ಕೃತಕ ಬುದ್ಧಿಮತ್ತೆಯು ಈಗ ಕೇವಲ ಒಂದು ಹೆಚ್ಚುವರಿ ತಂತ್ರಜ್ಞಾನವಾಗಿ ಮಾತ್ರವಲ್ಲದೆ, ಜಾಗತಿಕ ಮಾರುಕಟ್ಟೆಯಲ್ಲಿ ಬದುಕುಳಿಯಲು ಬೇಕಾದ ಅತ್ಯಗತ್ಯ ಚೌಕಟ್ಟಾಗಿ ಬದಲಾಗಿದೆ. ಚೀನಾದಲ್ಲಿ ಸಂಭವಿಸುತ್ತಿರುವ ಶೈಕ್ಷಣಿಕ ಮತ್ತು ಔದ್ಯೋಗಿಕ ಪಲ್ಲಟವು ಇಡೀ ಜಗತ್ತಿಗೆ ಒಂದು ದೊಡ್ಡ ಎಚ್ಚರಿಕೆ ನೀಡುತ್ತಿದೆ.
ಜಾಗತಿಕ ಮಟ್ಟದಲ್ಲಿ ಕೃತಕ ಬುದ್ಧಿಮತ್ತೆ (Artificial Intelligence) ತಂತ್ರಜ್ಞಾನವು ಕೇವಲ ಒಂದು ತಾಂತ್ರಿಕ ಆವಿಷ್ಕಾರವಾಗಿ ಉಳಿದಿಲ್ಲ, ಬದಲಾಗಿ ಅದು ಇಡೀ ವಿಶ್ವದ ಶೈಕ್ಷಣಿಕ ಮತ್ತು ಉದ್ಯೋಗ ಮಾರುಕಟ್ಟೆಯ ಸ್ವರೂಪವನ್ನೇ ಬುಡಮೇಲು ಮಾಡುತ್ತಿದೆ. ನಾನಾ ರಾಷ್ಟ್ರಗಳು ಈ ತಂತ್ರಜ್ಞಾನದ ಅತಿವೇಗದ ಬೆಳವಣಿಗೆ ಮತ್ತು ಭವಿಷ್ಯದ ಆರ್ಥಿಕ ಸವಾಲುಗಳಿಗೆ ತಕ್ಕಂತೆ ತನ್ನ ಇಡೀ ಶಿಕ್ಷಣ ವ್ಯವಸ್ಥೆಯನ್ನು ಮರುರೂಪಿಸಲು ಮುಂದಾಗಿವೆ. ಅಂತೆಯೇ, ಚೀನಾ ಕೂಡ ಗಂಭೀರ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದೆ. ಈಗ ಬರೋಬ್ಬರಿ 12,200ಕ್ಕೂ ಹೆಚ್ಚು ಸಾಂಪ್ರದಾಯಿಕ ಪದವಿ ಕೋರ್ಸ್‌ಗಳನ್ನು ಚೀನಾ ಏಕಾಏಕಿ ರದ್ದುಗೊಳಿಸಿದೆ.
ಬದಲಾಗುತ್ತಿರುವ ಎಐ ಯುಗದಲ್ಲಿ ಪ್ರಸ್ತುತ ಉದ್ಯೋಗ ಮಾರುಕಟ್ಟೆಯ ಬೇಡಿಕೆಗಳಿಗೆ ಹೊಂದಿಕೊಳ್ಳದ ಮತ್ತು ಸಂಪೂರ್ಣವಾಗಿ ಹಳತಾಗಿವೆ ಎಂದು ಪರಿಗಣಿಸಲಾದ ಕೋರ್ಸ್‌ಗಳನ್ನು ರದ್ದುಗೊಳಿಸಲಾಗಿದೆ. ಕಾಲಕ್ಕೆ ತಕ್ಕಂತೆ ಬದಲಾಗದಿದ್ದರೆ ಜಾಗತಿಕ ಸ್ಪರ್ಧೆಯಲ್ಲಿ ಹಿಂದುಳಿಯಬೇಕಾಗುತ್ತದೆ ಎಂಬ ಕಟು ವಾಸ್ತವಕ್ಕೆ ಹೊಂದಿಕೊಳ್ಳಬೇಕಿದೆ ಎಂದು ಚೀನಾ ಸರ್ಕಾರ ಭಾವಿಸಿದೆ ಎಂದು ‘ಸೌತ್ ಚೀನಾ ಮಾರ್ನಿಂಗ್‌ ಪೋಸ್ಟ್’ (SCMP) ವರದಿ ಮಾಡಿದೆ.
