯಾಕ್ಸ್ ಮುಲ್ಲರ್ ಶಾಲೆಯ ಜನಾರ್ಧನ್, ಭೀಮ್ ಆರ್ಮಿಯ ಆನಂದ್ ಕುಮಾರ್ ಮತ್ತು ಪ್ರತಾಪ್, ಬಿ.ಸಿ. ರಾಮಣ್ಣ, ರಾಜಗೋಪಾಲನಗರದ ರಾಮಾಂಜಿನಪ್ಪ, ಮಹಿಳಾ ಅಧ್ಯಕ್ಷೆ ಅನಿತಾ, ರಂಗರಾಜು, ರಾಜಗೋಪಾಲ್ ಸೇರಿದಂತೆ ಹಲವು ಗಣ್ಯರು ಹಾಗೂ ಸಂಘಟನೆಯ ಕಾರ್ಯಕರ್ತರು ಇದ್ದರು.
