ಅಮೆರಿಕದ ಸೆರೆಯಲ್ಲಿರುವ ವೆನೆಜುವೆಲಾದ ಮಾಜಿ ಅಧ್ಯಕ್ಷ ನಿಕೋಲಸ್‌ ಮಡುರೊ ಅವರ ರಾಜಕೀಯ ಜೀವನದಷ್ಟೇ ಕುತೂಹಲಕಾರಿಯಾದ ಸಂಗತಿಯೊಂದು ಮುನ್ನೆಲೆಗೆ ಬಂದಿದೆ. ಅವರು ಆಂಧ್ರಪ್ರದೇಶದ ಪುಟ್ಟಪರ್ತಿಯ ಸತ್ಯ ಸಾಯಿಬಾಬಾ ಅವರ ಪರಮ ಭಕ್ತರಾಗಿದ್ದರು ಎಂಬುದು ವಿಶೇಷ.
ಮಡುರೊ ಮತ್ತು ಪುಟ್ಟಪರ್ತಿಯ ನಡುವಿನ ನಂಟು ಎರಡು ದಶಕಗಳಷ್ಟು ಹಳೆಯದು. 2005ರಲ್ಲಿ ವೆನೆಜುವೆಲಾದ ವಿದೇಶಾಂಗ ಸಚಿವರಾಗಿದ್ದಾಗ, ಮಡುರೊ ತಮ್ಮ ಪತ್ನಿ ಸಿಲಿಯಾ ಫ್ಲೋರ್ಸ್‌ ಅವರೊಂದಿಗೆ ಭಾರತಕ್ಕೆ ಭೇಟಿ ನೀಡಿದ್ದರು. ಈ ವೇಳೆ ಅವರು ಯಾವುದೇ ರಾಜಕೀಯ ಮಾತುಕತೆಗಿಂತ ಮಿಗಿಲಾಗಿ, ಆಧ್ಯಾತ್ಮಿಕ ಗುರು ಸಾಯಿಬಾಬಾ ಅವರ ದರ್ಶನ ಪಡೆಯಲು ಪುಟ್ಟಪರ್ತಿಗೆ ತೆರಳಿದ್ದರು. ಸಾಯಿಬಾಬಾ ಅವರ ಕಾಲಿಗೆ ನಮಸ್ಕರಿಸಿ, ನೆಲದ ಮೇಲೆ ಕುಳಿತು ಭಕ್ತಿ ಪ್ರದರ್ಶಿಸಿದ್ದ ಛಾಯಾಚಿತ್ರಗಳು ಈಗಲೂ ಲಭ್ಯವಿವೆ.
ಮೂಲತಃ ಕ್ರೈಸ್ತರಾಗಿದ್ದ ಮಡುರೊ ಅವರ ಪತ್ನಿ ಸಿಲಿಯಾ ಅವರು ಸಾಯಿಬಾಬಾರ ಅಪ್ಪಟ ಭಕ್ತೆ. ಪತ್ನಿಯ ಪ್ರಭಾವದಿಂದ ಮಡುರೊ ಕೂಡ ಬಾಬಾರ ಅನುಯಾಯಿಯಾಗಿ ಬದಲಾದರು. ಎಷ್ಟರಮಟ್ಟಿಗೆಂದರೆ, ಮಡುರೊ ತಮ್ಮ ಕಚೇರಿಯಲ್ಲಿ ವೆನೆಜುವೆಲಾದ ಕ್ರಾಂತಿಕಾರಿ ನಾಯಕರಾದ ಸೈಮನ್ ಬೊಲಿವರ್ ಮತ್ತು ಹ್ಯೂಗೋ ಚಾವೆಜ್ ಅವರ ಭಾವಚಿತ್ರಗಳ ಜೊತೆಗೆ ಸತ್ಯ ಸಾಯಿಬಾಬಾ ಅವರ ದೊಡ್ಡ ಭಾವಚಿತ್ರವನ್ನೂ ಇರಿಸಿಕೊಂಡಿದ್ದರು.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಬಿಜೆಪಿ ‘ಕಾಮುಕರ’ ವಿರುದ್ಧ ಕುಡುಗೋಲು ಹಿಡಿದ ಮಹಿಳಾ ಶಕ್ತಿ!
2011ರ ಏಪ್ರಿಲ್‌ನಲ್ಲಿ ಸತ್ಯಸಾಯಿ ಬಾಬಾ ನಿಧನರಾದಾಗ, ಲ್ಯಾಟಿನ್ ಅಮೆರಿಕದ ರಾಷ್ಟ್ರಗಳ ಪೈಕಿ ವೆನೆಜುವೆಲಾ ಮಾತ್ರ ಬಾಬಾರಿಗೆ ಅಧಿಕೃತ ಗೌರವ ಸಲ್ಲಿಸಿತ್ತು. ಮಡುರೊ ನೇತೃತ್ವದಲ್ಲಿ ರಾಷ್ಟ್ರೀಯ ಸಭೆಯು ಸಂತಾಪ ನಿರ್ಣಯವನ್ನು ಅಂಗೀಕರಿಸಿ, ರಾಷ್ಟ್ರೀಯ ಶೋಕಾಚರಣೆಯನ್ನು ಘೋಷಿಸಿತ್ತು. ಇತ್ತೀಚೆಗೆ, 2025ರ ನವೆಂಬರ್ 23ರಂದು ಸಾಯಿಬಾಬಾ ಅವರ ಜನ್ಮ ಶತಮಾನೋತ್ಸವದ ಸಂದರ್ಭದಲ್ಲಿಯೂ ಮಡುರೊ ಬಾಬಾರನ್ನು ‘ಬೆಳಕಿನ ಸ್ವರೂಪಿ’ ಎಂದು ಸ್ಮರಿಸಿದ್ದರು.
ಮಡುರೊ ಆಳ್ವಿಕೆಯಲ್ಲಿ ಅನೇಕ ವಿದೇಶಿ ಸರ್ಕಾರೇತರ ಸಂಸ್ಥೆಗಳ ಮೇಲೆ ನಿರ್ಬಂಧವಿದ್ದರೂ, ಸತ್ಯಸಾಯಿ ಸೇವಾ ಸಂಸ್ಥೆಗಳು ವೆನೆಜುವೆಲಾದಲ್ಲಿ ನಿರ್ಭೀತಿಯಿಂದ ಕಾರ್ಯನಿರ್ವಹಿಸುತ್ತಿದ್ದವು.