ಚೀನಾದ ಶಿಕ್ಷಣ ಸಚಿವಾಲಯದ ಅಧಿಕೃತ ದತ್ತಾಂಶಗಳ ಪ್ರಕಾರ, ದೇಶದ ಉನ್ನತ ಶಿಕ್ಷಣ ಸಂಸ್ಥೆಗಳು ಕಳೆದ ಕೆಲವು ವರ್ಷಗಳಲ್ಲಿ ತಮ್ಮ ಒಟ್ಟು ಪದವಿ ಕಾರ್ಯಕ್ರಮಗಳ ಪೈಕಿ 30%ಗಿಂತಲೂ ಹೆಚ್ಚಿನ ಕೋರ್ಸ್‌ಗಳನ್ನು ಸಂಪೂರ್ಣವಾಗಿ ಕೈಬಿಟ್ಟಿವೆ. ಮುಖ್ಯವಾಗಿ ಕಲೆ, ಮಾನವಿಕ ವಿಜ್ಞಾನ, ಮ್ಯಾನೇಜ್‌ಮೆಂಟ್, ಉತ್ಪನ್ನ ವಿನ್ಯಾಸ ಹಾಗೂ ವಿದೇಶಿ ಭಾಷೆಗಳಂತಹ ಸಾಂಪ್ರದಾಯಿಕ ಕ್ಷೇತ್ರಗಳು ಕೋರ್ಸ್‌ಗಳ ರದ್ದತಿಯಿಂದಾಗಿ ಹೊಡೆತ ಅನುಭವಿಸಿವೆ.
‘ಶಾಂಘೈ ಯೂನಿವರ್ಸಿಟಿ ಆಫ್ ಸೈನ್ಸ್ ಅಂಡ್ ಟೆಕ್ನಾಲಜಿ’ಯು ತನ್ನ ಪ್ರಾಡಕ್ಟ್ ಡಿಸೈನ್ ಕೋರ್ಸ್ ಅನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಿದೆ. ಏಕೆಂದರೆ, ಈ ಕ್ಷೇತ್ರದ ಪ್ರಮುಖ ಕೆಲಸಗಳಾದ ಮಾಡೆಲಿಂಗ್ ಮತ್ತು ರೆಂಡರಿಂಗ್ ಅನ್ನು ಪ್ರಸ್ತುತ ದಿನಗಳಲ್ಲಿ ಎಐ ತಂತ್ರಜ್ಞಾನವೇ ಮನುಷ್ಯನಿಗಿಂತ ವೇಗವಾಗಿ ನಿರ್ವಹಿಸುತ್ತಿದೆ ಎಂದು ಶಾಂಘೈ ವಿಶ್ವವಿದ್ಯಾಲಯ ಹೇಳಿಕೊಂಡಿದೆ.
ಇಂತಹ ಹಳತಾದ ಕೋರ್ಸ್‌ಗಳ ಬದಲಾಗಿ, ಮುಂದಿನ ಪೀಳಿಗೆಯ ಕೃತಕ ಬುದ್ಧಿಮತ್ತೆಯನ್ನು ನೈಜ ಆರ್ಥಿಕತೆಗೆ ಸಂಯೋಜಿಸುವ ಉದ್ದೇಶದೊಂದಿಗೆ ಉದ್ಯೋಗ ಮಾರುಕಟ್ಟೆಗೆ ಪೂರಕವಾದ ಸುಮಾರು 10,200 ಹೊಸ ಆಧುನಿಕ ತಾಂತ್ರಿಕ ‘ಎಐ’ ಕೋರ್ಸ್‌ಗಳನ್ನು ವಿಶ್ವವಿದ್ಯಾಲಯಗಳಲ್ಲಿ ಪರಿಚಯಿಸಲಾಗಿದೆ ಎಂದು ‘SCMP’ ವರದಿ ಹೇಳಿದೆ.
ಈ ಬೃಹತ್ ಶೈಕ್ಷಣಿಕ ಪಲ್ಲಟದ ಹಿಂದೆ ಚೀನಾದಲ್ಲಿ ತೀವ್ರಗೊಳ್ಳುತ್ತಿರುವ ನಿರುದ್ಯೋಗದ ಆತಂಕವೂ ಪ್ರಮುಖ ಕಾರಣವಾಗಿದೆ. ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, ವಿದ್ಯಾರ್ಥಿಗಳನ್ನು ಹೊರತುಪಡಿಸಿ ಅಲ್ಲಿನ ಯುವ ನಿರುದ್ಯೋಗಿಗಳ ದರವು 16.9%ಗೆ ಏರಿಕೆಯಾಗಿದೆ. ಸಾಂಪ್ರದಾಯಿಕ ಪದವಿಗಳನ್ನು ಮುಗಿಸಿ ಹೊರಬರುತ್ತಿರುವ ಲಕ್ಷಾಂತರ ಪದವೀಧರರಿಗೆ ಮಾರುಕಟ್ಟೆಯಲ್ಲಿ ನಿರೀಕ್ಷಿತ ಉದ್ಯೋಗಾವಕಾಶಗಳು ಸಿಗುತ್ತಿಲ್ಲ. ಈ ವರ್ಷ ಸರಿಸುಮಾರು 1.27 ಕೋಟಿ ಪದವೀಧರರು ಉದ್ಯೋಗ ಮಾರುಕಟ್ಟೆಯನ್ನು ಪ್ರವೇಶಿಸುತ್ತಿದ್ದು, ನಿರುದ್ಯೋಗದ ಸಮಸ್ಯೆ ಮತ್ತಷ್ಟು ಕಠಿಣವಾಗುವ ಲಕ್ಷಣಗಳಿವೆ.
ಎಐ ಕ್ರಾಂತಿಯಿಂದಾಗಿ ಸಾಂಪ್ರದಾಯಿಕ ಪದವಿಗಳು ನಿರುಪಯುಕ್ತವಾಗುತ್ತಿವೆ ಎಂದು ಭಾವಿಸಿರುವ ವಿದ್ಯಾರ್ಥಿಗಳು ಈಗ ಉನ್ನತ ಶಿಕ್ಷಣದಿಂದಲೇ ದೂರ ಸರಿಯುತ್ತಿದ್ದಾರೆ. ಇದೇ ಕಾರಣಕ್ಕೆ ಚೀನಾದ ರಾಷ್ಟ್ರೀಯ ವಿಶ್ವವಿದ್ಯಾಲಯ ಪ್ರವೇಶ ಪರೀಕ್ಷೆಯಾದ ‘ಗಾವೊಕಾವೊ’ ಬರೆಯುವ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿ ಸತತವಾಗಿ ಇಳಿಕೆ ಕಂಡುಬಂದಿದೆ. ಈ ವರ್ಷ ಪರೀಕ್ಷಾರ್ಥಿಗಳ ಸಂಖ್ಯೆ 4.5 ಲಕ್ಷದಷ್ಟು ಭಾರೀ ಕುಸಿತ ಕಂಡಿದೆ. ಇದರ ಬದಲಾಗಿ, ತಕ್ಷಣವೇ ಪೂರ್ಣಾವಧಿಯ ಕೆಲಸವನ್ನು ಒದಗಿಸಬಲ್ಲ ಪ್ರಾಯೋಗಿಕ ವೃತ್ತಿಪರ ಕೋರ್ಸ್‌ಗಳತ್ತ ಯುವಜನರು ಮುಖ ಮಾಡುತ್ತಿದ್ದಾರೆ.
ಈ ಲೇಖನ ಓದಿದ್ದೀರಾ?: ಬತ್ತಿದ ಜೈವಿಕ ಚೈತನ್ಯ: ‘ಚೈಲ್ಡ್ ಫ್ರೀ’ ಪರಿಕಲ್ಪನೆ ಹೆಚ್ಚಳ, ಫಲವತ್ತತೆ ಕುಸಿತಕ್ಕೆ ಕಾರಣವೇನು?
ಎಐ ತಂತ್ರಜ್ಞಾನದ ಬೆಳವಣಿಗೆಯು ಮುಂಬರುವ ದಿನಗಳಲ್ಲಿ ಉದ್ಯೋಗ ಮಾರುಕಟ್ಟೆಯ ಚಿತ್ರಣವನ್ನೇ ಸಂಪೂರ್ಣವಾಗಿ ಬದಲಾಯಿಸಲಿದೆ. ಆರ್ಥಿಕ ಮತ್ತು ತಾಂತ್ರಿಕ ತಜ್ಞರ ಅಂದಾಜಿನ ಪ್ರಕಾರ, 2030ರ ಹೊತ್ತಿಗೆ ಕೃತಕ ಬುದ್ಧಿಮತ್ತೆಯ ತೀವ್ರ ಬಳಕೆಯಿಂದಾಗಿ ಚೀನಾದಲ್ಲಿ 22%ರಷ್ಟು ಉದ್ಯೋಗಗಳು ಕಡಿತವಾಗಿದ್ದು, ಬೃಹತ್ ಸಂಖ್ಯೆಯ ಉದ್ಯೋಗಿಗಳು ತಮ್ಮ ಉದ್ಯೋಗ ಕಳೆದುಕೊಳ್ಳಲಿದ್ದಾರೆ.
ಮುಖ್ಯವಾಗಿ ಉತ್ಪಾದನಾ ವಲಯ, ಡೇಟಾ ನಿರ್ವಹಣೆ, ಗ್ರಾಹಕ ಸೇವೆ ಹಾಗೂ ಗ್ರಾಫಿಕ್ಸ್ ವಿನ್ಯಾಸದಂತಹ ಕ್ಷೇತ್ರಗಳಲ್ಲಿ ಮನುಷ್ಯರ ಜಾಗವನ್ನು ಎಐ ಆಧಾರಿತ ಯಂತ್ರಗಳು ಮತ್ತು ರೋಬೋಟ್‌ಗಳು ಆವರಿಸಿಕೊಳ್ಳಲಿವೆ. ಈ ಭೀತಿಯಿಂದಾಗಿ ಕಾರ್ಪೊರೇಟ್ ಜಗತ್ತು ಕೂಡ ತನ್ನ ನೇಮಕಾತಿ ನೀತಿಯನ್ನು ಜಾಗತಿಕವಾಗಿ ಬದಲಿಸಿಕೊಳ್ಳುತ್ತಿದೆ. ಭವಿಷ್ಯದಲ್ಲಿ 40%ರಷ್ಟು ಕಂಪನಿಗಳು ಉದ್ಯೋಗಿಗಳನ್ನು ಆಯ್ಕೆ ಮಾಡುವಾಗ ಕೇವಲ ದೊಡ್ಡ ವಿಶ್ವವಿದ್ಯಾಲಯಗಳ ಪದವಿ ಪತ್ರಗಳನ್ನು ನೋಡುವ ಬದಲು, ಅವರ ‘ಎಐ ನೈಪುಣ್ಯತೆ’ ಮತ್ತು ಹೊಸ ತಂತ್ರಜ್ಞಾನಕ್ಕೆ ಒಗ್ಗಿಕೊಳ್ಳುವ ಸಾಮರ್ಥ್ಯಕ್ಕೆ ಮೊದಲ ಆದ್ಯತೆ ನೀಡಲಿವೆ ಎಂದು ವರದಿ ವಿವರಿಸಿದೆ.
ಚೀನಾದಲ್ಲಿ ಸಂಭವಿಸುತ್ತಿರುವ ಈ ಶೈಕ್ಷಣಿಕ ಮತ್ತು ಔದ್ಯೋಗಿಕ ಪಲ್ಲಟವು ಇಡೀ ಜಗತ್ತಿಗೆ ಒಂದು ದೊಡ್ಡ ಎಚ್ಚರಿಕೆ ನೀಡುತ್ತಿದೆ. ಕೃತಕ ಬುದ್ಧಿಮತ್ತೆಯು ಈಗ ಕೇವಲ ಒಂದು ಹೆಚ್ಚುವರಿ ತಂತ್ರಜ್ಞಾನವಾಗಿ ಮಾತ್ರವಲ್ಲದೆ, ಜಾಗತಿಕ ಮಾರುಕಟ್ಟೆಯಲ್ಲಿ ಬದುಕುಳಿಯಲು ಬೇಕಾದ ಅತ್ಯಗತ್ಯ ಚೌಕಟ್ಟಾಗಿ ಬದಲಾಗಿದೆ. ಸಾಂಪ್ರದಾಯಿಕ ಪಠ್ಯಕ್ರಮದ ಮಿತಿಯಿಂದ ಹೊರಬಂದು, ಬದಲಾಗುತ್ತಿರುವ ತಂತ್ರಜ್ಞಾನಕ್ಕೆ ತಕ್ಕಂತೆ ಕೌಶಲ್ಯಗಳನ್ನು ನಿರಂತರವಾಗಿ ನವೀಕರಿಸಿಕೊಳ್ಳುವ ಉದ್ಯೋಗಿಗಳು ಮತ್ತು ವಿದ್ಯಾರ್ಥಿಗಳು ಮಾತ್ರ ಎಐ ಯುಗದಲ್ಲಿ ಯಶಸ್ವಿಯಾಗಿ ನೆಲೆನಿಲ್ಲಲು ಸಾಧ್ಯ ಎಂಬುದನ್ನು ಇದು ಸ್ಪಷ್ಟವಾಗಿ ತೋರುತ್ತಿದೆ.
